Olcueih 16 - Matu Bible

¹ Hlang taengah lungbuei kah rhoekbahnah om dae olka hlatnah he BOEIPA lamkah ni.

² Hlang kah a longpuei boeih he amah mikhmuh ah khui dae, BOEIPA long tah a mueihla ni a khiinglang pah.

³ Na bibi te BOEIPA taengah hal lamtah, na kopoek cikngae bitni.

⁴ Soeprhaep boeih he amah kah a hlatnah ham BOEIPA loh a saii. Te dongah halang pataeng yoethae hnin kah ham a hlun.

⁵ Kut neh kut hlaengtang tih lungbuei aka oek boeih BOEIPA kah a tueilaehkoi la a om dongah hmil mahpawh.

⁶ Sitlohnah neh oltak loh thaesainah a dawth tih, BOEIPA hinyahnah loh boethae lamkah a nong sak.

⁷ Hlang kah khosing te BOEIPA loh a moeithen vaengah a thunkha rhoek pataeng amah taengah a rhong sak.

⁸ Duengnah nen yol mai cakhaw, a tiktam mueh canghum cangpai lakah then.

⁹ Hlang kah lungbuei loh amah longpuei te a moeh tih, BOEIPA loh a khokan a cikngae sak.

¹⁰ Manghai ka dongkah bihma tah laitloeknah ham ni, te dongah a ka vikvawk boel saeh.

¹¹ Tiktamnah cooi neh coilung tah BOEIPA taeng lamkah ni, sungsa coilung boeih khaw amah kah a bibi ni.

¹² Duengnah loh ngolkhoel a cikngae sak dongah, manghai rhoek loh halangnah a saii ham tah tueilaehkoi la om.

¹³ Duengnah hmuilai tah manghai rhoek kah kolonah om tih, a thuem aka thui te a lungnah.

¹⁴ Manghai kah kosi tah dueknah puencawn ni. Te dongah hlang cueih long ni kosi a daeh sak thai eh.

¹⁵ Manghai kah maelhmai khosae dongah hingnah tih, a kolonah tah tlankhol vaengkah khomai banghui ni.

¹⁶ Cueihnah lai he sui lakah bahoeng then tih, yakmingnah lai he khaw tangka n'tuek lakah then.

¹⁷ Boethae lamloh aka nong hamla a thuem longpuei om tih, a hinglu aka ngaithuen loh a longpuei a kueinah.

¹⁸ Pocinah kah a hmaiah hoemdamnah om tih, cungkunah kah a hmaiah ah mueihla oeknah a lamhma pah.

¹⁹ Thinthah neh kutbuem n'tael lakah kodo mangdaeng neh mueihla kunyun te then.

²⁰ Olka neh aka cangbam long tah hnothen a dang tih, BOEIPA dongah aka pangtung tah a yoethen pai.

²¹ Lungbuei aka cueih te aka yakming la a khue uh tih, hmuilai dongkah olding loh rhingtuknah a thap.

²² Lungmingnah te a kungmah la aka khueh long tah hingnah thunsih la om tih, aka ang rhoek kah thuituennah anglat la poeh.

²³ Aka cueih kah lungbuei tah a ka a cangbam tih, a hmuilai dongah rhingtuknah a thap.

²⁴ Ol then tah, hinglu ham khoitui khoitak bangla didip tih, rhuh hamla hoeihnah la om.

²⁵ Hlang mikhmuh ah longpuei te thuem dae a hmailong ah dueknah longpuei la om.

²⁶ Thakthaekung kah a hinglu loh amah hamla thakthae tih a ka te a kamcah sak.

²⁷ Hlang muen loh boethae a vueh tih, a hmuilai dongah hmai bangla rhangto.

²⁸ Calaak hlang loh olpungkacan a haeh tih, hlang aka thet loh boeihlum a pamhma sak.

²⁹ Kuthlahnah hlang loh a hui a hloih tih, longpuei a then pawt la a caeh puei.

³⁰ Calaak te moeh hamla a mik aka him tih, a hmui saibaeh loh boethae a cung sak.

³¹ Sampok he boeimang rhuisam la om tih, duengnah longpuei kah aka om loh a dang.

³² Thintoek aka ueh tah hlangrhalh lakah, a mueihla aka taem khaw khopuei aka ta lakah then.

³³ A rhang dongah hmulung khoh cakhaw a laitloeknah boeih tah BOEIPA lamkah ni a om.