ᐅ~ᒪᓯᓇᐃᑲᓐ ᐊᐸᔅᑕᓪ ᐹᓪ ᑳ~ᒪᓯᓇᐊᒪᐙᑦ ᕈᒪᓇ 3 - ᐅᔅᑭ ᑎᔅᑌᒥᓐᑦ1 ᑫᒀᓐ ᒫᑲ ᐗᓕᐙᒃ ᐌᑎᓰᑦ ᐊᓇ ᑳ ᒎᐎᑦ? ᓀᔥᑕᐱᑯ ᑖᓐ ᐁᑖᐸᑕᒃ ᑭᔅᑭᓄᐙᒋᔓᐎᓐ? 2 ᒥᔅᑕᐃ ᒥᓯᐌ ᐃᔑ: ᒫᑲ ᐅᓵᒻ, ᐁ ᑮ ᐊᑭᑎᓇᒪᐙᑲᓂᐎᒋᒃ ᑭᒋᒪᓂᑐ ᐅ ᐸᓓᑭ ᒪᓯᓇᐃᑫᐎᓇ᙮ 3 ᑫᒀᓐ ᒫᑲ ᑮᔥᐱᓐ ᐋᑎᑦ ᐁᑳ ᑮ ᑖᐺᑕᑭᒃ? ᐅᑦ ᐋᓉᑕᒧᐎᓂᐗᐤ ᓈ ᐌᒋ ᐁᑳ ᐙᔦᔥ ᑫ ᐃᑖᐸᑕᓂᓕᒃ ᑭᒋᒪᓂᑐ ᐅ ᑖᐺᔦᓕᑕᒧᐎᓐ? 4 ᓇᒪᐎᓚ ᑲᑕ ᐎ ᐃᑭᓐ: ᐁᐁ, ᐁᑯᔑ ᑭᒋᒪᓂᑐ ᑲᑕ ᑖᐺᐤ, ᒫᑲ ᒥᓯᐌ ᑕᑐ ᐃᓕᓕᐤ ᑲᑕ ᑭᓛᔅᑭᐤ: ᒬᒋ ᐁ ᐃᑕᓯᓇᐃᑳᑌᒃ, ᑭᒋ ᒀᔭᔅᑭᑖᑎᓯᐃᑳᐎᔭᓐ ᑭᑦ ᐋᔭᒥᐎᓂᒃ, ᓀᔥᑕ ᑭᒋ ᔖᑯᒋᐃᐌᔭᓐ ᐃᔅᐱ ᑎᐹᔅᑯᓂᑲᐎᔭᓀ᙮ 5 ᒫᑲ ᑮᔥᐱᓐ ᑭ ᒪᒑᑎᓯᐎᓂᓇᐤ ᐅᒋ ᑭᔅᑕᑭᒋᑳᑌᓕᒃ ᐅ ᒀᔭᔅᑭᑖᑎᓯᐎᓐ ᑭᒋᒪᓂᑐ, ᑫᒀᓐ ᑫ ᐃᑗᔨᒃ? ᒪᒑᑎᓯᐤ ᑭᒋᒪᓂᑐ ᑳ ᐊᔅᑯᒋᐃᐌᑦ? (ᐃᓕᓕᒃ ᓂᑦ ᐃᔑ ᐋᔭᒥᓐ) 6 ᓇᒪᐎᓚ ᑲᑕ ᐎ ᐃᑭᓐ: ᐁᓴ ᐁᑯᔅᐱ ᑖᓂ ᑫ ᐃᔑ ᑎᐹᔅᑯᓇᒃ ᐊᔅᑭᓕᐤ ᑭᒋᒪᓂᑐ? 7 ᐌᓴ ᑮᔥᐱᓐ ᑭᒋᒪᓂᑐ ᐅ ᑖᐺᐎᓐ ᐋᓕᐙᒃ ᐌᓗᒋᐸᓕᓕᒃ ᓂ ᑭᓛᔅᑭᐎᓂᒃ ᐅᒋ ᑭᒋ ᑭᔅᑌᓕᑖᑯᐋᑲᓂᐎᑦ; ᑖᓀᑭ ᐌᒋ ᑫᔮᐸᒡ ᓂᓚ ᓀᔥᑕ ᑖᐱᔅᑯᒡ ᐅᒪᒋᑣᐤ ᑫ ᐃᔑ ᑎᐹᔅᑯᓂᑳᐎᔮᓐ? 8 ᒫᑲ ᓂᑕᐙᒡ, ᐁ ᐃᔑ ᒫᒪᒋᐋᒋᒥᑳᐎᔮᒃ, ᓀᔥᑕ ᐋᑎᑦ ᐁ ᐃᑗᒋᒃ ᐁ ᐃᑗᔭᒃ, ᐁᑯᔑ ᒪᒋᑐᑖᑕᐤ, ᑳ ᒥᓨᔑᒃ ᑭᒋ ᑕᑯᔑᓄᒪᑲᒃ? ᐅ ᓂᔑᐗᓈᒋᒥᑯᓯᐎᓂᐗᐤ ᐁ ᒀᔭᔅᑾᓂᓕᒃ᙮ ᒧᓚ ᐊᐌᓇ ᑾᔭᔅᑭᑎᐤ 9 ᑫᒀᓐ ᒫᑲ? ᐊᐙᓯᑌ ᓈ ᑭ ᒥᓗᑣᓈᓇᐤ ᐃᔥᐱᔥ ᐎᓚᐗᐤ? ᓇᒪᐎᓚ ᑖᐺ; ᐌᓴ ᐋᔕᔾ ᓂ ᑮ ᓄᑯᑖᓈᓐ ᒫᒪᐤ ᒎᐗᒃ ᓀᔥᑕ ᒉᓐᑖᐃᓚᒃ, ᒥᓯᐌ ᐁ ᑎᐯᓕᒥᑯᒋᒃ ᒪᒋᑣᐎᓂᓕᐤ; 10 ᐁ ᐃᑕᓯᓇᐃᑳᑌᒃ, ᓇᒪᐎᓚ ᐊᐌᓇ ᒀᔭᔅᑭᑖᑎᓯᐤ, ᓇᒪᐎᓚ, ᓇᒪ ᐙᐙᒡ ᐯᔭᒃ: 11 ᓇᒪᐎᓚ ᐊᐌᓇ ᐃᑖᐤ ᑳ ᓂᓯᑐᑕᒃ, ᓇᒪᑌᐤ ᐊᐌᓇ ᑳ ᓈᓇᑕᐌᓕᒫᑦ ᑭᒋᒪᓂᑐᐗ᙮ 12 ᒥᓯᐌ ᑮ ᐸᔅᑫᐗᒃ, ᑖᐱᔅᑯᒡ ᒫᒪᐤ ᓇᒪ ᐙᐙᒡ ᐃᑖᐸᑎᓯᐗᒃ; ᓇᒪᐎᓚ ᐊᐌᓇ ᐃᑖᐤ ᑳ ᒥᓗᑐᑕᒃ, ᓇᒪᐎᓚ, ᓇᒪ ᐙᐙᒡ ᐯᔭᒃ᙮ 13 ᐅ ᑯᑖᑲᓂᐗᐤ ᑖᐱᔅᑯᒡ ᑳ ᐗᐸᐋᔅᑌᒃ ᒋᐹᔨᑲᒥᒃ; ᐅ ᓚᓕᐙᒃ ᑮ ᐅᒋ ᑲᑳᔦᓕᒥᐗᐗᒃ; ᐅ ᐱᒋᐳᐎᓂᐗᐤ ᑭᓀᐱᑾᒃ ᐱᒋᑐᓀᔅᑳᑯᐗᒃ: 14 ᓵᑲᔅᑭᓀᓕᐤ ᐅᑐᓂᐙᒃ ᒪᒐᑭᒥᐌᐎᓐ ᓀᔥᑕ ᐎᓴᑲᐅᐌᐎᓐ: 15 ᑭᔑᐸᓕᑕᐗᒃ ᑭᒋ ᓯᑭᓇᑭᒃ ᒥᑯᓕᐤ: 16 ᓂᔑᐗᓈᒋᐃᐌᐎᓐ ᓀᔥᑕ ᐊᓕᒥᐃᐌᐎᓐ ᐊᔅᑌᐗ ᐅ ᒣᔅᑲᓇᐙᒃ; 17 ᑳᔮᒣᓕᑕᒧᐎ ᒣᔅᑲᓇᐤ ᒫᑲ ᓇᒪᐎᓚ ᑮ ᑭᔅᑫᓕᑕᒶᒃ: 18 ᓇᒪᐎᓚ ᐅ ᑯᔅᐸᓀᓕᑖᑯᓯᐎᓂᓕᐤ ᑭᒋᒪᓂᑐᐗ ᒫᒥᑐᓋᐸᑕᒬᐗᒃ᙮ 19 ᑭ ᑭᔅᑫᓕᑌᓈᓇᐤ ᒫᑲ ᑫᒀᓐ ᑳ ᐃᑗᒪᑲᒃ ᐅᓚᔓᐌᐎᓐ, ᐃᑎᑯᐗᒃ ᐊᓂᑭ ᐅᓚᔓᐌᐎᓂᒃ ᑳ ᐃᑖᒋᒃ: ᒥᓯᐌ ᑕᑐ ᒥᑐᓐ ᑭᒋ ᑭᐸᐃᑳᑌᒃ, ᓀᔥᑕ ᒥᓯᐌ ᐊᔅᑭ ᑭᒋ ᒪᒉᓕᑖᑾᒃ ᐁᑖᔅᑕᒪᐱᑦ ᑭᒋᒪᓂᑐ᙮ 20 ᐁᐗᑯ ᒫᑲ ᐅᒋ ᐁ ᐊᔨᑎᓈᓂᐗᒃ ᐅᓚᔓᐌᐎᓂᒃ ᐅᒋ ᓇᒪᐎᓚ ᐊᐌᓇ ᑲᑕ ᑮ ᒀᔭᔅᑭᑖᑎᓯᐊᐤ ᐎᓚ ᐁ ᑲᓇᐙᐸᑫᑦ: ᐌᓴ ᐅᓚᔓᐌᐎᓐ ᐅᒋ ᑭᔅᑫᓕᒋᑳᑌᐤ ᒪᒋᑣᐎᓐ᙮ ᐁ ᐃᔑ ᒀᔭᔅᑾᑎᓯᐌᓕᒥᑯᔭᒃ ᑭᒋᒪᓂᑐ 21 ᐊᓄᒡ ᐁᑯ ᐅ ᒀᔭᔅᑭᑖᑎᓯᐎᓐ ᑭᒋᒪᓂᑐ ᑭᔅᑫᓕᑖᑾᓂᓕᐤ ᐅᓚᔓᐌᐎᓐ ᐁᑳ ᐁ ᐃᑕᑾᒃ ᐁ ᐃᑖᒋᒧᒥᑲᒃ ᐅᓚᔓᐌᐎᓐ ᓀᔥᑕ ᐅᑭᔅᑭᐙᐃᑫᐗᒃ; 22 ᐋᐳᒋᑲ ᐅᒀᔭᔅᑭᑖᑎᓯᐎᓐ ᑭᒋᒪᓂᑐ ᐁ ᑖᐺᔦᓕᒫᑲᓂᐎᑦ ᒋᓴᔅ ᙭ ᒥᓯᐌ ᑫ ᐋᔮᒋᒃ ᓀᔥᑕ ᑫ ᓛᔑᐸᓕᔅᑖᑯᒋᒃ ᒥᓯᐌ ᐊᓂᑭ ᑳ ᑖᐺᑕᑭᒃ; ᐌᓴ ᓇᒪᐎᓚ ᐊᐌᓇ ᐱᑐᔐᓕᒪᐤ: 23 ᐌᓴ ᒥᓯᐌ ᑮ ᒪᒋᑐᑕᒶᒃ, ᓀᔥᑕ ᑮ ᓄᑌᐊᒬᐗᒃ ᑭᒋᒪᓂᑐ ᐅ ᑭᔅᑌᓕᑖᑯᓯᐎᓂᓕᐤ; 24 ᒧᔐ ᐁ ᒀᔭᔅᑭᑖᑎᓯᐃᑲᐎᔭᒡ ᐅ ᔕᐌᓕᒋᑫᐎᓂᒡ ᐅᒋ ᐊᓂᒪ ᐱᒫᒋᐃᐌᐎᓐ ᐅᒋ ᒋᓴᔅ ᙭ ᑳ ᐅᒋ ᑕᑾᒃ: 25 ᐊᓇ ᑳ ᑮ ᐸᑭᑎᓂᑯᑦ ᑭᒋᒪᓂᑐᐗ ᑭᒋ ᓇᐃᓚᐌᐃᐌᐎᓂᐎᑦ ᐁ ᑖᐺᔦᓕᒋᑳᑌᓕᒃ ᐅᒥᑯᒻ, ᑭᒋ ᐎᒋᑳᑌᓕᒃ ᐅ ᒀᔭᔅᑭᑖᑎᓯᐎᓐ ᑭᒋ ᐊᔐᓂᑳᑌᑭ ᒪᒋᐃᑎᐎᓇ ᐋᔕᔾ ᑳ ᑮ ᐋᔨᑎᓈᓂᐗᑭ, ᐁᔅᐱᒋ ᐯᑳᑎᓰᑦ ᑭᒋᒪᓂᑐ; 26 ᑭᒋ ᐎᒋᑳᑌᓕᒃ, ᓂᑦ ᐃᑣᓐ, ᐊᓄᒡ ᐅ ᒀᔭᔅᑭᑖᑎᓯᐎᓐ: ᑭᒋ ᑮ ᑾᔭᔅᑭᑎᑦ ᓀᔥᑕ ᑭᒋ ᑮ ᒀᔭᔅᑭᑖᑎᓯᐋᑦ ᐊᓂᐃ ᑳ ᑖᐺᔦᓕᒫᓕᒋ ᒋᓴᓴ᙮ 27 ᑖᓐᑌ ᒫᑲ ᐁᑕᑾᒃ ᑲᑮᒋᒧᐎᓐ? ᐃᑲᑌᓂᑳᑌᐤ᙮ ᑫᑯ ᐅᓚᔓᐌᐎᓐ ᐅᒋ? ᐊᑑᔅᑫᐎᓂᒃ ᓈ? ᓇᒪᐎᓚ: ᒫᑲ ᑖᐺᔦᓕᑕᒧᐎ ᐅᓚᔓᐌᐎᓂᒡ ᐅᒋ᙮ 28 ᐁᐗᑯ ᐅᒋ ᓂᑦ ᐊᑭᑌᓈᓐ ᐃᓕᓕᐤ ᐁ ᒀᔭᔅᑳᑎᓯᐋᑲᓂᐎᑦ ᑖᐺᔦᓕᑕᒧᐎᓂᒃ ᐅᒋ ᐁᑳ ᐁ ᐃᑐᒋᑳᑎᑭ ᐅᓚᔓᐌᐎᓂ ᐊᔨᑎᐎᓇ᙮ 29 ᐅ ᑭᒋᒪᓂᑐᒥᒥᑯ ᓈ ᒎᐗ ᐱᑯ? ᓇᒪ ᓈ ᓀᔥᑕ ᐅ ᑭᒋᒪᓂᑐᒥᒥᑯ ᒉᓐᑖᐃᓚ? ᐁᐁ ᒉᓐᑖᐃᓚ ᐊᓯᒋ: 30 ᐁ ᓄᑾᒃ ᐁ ᐯᔭᑯᑦ ᑭᒋᒪᓂᑐ, ᑫ ᒀᔭᔅᑭᑖᑎᓯᐋᑦ ᑳ ᑭᔅᑭᓄᓅᐙᒋᔣᑲᓂᐎᓕᒋ ᑖᐺᔦᓕᑕᒧᐎᓂᒃ, ᓀᔥᑕ ᐁᑳ ᑳ ᑭᔅᑭᓄᐙᒋᔣᑲᓂᐎᓕᒋ ᑖᐺᔦᓕᑕᒧᐎᓂᒃ ᐅᒋ᙮ 31 ᓂᑦ ᐋᑕᐌᓕᑕᒥᑖᓈᓐ ᓈ ᐅᓚᔓᐌᐎᓐ ᑖᐺᔦᓕᑕᒧᐎᓂᒡ ᐅᒋ? ᓇᒪᐎᓚ ᑲᑕ ᐎ ᐃᑭᓐ: ᐁᐁ, ᓂᑦ ᐊᔭᒋᑳᐸᐎᑖᓈᓐ ᐅᓚᔓᐌᐎᓐ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society