ᑕᐃᑕᔅ 2 - ᐅᔅᑭ ᑎᔅᑌᒥᓐᑦᑾᔭᔉ ᑭᔅᑭᓄᐊᒫᑫᐎᓐ 1 ᒫᑲ ᑭᓚ ᐋᓕᒧᑕ ᐊᓂᐃ ᐌᒋᐸᓕᑭ ᒥᓗ ᑭᔅᑭᓄᐊᒫᑫᐎᓂᒃ: 2 ᑭᔐᓕᓕᐗᒃ ᑭᒋ ᐯᑳᒡ ᐃᑖᑎᓯᒋᒃ, ᓕᑆᑳᒋᒃ, ᑖᐱᑕᐙᑎᓯᒋᒃ, ᒪᔥᑲᐎᓯᒋᒃ ᑖᐺᔦᓕᑕᒧᐎᓂᒃ, ᓵᑭᐃᐌᐎᓂᒃ, ᔑᐱᓚᐌᓯᐎᓂᒃ᙮ 3 ᑖᐱᔅᑯᒡ ᓀᔥᑕ ᑭᔐᐃᔅᑴᐗᒃ, ᐅᑦ ᐃᑖᑎᓯᐎᓂᐙᒃ ᑭᒋ ᓄᑯᑖᒋᒃ ᐸᓓᑭᓯᐎᓂᓕᐤ, ᐁᑳ ᑭᒋ ᑭᓛᔅᑭᐎ ᒪᒥᔑᒥᐌᒋᒃ, ᐁᑳ ᒥᔅᑕᐃ ᑭᒋ ᒥᓂᑴᒋᒃ ᔓᒥᓈᐳᓕᐤ, ᑭᒋ ᑭᔅᑭᓄᐊᒫᑫᒋᒃ ᒥᓗ ᑫᒀᓇ: 4 ᑭᒋ ᑭᔅᑭᓄᐊᒪᐙᒋᒃ ᐅᔥᑭᓂᑭᔅᑴᐗ ᑭᒋ ᐯᑳᒡ ᐃᑖᑎᓯᒋᒃ, ᑭᒋ ᓵᑭᐋᒋᒃ ᐅ ᓈᐯᒥᐗᐗ, ᑭᒋ ᓵᑭᐋᒋᒃ ᐅᑦ ᐊᐙᔑᒥᔑᐗᐗ᙮ 5 ᑭᒋ ᓕᑆᑳᒋᒃ, ᑭᒋ ᐸᓓᑭᓯᒋᒃ, ᑭᒋ ᑕᔑᑫᒋᒃ ᑎᐱᓚᐌ ᐎᑭᐙᒃ, ᑭᒋ ᒥᓨᑎᓯᒋᒃ, ᑭᒋ ᓇᓇᐃᑕᐙᒋᒃ ᑎᐱᓚᐌ ᐅ ᓈᐯᒥᐙᐗ, ᑭᒋᒪᓂᑐ ᐅᑦ ᐋᔭᒥᐎᓐ ᐁᑳ ᑭᒋ ᒪᒋᐋᓕᒧᒋᑳᑌᓕᒃ᙮ 6 ᐅᔥᑭᓂᑭᐗᒃ ᓀᔥᑕ ᔑᑭᒥᒃ ᑭᒋ ᓕᑄᑲᐎ ᒥᑐᓀᓕᒋᑲᓂᒋᒃ᙮ 7 ᒥᓯᐌ ᑫᒀᓐ ᐃᔑ ᐁ ᐙᐸᑎᓕᐌᔭᓐ ᑭᒋ ᑭᔅᑭᓄᐙᐸᒥᑲᐎᔭᓐ ᒥᓗ ᐊᑑᔅᑫᐎᓂᒃ: ᑭᔅᑭᓄᐊᒫᑫᐎᓂᒃ ᐁ ᐙᐸᑎᓕᐌᔭᓐ ᐸᓓᑭᓯᐎᓐ, ᓕᑆᑳᐎᓐ, ᒀᔭᔉ ᐃᑌᓕᑕᒧᐎᓐ; 8 ᒀᔭᔉ ᐃᔑ ᐋᔭᒥᐎᓐ ᐁᑳ ᑫ ᑮ ᓂᔑᐗᓈᒋᒋᑳᑌᒃ: ᐊᓇ ᓇᔅᐹᒡ ᑳ ᐃᔑ ᐋᔭᒥᑦ ᑭᒋ ᓇᓀᐯᐎᓯᑦ, ᐁᑳ ᑫᒀᓐ ᐁ ᐋᔮᑦ ᑭᒋ ᐅᒋ ᒪᒋ ᐋᓕᒧᒥᔉ᙮ 9 ᔑᑭᒥᒃ ᐊᑑᔅᑫᓛᑲᓇᒃ ᑭᒋ ᓇᓇᐃᑕᐙᒋᒃ ᑎᐱᓚᐌ ᐅᑦ ᐅᑭᒫᒥᐙᐗ, ᓀᔥᑕ ᑭᒋ ᒥᓗ ᓇᐃᓚᐌᐋᒋᒃ ᒥᓯᐌ ᐃᔑ; ᐁᑳ ᐁ ᓇᔥᑴᐗᔑᐃᐌᒋᒃ ᒥᓇ; 10 ᐁᑳ ᐁ ᑭᒧᑎᔅᑭᒋᒃ, ᒫᑲ ᐁ ᐙᐸᑎᓕᐌᒋᒃ ᒥᓯᐌ ᒀᔭᔉ ᐋᐸᑎᓯᐎᓂᓕᐤ; ᑭᒋ ᑭᔅᑌᓕᑖᑯᑖᒋᒃ ᐅ ᑭᔅᑭᓄᐊᒫᑫᐎᓐ ᑭᒋᒪᓂᑐ ᑭ ᐱᒫᒋᐃᐌᒥᓇᐤ ᒥᓯᐌ ᐃᔑ᙮ 11 ᐌᓴ ᐅ ᔕᐌᓕᒋᑫᐎᓐ ᑭᒋᒪᓂᑐ, ᑳ ᐯᑕᒧᒪᑲᒃ ᐱᒫᒋᐃᐌᐎᓐ, ᑮ ᓄᑯᓯᔅᑖᑯᐗᒃ ᒥᓯᐌ ᐃᓕᓕᐗᒃ, 12 ᐁ ᑭᔅᑭᓄᐊᒫᑯᔭᒃ, ᐁ ᐋᓉᑕᒪᒃ ᒪᒑᑎᓯᐎᓐ ᓀᔥᑕ ᐊᔅᑭᐎ ᓇᑕᐌᓕᒋᑫᐎᓇ, ᑭᒋ ᐯᑳᒡ ᐱᒫᑎᓯᔭᒃ, ᑭᒋ ᒀᔭᔅᑭᑖᑎᓯᔭᒃ, ᓀᔥᑕ ᒪᓂᑐᐙᑎᓯᔭᒃ, ᐅᒪ ᐊᔅᑮᒃ ᐊᓄᒡ ᑳ ᐃᑕᑾᒃ; 13 ᐁ ᐊᔕᐙᐸᑕᒪᒃ ᐊᓂᒪ ᑳ ᒥᓦᑭᑖᑾᒃ ᐊᔅᐯᓕᒧᐎᓐ, ᓀᔥᑕ ᐅ ᑭᔅᑌᓕᑖᑯᓯᐎ ᓄᑯᓯᐎᓐ ᑫᔅᑎᓯᑦ ᑭᒋᒪᓂᑐ, ᓀᔥᑕ ᑭ ᐱᒫᒋᐃᐌᒥᓇᐤ ᒋᓴᔅ ᙭; 14 ᐊᓇ ᑳ ᑮ ᐸᑭᑎᓂᑎᓱᔅᑕᒫᑕᒃ, ᒥᓯᐌ ᒪᒑᑎᓯᐎᓂᒃ ᑭᒋ ᐅᒋ ᐱᒫᒋᐃᑕᒃ, ᓀᔥᑕ ᑭᒋ ᐸᓓᑭᔅᑕᒫᓱᑦ ᐙᐌᓛᐸᒫᑲᓂᐎ ᐃᓕᓕᐗ, ᐁ ᓱᑫᓕᑕᒥᓕᒋ ᑭᒋ ᒥᓗ ᐊᑑᔅᑫᓕᒋ᙮ 15 ᐅᐅ ᑫᒀᓇ ᐙᐎᑕ ᓀᔥᑕ ᔑᑭᑫᒧ, ᓀᔥᑕ ᑭᑕᐊᒫᑫ ᒥᓯᐌ ᑎᐯᓕᒋᑫᐎᓐ ᐅᒋ᙮ ᐁᑳᐎᓚ ᐊᐌᓇ ᑭ ᑳ ᐋᑕᐌᓕᒥᒃ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society