ᑭᔅᑫᓕᑖᑯᑖᑫᐎᓐ 19 - ᐅᔅᑭ ᑎᔅᑌᒥᓐᑦ1 ᑳ ᐳᓂᐸᓕᑭ ᐅᐅ, ᓂ ᑮ ᐯᑌᓐ ᐁ ᑭᒋ ᐯᑖᑯᓯᒋᒃ ᒥᒉᑦ ᐃᓕᓕᐗᒃ ᑭᒋᑭᔑᑯᒃ, ᐁ ᐃᑗᒋᒃ, ᐋᓕᓘᔭ; ᐱᒫᒋᐃᐌᐎᓐ, ᓀᔥᑕ ᑭᔅᑌᓕᑖᑯᓯᐎᓐ, ᓀᔥᑕ ᑭᔅᑎᓯᐎᓐ, ᓀᔥᑕ ᑲᔥᑭᐅᐎᓐ ᑲᑕ ᐎ ᐋᔭᐤ ᐅᑎᐯᓕᒋᑫᐤ ᑭ ᑭᒋᒪᓂᑐᒥᓇᐤ: 2 ᐌᓴ ᑖᐺᒪᑲᓂᓕᐗ ᓀᔥᑕ ᒀᔭᔅᑭᑖᑎᓯᒪᑲᓂᓕᐗ ᐅ ᑎᐹᔅᑯᓂᑫᐎᓇ: ᐌᓴ ᑭ ᑎᐹᔅᑯᓀᐤ ᑭᒋ ᐱᔑᒀᑎᓰᔅᑴᐗ, ᐊᓂᐃ ᑳ ᑮ ᒪᒉᓕᑖᑯᑖᓕᑭ ᐊᔅᑭᓕᐤ ᐅ ᐱᔑᒀᑎᓯᐎᓐ ᐅᒋ, ᓀᔥᑕ ᑭ ᐋᔅᑯᒋᐁᐤ ᐅ ᒥᑯᓕᐤ ᐅᒋ ᐅᑦ ᐊᑑᔅᑫᓛᑲᓂᒪ᙮ 3 ᒥᓇ ᒫᑲ ᑮ ᐃᑗᐗᒃ, ᐋᓕᓘᔭ᙮ ᐅ ᑲᔥᑳᐸᓼᐎᓐ ᒫᑲ ᑭ ᐅᐱᐸᓕᓕᐤ ᑳᑭᑫ ᓀᔥᑕ ᑲᑭᑫ᙮ 4 ᐊᓂᑭ ᒫᑲ ᓂᔑᑕᓇᐤ ᓀᔥᑕ ᓀᐅᔕᑉ ᑳ ᓂᑲᓀᓕᑖᑯᓯᒋᒃ, ᐊᓂᑭ ᓀᔥᑕ ᓀᐤ ᐊᐌᓯᓴᒃ, ᐁ ᐸᑭᔑᑭᒃ ᑭ ᓇᐗᑮᔅᑕᐌᐗᒃ ᑭᒋᒪᓂᑐᐗ ᐁ ᐊᐱᓕᒋ ᐅᑭᒫᐗᐱᐎᓂᒃ, ᐁ ᐃᑗᒋᒃ, ᐁᒣᓐ; ᐋᓕᓘᔭ᙮ ᐊᓂᒪ ᒫᓂᔥᒑᓂᔥ ᐅᐎᑭᑐ ᒪᑯᔐᐎᓐ 5 ᐯᑖᑯᓯᐎᓐ ᒫᑲ ᐅᑭᒫᐗᐱᐎᓂᒃ, ᑭ ᐅᒋᐸᓕᐤ, ᐁ ᐃᑗᒪᑲᒃ, ᒫᒥᒋᒥᒃ ᑭ ᑭᒋᒪᓂᑐᒥᓇᐤ ᒥᓯᐌ ᑭᓚᐗᐤ ᐅᑦ ᐊᑑᔅᑫᓛᑲᓇ, ᑭᓚᐗᐤ ᓀᔥᑕ ᑳ ᓇᓂᒌᔅᑕᐌᒃ, ᑳ ᐋᐱᔑᔑᔑᔦᒃ ᓀᔥᑕ ᑳ ᒥᔑᑭᑎᔦᒃ᙮ 6 ᓂ ᑮ ᐯᑌᓐ ᒫᑲ, ᒫᓇ ᐱᑯ ᐁ ᐯᑖᑯᓯᒋᒃ ᐁ ᒫᒪᐎᒥᒉᑎᒋᒃ, ᓀᔥᑕ ᑖᐱᔅᑯᒡ ᐁ ᐃᑎᑖᑾᑭ ᒥᒉᑦ ᓂᐱᔭ, ᓀᔥᑕ ᐁ ᐯᑖᑯᓯᒋᒃ ᑭᒋ ᐅᓂᒥᔅᑭᐗᒃ, ᐁ ᐃᑗᒋᒃ, ᐋᓕᓘᔭ: ᐌᓴ ᐅᑎᐯᓕᒋᑫᐤ ᑭᒋᒪᓂᑐ ᒥᓯᐌ ᓯᔪᑳᑎᓯᑦ ᑎᐯᓕᒋᑫᐤ᙮ 7 ᐁᑯᔑ ᓯᑭᓓᓯᑕᐤ ᓀᔥᑕ ᒧᒋᑫᓕᑖᑕᐤ, ᓀᔥᑕ ᑭᔅᑌᓕᒫᑕᐤ: ᐌᓴ ᐅ ᐎᑭᑐᐎᓐ ᒫᓂᔥᒑᓂᔑᔥ ᐅᑎᒋᐸᓕᓕᐤ, ᐎᐗ ᓀᔥᑕ ᐊᔕᔾ ᑭ ᐙᐌᔑᐅᓕᐗ᙮ 8 ᐎᓚ ᒫᑲ ᑭ ᒥᓚᐤ, ᑭᒋ ᑭᑭᔥᑲᒃ ᒣᓨᔑᓂᓕᒃ ᐙᐱᔅᑫᑭᓂᓕᐤ, ᐁ ᐸᓓᑲᓂᓕᑳ ᓀᔥᑕ ᐁ ᐙᐹᓕᒃ: ᐌᓴ ᒣᓨᔑᒃ ᐙᐱᔅᑫᑭᓐ ᐁᐗᑯ ᐅ ᒀᔭᔅᑭᑖᑎᓯᐎᓂᐗᐤ ᐅᐸᓓᑭᓴᒃ᙮ 9 ᓂ ᑮ ᐃᑎᒃ ᒫᑲ, ᒪᓯᓇᐊ, ᔕᐌᓕᑖᑯᓯᐗᒃ ᐊᓂᑭ ᑳ ᐃᔑ ᓇᑐᒫᑲᓂᐎᒋᑳ ᐅ ᐎᑭᑑᐎ ᓂᐯᑴᐎᓂᒃ ᒫᓂᔥᒑᓂᔑᔥ᙮ ᓂ ᑮ ᐃᑎᒃ ᒫᑲ, ᐅᐅ ᐁᐗᒀᓂᐃ ᐅ ᑖᐺ ᐃᑗᐎᓇ ᑭᒋᒪᓂᑐ᙮ 10 ᓂ ᑮ ᐸᑭᔑᓂᓐ ᒫᑲ ᐅᓯᑎᒃ ᑭᒋ ᓇᐗᑮᔅᑕᐗᒃ᙮ ᓂ ᑮ ᐃᑎᒃ, ᔮᑾ ᐁᑳ ᑐᑖ: ᓂᓚ ᑮᒋᐋᑑᔅᑫᓛᑲᓐ, ᓀᔥᑕ ᓂᑦ ᐊᔑᑕᑭᒥᑲᐎᓐ ᑭᒋᔖᓇᒃ ᑳ ᐋᔭᐙᒋᒃ ᐅ ᑎᐹᒋᒧᐎᓂᓕᐤ ᒋᓴᓴ: ᓇᐗᑮᔅᑕᐤ ᑭᒋᒪᓂᑐ: ᐌᓴ ᐅ ᑎᐹᒋᒧᐎᓐ ᒋᓴᔅ ᐁᐗᑯ ᑳ ᐊᒑᑯᐗᒃ ᑭᔅᑭᐙᐃᑫᐎᓐ᙮ ᐊᓇ ᑳ ᑌᑕᐱᑦ ᑳ ᐗᐱᓯᓕᒋ ᒥᔅᑕᑎᒧ 11 ᓂ ᑮ ᐙᐸᑌᓐ ᒫᑲ ᑭᒋᑭᔑᒃ ᐁ ᐋᐸᐋᔅᑌᒃ, ᒫᑎᑲ, ᒫᑲ, ᐁ ᐙᐱᓯᑦ ᒥᔅᑕᑎᒻ; ᐊᓇ ᒫᑲ ᑳ ᑌᑕᐱᑐᑕᐙᑦ ᑮ ᐃᔑᓂᑳᑕᐤ, ᐅᒀᔭᔅᑭᑎᐤ ᓀᔥᑕ ᐅᑖᐺᐎᐤ, ᒀᔭᔅᑭᑖᑎᓯᐎᓂᒃ ᒫᑲ ᑎᐹᔅᑯᓂᑫᐤ ᓀᔥᑕ ᓇᑐᐸᓕᐤ᙮ 12 ᐅᔅᑭᔑᑾ ᑖᐱᔅᑯᒡ ᐁ ᐗᓚᑌᒃ ᐃᔥᑯᑌᐤ ᑭ ᐃᔑᓈᑾᓂᓕᐗ, ᓀᔥᑕ ᐅᔅᑎᒀᓂᒃ ᑭ ᑭᑭᔥᑲᒻ ᒥᒋᑦ ᐅᑭᒪᐗᔅᑐᑎᓋ; ᑭ ᐋᔭᐤ ᒫᑲ ᐎᓗᐎᓂᓕᐤ ᐁ ᒪᓯᓇᐃᑳᑌᓕᒃ, ᐁᑳ ᐊᐌᓇ ᑳ ᑭᔅᑫᓕᑕᒃ, ᐎᓚ ᑫᒋᐙᒃ ᐱᑯ᙮ 13 ᑭ ᑭᑭᔥᑲᒻ ᒫᑲ ᐊᑯᐅᓂᓕᐤ ᐁ ᑮ ᑭᑖᓂᑳᑌᓕᒃ ᒥᑯᒃ: ᐅᑦ ᐃᔑᓂᑳᓱᐎᓐ ᒫᑲ ᐃᔑᓂᑳᑌᓕᐤ, ᐅᑦ ᐋᔭᒥᐎᓐ ᑭᒋᒪᓂᑐ᙮ 14 ᐊᓂᑭ ᐅᒫᒪᐎᓄᑎᓂᑫᐗᒃ ᒫᑲ ᑭᒋᑭᔑᑯᒃ ᑳ ᐃᑖᒋᒃ ᑭ ᓄᔅᐱᓇᑌᐗᒃ ᐁ ᑌᑕᐱᑐᑕᐙᒋᒃ ᑳ ᐙᐱᓯᓕᒋ ᒥᔅᑕᑎᒶ, ᐁ ᑭᑭᔥᑲᑭᒃ ᑳ ᒥᓨᔑᓂᓕᒃ ᐙᐱᔅᑫᑭᓂᓕᐤ, ᐁ ᐙᐹᓕᒃ ᓀᔥᑕ ᐁ ᐸᓓᑲᓂᓕᒃ᙮ 15 ᐅᑐᓂᒃ ᒫᑲ ᐅᒋᐸᓕᐤ ᐁ ᑳᔖᒃ ᔑᒫᑲᓐ, ᐁᐗᑴᓕᐤ ᑭᒋ ᐅᒋ ᓂᐸᐋᑦ ᑳ ᑕᑐᔅᑳᓀᓯᓕᒋ ᐃᓕᓕᐗ: ᐱᐙᐱᔅᑯᓕᐤ ᒫᑲ ᑲᑕ ᐅᒋ ᑎᐯᓕᒣᐤ: ᑕᑕᑯᔅᑳᑕᒻ ᒫᑲ ᔓᒥᓈᐳ ᒫᑾᐃᑲᓂᓕᐤ ᑳ ᐅᒋᒪᑲᓂᓕᒃ ᐅᑦ ᐊᒀᑎᓯᐎᓂᒃ ᓀᔥᑕ ᐅᑦ ᐋᑯᓚᐌᓯᐎᓂᒃ ᑭᒋᒪᓂᑐ᙮ 16 ᐋᔭᐤ ᓀᔥᑕ ᐅᑦ ᐊᑯᐅᓂᒃ ᓀᔥᑕ ᐅᑆᒥᒃ ᐎᓗᐎᓂᓂᐤ ᐁ ᒪᓯᓇᐃᑳᑌᓕᒃ, ᐅ ᑭᒋᐅᑭᒫᒥᐙᐗ ᑭᒋᐅᑭᒫᐗᒃ, ᓀᔥᑕ ᐅ ᑎᐯᓕᒋᑫᒥᐙᐗ ᐅᑎᐯᓕᒋᑫᐗᒃ᙮ 17 ᓂ ᑮ ᐙᐸᒪᐤ ᒫᑲ ᐁᓐᒐᓪ ᐁ ᓂᐹᐎᑦ ᐱᓯᒧᒃ, ᑭ ᑌᐺᐤ ᒫᑲ ᐁ ᑭᔗᐌᑦ, ᐁ ᐃᑖᑦ ᒥᓯᐌ ᐱᓓᔑᔕ ᑳ ᐸᐸᒥᓛᓕᒋ ᒧᔐᑭᔑᑯᒃ, ᐋᔅᑕᒥᑐᒃ ᒫᒪᐎ ᒫᐗᒋᐃᑐᒃ ᐅ ᓂᐯᑴᐎᓂᒃ ᑫᔅᑎᓯᑦ ᑭᒋᒪᓂᑐ; 18 ᑭᒋ ᒥᒋᐌᒃ ᐅ ᐎᔮᓯᐗᐤ ᑭᒋᐅᑭᒪᐗᒃ, ᓀᔥᑕ ᐅ ᐎᔮᓯᐗᐤ ᓇᑐᐸᓕᐎᑭᒫᐗᒃ, ᓀᔥᑕ ᐅ ᐎᔮᓯᐗᐤ ᓯᔪᑳᑎᓯᒋᒃ ᐃᓕᓕᐗᒃ, ᓀᔥᑕ ᐅ ᐎᔮᓯᐗᐤ ᒥᔅᑕᑎᒶᒃ, ᐊᓂᑭ ᓀᔥᑕ ᑳ ᑌᑕᐱᑐᑕᐙᒋᒃ, ᓀᔥᑕ ᐅ ᐎᔮᓯᐗᐤ ᒥᓯᐌ ᐃᓕᓕᐗᒃ, ᑳ ᑎᐯᓕᒥᑎᓱᒋᒃ ᓀᔥᑕ ᐊᐗᑳᓇᒃ, ᑳ ᐋᐱᔑᔑᒋᒃ ᓀᔥᑕ ᑳ ᒥᔑᑭᑎᒋᒃ᙮ 19 ᓂ ᑮ ᐙᐸᒪᐤ ᒫᑲ ᐊᓇ ᐊᐌᓯᔅ, ᓀᔥᑕ ᑭᒋᐅᑭᒫᐗᒃ ᐊᔅᑮᒃ, ᓀᔥᑕ ᐅ ᒫᒪᐎᓄᑎᓂᑫᒥᐙᐗ ᐁ ᒫᐗᒋᐃᑐᒋᒃ ᑭᒋ ᓇᑐᐸᓖᔅᑕᐙᒋᒃ ᐊᓂᐃ ᑳ ᑌᑕᐱᑐᑕᐙᓕᒋ ᒥᔅᑕᑎᒶ, ᓀᔥᑕ ᐅ ᒫᒪᐎᓄᑎᓂᑫᒥᓕᐗ᙮ 20 ᐊᓇ ᐊᐌᓯᔅ ᒫᑲ ᑭ ᐅᑎᓇᐤ, ᐊᓯᒋ ᐊᓇ ᓀᔥᑕ ᓇᔅᐹᒡ ᐅᑭᔅᑭᐙᐃᑫᐗ ᑳ ᒫᒪᑖᐎ ᐃᔑᒋᑫᔅᑖᑯᑦ, ᐊᓂᐃ ᑳ ᐅᒋ ᐙᔦᔑᐋᑦ ᑳ ᑮ ᐅᑎᓇᒥᓕᒋ ᐅ ᑭᔅᑭᓄᐙᒋᒋᑲᓂᓕᐤ ᐊᐌᓯᓴ, ᓀᔥᑕ ᐊᓂᑭ ᑳ ᓇᐗᑭᔅᑕᐅᒫᒋᒃ ᐅ ᒪᓯᓕᓕᒪ᙮ ᐅᑯ ᒫᑲ ᒫᒪᐤ ᐁ ᐱᒫᑎᓯᒋᒃ ᑮ ᐃᔑᐌᐱᓇᐗᒃ ᐃᔥᑯᑌᐎ ᓵᑲᐃᑲᓂᒃ ᐁ ᐗᓚᑌᒃ ᐅᓵᐙᐱᔅᑯᓯᓂ᙮ 21 ᐊᓂᑭ ᒫᑲ ᑳ ᐃᔥᑯᐸᓕᒋᒃ ᑮ ᓂᐸᐋᐗᒃ ᐅ ᔑᒫᑲᓐ ᐅᒋ ᐊᓇ ᑳ ᑌᑕᐱᑐᑕᐙᑦ ᒥᔅᑕᑎᒶ, ᐊᓂᒪ ᔑᒫᑲᓐ ᐅᑐᓂᒃ ᑳ ᐅᒋᐸᓕᓕᒃ: ᒥᓯᐌ ᓀᔥᑕ ᐱᓓᔑᔕᒃ ᑮ ᑭᔥᐳᐋᐗᒃ ᐅ ᐎᔮᓯᓕᐤ ᐅᒋ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society