Olcueih 17 - Matu Bible

¹ Tuituknah hmueih im dongkah a bae lakah a ommongnah buhkak kamat te then.

² Hlang aka cangbam sal loh hlang yah aka bai capa te a taemrhai vetih, pacaboeina taengah rho a tael ni.

³ Cak hamla cak am, sui hamla hmai-ulh om, tedae BOEIPA long tah lungbuei ni a noem.

⁴ Thae aka huet loh boethae hmuilai kah a honghi te a hnatung tih, talnah ol te hna a kaeng thil.

⁵ Khodaeng aka tamdaeng tah amah aka saii kung ni a veet, rhainah soah ko aka hoe khaw hmil mahpawh.

⁶ Ca rhoek kah a ca rhoek tah patong rhoek kah rhuisam la om tih a napa rhoek te khaw ca rhoek kah a boei a mang la om.

⁷ Hlangrhuel hmuilai he a ang ham a rhoeprhui moenih. A honghi kah hmuilai khaw hlangcong hamla koih loeng loeng van pawh.

⁸ Kapbaih he a kungmah kah mik ah lungto mikdaithen bangla boeih a hoilae tih a cangbam.

⁹ Hlang kah dumlai aka dah loh lungnah a toem dae, olka dongah aka thovael loh a boeihlum khaw a paekboe sak.

¹⁰ Aka ang voei yakhat n'ngawn lakah aka yakming ham tah tluungnah mah a tlaeh pah coeng.

¹¹ Boekoek loh boethae bueng a tlap dae, anih taengah puencawn muenying muenyang ni a tueih pa eh.

¹² Hlang kah a dueidah a laemhong sak vom neh ka hum uh palueng eh, aka ang kah a anglat nen tah ka hum uh boel eh.

¹³ A then te thae la aka thuung tah a im lamkah a thae te nong rhoe nong mahpawh.

¹⁴ Olpungkacan a tongnah tah tui a cae sak. Te dongah tuituknah a puek hlanah khoe huu laeh.

¹⁵ Halang aka tang sak neh hlang dueng aka boe sak, amih rhoi bang te BOEIPA kah a tueilaehkoi ni.

¹⁶ Cueihnah lai ham hlang ang kut dongkah a phu te ba ham lae, a lungbuei neh a om hae moenih.

¹⁷ A tue boeih dongah a hui aka lungnah loh, citcai vaengkah ham manuca a cun.

¹⁸ Lungbuei aka talh hlang loh kut a yuh tih, a hui mikhmuh ah mingphanah rhi a khang.

¹⁹ Boekoek aka lungnah loh olpungnah te a lungnah, a thohka te a sang sak tih pocinah a tlap.

²⁰ Lungbuei aka voeldak loh hnothen hmu pawt tih, a ol neh hlang aka maelh khaw yoethae ah cungku.

²¹ Amah kah a pha-ueknah nah ham hlang ang te a cun, te dongah hlang ang kah a napa tah a ko a hoe moenih.

²² Lungbuei kohoe he si la a hoeih sak tih, mueihla a rhawp vaengah songrhuh khaw a koh sak.

²³ Laitloeknah a caehlong te phaelh sak ham, halang loh a huep ah kapbaih a loh.

²⁴ Cueihnah he aka yakming ham tah amah mikhmuh ah a om pah tih, aka ang kah a mik ah tah diklai khobawt la a om pah.

²⁵ Capa aka ang tah a napa ham konoinah la om tih, anih aka cun khaw hmuetphawtnah ni.

²⁶ Hlang dueng te lai a sah sak khaw, a dueng dongah hlangcong taam ham then pawh.

²⁷ A ol aka tuem tah mingnah te aka ming la om tih, mueihla phu tlo aka dingsuek tah hlang lungcuei ni.

²⁸ Hlang ang pataeng a hil a phah atah aka cueih la, a ka a buem atah la aka yakming la a ngai coeng.