Joba 37 - Matu Bible

¹ He dongah ka lungbuei lakueng tih a hmuen lamloh cungpet.

² A ol dongkah khoponah te hnatun rhoela hnatun. A ka lamloh caitawknah thoeng.

³ Vaan boeih hmuiah a hlah tih a vangnah loh diklai hmoi duela pawk.

⁴ A hnukkah a kawk ol khaw a hoemdamnah ol neh hum tih, a ol a yaak vaengah rhaek uelh sak boeh.

⁵ Pathen loh a ol neh khobaerhambae a saii khungdaeng tih, hum dae m'ming uh moenih.

⁶ Vuelsong neh khotlan khonal te, 'Diklai ah om saeh,' a ti vaengah khotlan khonal khaw a sarhi tak.

⁷ Amah kutngo hlang boeih ming sak ham hlang boeih kah kut te rhodaek a soei pah.

⁸ Te vaengah mulhing khaw a khui la kun tih a khuisaek ah kho a sak.

⁹ Cangpalam te imkhui lamloh, khosik te tlangpuei lamloh ha thoeng.

¹⁰ Pathen kah hiil lamloh rhaelnu khaw a khueh tih tui daang mangdaeng mangtok la om.

¹¹ Khomai te cingtui loh a rhih sak tih, cingmai loh amah kah vangnah te a taekyak.

¹² Te khaw diklai kah lunglai hman ah a uen boeih te saii hamla a niing, a niing dongah kuluk la a hil.

¹³ Te te caitueng lam khaw, a khohmuen ham khaw, sitlohnah ham khaw a thoeng sak.

¹⁴ Job, he he hnakaeng lah. Pai lamtah Pathen kah khobaerhambae he yakming lah.

¹⁵ Te rhoek soah Pathen loh a khueh tih a cingmai kah vangnah a sae te na ming a?

¹⁶ Poeknah rhuemtuet, mangvawt khomai a haainah te na ming a?

¹⁷ Tuithim loh khohmuen a mong sak vaengah na himbai te aka bae sak,

¹⁸ Hmaidan a hlawn bangla khomong a thah la amah taengah na nulh thai aya?

¹⁹ Amah taengah metla n'thui ham khaw kaimih n'tueng lah. Hmaisuep hmai ah n'tawn uh thai pawt oe.

²⁰ Hlang loh a dolh hamla thui cakhaw ka thui bangla amah taengah a tae pa aya?

²¹ Tahae ah khaw vangnah a hmuh uh moenih. A aa te khohli loh a yawn tih, a caihcil hnukkah khomong dongah tueng.

²² Tlangpuei lamkah sui te mueithennah rhih om Pathen taengla pawk.

²³ Tlungthang te thadueng a len dongah a tiktamnah m'hmuh lek moenih. Duengnah khaw a cungkuem dongah hlang a phaep moenih.

²⁴ Hlang rhoek loh amah te a rhih uh tangloeng dongah lungbuei aka cueih rhoek takuem khaw a sawt moenih,” a ti.