Olcueih 13 - Matu Bible

¹ Ca aka cueih loh pa kah thuituennah a hnatun tih, hmuiyoi long tah tluungnah pataeng hnatun pawh.

² Hlang lai thaih lamloh a then khaw a cah dae, hnukpoh kah hinglu tah kuthlahnah la poeh.

³ A hinglu aka ngaithuen long tah a ka a tuem, a ka aka ang soeh khaw amah ham porhaknah la om.

⁴ Kolhnaw loh a ngaidam dae a hinglu a thum moenih. Tedae aka haam kah a hinglu tah hah ngaikhoek.

⁵ Aka dueng loh a hong ol te a hmuhuet. Halang tah a borhim tih a hmai tal.

⁶ Duengnah loh thincaknah longpuei te a kueinah tih, halangnah loh tholhnah a paimaelh.

⁷ Boei tih ba aka khueh pawt khaw om, vawtthoek dae a boei a rhaeng aka coih khaw om.

⁸ Khuehtawn he hlang kah hinglu tah tlansum ni. Tedae khodaeng loh tluungnah a yaak moenih.

⁹ Aka dueng kah khosae tah a kohoe tih, halang kah hmaithoi tah a thih pah.

¹⁰ Althanah loh olpungnah a paek tih, uentonah dongah cueihnah om.

¹¹ A honghi lamkah boeirhaeng khaw yip muei tih, amah kut neh aka coi long tah a ping sak.

¹² Ngaiuepnah loh lungbuei aka nue a dangrhoek tih, hingnah thingkung loh ngaihlihnah a cung sak.

¹³ Olka aka hnoelrhoeng loh amah ham lai a koi vetih, olpaek aka rhih te anih loh a rhong ni.

¹⁴ Aka cueih kah olkhueng tah hingnah thunsih la om tih, dueknah hlaeh lamloh aka nong sak la om.

¹⁵ Lungmingnah then tah mikdaithen la a khueh tih, hnukpoh kah longpuei tah mueng.

¹⁶ Aka thaai loh mingnah neh boeih a saii tih, aka ang loh a anglat te a yaal.

¹⁷ Halang puencawn tah yoethae ah cungku tih, oltak kah laipai tah hoeihnah la om.

¹⁸ Khodaeng neh yah loh thuituennah a hlahpham tih, toelthamnah aka tuem tah a thangpom.

¹⁹ Ngaihlihnah a dip te hinglu ham khaw tui dae, aka ang long tah boethae lamloh nong ham te tueilaehkoi la a om pah.

²⁰ Hlang cueih taengah aka cet la aka cet tah cueih rhoela cueih tih, hlang ang neh aka luem tah lolh coeng.

²¹ Hlangtholh rhoek te yoethae loh a hloem dae, aka dueng te hnothen neh a thuung.

²² Hlang then long tah a ca kah a ca khaw a phaeng dae, laihmu kah a thadueng tah hlang dueng hamla a khoem pah.

²³ Khodaeng kah khohai cang tah thawt tangloeng dae, tiktamnah a om pawt dongah a khoengvoep.

²⁴ A ca aka thiinah loh a cungcik a hnaih, tedae aka lungnah tah thuituennah neh a toem.

²⁵ Hlang dueng loh a hinglu dongah kodam la a caak dae, halang tah a bung a vaitah.