Joba 8 - Matu Bible

Bildad Olthui

¹ Shuhi Bildad loh a doo tih,

² “He he me hil nim na thui ve? Na ka kah ol tah khohli bangla khuet coeng.

³ Pathen loh tiktamnah he a khun sak tih, Tlungthang loh duengnah te a khun sak mai a?

⁴ Na ca rhoek te anih taengah a tholh vaengah, amih te amamih kah boekoek kut dongla a tueih.

⁵ Namah loh Pathen te na toem tih Tlungthang te na hloep mak atah,

⁶ Na cil tih na thuem koinih nang yueng la haenghang vetih na duengnah rhamtlim te n'thuung pataeng pawn ni.

⁷ Na tongnah te a yiit la om cakhaw na hmailong te muep rhoeng ni.

⁸ Lamhma kah cadil taengah dawt laeh lamtah, a napa rhoek khenah te soepsoei laeh.

⁹ Mamih loh n'hlaem kah khaw m'ming uh moenih, mamih kah khohnin tah diklai mueihlip dongkah ni.

¹⁰ Amih te na thuinuet pawt tih a, nang taengah a thui vetih, amih kah lungbuei lamloh olthui te a khueh eh?

¹¹ Nongtui pawt ah talik thawn tih, tui om mueh ah capu rhoeng a?

¹² Te te a duei pueng ah a hlaek pawt akhaw, sulrham boeih hmai ah rhae coeng.

¹³ Pathen aka hnilh boeih kah caehlong neh lailak kah ngaiuepnah tah bing tangloeng.

¹⁴ A uepnah neh a pangtungnah bumba im te khaw bawtboeng.

¹⁵ A im dongah hangdang dae pai thai pawh. Te te a kuel dae thoo pawh.

¹⁶ Anih te khosae li ah thingsup tih a dum ah a dawn sai.

¹⁷ A yung loh lungkuk dongah a ven tih lungto im te a hmuh.

¹⁸ Te te a hmuen lamloh a phuk van vaengah, “Nang kam hmu moenih,” anih te a namnah.

¹⁹ He he a longpuei kah omthennah coeng koinih laipi tloe lamloh a poe uh khaming.

²⁰ Pathen loh cuemthuek hnawt ngawn pawt tih thaehuet kut te a moem moenih.

²¹ Na ka dongah nueihbu neh na hmui dongah tamlung bae.

²² Na lunguet rhoek loh yahpohnah a bai uh vetih halang kah dap tah om mahpawh,” a ti.