Joba 4 - Matu Bible

Eliphaz loh A Thui

¹ Te vaengah Temani hoel Eliphaz loh a doo.

² Te vaengah nang te ol neh n'noemcai saeh, na ngak aya? Tedae olthui te kuemsuem ham unim aka noeng eh?

³ Muep na toel tih kut kha rhoek khaw na talong coeng te.

⁴ Aka paloe rhoek te na olthui loh a thoh tih khuklu aka khun khaw na caang sak.

⁵ Tedae namah taengla ha loe tih na ngak coeng, namah te m'ben tih na let coeng.

⁶ Na hinyahnah, na ueppangnah, na ngaiuepnah, na longpuei kah thincaknah khaw om pawt nim?

⁷ Poek van laeh, ommongsitoe he paltham nim? Aka thuem rhoek te melam a thup?

⁸ Ka hmuh vanbangla boethae aka thoe tih aka soem khaw amah long ni thakthaenah a ah.

⁹ Pathen kah hiil dongah milh uh tih a thintoek khohli dongah khap uh coeng.

¹⁰ Sathueng khaw kawknah neh sathuengca khaw a ol neh om dae sathuengca khaw a no tloong.

¹¹ Maeh a mueh lamloh sathueng te milh tih sathuengnu ca rhoek khaw pam uh.

¹² Ka taengah ol a huen tih a olduem loh kai hna a lat sak.

¹³ Hlang he khoyin olphong lamkah pomnah khuiah a ih muelh vaengah.

¹⁴ birhihnah loh kai m'mah tih thuennah neh ka rhuh boeih a rhih sak.

¹⁵ Mueihla loh ka maelhmai a pah vaengah ka mul ka saa poenghu.

¹⁶ A pai vaengah khaw a mueimae ka hmat moenih. A muei tah ka mikhmuh ah om tih bidip ol a yaak.

¹⁷ Pathen lakah hlanghing he tang tih anih aka saii lakah ah hlang caihcil ngai a?

¹⁸ A sal rhoek soah tangnah pawt tih a puencawn te a lolh la a khueh atah,

¹⁹ Laipi neh lai im dongah kho aka sa aisat te bungbo hmai ah a khoengim pop coeng.

²⁰ Mincang lamloh hlaem duela a phop te a yoeyah la a milh khaw mingpha pawh.

²¹ Amih lamkah a hlangrhuel a phil pah vaengah a duek uh moenih a? Te dongah cueihnah neh a om moenih a?