Mathai 9 - Matu Bible

Hlang Capa a Hoeih Sak

¹ Te phoeiah lawng khuila kun tih, a hlaikan daengah amah kho la pawk.

² Te vaengah khawn tih thingkong dongah aka yalh te a taengla tarha a khuen pa uh. Amih kah tangnah te Jesuh loh a hmuh coeng dongah aka khawn te, “Ngaimong sak, ka ca, tholhnah loh nang n'hlah coeng,” a ti nah.

³ Te vaengah cadaek rhoek khuikah hlangvang long tah amamih khui, “Anih loh a soehsal coeng,” tarha a ti uh.

⁴ Jesuh loh amih kah poeknah te a hmuh tih, “Balae tih na thinko khui ah a thae na poek uh.

⁵ 'Na tholh loh n'hlah coeng,' ti ham neh, 'thoo lamtah cet,' ti ham he, melae yoeikoek la aka om?

⁶ Te daengah ni diklai hmankah tholh hlah ham he hlang capa loh saithainah a khueh te na ming uh eh,” a ti nah. Te phoeiah aka khawn te, “Thoo, na phak te khuen lamtah na im la cet,” a ti nah.

⁷ Te vaengah thoo tih a im la koe cet.

⁸ Hlangping loh a hmuh vaengah a rhih uh tih, hlang taengah hebang saithainah aka pae Pathen te a thangpom uh.

Mathai a Khue

⁹ Jesuh te lamkah a khum vaengah, Matthai la a khue hlang pakhat tah mangmu doenah ah a ngol te a hmuh tih, “Kai m'vai lah,” a ti nah. Te dongah tho tih Jesuh taengah bang.

¹⁰ Im khuiah a om vaengah caboei te a vael. Te vaengah, mangmucoi rhoek neh hlangtholh rhoek muep tarha ha pawk uh tih Jesuh neh a hnukbang rhoek taengah a vael uh.

¹¹ Pharisee rhoek loh a hmuh uh vaengah a hnukbang rhoek taengah, “Balae tih nangmih kah saya tah mangmucoi rhoek neh hlangtholh rhoek taengah a caak,” a ti nah.

¹² Tedae a yaak vaengah, “Sading rhoek loh siboei a ngoe moenih, tedae tloh aka khueh rhoek long tah a ngoe.

¹³ Cet uh lamtah metla a om khaw cang uh saw. Ka ngaih he tah rhennah ni hmueih te moenih. Aka dueng rhoek khue ham pawt tih aka tholh rhoek ham ni ka pawk,” a ti nah.

Yaehnah Kawng

¹⁴ Te phoeiah Johan kah hnukbang loh a paan uh tih, “Balae tih kaimih neh Pharisee rhoek long tah vawpvawp ka yaeh uh. Tedae na hnukbang rhoek loh a yaeh uh moenih,” a ti nah.

¹⁵ Jesuh loh amih te, “Paca boeina loh yulueihmuen te a nguek thil thai moenih. Amih a om khuiah tah yulokung loh a om puei ta. Tedae yulokung te amih taeng lamkah loh a khue tue ha pawk vaengah a yaeh uh van bitni.

¹⁶ Hni pen a cuemsok te himbai rhuem soah a bo moenih. A bawtnah ah te long te himbai ni a dueng tih a pawnnah te a thae la a om.

¹⁷ Misurtui a noe te tuitang rhuem khuiah a than moenih. Te pawt koinih tuitang te paeng tih misurtui khaw cae. Te vaengah tuitang khaw poci. Tedae misurtui noe te tuitang a thai dongah a than uh atah bok sueng,” a ti nah.

Hula a Thoh, Manu Khaw Hoeih

¹⁸ He rhoek he amih a thui vaengah, boei pakhat te pakcak cet tih anih te a bawk. Te phoeiah, “Ka canu he paekca ah duek dae na lo tih na kut na tloeng thil koinih hing ni,” a ti nah.

¹⁹ Te dongah Jesuh tah thoo tih anih te a hnukbang rhoek neh a vai phai.

²⁰ Te vaengah kum hlainit khuiah aka thii nu loh a hnuk ah a paan tih a himbai dongkah salaw te a taek pah.

²¹ Amah long tah, “Jesuh kah himbai mah ka taek koinih, ka hoeih ni,” a ti dongah ni.

²² Jesuh te mael tih huta te a hmuh vaengah, “Ka canu na ngaimong sak, na tangnah loh nang n'khang coeng.” a ti nah. Te vaeng tue lamloh huta tah daem.

²³ Boei im la Jesuh a pawk vaengah phavi tum neh hlangping te a sarhingrhup la a hmuh.

²⁴ Te dongah, “Khoe uh lah, hula he a duek moenih, aka ip ni,” a ti nah. Te vaengah Jesuh te a nueih thil uh.

²⁵ Tedae hlangping te a haek phoeiah kun tih a kut a tuuk pah vaengah hula te thoo.

²⁶ He olthang loh tekah kho boeih te a pha.

Mikdael rhoi loh Kho a hmuh

²⁷ Te lamloh Jesuh a khum vaengah mikdael panit loh a vai rhoi. Te vaengah pang rhoi tih, “David Capa kaimih rhoi n'rhen lah,” a ti rhoi.

²⁸ Im la a pawk vaengah Jesuh te mikdael rhoi loh a paan rhoi. Te vaengah Jesuh loh amih rhoi te, “He he ka saii thai tila na tangnah rhoi a?” a ti nah hatah, “Ue, Boeipa,” a ti rhoi.

²⁹ Te phoeiah amih rhoi kah mik te a taek pah tih, “Nangmih rhoi kah tangnah bangla nangmih taengah om saeh,” a ti nah.

³⁰ Te vaengah a mik a tueng pah. Tedae Jesuh tah thanueih tih amih rhoi te, “Ngaithuen, hlang loh ming boel saeh,” a ti nah.

³¹ Tedae cet rhoi tih Jesuh kawng te kho tom ah a doek rhoi.

Rhaithae a Haek

³² Amih rhoi a caeh neh rhaithae aka kaem hlang pakhat hnapang te a taengla tarha a khuen uh.

³³ Rhaithae te haek pah olmueh te koep cal. Te dongah hlangping tah a ngaihmang uh tih, “Israel khuiah om noek tangloeng pawh,” a ti uh.

³⁴ Tedae Pharisee rhoek loh, “Rhaithae boei rhang nen ni rhaithae a haek,” a ti uh.

Boeipa Cangvuei

³⁵ Te phoeiah Jesuh tah khopuei boeih neh vangca tom la cet tih, amih kah tunim ah a thuituen. Ram kah olthangthen te khaw a hoe, tih tlohtat boeih neh tlohnat boeih te a hoeih sak.

³⁶ A hmuh vaengah amih hlangping ham te a thinphat. Tawnba a om uh lalah tudawn aka om pawh tu bangla a voeih uh.

³⁷ Te dongah a hnukbang rhoek te, “Cangah hamla yet ngawn dae bibikung rhoek tah yolca.

³⁸ Te dongah cangah boeipa taengah na thangthui uh daengah ni a cangat la bibikung han tueih eh,” a ti nah.