ᑭᔅᑫᓕᑖᑯᑖᑫᐎᓐ 9 - ᐅᔅᑭ ᑎᔅᑌᒥᓐᑦ1 ᐊᓇ ᒫᑲ ᓂᔮᓕᓪ ᐁᓐᒐᓪ ᑮ ᑭᑐᑕᐤ, ᓂ ᑮ ᐙᐸᒪᐤ ᒫᑲ ᐊᒐᑯᔥ ᑭᔑᑯᒃ ᐁ ᐅᒋ ᐸᑭᔑᒃ ᐊᔅᑮᒃ ᐃᔑ: ᐊᐗ ᒫᑲ ᑮ ᒥᓚᐤ ᐎᑯᑕᐃᑲᓂᓕᐤ ᐁᑳ ᑳ ᒥᓴᔅᑫᔮᒃ ᐙᑎᑳᓐ᙮ 2 ᑮ ᐹᔅᑭᑌᓇᒻ ᒫᑲ ᐁᑳ ᑳ ᒥᓴᔅᑫᔮᓕᒃ ᐙᑎᑳᓂᓕᐤ; ᐙᑎᑳᓂᒃ ᒫᑲ ᑮ ᐅᒋ ᐅᐱᐸᓕᐤ ᐁ ᐱᐳᑌᒃ, ᑖᐱᔅᑯᒡ ᐁ ᐃᔑ ᐱᐳᑌᒃ ᑭᒋ ᐃᔥᑯᑌᐎᑲᒥᒃ; ᐱᓯᒻ ᒫᑲ ᓀᔥᑕ ᒧᔐᑭᔑᑯᒃ ᑮ ᐗᓂᑎᐱᔅᑲᐤ, ᐁ ᐃᔅᐱᒋ ᑲᔥᑳᐸᑌᒃ ᐙᑎᑳᓐ ᐅᒋ᙮ 3 ᐁ ᑲᔥᑳᐸᑌᒃ ᒫᑲ ᑮ ᐯᒋ ᐅᒋᐗᒃ ᒀᒀᐱᔑᔕᒃ ᐊᔅᑮᒃ ᐃᔑ; ᑮ ᒥᓚᐗᒃ ᒫᑲ ᑲᔥᑭᐅᐎᓂᓕᐤ, ᑖᐱᔅᑯᒡᔕ ᓯᓯᑴᐗᒃ ᐊᔅᑭᒃ ᐁ ᐃᔑ ᐋᔮᒋᒃ ᑲᔥᑭᐅᐎᓂᓕᐤ᙮ 4 ᑮ ᐃᑕᔓᐙᐗᒃ ᒫᑲ ᐁᑳ ᑭᒋ ᐅᔑᑯᑖᒋᒃ ᒪᔅᑯᔑᔭ ᐊᔅᑮᒃ, ᐁᑳ ᓀᔥᑕ ᑫᒀᓐ ᑳ ᐅᓵᐗᔅᑳᓕᒃ, ᐁᑳ ᓀᔥᑕ ᒥᔅᑎᑾ: ᒫᑲ ᐊᓂᐃ ᐃᓕᓕᐗ ᐱᑯ ᐁᑳ ᑳ ᐋᔮᓕᒋ ᑭᒋᒪᓂᑐ ᐅ ᑭᔅᑭᓄᐙᒋᒋᑲᓐ ᐅᔅᑲᑎᑯᐙᒃ᙮ 5 ᐅᑯ ᒫᑲ ᑮ ᒥᓛᐗᒃ ᐁᑳ ᑭᒋ ᓂᐸᐋᒋᒃ, ᒫᑲ ᐃᔥᐱᔥ ᓂᔮᓕᓐ ᐱᓯᒶ ᑭᒋ ᑲᒀᑕᑭᐋᑲᓂᐎᓕᒋ: ᐅ ᑲᒀᑕᑭᐃᐌᐎᓂᐗᐤ ᒫᑲ ᑖᐱᔅᑯᒡ ᐅ ᑲᒀᑕᑭᐃᐌᐎᓐ ᓯᓯᑴᐤ ᐃᔅᐱ ᐯᑲᒥᔅᑲᐙᒋ ᐃᓕᓕᐗ᙮ 6 ᒣᒀᒡ ᒫᑲ ᐅᐅ ᐁ ᑭᔑᑳᑭ ᐃᓕᓕᐗᒃ ᑲᑕ ᓈᓇᑕᐌᓕᑕᒶᒃ ᓂᐱᐎᓂᓕᐤ, ᓇᒪ ᒫᑲ ᑲᑕ ᒥᔅᑲᒶᒃ; ᓀᔥᑕ ᑲᑕ ᐎ ᓂᐱᐗᒃ, ᓂᐱᐎᓂᓕᐤ ᒫᑲ ᑲᑕ ᐅᔑᒥᑯᐗᒃ᙮ 7 ᐊᓂᑭ ᒀᒀᐱᔑᔕᒃ ᒫᑲ ᑮ ᐃᔑᓈᑯᓯᐗᒃ ᑖᐱᔅᑯᒡ ᒥᔅᑕᑎᒶᒃ ᐁ ᐋᔦᔅᑲᐎᓯᒋᒃ ᒫᒪᐎᓄᑎᓂᑐᐎᓐ ᐅᒋ; ᓀᔥᑕ ᐅᔅᑎᒀᓂᐙᒃ ᑮ ᐃᑕᑾᓋ ᑖᐱᔅᑯᒡ ᐅᓵᐎᔔᓕᐊᓈᐱᔉ ᐅᑭᒪᐗᔅᑐᑎᓋ, ᓀᔥᑕ ᐅᑖᔅᑕᒥᑯᐙᐗ ᑖᐱᔅᑯᒡ ᐃᓕᓕᐗᒃ ᐅᑖᔅᑕᒥᑯᐙᐗ ᑮ ᐃᔑᓈᑾᓂᓕᐗ᙮ 8 ᑮ ᐅᐱᐙᐎᐗᒃ ᑖᐱᔅᑯᒡ ᐅᐱᐙᐎᐙᐗ ᐃᔅᑴᐗᒃ, ᓀᔥᑕ ᐎᐱᑎᐙᐗ ᑖᐱᔅᑯᒡ ᒥᔑᐱᔑᐗᒃ ᐎᐱᑎᐙᐗ᙮ 9 ᑮ ᐅᒥᔅᑳᔅᑭᑲᓈᐱᔅᑯᐗᒃ ᒫᑲ ᑖᐱᔅᑯᒡ ᐱᐙᐱᔉ ᒥᔅᑳᔅᑭᑲᓈᐱᔅᑾ; ᓀᔥᑕ ᐁ ᓄᑖᑾᓂᓕᑭ ᐅ ᑕᑲᑾᓂᐗᐗ ᑮ ᐃᑎᑖᑾᓐ ᑖᐱᔅᑯᒡ ᐁ ᐃᑎᑖᑯᓯᒋᒃ ᒥᒉᑦ ᑎᑎᐱᑖᐸᓈᔅᑾᒃ ᐊᓯᒋ ᒥᔅᑕᑎᒶᒃ ᐁ ᐃᔅᐸᓕᒋᒃ ᒫᒪᐎᓄᑎᓂᑐᐎᓂᒃ ᐃᔑ᙮ 10 ᑮ ᐅᓱᐗᒃ ᒫᑲ ᑖᐱᔅᑯᒡ ᓯᓯᑫᐗᒃ, ᑮ ᑕᑾᑫᐗᒃ ᒫᑲ ᐅᓱᐙᒃ; ᓀᔥᑕ ᐅ ᑲᔥᑭᐅᐎᓂᐗᐤ ᐁᐗᑯ ᑭᒋ ᐋᑯᐋᒋᒃ ᐃᓕᓕᐗ ᐃᔥᐱᔥ ᓂᔮᓕᓪ ᐱᓯᒶ᙮ 11 ᑮ ᐋᔭᐌᐗᒃ ᒫᑲ ᑭᒋᐅᑭᒪᐗ ᐁ ᑎᐯᓕᒥᑯᒋᒃ ᐊᓂᐃ ᐁᓐᒐᓚ ᐁᑳ ᑳ ᒥᓴᔅᑫᔮᒃ ᐙᑎᑳᓂᒃ ᑳ ᐅᒋᓕᒋ, ᑳ ᐃᔑᓂᑳᓱᓕᒋ ᐦᐃᑉᕉ ᐃᔑ ᑭᔗᐎᓂᒃ ᐊᐹᑕᓐ, ᒫᑲ ᒃᕆᒃ ᐃᔑᑭᔗᐎᓂᒃ ᐊᐸᓕᔭᓐ ᐃᔑᓂᑳᓱᓕᐗ᙮ 12 ᐯᔭᒃ ᑲᒀᑕᑭᓯᐎᓐ ᒫᔭᐎᐸᓕᐤ; ᒫᑎᑲ ᒪᑲ, ᑫᔮᐸᒡ ᓂᔔᑲᒀᑕᑭᓯᐎᓇ ᐹᐸᓕᐗ᙮ 13 ᐊᓇ ᓂᑯᑣᔅ ᐁᓐᒐᓪ ᒫᑲ ᑮ ᑭᑐᑕᐤ, ᓂ ᑮ ᐯᑌᓐ ᒫᑲ ᐯᑖᑯᓯᐎᓐ ᐊᓐᑕ ᐅᒋ ᐁ ᓀᐅᑌᔥᑲᓀᒪᑲᒃ ᐅᓵᐎᔔᓕᐊᓈᐱᔉ ᐸᑭᒋᑲᓈᐱᔉ ᑳ ᐃᑕᑾᒃ ᐅᑎᔥᑲᐤ ᑭᒋᒪᓂᑐᐗ᙮ 14 ᐁ ᐃᑎᑯᑦ ᐊᓇ ᓂᑯᑣᔅ ᐁᓐᒐᓪ ᑳ ᐋᔮᑦ ᐳᑖᒋᑲᓂᓕᐤ, ᐋᐸᐅᒃ ᐊᓂᑭ ᓀᐤ ᐁᓐᒐᓚᒃ ᑳ ᒫᑯᐱᓱᒋᒃ ᑭᒋ ᓯᐲᒃ ᔫᑉᕃᑏᔅ᙮ 15 ᑮ ᐋᐸᐙᐗᒃ ᒫᑲ ᐊᓂᑭ ᐁᓐᒐᓚᒃ, ᑳ ᑮ ᐋᔦᔅᑲᐎᐋᑲᓂᐎᒋᒃ ᐃᔥᐱᔥ ᐯᔭᒃ ᑎᐹᔨᑲᓐ ᐱᓯᒧᑳᓂᐤ, ᓀᔥᑕ ᐯᔭᑾᐤ ᐁ ᑭᔑᑳᒃ, ᓀᔥᑕ ᐯᔭᒃ ᐱᓯᒻ, ᓀᔥᑕ ᐯᔭᑾᐤ ᐁ ᐱᐴᒃ, ᓂᔅᑡᐤ ᐃᓕᑯᒃ ᑭᒋ ᓂᐸᐋᒋᒃ ᐃᓕᓕᐗ᙮ 16 ᑮ ᐃᑕᓯᐗᒃ ᒫᑲ ᐊᓂᑭ ᐅᓄᑎᓂᑫᐗᒃ ᒥᔅᑕᑎᒥᓕᓕᐗᒃ ᓂᔡᐤ ᒥᑕᑐᒦᑕᓇᐤ ᑭᒋᒥᑖᑐᒥᑕᓇᐗᐤ ᑭᒋᒥᑖᑐᒥᑕᓇᐤ: ᓂ ᑮ ᐯᑌᓐ ᒫᑲ ᐁ ᐃᑕᓯᒋᒃ᙮ 17 ᐅᒪ ᐃᔑ ᒫᑲ ᓂ ᑮ ᐙᐸᒪᐗᒃ ᒥᔅᑕᑎᒶᒃ ᐃᔑᓇᒧᐎᓂᒃ, ᐊᓂᑭ ᓀᔥᑕ ᑳ ᑌᑕᐱᑐᑕᐙᒋᒃ ᐁ ᐋᔮᒋᒃ ᐃᔥᑯᑌᐎ ᓀᔥᑕ ᒑᓯᓐᑦ, ᓀᔥᑕ ᐅᓵᐙᐱᔅᑯᓯᓂᐎ ᒥᔅᑳᔅᑭᑲᓈᐱᔅᑾ: ᐅᔅᑎᒀᓂᐙᐗ ᒫᑲ ᒥᔅᑕᑎᒶᒃ ᑮ ᐃᔑᓈᑾᓂᓕᐗ ᑖᐱᔅᑯᒡ ᒥᔑᐱᔑᐗᒃ ᐅᔅᑎᒀᓂᐙᐗ: ᐅᑐᓂᐙᒃ ᒫᑲ ᑮ ᐅᒋᐸᓕᐤ ᐃᔥᑯᑌᐤ ᓀᔥᑕ ᑲᔥᑳᐸᑌᐤ ᓀᔥᑕ ᐅᓵᐙᐱᔅᑯᓯᓂ᙮ 18 ᐅᑯ ᓂᔅᑐ ᒫᑲ ᓂᔅᑡᐤ ᐃᓕᓕᐗᒃ ᑮ ᐅᒋ ᓂᐸᐋᐗᒃ, ᐃᔥᑯᑌᐤ ᐅᒋ, ᓀᔥᑕ ᐁ ᑲᔥᑳᐸᑌᒃ ᐅᒋ, ᓀᔥᑕ ᐅᓵᐙᐱᔅᑯᓯᓂ ᐅᒋ, ᑳ ᐅᒋᐸᓕᓕᒃ ᐅᑐᓂᐙᒃ᙮ 19 ᐌᓴ ᐅ ᑲᔥᑭᐅᐎᓂᐗᐤ ᐅᑐᓂᐙᒃ ᐃᑕᑾᓂᓕᐤ, ᓀᔥᑕ ᐅᓱᐙᒃ: ᐌᓴ ᐅᓱᐙᐗ ᑮ ᐃᔑᓈᑾᓂᓕᐗ ᑖᐱᔅᑯᒡ ᒥᔑᑭᓀᐱᑾᒃ, ᑮ ᐅᔅᑎᒀᓂᐗᒃ, ᐁᐗᒀᓂᐃ ᓀᔥᑕ ᐌᒋ ᐎᓴᑫᓕᑕᒥᐃᐌᒋᒃ᙮ 20 ᒥᓯᐌ ᒫᑲ ᐃᓕᓕᐗᒃ ᐁᑳ ᑳ ᑮ ᓂᐹᐃᑯᒋᒃ ᐅᐅ ᐋᑯᐃᑖᔅᐱᓀᐎᓇ, ᐁᓕᐌᒃ ᒫᑲ ᑫᔮᐸᒡ ᓇᒪᐎᓚ ᑮ ᒥᒋᓚᐌᔦᓕᑕᒶᒃ ᑳ ᑭ ᐊᔨᐊᑑᔅᑫᒋᒃ ᐅᒋᒋᐙᒃ, ᐁᑳ ᑭᒋ ᓇᐙᑭᔅᑕᐙᒋᒃ ᒪᒋᒪᓂᑐᐗ, ᓀᔥᑕ ᐅᓵᐎᔔᓕᐋᓇᐱᔉ, ᒪᓂᑐᑳᓇ, ᓀᔥᑕ ᔔᓕᐊᓈᐱᔉ, ᓀᔥᑕ ᐅᓵᐙᐱᔉ, ᓀᔥᑕ ᐊᓯᓂ, ᓀᔥᑕ ᒥᔅᑎᒃ, ᐊᓂᐃ ᐁᑳ ᑳ ᐙᐱᓕᒋ, ᓀᔥᑕ ᐅᓯᑌᓕᒋ, ᓀᔥᑕ ᐱᒧᑌᓕᒋ, 21 ᓇᒪ ᓀᔥᑕ ᑮ ᒥᒋᓚᐌᔦᓕᑕᒶᒃ ᐅ ᓂᐹᔨᐌᐎᓂᐙᐗ, ᓀᔥᑕ ᐅ ᒥᑌᐃᐎᓂᐙᐗ, ᓀᔥᑕ ᐅ ᐱᔑᒀᑎᓯᐎᓂᐙᐗ, ᓀᔥᑕ ᐅ ᑭᒧᑎᔅᑭᐎᓂᐙᐗ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society