ᑭᔅᑫᓕᑖᑯᑖᑫᐎᓐ 20 - ᐅᔅᑭ ᑎᔅᑌᒥᓐᑦᐊᓂᐃ ᑭᒋᒥᑖᑐᒥᑕᓇᐤ ᐱᐳᓇ 1 ᓂ ᑮ ᐙᐸᒪᐤ ᒫᑲ ᐁᓐᒐᓪ ᑭᒋᑭᔑᑯᒃ ᐁ ᐅᒋ ᐯᒋ ᓛᔑᑦ ᐁ ᐋᔮᑦ ᐎᑯᑕᐃᑲᓐ ᐁᑳ ᑳ ᒥᓴᔅᑫᔮᓕᒃ ᐙᑎᑳᓂᓕᐤ, ᓀᔥᑕ ᐱᐙᐱᔅᑴᔭᐱ ᐅᒌᒌᒃ; 2 ᑮ ᐅᑎᑎᓀᐤ ᒫᑲ ᒥᔑᑭᓀᐱᑾ, ᐊᓂᐃ ᑭᔐ ᒥᔑᑭᓀᐱᑾ, ᐁᐗᑯ ᒪᒋᒪᓂᑐ ᓀᔥᑕ ᓭᑖᓐ, ᑮ ᒫᒫᒋᒀᐱᑌᐤ ᒫᑲ ᐃᔥᐱᔥ ᑭᒋᒥᑖᑐᒥᑕᓇᐤ ᐱᐴᓋ, 3 ᑮ ᐌᐱᓀᐤ ᒫᑲ ᐊᓐᑕ ᐁᑳ ᐁ ᒥᓴᔅᑫᔮᒃ ᐙᑎᑳᓂᒃ, ᑮ ᑭᐸᐌᐤ ᒫᑲ, ᓀᔥᑕ ᑮ ᐊᑯᔅᑭᐙᓶᐤ, ᐁᑳᐎᔅᑳᑦ ᒥᓇ ᑭᒋ ᐙᔦᔑᐋᓕᒋ ᑳ ᑕᑐᔅᑳᓀᓱᓕᒋ ᐃᓕᓕᐗ, ᐹᑎᒫ ᑮ ᑎᐱᐸᓕᑾᐌ ᑭᒋᒥᑖᑐᒥᑕᓇᐤ ᐱᐴᓋ: ᐁᑯᔅᐱ ᒫᑲ ᐊᒋᓚᐤ ᑭᒋ ᐋᐸᐙᑲᓂᐎᓕᒋ᙮ 4 ᓂ ᑮ ᐙᐸᑌᓐ ᒫᑲ ᐅᑭᒪᐗᐱᐎᓇ, ᐊᓂᑭ ᓀᔥᑕ ᑳ ᑌᑕᐱᒋᒃ, ᑮ ᒥᓛᐗᒃ ᒫᑲ ᑭᒋ ᑎᐹᔅᑯᓂᑫᒋᒃ: ᓂ ᑮ ᐙᐸᒥᒫᐗ ᒫᑲ ᐅᑦ ᐊᒑᑯᐙᐗ ᐊᓂᑭ ᑳ ᑮ ᑮᔥᑭᑴᐙᑲᓂᐎᒋᒃ ᐅ ᑎᐹᒋᒧᐎᓐ ᒋᓴᔅ ᐅᒋ, ᓀᔥᑕ ᐅᑦ ᐋᔭᒥᐎᓐ ᑭᒋᒪᓂᑐ, ᐁᑳ ᓀᔥᑕ ᑳ ᑮ ᓇᐗᑮᔅᑕᐙᒋᒃ ᐊᓂᐃ ᐊᐌᓯᓴ, ᐁᑳ ᓀᔥᑕ ᐅ ᒪᓯᓕᓕᒥᓕᐗ, ᐁᑳ ᓀᔥᑕ ᑳ ᑮ ᐅᑎᓇᒸᒋᒃ ᐅ ᑭᔅᑭᓄᐙᒋᒋᑲᓂᓕᐤ ᐅᔅᑲᑎᑯᐙᒃ, ᓀᔥᑕᐱᑯ ᐅᒋᒋᐙᒃ; ᑮ ᐎᒋᐱᒫᑎᓯᒣᐗᒃ ᓀᔥᑕ ᑮ ᐎᒋᑎᐯᓕᒋᑫᒣᐗᒃ ᙭ᑕ ᐃᔥᐱᔥ ᑭᒋᒥᑖᑐᒥᑕᓇᐤ ᐱᐴᓋ᙮ 5 ᒫᑲ ᒥᓯᐌ ᑯᑕᑭᔭᒃ ᑳ ᓂᐱᒋᒃ ᓇᒪᐎᓚ ᒥᓇ ᑮ ᐱᒫᑎᓯᐗᒃ ᐹᑎᒫ ᑮ ᐳᓂᐸᓕᑭ ᐊᓂᐃ ᑭᒋᒥᑖᑐᒥᑕᓇᐤ ᐱᐴᓋ᙮ ᐅᒪ ᐁᐗᑯ ᓃᔥᑕᒻ ᐗᓂᔥᑲᐎᓐ᙮ 6 ᔕᐌᓕᑖᑯᓯᐤ ᓀᔥᑕ ᐸᓓᑭᓯᐤ ᐊᓇ ᑳ ᐎᒋᐃᐌᑦ ᓂᔥᑕᒻ ᐗᓂᔥᑲᐎᓂᒃ: ᐅᑯ ᑐᐎ ᓂᔓ ᓂᐱᐎᓂᓕᐤ ᓇᒪᐎᓚ ᑎᐯᓕᒥᑯᐗᒃ, ᒫᑲ ᑲᑕ ᐋᐎᐗᒃ ᑭᒋᒪᓂᑐ ᐅ ᓵᓵᑭᐎᓕᐌᐎᓕᓕᒪ, ᓀᔥᑕ ᙭, ᓀᔥᑕ ᑲᑕ ᐎᒋᑎᐯᓕᒋᑫᒣᐗᒃ ᐃᔥᐱᔥ ᑭᒋᒥᑖᑐᒥᑕᓇᐤ ᐱᐴᓋ᙮ ᑳ ᐸᔅᑭᓚᐙᑲᓂᐎᑦ ᓭᑕᓐ 7 ᐃᔅᐱ ᒫᑲ ᑮ ᑎᐱᐸᓕᑾᐌ ᑭᒋᒥᑖᑐᒥᑕᓇᐤ ᐱᐴᓋ, ᓭᑕᓐ ᑲᑕ ᐋᐸᐗᐤ ᐅ ᑭᐸᐅᑐᐎᑲᒥᑯᒃ ᐅᒋ, 8 ᑲᑕ ᐗᓚᐎᐤ ᒫᑲ ᑭᒋ ᐙᔦᔑᐋᑦ ᑳ ᑕᑐᔅᑳᓀᓯᓕᒋ ᐃᓕᓕᐗ ᐁ ᓀᐗᐤ ᑭᑫᔮᑭ ᐊᔅᑮᒃ, ᑲᒃ ᓀᔥᑕ ᒣᑲᒃ, ᑭᒋ ᒪᐗᒋᐋᑦ ᑭᒋ ᓇᑐᐸᓕᓕᒋ; ᐃᑕᓯᓕᐗ ᒫᑲ ᐃᔥᐱᔥ ᓓᑲᐤ ᑭᒋᑲᒦᒃ᙮ 9 ᑮ ᐃᑐᑌᐗᒃ ᒫᑲ ᐁᔅᐱᒋ ᐋᓚᑲᔥᑳᒃ ᐊᔅᑭᒃ, ᑮ ᐙᔅᑳᔅᑲᐊᒬᐗᒃ ᒫᑲ ᐅ ᑲᐯᔑᐎᓂᓕᐤ ᐅᐸᓓᑭᓴ, ᓀᔥᑕ ᑳ ᓵᑭᑖᓂᐗᓂᓕᒃ ᐃᑖᐎᓂᓕᐤ: ᐃᔥᑯᑌᓕᐤ ᒫᑲ ᑮ ᐯᒋ ᓈᔑᐸᓕᓕᐤ ᑭᒋᒪᓂᑐ ᐅᒋ ᑭᒋᑭᔑᑯᒃ, ᑳ ᓂᔑᐗᓈᒋᐃᑯᒋᒃ᙮ 10 ᒪᒋᒪᓂᑐ ᒫᑲ ᑳ ᑮ ᐙᔦᔑᐋᑦ ᐃᔥᑯᑌᐎ ᓀᔥᑕ ᐅᓵᐙᐱᔅᑯᓯᓂ ᓵᑲᐃᑲᓂᒃ ᑮ ᐃᔑ ᐌᐱᓇᐤ, ᐁᑯᑕ ᐁ ᐃᑖᒋᒃ ᐊᓇ ᐊᐌᓯᔅ ᓀᔥᑕ ᐊᓇ ᓇᔅᐹᒡ ᐅᑭᔅᑭᐙᐃᑫᐤ, ᓀᔥᑕ ᑲᑕ ᑲᒀᑕᑭᐊᐤ ᐁ ᑭᔑᑳᓕᒃ ᓀᔥᑕ ᐁ ᑎᐱᔅᑳᓕᒃ, ᑳᑭᑫ ᓀᔥᑕ ᑳᑭᑫ᙮ ᐊᓂᒪ ᒫᒋᒡ ᑎᐹᔅᑯᓂᑫᐎᓐ 11 ᓂ ᑮ ᐙᐸᑌᓐ ᒫᑲ ᑭᒋ ᐙᐱᔅᑭ ᐅᑭᒪᐗᐱᐎᓐ, ᐊᓇ ᓀᔥᑕ ᑳ ᑌᑕᐱᑦ, ᐊᓇ ᐁ ᑲᓇᐙᐸᑕᒃ ᐊᔅᑭ ᓀᔥᑕ ᑭᔑᒃ ᑮ ᐅᔑᒧᒪᑲᓋ; ᓇᒪ ᒫᑲ ᑮ ᒥᔅᑭᑳᑌᐤ ᐃᑕ ᑫ ᐃᑕᑾᑭ᙮ 12 ᓂ ᑮ ᐙᐸᒫᐗᒃ ᒫᑲ ᑳ ᓂᐱᒋᒃ, ᐁ ᐋᐱᔑᔑᔑᒋᒃ ᓀᔥᑕ ᐁ ᒥᔑᑭᑎᒋᒃ, ᐁ ᐅᑎᔥᑲᐎᑳᐸᐐᔅᑕᐙᒋᒃ ᑭᒋᒪᓂᑐᐗ: ᒪᓯᓇᐃᑲᓇ ᒫᑲ ᑮ ᐋᐸᐃᑳᑌᐗ; ᑯᑕᒃ ᒪᓯᓇᐃᑲᓐ ᓀᔥᑕ ᑮ ᐋᐸᐃᑳᑌᐤ, ᐁᐗᑯ ᐱᒫᑎᓯᐎᓂ ᒪᓯᓇᐃᑲᓐ; ᑳ ᓂᐱᒋᒃ ᒫᑲ ᑮ ᐅᒋ ᑎᐹᔅᑯᓇᐗᒃ ᐊᓂᐃ ᒪᓯᓇᐃᑲᓂᒃ ᑳ ᒪᓯᓇᐃᑳᑌᓕᑭ, ᒬᒋ ᑳ ᑮ ᐃᔑ ᐊᑑᔅᑫᒋᒃ᙮ 13 ᑭᒋᑲᒥ ᓀᔥᑕ ᑮ ᐸᑭᑎᓀᐤ ᑳ ᓂᐱᓕᒋ ᐁᑯᑕ ᑳ ᐃᑖᓕᒋ; ᓀᔥᑕ ᓂᐱᐎᓐ ᓀᔥᑕ ᒋᐸᐃᐊᔅᑭ ᑮ ᐸᑭᑎᓀᐗᒃ ᑳ ᓂᐱᓕᒋ ᐁᑯᑕ ᑳ ᐃᑖᓕᒋ: ᑮ ᑎᐹᔅᑯᓇᐗᒃ ᒫᑲ ᒥᓯᐌ ᐊᐌᓂᑭ ᒬᒋ ᑳ ᑮ ᐃᔑ ᐊᑑᔅᑫᒋᒃ᙮ 14 ᓂᐱᐎᓐ ᒫᑲ ᓀᔥᑕ ᒋᐸᐃᐊᔅᑭ ᑮ ᐃᔑ ᐌᐱᓂᑳᑌᐗ ᐃᔥᑯᑌᐎ ᓵᑲᐃᑲᓂᒃ᙮ ᐁᐗᒀᓂᒪ ᓂᔓ ᓂᐱᐎᓐ᙮ 15 ᒥᓯᐌ ᑕᑐ ᐊᐌᓇ ᒫᑲ ᐁᑳ ᑳ ᒥᔅᑲᐙᑲᓂᐎᑦ ᐁ ᒪᓯᓇᐃᑳᓱᑦ ᐱᒫᑎᓯᐎᓂ ᒪᓯᓇᐃᑲᓂᒃ ᐃᔥᑯᑌᐎ ᓵᑲᐃᑲᓂᒃ ᑮ ᐃᔑ ᐌᐱᓇᐤ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society