ᑭᔅᑫᓕᑖᑯᑖᑫᐎᓐ 22 - ᐅᔅᑭ ᑎᔅᑌᒥᓐᑦ1 ᓂ ᑮ ᐙᐸᑎᓕᒃ ᒫᑲ ᐁ ᐸᓓᑲᒃ ᓯᐱ ᐁ ᐱᒫᑎᓯᐎᓂ ᓂᐱᐗᒃ, ᐁ ᐙᓭᑲᒥᒃ ᑖᐱᔅᑯᒡ ᒪᔅᑾᒥ, ᐁ ᐅᒋᐸᓕᒃ ᑭᒋᒪᓂᑐ ᐅᑦ ᐅᑭᒪᐗᐱᐎᓂᒃ ᓀᔥᑕ ᒫᓂᔥᒑᓂᔑᔥ᙮ 2 ᑌᑖᐎᒡ ᐱᒧᑌᔅᑲᓈᒃ ᐊᓐᑕ, ᓀᔥᑕ ᐊᔨᑕᐗᑳᒻ ᓯᐱᒃ, ᑮ ᐃᑕᐤ ᐱᒫᑎᓯᐎᓂ ᒥᔅᑎᒃ, ᑳ ᓂᑖᐎᑭᑖᑦ ᓂᔓᔖᑉ ᑐᐎ ᒥᓂᔕ, ᓀᔥᑕ ᑳ ᒥᓂᔑᐎᑦ ᒥᓯᐌ ᑕᑐ ᐱᓯᒧᒃ: ᒥᔅᑎᒃ ᒫᑲ ᐅ ᓂᐱᔑᒪ ᑲᑕ ᐅᒋ ᒥᓇᐗᒋᐊᐗᒃ ᑳ ᑕᑐᔅᑳᓀᓯᒋᒃ ᐃᓕᓕᐗᒃ᙮ 3 ᓇᒪᐎᔅᑳᑦ ᒫᑲ ᒥᓇ ᑲᑕ ᐃᑕᑾᓐ ᒪᒐᑭᒥᐌᐎᓐ: ᒫᑲ ᐅᑦ ᐅᑭᒪᐗᐱᐎᓐ ᑭᒋᒪᓂᑐ ᓀᔥᑕ ᒫᓂᔥᒑᓂᔑᔥ ᐁᑯᑕ ᑫ ᐃᑕᑾᓂᓕᒃ; ᑲᑕ ᐊᑑᔅᑫᔅᑖᑯ ᒫᑲ ᐅᑦ ᐊᑑᔅᑫᓛᑲᓇ: 4 ᑲᑕ ᐙᐸᑕᒬᐗᒃ ᒫᑲ ᐅᑖᔅᑕᒥᑯᓕᐤ; ᓀᔥᑕ ᐅᑦ ᐃᔑᓂᑳᓱᐎᓐ ᑲᑕ ᐃᑕᑾᓂᓕᐤ ᐅᔅᑲᑎᑯᐙᒃ᙮ 5 ᓇᒪᐎᓚ ᒫᑲ ᐊᓐᑕ ᑲᑕ ᑎᐱᔅᑲᐤ; ᓇᒪ ᓀᔥᑕ ᓇᑕᐌᓕᑕᒶᒃ ᐙᔅᑌᓇᒫᑲᓂᓕᐤ, ᓇᒪ ᓀᔥᑕ ᐱᓯᒻ ᐅ ᐙᔅᑌᐎᓐ; ᐌᓴ ᐙᔅᑌᓇᒫᑯᐗᒃ ᑭᒋᒪᓂᑐᐗ: ᑲᑕ ᑎᐯᓕᒋᑫᐗᒃ ᒫᑲ ᑳᑭᑫ ᓀᔥᑕ ᑳᑭᑫ᙮ ᑫ ᑕᑯᔑᒃ ᒋᓴᔅ 6 ᓂ ᑮ ᐃᑎᒃ ᒫᑲ, ᐅᐅ ᐃᑗᐎᓇ ᒀᔭᔅᑭᑎᒪᑲᓋ ᓀᔥᑕ ᑖᐺᒪᑲᓋ: ᐅᑎᐯᓕᒋᑫᐤ ᒫᑲ ᐅ ᑭᒋᒪᓂᑐᒥᐙᐗ ᐸᓓᑭ ᐅᑭᔅᑭᐙᐃᑫᐗᒃ ᑮ ᐯᒋᑎᔕᐌᐤ ᐅᑦ ᐁᓐᒐᓕᒪ ᑭᒋ ᐙᐸᑎᓛᓕᒋ ᐅᑦ ᐊᑑᔅᑫᓛᑲᓇ ᐊᓂᐃ ᐎᐸᒡ ᑫ ᐃᑭᓂᓕᑭ᙮ 7 ᒫᑎᑲ, ᐎᐸᒡ ᓂ ᑕᑯᔑᓂᓐ: ᔕᐌᓕᑖᑯᓯᐤ ᐊᓇ ᑳ ᑲᓇᐌᓕᑕᒃ ᑳ ᐃᑗᒫᑲᓂᓕᒃ ᑫᔅᑭᐙᐃᑫᐎᓐ ᐅᑕ ᒪᓯᓇᐃᑲᓂᒃ᙮ 8 ᓂᓚ ᒑᓐ ᒫᑲ ᓂ ᑮ ᐙᐸᑌᓐ ᐅᐅ ᑫᒀᓇ, ᓀᔥᑕ ᓂ ᑮ ᐯᑌᓐ᙮ ᐃᔅᐱ ᒫᑲ ᑳ ᑮ ᐯᑕᒫᓐ ᓀᔥᑕ ᐙᐸᑕᒪᓐ, ᓂ ᑮ ᐸᑭᔑᓂᓐ ᑭᒋ ᓇᐗᑭᔅᑖᑫᐗᒃ ᐅᓯᑎᒃ ᐊᓇ ᐁᓐᒐᓪ ᑳ ᑮ ᐙᐸᑎᓕ ᐅᐅ ᑫᒀᓇ᙮ 9 ᐁᑯ ᐁᔑᑦ, ᔮᑾ ᐁᑳ ᑐᑕ: ᐌᓴ ᓂᓚ ᑮᒋᐊᑑᔅᑫᓛᑲᓐ, ᓀᔥᑕ ᓂᑦ ᐊᔑᑕᑭᒥᑲᐎᓐ ᑭᒋᔖᓇᒃ ᐅᑭᔅᑭᐙᐃᑫᐗᒃ, ᓀᔥᑕ ᐊᓂᑭ ᑳ ᑲᓇᐌᓕᑕᑭᒃ ᐃᑗᐎᓇ ᐅᒪ ᒪᓯᓇᐃᑲᓂᒃ ᑳ ᐃᑕᑾᓂᓕᑭ; ᓇᐗᑮᔅᑕᐤ ᑭ ᒪᓂᑐ᙮ 10 ᓂᑎᒃ ᓀᔥᑕ, ᐁᑳᐎᓚ ᐊᑯᔅᑭᐗᓴ ᑳ ᐃᑗᒪᑲᒃ ᑭᔅᑭᓄᐙᒋ ᐋᔭᒥᐎᓐ ᐅᑕ ᒪᓯᓇᐃᑲᓂᒃ; ᐌᓴ ᑫᑳᑦ ᐅᑎᒋᐸᓕᐤ᙮ 11 ᐊᓇ ᑳ ᒪᒑᑎᓰᑦ, ᐁᑯᔑ ᑫᔮᐸᒡ ᑲᑕ ᒪᒑᑎᓯᐤ; ᐊᓇ ᓀᔥᑕ ᑳ ᐎᓂᓯᑦ, ᐁᑯᔑ ᑫᔮᐸᒡ ᑲᑕ ᐎᓂᓯᐤ; ᐊᓇ ᓀᔥᑕ ᑳ ᒀᔭᔅᑭᑖᑎᓰᑦ ᐁᑯᔑ ᑫᔮᐸᒡ ᑲᑕ ᒀᔭᔅᑭᑖᑎᓯᐤ; ᐊᓇ ᓀᔥᑕ ᑳ ᐸᓓᑭᓯᑦ ᐁᑯᔑ ᑫᔮᐸᒡ ᑲᑕ ᐸᓓᑭᓯᐤ᙮ 12 ᒫᑎᑲ, ᒫᑲ, ᐎᐸᒡ ᓂ ᑕᑯᔑᓂᓐ; ᓂ ᑎᐸᐊᒫᑫᐎᓐ ᓀᔥᑕ ᓂ ᐎᒉᐎᑯᓐ, ᑭᒋ ᒥᓚᒃ ᒥᓯᐌ ᑕᑐ ᐃᓕᓕᐤ ᑫ ᐃᔑᓈᑾᓂᓕᒃ ᐅᑦ ᐊᑑᔅᑫᐎᓐ᙮ 13 ᓂᓚ ᐁᐗᑯ ᐋᓪᐸ ᓀᔥᑕ ᐅᒥᑲ, ᒪᐗᒋ ᓃᔥᑕᒻ ᓀᔥᑕ ᐃᔅᒀᔮᒡ, ᓃᔥᑕᒻ ᓀᔥᑕ ᒫᒋᒡ᙮ 14 ᔕᐌᓕᑖᑯᓯᐗᒃ ᐊᓂᑭ ᑳ ᑐᑕᒸᒋᒃ ᐅ ᑲᑫᔅᑴᐎᓂᓕᐗ, ᒀᔭᔉ ᑭᒋ ᑮ ᐋᔭᐙᒋᒃ ᐱᒫᑎᓯᐎᓂ ᒥᔅᑎᑾ, ᓀᔥᑕ ᔕᐳ ᑭᒋᐃᔥᒀᑌᒥᒃ ᑭᒋ ᐱᑐᑫᒋᒃ ᐃᑖᐎᓂᒃ᙮ 15 ᐌᓴ ᐗᓚᐎᑎᒥᒃ ᐃᑕᐗᒃ ᐊᑎᒶᒃ, ᓀᔥᑕ ᒥᑌᐗᒃ, ᓀᔥᑕ ᐅᐱᔑᒀᑎᓴᒃ, ᓀᔥᑕ ᐅᓂᐹᔨᐌᔅᑲᒃ, ᓀᔥᑕ ᑳ ᓇᐗᑮᔅᑕᐙᒋᒃ ᒪᓂᑐᑳᓇ, ᓀᔥᑕ ᒥᓯᐌ ᑕᑐ ᐊᐌᓇ ᐁ ᓵᑭᑖᑦ ᓀᔥᑕ ᐁ ᐅᔑᑖᑦ ᑭᓛᔅᑭᐎᓂᓕᐤ᙮ 16 ᓂᓚ ᒋᓴᔅ, ᓂ ᑮ ᐃᔑᑎᔕᐗᐤ ᓂᑦ ᐁᓐᒐᓕᒻ ᑭᒋ ᐋᓕᒧᑕᒫᑖᒃ ᐅᐅ ᑫᒀᓇ ᐃᑕ ᐁ ᐃᑖᒋᒃ ᒫᒪᐎᐋᔭᒥᐋᐗᒃ᙮ ᓂᓚ ᐁᐗᑯ ᐅᒉᐱᑯᒻ ᓀᔥᑕ ᐅᑦ ᐊᐙᔑᒥᔕ ᑌᐱᑦ, ᓀᔥᑕ ᑳ ᐙᓯᓱᑦ ᓀᔥᑕ ᐙᐸᓇᒐᒃ᙮ 17 ᐊᒑᒃ ᒫᑲ ᓀᔥᑕ ᐅᔥᑭᑴᐙᓐ ᐃᑗᐗᒃ, ᐋᔅᑕᒻ᙮ ᐊᓇ ᒫᑲ ᑳ ᐯᑕᒃ ᐁᑯᔑ ᑲᑕ ᐃᑗᐤ, ᐋᔅᑕᒻ᙮ ᐊᓇ ᓀᔥᑕ ᑳ ᓄᑌᔮᐸᑴᑦ ᐁᑯᔑ ᑲᑕ ᐯᒋ ᐃᑐᑌᐤ: ᐊᐌᓇ ᒫᑲ ᐁᑌᓕᑕᒧᑴ, ᐁᑯᔑ ᒧᔐ ᑲᑕ ᐅᑎᓇᒻ ᐱᒫᑎᓯᐎᓂ ᓂᐱᓕᐤ᙮ ᐁ ᑭᔑᐱᐸᓂᒃ 18 ᐌᓴ ᓂᑦ ᐃᑖᒋᒧᔅᑕᐗᐤ ᒥᓯᐌ ᑕᑐ ᐃᓕᓕᐤ ᑳ ᐯᑕᒃ ᑳ ᐃᑗᒪᑲᓂᓕᒃ ᑭᔅᑭᐙᐃᑫᐎ ᐋᔮᒥᐎᓂᓕᐤ ᐅᑕ ᒪᓯᓇᐃᑲᓂᒃ, ᑮᔥᐱᓐ ᐊᐌᓇ ᐃᓕᓕᐤ ᑫ ᓚᑭᑖᑴ ᐅᐅ ᑫᒀᓇ, ᑭᒋᒪᓂᑐ ᑲᑕ ᓚᑭᑕᒪᐌᐤ ᐊᓂᐃ ᐋᑯᐃᑖᔅᐱᓀᐎᓇ ᑳ ᒪᓯᓇᐃᑳᑌᓕᑭ ᐅᒪ ᒪᓯᓇᐃᑲᓂᒃ: 19 ᑮᔥᐱᓐ ᒫᑲ ᐊᐌᓇ ᐃᓕᓕᐤ ᑫ ᐃᑲᑌᓇᒧᑴ ᑳ ᐃᑗᒪᑲᓂᓕᒃ ᐅᒪ ᑭᔅᑭᐙᐃᑫᐎ ᐋᔭᒥᐎᓐ ᒪᓯᓇᐃᑲᓂᒃ, ᑭᒋᒪᓂᑐ ᑲᑕ ᐃᑲᑌᓇᒬᐤ ᐅ ᑎᐯᓕᑖᑯᓯᐎᓂᓕᐤ ᐱᒫᑎᓯᐎᓂ ᒪᓯᓇᐃᑲᓂᒃ ᐅᒋ, ᓀᔥᑕ ᐸᓓᑭ ᐃᑖᐎᓂᒃ ᐅᒋ, ᓀᔥᑕ ᐊᓂᐃ ᑫᒀᓇ ᐅᒋ ᑳ ᒪᓯᓇᐃᑳᑌᑭ ᐅᒪ ᒪᓯᓇᐃᑲᓂᒃ᙮ 20 ᐊᓇ ᑳ ᑎᐹᑐᑕᒃ ᐅᐅ ᑫᒀᓇ ᐃᑗᐤ, ᑫᒋᓈᔥ ᐎᐸᒡ ᓂ ᑕᑯᔑᓂᓐ᙮ ᐁᒣᓐ: ᐁᑯᔑ ᐃᔑ ᑕᑯᔑᓐ, ᑌᐯᓕᒋᑫᔭᓐ ᒋᓴᔅ᙮ 21 ᐅ ᔕᐌᓕᒋᑫᐎᓐ ᑭ ᑎᐯᓕᒋᑫᒥᓇᐤ ᒋᓴᔅ ᙭ ᑭ ᑳ ᐎ ᐎᒉᐎᑯᐙᓇᐗᐤ ᒥᓯᐌ ᐁ ᐃᑕᔑᔦᒃ᙮ ᐁᒣᓐ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society