ᑭᔅᑫᓕᑖᑯᑖᑫᐎᓐ 5 - ᐅᔅᑭ ᑎᔅᑌᒥᓐᑦ

ᐊᓂᑭ ᑎᑎᐱᔦᑭᓂᑲᓐ ᓀᔥᑕ ᐊᓇ ᒫᓂᔥᒑᓂᔥ

¹ ᓂ ᑮ ᐙᐸᑌᓐ ᒫᑲ ᐅ ᑭᒋᓂᔅᑮᒃ ᐊᓇ ᐅᑭᒪᐗᐱᐎᓂᒃ ᑳ ᐊᐱᑦ, ᒪᓯᓇᐃᑲᓐ ᐁ ᒪᓯᓇᐃᑳᑌᒃ ᐱᒋ ᓀᔥᑕ ᐁ ᐅᔅᐱᔅᑾᓂᒪᑲᒃ, ᐁ ᐊᑯᔅᑭᐗᓯᑳᑌᒃ ᓂᔂᔅ ᐊᑯᔅᑭᐗᓯᑲᓇᒃ ᐅᒋ᙮

² ᓂ ᑮ ᐙᐸᒪᐤ ᒫᑲ ᐁ ᒪᔥᑲᐎᓰᑦ ᐁᓐᒐᓪ ᐁ ᐃᑗᑦ ᐁ ᑭᔗᐌᑦ, ᐊᐌᓇ ᑎᐁᐸᑌᓕᑖᑯᓯᑦ ᑭᒋ ᐋᐸᐊᒃ ᒪᓯᓇᐃᑲᓂᓕᐤ, ᓀᔥᑕ ᑭᒋ ᐋᐸᐙᑦ ᐊᑯᔅᑭᐗᓯᑲᓇ?

³ ᓇᒪᐎᓚ ᐊᐌᓇ ᐃᓕᓕᐤ ᒫᑲ ᑭᒋᑭᔑᑯᒃ, ᓇᒪ ᓀᔥᑕ ᐊᔅᑮᒃ, ᓇᒪ ᓀᔥᑕ ᐊᑖᒪᔅᑲᒥᒃ ᑮ ᑲᔥᑭᑕᐤ ᑭᒋ ᐋᐸᐊᒃ ᒪᓯᓇᐃᑲᓂᓕᐤ, ᓇᒪ ᓀᔥᑕ ᑭᒋ ᑲᓇᐙᐸᑕᒃ᙮

⁴ ᒥᔅᑕᐃ ᒫᑲ ᓂ ᑮ ᒫᑐᓐ, ᐁᑳ ᐊᐌᓇ ᐃᓕᓕᐤ ᐁ ᑮ ᒥᔅᑲᐙᑲᓂᐎᑦ ᑭᒋ ᐋᐸᐊᒃ ᓀᔥᑕ ᑭᒋ ᐋᔭᒥᑖᑦ ᒪᓯᓇᐃᑲᓂᓕᐤ, ᐁᑳ ᓀᔥᑕ ᑭᒋ ᑲᓇᐙᐸᑕᒃ᙮

⁵ ᐯᔭᒃ ᒫᑲ ᐁ ᐃᑕᓯᒋᒃ ᑳ ᓂᑳᓀᓕᑖᑯᓯᒋᒃ ᓂ ᑮ ᐃᑎᒃ, ᐁᑳᐎᓚ ᒫᑐ: ᒫᑎᑲ, ᐊᓇ ᒥᔑᐱᔑᐤ ᐅ ᐯᔭᑯᑌᒥᒃ ᒎᑕ ᑳ ᐅᒌᑦ, ᐁ ᐅᒉᐱᑭᐎ ᑌᐱᑦ, ᑮ ᐸᔅᑭᓛᑫᐤ ᑭᒋ ᐋᐸᐊᒃ ᒪᓯᓇᐃᑲᓂᓕᐤ, ᓀᔥᑕ ᑭᒋ ᐋᐸᐙᑦ ᐊᓂᐃ ᓂᔂᔅ ᐊᑯᔅᑭᐗᓯᑲᓇ᙮

⁶ ᓂ ᑮ ᐃᑖᐱᓐ ᒫᑲ, ᒫᑎᑲ, ᒫᑲ, ᒣᑴᔭᔥ ᐅᑭᒪᐗᐱᐎᓐ, ᓀᔥᑕ ᐊᓂᑭ ᓀᐤ ᐅᐱᒫᑎᓴᒃ, ᒣᑴᔭᔥ ᒫᑲ ᐊᓂᑭ ᑳ ᓂᑳᓀᓕᑖᑯᓯᒋᒃ, ᑮ ᓂᐸᐎᐤ ᒫᓂᔥᒑᓂᔥ ᑖᐱᔅᑯᒡ ᐁ ᑮ ᓂᐸᐋᑲᓂᐎ ᓂᔂᔅ ᐁ ᐅᑦ ᐁᔥᑲᓄᑦ, ᓀᔥᑕ ᓂᔂᔅ ᐁ ᐅᔅᑭᔑᑯᑦ, ᐁᐗᒀᓂᐃ ᓃᔂᔅ ᐅᑦ ᐊᒑᑾ ᑭᒋᒪᓂᑐ ᐁ ᐃᔑᑎᔕᐙᑲᓂᐎᓕᒋ ᒥᓯᐌ ᐊᔅᑮᒃ᙮

⁷ ᑮ ᐯᒋ ᐃᑐᑌᐤ ᒫᑲ, ᓀᔥᑕ ᑮ ᐅᑎᓇᒻ ᒪᓯᓇᐃᑲᓂᓕᐤ ᐅ ᑭᒋᓂᔅᑭᓕᒃ ᐅᒋ ᐊᓂᐃ ᐅᑭᒪᐗᐱᐎᓂᒃ ᑳ ᐊᐱᓕᒋ᙮

⁸ ᐃᔅᐱ ᒫᑲ ᐌᑎᓇᒃ ᒪᓯᓇᐃᑲᓂᓕᐤ, ᐊᓂᑭ ᓀᐤ ᐅᐱᒫᑎᓴᒃ ᓀᔥᑕ ᐊᓂᑭ ᓂᔑᑕᓇ ᓀᔥᑕ ᓀᐅᔖᑉ ᑳ ᓂᑲᓀᓕᑖᑯᓯᒋᒃ ᑮ ᐸᑭᔑᓂᔅᑕᐌᐗᒃ ᒫᓂᔥᒑᓂᔑᔕ, ᑕᑐ ᐁ ᐃᑕᓯᒋᒃ ᐁ ᐋᔭᐙᒋᒃ ᔖᑲᓈᐱᑭᑐᒋᑲᓇ, ᓀᔥᑕ ᐅᓴᐎᔔᓕᐋᓈᐱᔉ ᐊᓱᐗᒋᑲᓇ ᐁ ᓵᑲᔅᑭᓀᑭ ᐎᑭᒫᓯᑲᓐ, ᐁᐗᒀᓂᒪ ᐅᑦ ᐋᔭᒥᐋᐎᓂᐗᐗ ᐅᐸᓓᑭᓴᒃ᙮

⁹ ᑮ ᓂᑲᒧᐗᒃ ᒫᑲ ᐅᔥᑭ ᓂᑲᒧᐎᓂᓕᐤ, ᐁ ᐃᑗᒋᒃ, ᑮ ᑌᐸᑫᓕᑖᑯᓯᓐ ᑭᒋ ᐅᑎᓇᒪᐤ ᒪᓯᓇᐃᑲᓐ, ᓀᔥᑕ ᑭᒋ ᐋᐸᐗᒋᒃ ᐊᑯᔅᑭᐗᓯᑲᓇᒃ: ᐌᓴ ᑭ ᑮ ᓂᐹᐃᑲᐎᓐ, ᓀᔥᑕ ᑭ ᑮ ᐱᒫᒋᐃᓈᓐ ᑭᒋᒪᓂᑐ ᐅᒋ ᑭᒥᑯᒻ ᐅᒋ, ᓇᓈᑲᐤ ᐁ ᐅᑕᔅᑳᓀᓯᔮᒃ, ᓀᔥᑕ ᓇᓇᑲᐤ ᐁ ᐃᔑ ᑭᔗᔮᒃ, ᓀᔥᑕ ᐁ ᐃᓕᓕᐎᔮᒃ, ᓀᔥᑕ ᐁ ᐃᑕᔅᑳᓀᓯᔮᒃ;

¹⁰ ᓀᔥᑕ ᑭ ᑮ ᐃᔑᐃᓈᓐ ᑭᒋ ᑭᒋᐅᑭᒪᐎᔮᒃ ᓀᔥᑕ ᓵᓵᑭᐎᓕᐌᐎᓕᓕᐎᔮᒃ ᐅᑎᔥᑲᐤ ᓂ ᑭᒋᒪᓂᑐᒥᓈᓐ: ᓂ ᑳ ᑎᐯᓕᒋᑳᓈᓐ ᒫᑲ ᐊᔅᑮᒃ᙮

¹¹ ᓂ ᑮ ᐃᑖᐱᓐ ᒫᑲ, ᓂ ᑮ ᐯᑕᒸᓐ ᒫᑲ ᐅ ᐯᑖᑯᓯᐎᓂᐗᐤ ᒥᒉᑦ ᐁᓐᒐᓚᒃ ᐙᔅᑲ ᐅᑭᒪᐗᐱᐎᓂᒃ, ᓀᔥᑕ ᐊᓂᑭ ᐅᐱᒫᑎᓴᒃ, ᓀᔥᑕ ᐊᓂᑭ ᑳ ᓂᑳᓀᓕᑖᑯᓯᒋᒃ: ᑮ ᐃᑕᔑᐗᒃ ᒫᑲ ᒥᑖᑦ ᑭᒋᒥᑕᑐᒥᑕᓇᐗᐤ ᒥᑖᑦ ᑭᒋᒥᑖᑐᒥᑕᓇᐤ, ᓀᔥᑕ ᑭᒋᒥᑖᑐᒥᑕᓇᐗᐤ ᑭᒋᒥᑖᑐᒥᑕᓇᐤ;

¹² ᐁ ᐃᑗᒋᒃ ᐁ ᑭᔗᐌᒋᒃ, ᑌᐸᑫᓕᑖᑯᓯᐤ ᒫᓂᔥᒑᓂᔑᔥ ᑳ ᑭ ᓂᐸᐋᑲᓂᐎᑦ ᑭᒋ ᒥᓛᑲᓂᐎᑦ ᑲᔥᑭᐅᐎᓂᓕᐤ, ᓀᔥᑕ ᒥᔕᑭᓯᐎᓇ, ᓀᔥᑕ ᑲᑫᑕᐌᓕᑕᒧᐎᓂᓕᐤ, ᓀᔥᑕ ᒪᔥᑲᐎᓯᐎᓂᓕᐤ, ᓀᔥᑕ ᑭᔅᑎᓯᐎᓂᓕᐤ, ᓀᔥᑕ ᑭᔅᑌᓕᑖᑯᓯᐎᓂᓕᐤ, ᓀᔥᑕ ᒥᓦᑭᒥᐌᐎᓂᓕᐤ᙮

¹³ ᒥᓯᐌ ᑕᑐ ᐊᐌᓇ ᑳ ᐃᑖᑦ ᑭᒋᑭᔑᑯᒃ, ᓀᔥᑕ ᐊᔅᑮᒃ, ᓀᔥᑕ ᐊᑖᒪᔅᑲᒥᒃ, ᓀᔥᑕ ᐊᓂᑭ ᑭᒋᑲᒦᒃ ᑳ ᐃᑖᒋᒃ, ᓀᔥᑕ ᒥᓯᐌ ᐁᑯᑕ ᑳ ᐃᑖᒋᒃ, ᓂ ᑮ ᐯᑕᐙᐗᒃ ᐁ ᐃᑗᒋᒃ, ᒥᓦᑭᒥᐌᐎᓐ, ᓀᔥᑕ ᑭᔅᑎᓯᐎᓐ, ᓀᔥᑕ ᑭᔅᑌᓕᑖᑯᓯᐎᓐ, ᓀᔥᑕ ᑲᔥᑭᐅᐎᓐ, ᑲᑕ ᐎ ᐋᔭᐤ ᐊᓇ ᑳ ᐊᐱᑦ ᐅᑭᒪᐗᐱᐎᓂᒃ, ᓀᔥᑕ ᒫᓂᔥᒑᓂᔑᔥ ᑳᑭᑫ ᓀᔥᑕ ᑳᑭᑫ᙮

¹⁴ ᐊᓂᑭ ᓀᐤ ᐅᐱᒫᑎᓴᒃ ᒫᑲ ᑮ ᐃᑗᐗᒃ, ᐁᒣᓐ᙮ ᐊᓂᑭ ᓂᔑᑕᓇᐤ ᓀᔥᑕ ᓀᐅᔖᑉ ᑳ ᓂᑳᓀᓕᑖᑯᓯᒋᒃ ᒫᑲ ᑮ ᐸᑭᔑᓋᒃ ᓀᔥᑕ ᑮ ᓇᐗᑭᔅᑕᐌᐗᒃ ᐊᓂᐃ ᑳ ᐱᒫᑎᓯᓕᒋ ᑳᑭᑫ ᓀᔥᑕ ᑳᑭᑫ᙮