3 Joni 1 - Godoni vuʼa maiuʼina

Nimaijihuni Vaji 'Uraho'avara

¹ Na erutai Keasi ka'ene na oja mahujihuna'e veju.

² Vwea nuna na oja mahi'ine na oni siporua 'ojura'omo uneunecha mapoka ja pu'úmo marasahe 'ee a hami hihuna areri oni oji vaji marana ja'ina'e rehuna.

³ Vwehu núpo roe ara 'unama ka'ene nimaiji 'urahe onuji 'warivume hejujaho na teamanimana.

⁴ 'Eju'ukamare'e sesahu núpo 'unama mamaiji ojuji na hejujaho na niho'o teamanima paraniu.

Keasi Aromahajina

⁵ Vwea nuna ka'ene oja mahi'iniji ara vwehu núpuna'i vene 'ee apiora ka'ene vwea vwina vene ni'ajihujaho mavarasa'ina venu.

⁶ Pu sosi vaji ara oja ka'ene mihuji rone 'waruvu jihuna'e a pu irechamie va'avajaho hami 'unama ka'ene Godi teamahuni ja'ina'e ve'amana.

⁷ Pu Huni Ihijihuni hahi usema va'ajihuna'e pu Jenitaru puna unenua 'aho'a pa'ekara.

⁸ Ijihuna'e nú 'u'o ea ija'inijija ni'ajihuna. 'Ejakame nú pu pu'úmo ahume nimaijihuni kaukara veji'ina'e rehuna.

Tiatiripisi 'Ee Timitiriasi

⁹ Na sosi huni vu'a 'aho'a na heha 'ahi nivejuta. 'Enakaivo Tiatiripisi hu niho'o ni'ima'ura re'iro vwiha'i kaivo núra raka ka'ene 'waravajaho hu rarenana.

¹⁰ Ijihuni hahi nara roujaho hura uneunecha ka'ene sisei venajaho 'eka ro najahuna. Hu núnuna'i ira sisea 'warume 'ee namuhuna. Hu vwehu núna ka'ene apiorijija paaherame 'ee ea 'aho'a tanu'urihu'e pu 'u'o ija'ina vejura. 'Ene ea 'ahopo apiora 'eka'ujaho hu pu tanu'urihu'e sosia paro'i kaivo samai hijura.

¹¹ Vwea nuna ka'ene na oja mahukera a paka'eje sisei jihuni 'unamijaho matesara'amana kaivo mamai jihuni 'unamijiru matesara'amana. Ea irara mamaaru venujaho hu Godi ona 'ee ea irara sisearu venujaho hu Godi pakamuna.

¹² Ea mapoka Timitiriasi ta'arohe hina 'wavura. Nú Timitiriasira raka ka'ene venuji nú kama hejuji 'u'o 'waravura. 'Eju'ukame ja niheju núra raka ka'ene 'waravujija nimaa nimaa.

Vu'a Túchamaijina

¹³ Na niho'o mapoka mapoka 'wara'i 'ahiu kaivo na heha 'ahi ijí vehuna ura pareniu.

¹⁴ Na vu'e a kahuna ni samatu'u renu. 'Ene nú no'o urania kakaravi'i ahuma 'wama hehuna. Matauvi'inijaho a hu'úmuna 'ee napuhuana ka'ene iki hijujipo a 'ajoravu. 'Ene napuhu nuna ihi 'urihi'i 'ajora'amana.