ᑭᔅᑫᓕᑖᑯᑖᑫᐎᓐ 21 - ᐅᔅᑭ ᑎᔅᑌᒥᓐᑦᐊᓂᒪ ᐅᔥᑭ ᑭᒋᑭᔑᑯᒃ ᓀᔥᑕ ᐊᓂᒪ ᐅᔥᑭ ᐊᔅᑭ 1 ᓂ ᑮ ᐙᐸᑌᓐ ᒫᑲ ᐅᔥᑭ ᑭᔑᒃ ᓀᔥᑕ ᐅᔥᑭ ᐊᔅᑭ: ᐌᓴ ᓃᔥᑕᒻ ᑭᔑᒃ ᓀᔥᑕ ᐊᔅᑭ ᑮ ᐌᐱᐸᓕᐗ; ᓇᒪ ᓀᔥᑕ ᑫᔮᐸᒡ ᑮ ᐃᑕᑾᓐ ᑭᒋᑲᒥ᙮ 2 ᓂᓚ ᒑᓐ ᒫᑲ ᓂ ᑮ ᐙᐸᑌᓐ ᐸᓓᑭ ᐃᑖᐎᓐ, ᐅᔥᑭ ᒋᕉᓴᓚᒻ, ᐁ ᐯᒋ ᐅᒋ ᓛᔑᐸᓕᒃ ᑭᒋᒪᓂᑐ ᑭᒋᑭᔑᑯᒃ, ᐁ ᐋᔦᔅᑲᐎᑖᓂᐗᒃ ᑖᐱᔅᑯᒡ ᐅᔥᑭᔅᑴᐙᓐ ᐁ ᐙᐌᔑᐅᑦ ᐅ ᓈᐯᒪ ᐅᒋ᙮ 3 ᓂ ᑮ ᐯᑌᓐ ᒫᑲ ᑭᒋ ᐯᑖᑯᓯᐎᓐ ᑭᒋᑭᔑᑯᒃ ᐅᒋ ᐁ ᐃᑗᒪᑲᒃ, ᒫᑎᑲ ᑭᒋᒪᓂᑐ ᐎᑭ ᐃᑕᑾᓂᓕᐤ ᐃᑕ ᐁ ᐃᑖᓕᒋ ᐃᓕᓕᐗ, ᑲᑕ ᐎᒋᑕᔑᑫᒣᐤ ᒫᑲ, ᑲᑕ ᐅᑦ ᐃᓕᓕᒥᐤ ᒫᑲ, ᑭᒋᒪᓂᑐ ᑫᒋᐙᒃ ᓀᔥᑕ ᑲᑕ ᐎᒉᐌᐤ, ᓀᔥᑕ ᑲᑕ ᐅ ᑭᒋᒪᓂᑐᒥᒥᑯᐗᒃ᙮ 4 ᑭᒋᒪᓂᑐ ᒫᑲ ᑲᑕ ᑳᓯᐊᒬᐤ ᒥᓯᐌ ᑳ ᐅᒋᑲᐙᐱᓕᒋ ᐅᔅᑭᔑᑯᓕᒃ; ᓇᒪᐎᔅᑳᑦ ᒥᓇ ᒫᑲ ᑲᑕ ᐃᑕᑾᓐ ᓂᐱᐎᓐ, ᓇᒪ ᓀᔥᑕ ᒥᔕᒣᓕᑕᒧᐎᓐ, ᓇᒪ ᓀᔥᑕ ᒫᑐᐎᓐ, ᓇᒪ ᓀᔥᑕ ᒥᓇ ᑲᑕ ᐃᑕᑾᓐ ᐎᓴᑫᓕᑕᒧᐎᓐ: ᐌᓴ ᑳᔮᔥ ᑫᒀᓇ ᑮ ᐌᐱᐸᓕᐗ᙮ 5 ᐊᓇ ᒫᑲ ᑳ ᐊᐱᑦ ᐅᑭᒪᐗᐱᐎᓂᒃ ᑮ ᐃᑗᐤ, ᒫᑎᑲ, ᒥᓯᐌ ᑫᒀᓇ ᓂᑦ ᐅᔥᑭᑖᓐ᙮ ᓂ ᑮ ᐃᑎᒃ ᒫᑲ, ᒪᓯᓇᐊ; ᐌᓴ ᐅᐅ ᐋᔭᒥᐎᓇ ᑖᐺᒪᑲᓋ ᓀᔥᑕ ᑾᔹᔅᑭᑎᒪᑲᓋ᙮ 6 ᓂ ᑮ ᐃᑎᒃ ᒫᑲ, ᑭᔑᒋᑳᑌᐤ᙮ ᓂᓚ ᐁᐗᑯ ᐋᓪᐸ ᓀᔥᑕ ᐅᒣᑲ, ᐊᓇ ᒫᐗᒋ ᓃᔥᑕᒻ ᓀᔥᑕ ᒫᒋᒡ᙮ ᓂ ᑳ ᒥᓇᐊᐤ ᒧᔐ ᐊᓇ ᑳ ᓄᑌᔮᐸᑴᑦ ᐁ ᐃᔑ ᒧᔅᑭᒋᐗᓂᓕᒃ ᐱᒫᑎᓯᐎᓂ ᓂᐱᓕᐤ᙮ 7 ᐊᓇ ᑳ ᔖᑯᒋᐃᐌᑦ ᑲᑕ ᐊᑎ ᐋᔭᐤ ᐅᐅ ᑫᒀᓇ; ᓂ ᑳ ᐅ ᑭᒋᒪᓂᑐᒥᒥᒃ ᒫᑲ, ᓂᓚ ᓀᔥᑕ ᓂ ᑳ ᐅᑯᓯᓯᒪᐤ᙮ 8 ᒫᑲ ᑳ ᓭᑭᓯᒋᒃ, ᓀᔥᑕ ᐁᑳ ᑳ ᑖᐺᑕᑭᒃ, ᓀᔥᑕ ᑳ ᓂᐹᓯᓈᑯᓯᒋᒃ, ᓀᔥᑕ ᑳ ᐱᔑᒀᑎᓯᒋᒃ, ᓀᔥᑕ ᒥᑌᐗᒃ, ᓀᔥᑕ ᑳ ᓇᐗᑮᔅᑕᐙᒋᒃ ᒪᓂᑐᑳᓇ, ᓀᔥᑕ ᒥᓯᐌ ᐅᑭᓛᔅᑭᔅᑲᒃ, ᑲᑕ ᐋᔮᐗᒃ ᐅ ᑎᐸᐊᒫᑯᓯᐎᓂᐗᐤ ᐊᓂᒪ ᓵᑲᐃᑲᓂᒃ ᐃᑕ ᐁ ᐗᓚᑌᒃ ᐃᔥᑯᑌᐤ ᓀᔥᑕ ᐅᓵᐙᐱᔅᑯᓯᓂ; ᐁᐗᒀᓂᒪ ᓂᔓ ᓂᐱᐎᓐ᙮ ᐅᔥᑭ ᒋᕉᓴᓚᒻ 9 ᓂ ᑮ ᐯᒋ ᓈᑎᒃ ᒫᑲ ᐯᔭᒃ ᐁ ᐃᑕᓯᒋᒃ ᐊᓂᑭ ᓂᔂᔅ ᐁᓐᒐᓚᒃ, ᑳ ᑮ ᐋᔮᒋᒃ ᐊᓂᐃ ᓂᔂᔅ ᐅᓛᑲᓂᔕ ᐁ ᓵᑲᔅᑭᓀᓕᑭ ᐊᓂᐃ ᓂᔂᔅ ᒫᒋᒡ ᐋᑯᐃᑖᔅᐱᓀᐎᓇ, ᐁ ᐃᑗᑦ, ᐅᑕ ᐯᒋ ᐃᑐᑌ, ᑭ ᑳ ᐙᐸᑎᓕᑎᓐ ᒫᑲ ᐅᔥᑭᔅᑴᐙᓐ, ᒫᓂᔥᒑᓂᔑᔥ ᐎᐗ᙮ 10 ᓂ ᑮ ᐃᑐᑕᐃᒃ ᒫᑲ ᐊᒑᑯᒃ ᑭᒋ ᓀᔥᑕ ᐁ ᐃᔅᐸᑎᓈᒃ ᐗᒌᒃ, ᐁᑯ ᐎᐋᐸᑎᓕᑦ ᐊᓂᒪ ᑭᒋ ᐃᑖᐎᓐ, ᐸᓓᑭ ᒋᕉᓴᓚᒻ, ᐁ ᐅᒋ ᓛᔑᐸᓕᒃ ᑭᒋᒪᓂᑐ ᑭᒋᑭᔑᑯᒃ; 11 ᐁ ᐋᔮᒃ ᑭᒋᒪᓂᑐ ᐅ ᑭᔅᑌᓕᑖᑯᓯᐎᓐ: ᐁ ᐙᓯᓱᒃ ᒫᑲ ᑖᐱᔅᑯᒡ ᐊᓯᓂ ᒫᐗᒡ ᐁ ᒥᓗᔑᔑᑦ ᑮ ᐃᔑᓈᑾᓐ, ᑖᐱᔅᑯᒡ ᐅᑎ ᒑᔅᐸᕐ ᐊᓯᓂ, ᐁ ᔖᐳᐙᓱᒃ ᑖᐱᔅᑯᒡ ᒪᔅᑾᒥ; 12 ᑮ ᐋᔮᒪᑲᓐ ᒫᑲ ᑭᒋ ᓀᔥᑕ ᐁ ᐃᔥᐹᒃ ᒣᓂᑲᓐ, ᓀᔥᑕ ᓂᔓᔖᑉ ᑭᒋᐃᔥᒀᑌᒪ, ᓀᔥᑕ ᐊᓐᑕ ᐃᔥᒀᑌᒥᒃ ᓂᔓᔖᑉ ᐁᓐᒐᓚᒃ, ᐁᑯᑕ ᓀᔥᑕ ᐎᓗᐎᓇ ᐁ ᒪᓯᓇᐃᑳᑌᑭ, ᐁᐗᒀᓂᐃ ᐅᑦ ᐃᔑᓂᑳᓱᐎᓂᐙᐗ ᐊᓂᑭ ᓂᔓᔖᑉ ᑳ ᑕᑐᑌᐎᓯᒋᒃ ᐃᔅᕃᐃᓪ ᐅᑦ ᐊᐙᔑᒥᔕ᙮ 13 ᐙᐸᓄᑖᒃ ᐃᑌᑫ ᓂᔅᑐ ᑭᒋᐃᔥᒀᑌᒪ; ᑭᐌᑎᓄᑖᒃ ᐃᑌᑫ ᓂᔅᑐ ᑭᒋᐃᔥᒀᑌᒪ; ᔖᐗᓄᑖᒃ ᐃᑌᑫ ᓂᔅᑐ ᑭᒋᐃᔥᒀᑌᒪ; ᓀᔥᑕ ᓂᑳᐯᐊᓄᑖᒃ ᐃᑌᑫ ᓂᔅᑐ ᑭᒋᐃᔥᒀᑌᒪ᙮ 14 ᐊᓂᒪ ᐃᑖᐎᓂ ᒣᓂᑲᓐ ᒫᑲ ᑮ ᐋᔮᒪᑲᓐ ᓂᔓᔖᑉ ᐅᓚᔅᑕᒋᑫᐎᓇ, ᐁᑯᑕ ᒫᑳ ᐁᑕᑾᓂᓕᑭ ᐅᑦ ᐃᔑᓂᑳᓱᐎᓂᐙᐗ ᓂᔓᔖᑉ ᐅᑦ ᐊᐸᔅᑕᓕᒪ ᒫᓂᔥᒑᓂᔑᔥ᙮ 15 ᐊᓇ ᒫᑲ ᑳ ᐋᔭᒥᐃᑦ ᑮ ᐋᔭᐤ ᐅᓵᐎᔔᓕᐊᓈᐱᔉ ᐎᐹᔅᑯᓕᐤ ᑭᒋ ᑎᐸᐊᒃ ᐃᑖᐎᓂᓂᐤ, ᓀᔥᑕ ᐃᔥᒀᑌᒪ ᓀᔥᑕ ᒣᓂᑲᓂᓕᐤ᙮ 16 ᐃᑖᐎᓐ ᒫᑲ ᓀᐗᔭᒃ ᑮ ᐃᔑᐌᔭᐤ, ᐁ ᐃᔅᒀᒃ ᐁᑯ ᓀᔥᑕ ᐁ ᐃᔅᐱᒋ ᐋᓚᑲᔥᑳᒃ᙮ ᓀᔥᑕ ᐎᐹᔅᑯᓕᐤ ᑮ ᐅᒋ ᑎᐸᐊᒡ ᐃᑖᐎᓂᓕᐤ, ᓂᔓᔖᑄᐤ ᑭᒋᒥᑖᑐᒥᑕᓇᐤ ᑎᐹᐹᓇ᙮ ᐁ ᐃᔅᒀᒃ, ᓀᔥᑕ ᐁ ᐃᔅᐱᒋ ᐋᓚᑲᔥᑳᒃ ᓀᔥᑕ ᐃᔥᐹᒃ ᑖᐱᔅᑯᒡ᙮ 17 ᑮ ᑎᐸᐊᒻ ᓀᔥᑕ ᒣᓂᑲᓂᓕᐤ, ᒥᑖᑐᒥᑕᓇᐤ ᓀᒥᑕᓈᐤ ᓀᔥᑕ ᓀᐅᔖᑉ ᑭᐤᐱᑕ, ᐅ ᑎᐹᔨᑲᓂᒃ ᐃᓕᓕᐤ ᐃᔑ ᐁᐗᒀᓇ ᐁᓐᒐᓪ᙮ 18 ᒣᓂᑲᓐ ᒫᑲ ᒑᔅᐸᑦ ᑮ ᐅᒋ ᐅᔑᑖᓂᐗᓐ: ᐃᑖᐎᓐ ᒫᑲ ᑮ ᒣᒧᒋ ᐅᓵᐎᔔᓕᐋᓈᐱᔅᑯᐗᓐ, ᑖᐱᔅᑯᒡ ᐁ ᔖᐳᐙᓱᒃ ᐙᓭᓂᑖᑲᓐ᙮ 19 ᓀᔥᑕ ᒣᓂᑲᓂ ᐅᓚᔅᑕᒋᑫᐎᓇ ᒥᓯᐌ ᑐᐎ ᒣᓗᔑᔑᒋᒃ ᐊᓯᓂᔭᒃ ᑮ ᐅᒋ ᐙᐌᔑᒋᑳᑌᐤ᙮ ᐊᓂᒪ ᓃᔅᑕᒻ ᐅᓚᔅᑕᒋᑫᐎᓐ ᐁᐗᑯ ᒑᔅᐸᕐ; ᐊᓂᒪ ᓂᔓ, ᓵᐸᐃᕐ; ᐊᓂᒪ ᓂᔅᑐ, ᑳᓪᓯᑐᓂ; ᐊᓂᒪ ᓀᐤ, ᐁᒥᕋᓪᑦ; 20 ᐊᓂᒪ ᓃᔮᓕᓪ, ᓴᕐᑕᓂᒃᔅ; ᐊᓂᒪ ᓂᑯᑣᔅ, ᔮᕐᑎᔭᔅ; ᐊᓂᒪ ᓂᔂᔅ, ᒃᕆᓱᓚᐃᑦ; ᐊᓂᒪ ᔭᓈᓀᐤ, ᐯᕋᓪ; ᐊᓂᒪ ᔖᑭᑖᑦ, ᑐᐹᔅ; ᐊᓂᒪ ᒥᑖᑦ, ᒃᕌᓱᑉᕌᓴᔅ; ᐊᓂᒪ ᐯᔭᑯᔖᑉ, ᒑᓯᓐᑦ; ᐊᓂᒪ ᓂᔓᔖᑉ ᐋᒥᑎᔅᑦ᙮ 21 ᐊᓂᐃ ᓂᔓᔖᑉ ᑭᒋᐃᔥᒀᑌᒪ ᐁᐗᒀᓂᑭ ᓂᔓᔖᑦ ᐁᓴᒃ; ᒥᓯᐌ ᑕᑐ ᑭᒋᐃᔥᒀᑌᒻ ᐯᔭᒃ ᐁᔅ: ᐱᒥᑌᔅᑲᓇᐤ ᒫᑲ ᐃᑖᐎᓂᒃ ᒣᒧᒋ ᑭ ᐅᓴᐎᔔᓕᐋᓈᐱᔅᑯᐗᓐ, ᑖᐱᑺᒡ ᑳ ᔖᐳᐙᓱᒃ ᐙᓭᓂᑖᑲᓐ᙮ 22 ᓇᒪᐎᓚ ᒫᑲ ᓂ ᑮ ᐙᐸᑌᓐ ᑭᒋᐋᔭᒥᐁᐎᑲᒥᒃ ᐊᓐᑕ; ᐌᓴ ᐅᑎᐯᓕᒋᑫᐤ ᑭᒋᒪᓂᑐ ᒥᓯᐌ ᓯᔪᑳᑎᓰᑦ ᓀᔥᑕ ᒫᓂᔥᒑᓂᔑᔥ ᑭᒋᐋᔭᒥᐁᐎᑲᒥᑯᐎᐗᒃ ᐁᑯᑕ᙮ 23 ᐊᓐᑕ ᒫᑲ ᐃᑖᐎᓂᒃ ᐱᓯᒻ ᓇᒪᐎᓚ ᑭ ᓇᑕᐌᓕᒪᐤ, ᓇᒪ ᓀᔥᑕ ᑎᐱᔅᑭᐱᓯᒻ ᑭᒋ ᒐᑳᓯᑫᒋᒃ; ᐌᓴ ᑮ ᐅᒋ ᐙᔅᑌᓂᑳᑌᐤ ᑭᒋᒪᓂᑐ ᐅ ᑭᔅᑌᓕᑖᑯᓯᐎᓐ, ᓀᔥᑕ ᒫᓂᔥᒑᓂᔑᔥ ᐙᓭᔮᓯᐎᓂᐎᐤ ᐁᑯᑕ᙮ 24 ᐊᓂᑭ ᒫᑲ ᑳ ᑕᑐᔅᑳᓀᓯᒋᒃ ᐃᓕᓕᐗᒃ ᑳ ᐱᒫᒋᐋᑲᓂᐎᒋᒃ ᑲᑕ ᐱᒧᑖᑕᒶᒃ ᐁ ᐃᔑ ᐙᓯᓱᓕᒃ: ᐁᑯᑕ ᒫᑲ ᑭᒋᐅᑭᒪᐗᒃ ᐅᑕ ᐊᔅᑮᒃ ᐱᐁᑖᒋᒃ ᐅ ᑭᔅᑌᓕᑖᑯᓯᐎᓂᐗᐤ ᓀᔥᑕ ᐅ ᑭᔅᑎᓯᐎᓂᐗᐤ᙮ 25 ᐊᓂᐃ ᒫᑲ ᑭᒋᐃᔥᒀᑌᒪ ᓇᒪᐎᔅᑲᑦ ᑭᐸᐃᑳᑌᐗ ᒣᒀᒡ ᐁ ᑭᔑᑳᒃ; ᐌᓴ ᓇᒪᐎᓚ ᑲᑕ ᑎᐱᔅᑲᐤ ᐊᓐᑕ᙮ 26 ᐁᑯᑕ ᒫᑲ ᑫ ᐯᑖᒋᒃ ᑳ ᑕᑐᔅᑳᓀᓯᓕᒋ ᐃᓕᓕᐗ ᐅ ᑭᔅᑌᓕᑖᑯᓯᐎᓂᓕᐤ ᓀᔥᑕ ᐅ ᑭᔅᑎᓯᐎᓂᓂᐤ᙮ 27 ᓇᒪᐎᓚ ᒥᑐᓂ ᒫᑲ ᐊᓐᑕ ᑲᑕ ᐱᑐᑫᒪᑲᓐ ᑫᒀᓇ ᑳ ᐎᓂᐃᐌᒪᑲᒃ, ᓇᒪ ᓀᔥᑕ ᑫᒀᓐ ᑳ ᓂᐹᓯᓈᑯᐃᐌᒪᑲᒃ, ᓀᔥᑕ ᐱᑯ ᑳ ᑭᓛᔅᑭᒪᑲᒃ; ᐊᓂᑭ ᐱᑯ ᑳ ᒪᓯᓇᐃᑳᓱᒋᒃ ᒫᓂᔥᒑᓂᔑᔥ ᐅ ᐱᒫᑎᓯᐎᓂ ᒫᓯᓇᐃᑲᓂᒃ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society