ᐅ~ᒪᓯᓇᐃᑲᓐ ᐊᐸᔅᑕᓪ ᐹᓪ ᑳ~ᒪᓯᓇᐊᒪᐙᑦ ᕈᒪᓇ 16 - ᐅᔅᑭ ᑎᔅᑌᒥᓐᑦᐗᒉᑫᒧᐎᓇ 1 ᑭ ᒥᓗᐋᓕᒧᑕᒫᑎᓇᐗᐤ ᐱᐱ ᑭ ᐎᒋᔖᓂᔅᑴᒥᓇᐤ ᑳ ᐅᑦ ᐊᑑᔅᑫᓛᑲᓂᒥᑯᑦ ᒫᒪᐎᐗᔭᒥᐋᐗ ᑳ ᐃᑖᓕᒋ ᔭᓐᒃᕆᐊᐃᒃ: 2 ᑭᒋ ᐱᑐᑲᐁᒃ ᐅᑎᐯᓕᒋᑫᐗ ᐃᔑ, ᐁ ᐃᔑᑣᒋᒃ ᐅᐸᓓᑭᓯᐗᒃ, ᓀᔥᑕ ᑭᒋ ᐎᒋᐁᒃ ᐱᑯ ᑫᒀᓐ ᑫ ᐃᔑ ᓇᑕᐌᓕᑕᒫᑖᒃ: ᐌᓴ ᒥᒉᑦ ᑮ ᓈᓂᔓᑲᒪᐌᐤ, ᓂᓚ ᓀᔥᑕ ᓂ ᑮ ᓂᔓᑲᒫᒃ᙮ 3 ᐊᑕᒥᔅᑳᒃ ᑉᕆᓯᓚ ᓀᔥᑕ ᐋᑶᓚ ᑳ ᐎᒋᐃᒋᒃ ᙭ ᒋᓴᓯᒃ; 4 ᐊᓂᑭ ᓂ ᐱᒫᑎᓯᐎᓐ ᐅᒋ ᑳ ᑮ ᐸᑭᑎᓇᑭᒃ ᑎᐱᓚᐌ ᐅ ᑳᔭᐗᐗ: ᐊᓂᑭ ᓇᒪᐎᓚ ᓂᓚ ᐱᑯ ᑳ ᓈᓈᔅᑯᒪᑭᒃ, ᒫᑲ ᐊᓯᒋ ᓀᔥᑕ ᒥᓯᐌ ᒉᓐᑖᐃᓕᐎ ᒫᒪᐎᐗᔭᒥᐋᐗᒃ᙮ 5 ᐊᓯᒋ ᓀᔥᑕ ᐊᑕᒥᔅᑳᑯᒃ ᒫᒪᐎᐋᔭᒥᐊᐗᒃ ᐎᑭᓕᒃ ᑳ ᐃᑖᒋᒃ᙮ ᐊᑕᒥᔅᑳᒃ ᑳ ᓵᑭᐊᒃ ᐃᐱᓂᑕᔅ, ᐊᓇ ᑳ ᓂᑳᓂᒥᓂᔑᐎᑦ ᐊᓐᑕ ᐊᑳᔭᐃᒃ ᙭ᑎᒃ ᐃᔑ᙮ 6 ᐊᑕᒥᔅᑳᒃ ᒣᕆ, ᒥᔅᑕᐃ ᑳ ᑮ ᐊᑐᔅᑳᐎᔭᒥᑦ᙮ 7 ᐊᑕᒥᔅᑳᒃ ᐋᓐᑦᕋᓂᑲᔅ ᓀᔥᑕ ᒎᓂᔭ, ᓂ ᐙᑯᒫᑲᓇᒃ, ᓀᔥᑕ ᓂᒋᑭᐸᐙᑲᓇᒃ, ᑳ ᑭᔅᑌᓕᒥᑯᒋᒃ ᐊᐸᔅᑕᓚ, ᓀᔥᑕ ᑳ ᑮ ᐃᑖᒋᒃ ᙭ᑎᒃ ᐸᒧᔑ ᓂᓚ᙮ 8 ᐊᑕᒥᔅᑳᒃ ᐋᒻᑉᓕᔭᔅ ᑳ ᓵᑭᐊᒃ ᐅᑎᐯᓕᒋᑫᒃ᙮ 9 ᐊᑕᒥᔅᑳᒃ ᐊᕐᐯᓂ, ᑳ ᐎᒋᐃᑦ ᙭ᑎᒃ, ᓀᔥᑕ ᔅᑖᑮᔅ ᑳ ᓵᑭᐊᒃ᙮ 10 ᐊᑕᒥᔅᑳᒃ ᐊᐱᓖᔅ ᑳ ᓇᐁᓕᑖᑯᓯᑦ ᙭ᑎᒃ᙮ ᐊᑕᒥᔅᑳᑯᒃ ᐊᓂᑭ ᑳ ᐃᑖᒋᒃ ᐋᕆᔅᑕᐱᐤᓚᓴ ᐎᒋᓕᒃ᙮ 11 ᐊᑕᒥᔅᑳᒃ ᐦᐃᕈᑎᔭᓐ ᓂ ᐙᑯᒫᑲᓐ᙮ ᐊᑕᒥᔅᑳᑯᒃ ᐊᓂᑭ ᑳ ᐃᑕᒋᒃ ᓈᕐᓯᓴᓴ ᐎᑭᓕᒃ, ᑳ ᐃᑖᒋᒃ ᐅᑎᐯᓕᒋᑫᒃ᙮ 12 ᐊᑕᒥᔅᑳᒃ ᑦᕋᐃᐱᓇ ᓀᔥᑕ ᑦᕋᐃᐳᓴ ᑳ ᐊᑑᔅᑫᔅᑕᐙᒋᒃ ᐅᑎᐯᓕᒋᑫᐗ᙮ ᐊᑕᒥᔅᑳᒃ ᓯᐋᑭᐋᑲᓂᐎᑦ ᐸᔅᓯᔅ, ᒥᔅᑕᐃ ᑳ ᑮ ᐊᑑᔅᑫᔅᑕᐙᑦ ᐅᑎᐯᓕᒋᑫᐗ᙮ 13 ᐊᑕᒥᔅᑳᒃ ᕉᐸᔅ ᑳ ᐙᐌᓛᐸᒥᑯᑦ ᐅᑎᐯᓕᒋᑫᐗ, ᓀᔥᑕ ᐅᑳᐎᔭ ᐁᐗᑯ ᓂᓚ ᓂᑳᐎ᙮ 14 ᐊᑕᒥᔅᑳᒃ ᐋᓯᓐᒃᕋᐃᑕᔅ, ᑉᓕᑲᓐ, ᐦᐊᑦᒫᔅ, ᐹᑦᕉᐹᔅ, ᐦᐊᕐᒦᔅ, ᓀᔥᑕ ᐎᒋᔖᓂᒪᐗ ᑳ ᐎᒉᐙᒋᒃ᙮ 15 ᐊᑕᒥᔅᑳᒃ ᐹᐃᓚᓚᑲᔅ, ᓀᔥᑕ ᒎᓕᔭ, ᓂᕆᐊᔅ, ᓀᔥᑕ ᐎᒋᔖᓂᔅᑴᒪ, ᓀᔥᑕ ᐅᓕᒻᐸᔅ ᓀᔥᑕ ᒥᓯᐌ ᐅᐸᓓᑭᓯᐗ ᑳ ᐎᒉᐎᑯᒋᒃ᙮ 16 ᐊᑕᒥᔅᑖᑐᒃ ᐁ ᐸᓓᑭ ᐅᒉᒥᑐᔦᒃ᙮ ᙭ ᐅ ᒫᒪᐎᐋᔭᒥᐊᒪ ᑭᑦ ᐊᑕᒥᔅᑳᑯᐗᐗᒃ᙮ ᒫᒋᒡ ᑭᔅᑭᓄᐊᒫᑫᐎᓐ 17 ᐁᑯ ᑭ ᐸᑯᓴᓕᒥᑎᓇᐗᐤ, ᓂᒋᔖᓂᑐᒃ, ᐱᓯᔅᑫᓕᒥᑯᒃ ᐊᓂᑭ ᑳ ᐅᒋ ᐃᑕᑾᑫ ᐸᑳᓂᐃᑐᐎᓇ ᓀᔥᑕ ᓇᔦᑕᐎ ᐃᑐᑕᒧᐎᓇ ᐱᑐᔥ ᑳ ᐃᑌᓕᑖᑾᑭ ᐊᓂᒪ ᑭᔅᑭᓄᐊᒫᑫᐎᓐ ᐅᒋ ᑳ ᑮ ᑭᔅᑭᓄᐊᒫᑲᐎᔦᒃ; ᐁᑳᐎᓚ ᒫᑲ ᐎᒉᐎᑯᒃ᙮ 18 ᐌᓴ ᐁᐗᒀᓂᑭ ᑐᐎᑳᓇᒃ ᐁᑳ ᑳ ᐊᑑᔅᑫᔅᑕᐙᒋᒃ ᑭ ᑎᐯᓕᒋᑫᒥᓇᐗ ᒋᓴᔅ ᙭ᑕ, ᒫᑲ ᑎᐱᓚᐌ ᐙᑖᐗᐤ; ᓀᔥᑕ ᐁ ᒥᓗᐋᔭᒥᒋᒃ ᓀᔥᑕ ᐁ ᓱᔅᒀᒋ ᐋᔭᒥᒋᒃ ᑳ ᐙᔦᔑᑕᒸᒋᒃ ᐅᑌᐃᓕᐗ ᐊᓂᐃ ᐁᑳ ᑳ ᓕᑆᑳᓂᒋ᙮ 19 ᐌᓴ ᑭ ᓇᓇᐃᑕᒧᐎᓂᐗᐤ ᑮ ᐯᒋ ᐅᑎᑎᑯᐗᒃ ᒥᓯᐌ ᐃᓕᓕᐗᒃ᙮ ᐁᐗᑯ ᐅᒋ ᓂ ᓯᑭᓓᓯᓐ ᒫᑲ ᑭᓚᐗᐤ ᐅᒋ: ᑫᔮᐸᒡ ᒫᑲ ᑭ ᓇᑕᐌᓕᒥᑎᓇᐗᐤ ᑭᒋ ᑲᑫᑕᐌᓕᑕᒣᒃ ᐊᓂᒪ ᑳ ᒥᓨᔑᒃ, ᓀᔥᑕ ᑭᒋ ᑲᑫᐹᑎᓯᔦᒃ ᑳ ᒫᓛᑕᒃ ᐅᒋ᙮ 20 ᑭᒋᒪᓂᑐ ᒫᑲ ᑳ ᑎᐯᓕᑕᒃ ᑳᔮᒣᓕᑕᒧᐎᓂᓕᐤ ᐎᐸᒡ ᑲᑕ ᐊᐱᑕᐌᐤ ᓭᑕᓇ ᔑᐹ ᑭᓯᑎᐙᒃ᙮ ᐅ ᔕᐌᓕᒋᑫᐎᓐ ᑭ ᑎᐯᓕᒋᑫᒥᓇᐤ ᒋᓴᔅ ᙭ ᑭ ᑳ ᐎ ᐎᒉᐎᑯᐙᓇᐗᐤ᙮ ᐁᒣᓐ᙮ 21 ᑎᒧᑎ ᓂᒋᐊᑑᔅᑫᓛᑲᓐ, ᓀᔥᑕ ᓘᓯᔭᔅ, ᓀᔥᑕ ᒉᓴᓐ, ᓀᔥᑕ ᓱᓯᐯᑕᕐ, ᓂ ᐙᑯᒫᑲᓇᒃ ᑭᑦ ᐊᑕᒥᔅᑳᑯᐗᐗᒃ᙮ 22 ᓂᓚ ᑕᕐᓯᔭᔅ, ᑳ ᑮ ᒪᓯᓇᐊᒫᓐ ᐅᒪ ᒪᓯᓇᐃᑫᐎᓐ, ᑭᑦ ᐊᑕᒥᔅᑕᒫᑎᓇᐗᐤ ᐅᑎᐯᓕᒋᑫᒃ᙮ 23 ᑫᐊᔅ ᑳ ᐱᑐᑲᐃᑦ, ᓀᔥᑕ ᒥᓯᐌ ᒫᒪᐎᐋᔭᒥᐊᐗᒃ, ᑭᑦ ᐊᑕᒥᔅᑳᑯᐗᐤ, ᐃᕌᔅᑕᔅ ᐅᑲᓇᐎᔔᓕᐋᐌᐤ ᐃᑖᐎᓂᒃ ᑭᑦ ᐊᑕᒥᔅᑳᑯᐗᐤ, ᓀᔥᑕ ᑾᕐᑕᔅ ᑳ ᐎᒋᔖᓇᒪᐎᑦ᙮ 24 ᐅ ᔕᐌᓕᒋᑫᐎᓐ ᑭ ᑎᐯᓕᒋᑫᒥᓇᐤ ᒋᓴᔅ ᙭ ᒥᓯᐌ ᑭ ᑳ ᐎ ᐎᒉᐎᑯᐙᓇᐗᐤ᙮ ᐁᒣᓐ᙮ ᑄᓪ ᒫᒥᒋᒣᐤ ᑭᒋᒪᓂᑐᐗ 25 ᐁᑯ ᐊᓇ ᑳ ᑲᔥᑭᑖᑦ ᑭᒋ ᐋᔨᒋᐃᑖᒃ ᐁ ᐃᑗᒪᑲᒃ ᓂ ᒥᓗᐋᒋᒪᐎᓐ, ᓀᔥᑕ ᐁ ᐃᔑ ᑎᐹᒋᒫᑲᓂᐎᑦ ᒋᓴᔅ ᙭, ᑳ ᑮ ᐃᔑ ᑭᔅᑫᓕᑖᑯᑖᓂᐗᒃ ᑳ ᒫᒪᔅᑳᑕᒃ, ᐊᓂᒪ ᑳ ᑮ ᑭᒧᒡ ᑲᓇᐌᓕᒋᑳᑌᒃ ᐊᔅᐱᓐ ᑳ ᐯᒋ ᐊᔅᑭᐗᒃ, 26 ᒫᑲ ᐊᓄᒡ ᑳ ᑭᔅᑫᓕᑖᑯᑖᑲᓂᐗᒃ, ᓀᔥᑕ ᐅ ᒪᓯᓇᐃᑫᐎᓂᐗᐗ ᐅᒋ ᐊᓂᑭ ᐅᑭᔅᑭᐙᐃᑫᐗᒃ, ᑳ ᑮ ᐃᑕᔓᐌᑦ ᐊᓇ ᑳᑭᑫ ᐯᒫᑎᓰᑦ ᑭᒋᒪᓂᑐ, ᑳ ᑭᔅᑫᓕᑕᒥᐋᑲᓂᐄᒋᒃ ᒥᓯᐌ ᐁ ᐃᑕᔅᑳᓀᓯᒋᒃ ᐃᓕᓕᐗᒃ ᑭᒋ ᐅᒋ ᓇᓇᐃᑕᑭᒃ ᑖᐺᔦᓕᑕᒧᐎᓂᓕᐤ: 27 ᑭᒋᒪᓂᑐ ᐎᓚ ᐱᑯ ᑳ ᑲᑫᑕᐌᓕᑕᒃ, ᑲᑕ ᐎ ᒫᒥᒋᒫᑲᓂᐎᐤ ᒋᓴᔅ ᙭ ᐅᒋ ᑳᑭᑫ᙮ ᐁᒣᓐ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society