Joba 26 - Matu Bible

Job Loh Bildad A Doo

¹ Job loh a doo tih,

² “Metlam thadueng mueh te na bom tih sarhi aka tak mueh bantha te na khang?

³ Metlam lae cueihnah aka tal te na uen tih a cungkuem ah lungming cueihnah na ming sak.

⁴ U taengah nim ol na thui tih, nang lamloh u kah hiil nim aka thoeng?

⁵ Sairhai tah tui hmui ah kilkul uh tih kho a sak.

⁶ A taengah saelkhui khaw pumtling la om tih Abaddon khaw himbai om pawh.

⁷ Tllangpuei ah hinghong la a yaal tih bang aka om pawt soah khaw diklai a dingkoei sak‍.

⁸ A khomai khuiah tui a cun tih cingmai te a hmui ah a ueth pawh.

⁹ A cingmai te a soah a yaal tih ngolkhoel hmai a dah.

¹⁰ Vangnah neh a hmuep laklo kah a khuetnah hamla tui hman ah a rhi a rhuen pah.

¹¹ Vaan kah tung khaw hlinghloek uh tih a tluungnah dongah a ngaihmang uh.

¹² A thadueng loh tuipuei te a phih tih a lungcuei neh Rahab a phop.

¹³ A mueihla loh vaan kah khocil a thoeng sak tih a kut loh yingyet rhul khaw a toeh.

¹⁴ He tah a longpuei dongkah longpuei hmoi puen ni he. A thayung thamal kah khohum khuiah amah kah ol duem te metlam n'yaak? A thayung thamal te u long a yakming pai eh?” a ti.