Rhaengsae 4 - Matu Bible

Khopuei A Dum Kah Khorhi

¹ Sui te bahoeng muhut, sui then khaw tho uh, lungto cim khaw tollong tom kah taphung ah a hawk uh.

ב Bet

² Zion ca rhoek loh suicilh neh lung vang a thuek balae tih aka picai kut dongkah a bibi tuitang paikaek bangla a poek uh.

ד Dalet

³ Pongui long pataeng rhangsuk a pumcum tih a ca a khut. Ka pilnam tanu tah kalaukva khuiah khosoek kah kalaukva bangla muen.

ה He

⁴ Tuihalh ah cahni kah a lai te a dang la kap tih camoe rhoek loh buh a hoe dae amih aka pae om pawh.

ו Vav

⁵ Buhmong la aka ca rhoek te tollong ah aka pong, hlampai dongah aka tangnah rhoek loh natva ni a kop uh.

ז Zayin

⁶ Sodom kah tholhnah lakah ka pilnam nu kah thaesainah he rhoeng. Mikhaptok ah mael tih anih te kut long khaw a sambai moenih.

ח Khet

⁷ A hlangcoelh rhoek te vuelsong lakah cil tih suktui lakah bok. A rhuhrhong te lungvang lakah, a pumrho te minhum lakah thimyum.

ט Tet

⁸ A suisak te amhmol lakah hmuep tih tollong ah hmat uh voel pawh. A vin a rhuh dongah ben uh tih thing koh bangla om.

י Yod

⁹ Khokha dongah rhok lakah cunghang dongkah rhok la om te then. Amih te khohmuen thaih loh a thun tih cae uh.

כ Kaf

¹⁰ Lungma nu rhoek kut loh a ca a thong uh tih ka pilnam canu kah pocinah dongah amih kah a caak la poeh uh.

ל Lamed

¹¹ BOEIPA loh a kosi a sah tih a thintoek thinsa te a kingling. Zion ah hmai a hlup tih a khoengim a hlawp.

מ Mem

¹² Jerusalem vongka longah rhal neh thunkha a kun te diklai manghai neh lunglai dongkah khosa boeih boeih loh tangnah uh pawh. A tonghma rhoek kah tholhnah neh a khosoih rhoek kah thaesainah loh a khui ah hlangdueng kah thii a hawk sak.

נ Nun ס Nun

¹³ Tollong ah mikdael la vikvuek uh tih a pueinak te ben thai pawt ham thii neh nok uh.

פ Pe

¹⁴ Amih rhalawt rhoek te, “Nong uh, nong, nong uh lamtah ben uh boeh,” tila a o uh. Yong khonghak tih a poengdoe uh vaengah, “Namtom taengkah bakuep ham khoengvoep uh boeh,” a ti uh.

ק Qaf

¹⁵ BOEIPA mikhmuh ah amih a taekyak te amih paelki ham a khoep moenih. Khosoih rhoek kah maelhmai khaw dan uh pawt tih patong neh hamca rhoek khaw rhen uh pawh.

ע Ayin

¹⁶ Amih a khoengvoep bangla mamih khaw n'khoengvoep uh. Kaimih kah bomnah ham khaw kaimih mik ni a kha. Aka daem sak pawh namtom te mamih kah rhaltawt lamloh n'rhaltawt thil khaw a honghi ni.

צ Tsade

¹⁷ Mamih kah toltung ah pongpa ham mamih kah kholaeh a thuih uh. Mamih kah a bawtnah loh ha tawn uh tih mamih kah khohnin a cup coeng dongah mamih kah a bawknah ha pawk coeng.

ק Qaf

¹⁸ Mamih aka hloem rhoek te vaan kah atha lakah kapyang la om uh. Mamih he tlang ah n'hlak tih khosoek ah khaw mamih n'rhongngol thil uh.

ר Resh

¹⁹ BOEIPA loh a koelh mamih hnarhong lamkah hil pataeng amih kah rhomhmop koeh ah man. Te te namtom taengah khaw, “A hlipkhup ah n'hing uh bitni,” n'ti uh dae ta.

שׁ Sin/Shin

²⁰ Uz Kho kah khosa, khosa Edom nu rhoek ngaingaih uh lamtah kohoe sak uh. Nang te khaw boengloeng loh m'paan tih na rhuihmil neh na yan uh bitni.

ת Tav

²¹ Zion nu nang kah thaesainah tah bawt tih nang poelyoe ham koei voel mahpawh. Edom nu nang kah thaesainah khaw a cawh vetih na tholhnah te a phoe ni.