Lampah 2 - Matu Bible

Rhaehhmuen kah Boesoepnah

¹ BOEIPA loh Moses neh Aaron te a voek tih,

² “Hlang he a napa imko kah miknoek neh a hnitai hmuiah rhaeh uh saeh. Israel ca rhoek te tingtunnah dap taengah a hla la pin rhaeh uh saeh.

³ Khothoeng khocuk la Judah lambong kah hnitai te amah kah caempuei neh rhaeh saeh. Te vaengah Amminadab capa Nahshon te Judah koca rhoek kah khoboei saeh.

⁴ A caempuei khaw thawng sawmrhih thawng li neh ya rhuk la a soep.

⁵ A hmatoeng ah aka rhaeh Issakhar koca neh Issakhar ca rhoek kah khoboei tah Zuar capa Nethanel saeh.

⁶ A caempuei khaw thawng sawmnga thawng li neh ya li la a soep uh.

⁷ Zebulun koca neh Zebulun ca rhoek kah khoboei tah Helon capa Eliab saeh.

⁸ A caempuei khaw thawng sawmnga thawng rhih neh ya li la a soep uh.

⁹ Judah rhaehhmuen kah boeih te thawng yakhat neh thawng sawmrhet neh thawng rhuk ya li la soep uh. Amih kah caempuei te a pacuek cet saeh.

¹⁰ Reuben rhaehhmuen kah hnitai tah tuithim ah amah caempuei neh om tih Shedeur capa Elizur te Reuben koca kah khoboei saeh.

¹¹ A caempuei neh anih te thawng sawmli thawng rhuk neh ya nga la soep uh.

¹² A hmatoeng ah aka rhaeh Simeon koca neh Simeon ca rhoek kah khoboei tah Zurishaddai capa Shelumiel saeh.

¹³ A caempuei neh amih te thawng sawmnga thawng ko neh ya thum la a soep uh.

¹⁴ Gad koca neh Gad ca rhoek kah khoboei tah Reuel capa Eliasaph saeh.

¹⁵ A caempuei neh amih te thawng sawmli thawng nga neh ya rhuk sawmnga la a soep uh.

¹⁶ Reuben rhaehhmuen kah boeih te thawng yakhat neh thawng sawmnga thawng khat neh ya li sawmnga la a soep uh. Amih kah caempuei te a pabae ah cet saeh.

¹⁷ Te vaengah Levi rhaehhmuen kah tingtunnah dap lambong laklung ah cet saeh. A rhaeh uh vanbangla hlang he amah hnitai hmuikah amah kah hmuen ah cet tangloeng saeh.

¹⁸ Ephraim caem kah hnitai a caempuei neh khotlak ah om saeh lamtah Ephraim ca rhoek kah khoboei tah Ammihud capa Elishama saeh.

¹⁹ A caempuei neh amih te thawng sawmli neh ya nga lo.

²⁰ A hmatoeng te Manasseh koca saeh lamtah Manasseh ca rhoek kah khoboei tah Pedahzur capa Gamaliel saeh.

²¹ A caempuei neh amih te thawng sawmthum thawng hnih ya hnih la a soep uh.

²² Benjamin koca neh Benjamin ca rhoek kah khoboei tah Gideoni tah capa Abidan saeh.

²³ A caempuei neh amih te thawng sawmthum tah thawng nga neh ya li la a soep uh.

²⁴ Ephraim caem te thawng yakhat phoeiah thawng rhet neh ya khat la boeih soep uh tih amih kah caempuei te a pathum ah cet saeh.

²⁵ Dan caem kah hnitai tah a caempuei neh tlangpuei ah om saeh lamtah Dan ca rhoek kah khoboei tah Ammishaddai capa Ahiezer saeh.

²⁶ A caempuei neh amih te thawng sawmrhuk thawng hnih neh ya rhih a soep uh.

²⁷ A hmatoeng kah aka rhaeh Asher koca neh Asher ca rhoek kah khoboei tah Okran capa Pagiel saeh.

²⁸ A caempuei neh amih te thawng sawmli thawng khat ya nga a soep.

²⁹ Naphtali koca neh Naphtali ca rhoek kah khoboei tah Enan capa Ahira saeh.

³⁰ A caempuei neh amih te thawng sawmnga thawng thum neh ya li a soep uh.

³¹ Dan caem khuikah boeih he thawng yakhat neh thawng sawmnga thawng rhih ya rhuk la a soep uh tih a hnukkhoem la a hnitai neh cet uh saeh.

³² Israel ca rhoek te a napa rhoek imkhui neh a soep tih a caempuei lamloh a caem te boeih a soep vaengah thawng ya rhuk neh thawng thum ya nga sawmnga lo,” a ti nah.

³³ Tedae Levi rhoek tah BOEIPA loh Moses a uen vanbangla Israel ca khui ah soep uh thil pawh.

³⁴ BOEIPA loh Moses a uen bangla a cungkuem te Israel ca rhoek loh a saii uh. A hnitai hmuiah rhaeh uh tih hlang he amah koca ah a napa imkhui neh cet uh.