ᑭᔅᑫᓕᑖᑯᑖᑫᐎᓐ 14 - ᐅᔅᑭ ᑎᔅᑌᒥᓐᑦᐊᓇ ᒫᓂᔥᒑᓂᔑᔥ ᓀᔥᑕ ᐅᑎᓕᓖᒪ 1 ᓂ ᑮ ᐃᑖᐱᓐ ᒫᑲ, ᒫᑎᑲ ᒫᑲ, ᒫᓂᔥᒑᓂᔑᔥ ᑮ ᓂᐸᐎᐤ ᓵᐃᐊᓐ ᐗᒋᒃ, ᐁ ᐎᒋᑳᐸᐎᔅᑖᑯᑦ ᒫᑲ ᒥᑖᑐᒥᑕᓇᐗᐤ ᓀᔥᑕ ᓂᒥᑕᓇᐤ ᓀᐅᔖᑄᐤ ᑭᒋᒥᑖᑐᒥᑕᓇᐤ, ᐅᑖᐎᔭ ᐅᑦ ᐃᔑᓂᑳᓱᐎᓂᓕᐤ ᐅᔅᑳᑎᑯᓕᒃ ᐁ ᒪᓯᓇᐃᑳᑌᓕᒃ᙮ 2 ᓂ ᑮ ᐯᑌᓐ ᒫᑲ ᐯᑖᑯᓯᐎᓐ ᑭᒋᑭᔑᑯᒃ ᐅᒋ, ᑖᐱᔅᑯᒡ ᐁ ᑭᔗᐌᔮᑲᒪᐊᑭ ᒥᒉᑦ ᓂᐱᐊ, ᓀᔥᑕ ᑖᐱᔅᑯᒡ ᐁ ᓄᑖᑯᓯᑦ ᑭᒋ ᐅᓂᒥᔅᑭᐤ: ᓂ ᑮ ᐯᑕᒸᓐ ᓀᔥᑕ ᐅᑭᑐᒋᑫᐗᒃ ᐅ ᐯᑖᑯᓯᐎᓂᐗᐤ ᐁ ᑭᑐᑖᒋᒃ ᐅ ᑭᑐᒋᑲᓂᐙᐗ: 3 ᑮ ᓂᑲᒧᐗᒃ ᒫᑲ ᒥᑯᔥᑳ ᐅᔥᑭ ᓂᑲᒧᐎᓂᓕᐤ ᐅᑎᔥᑲᐤ ᐅᑭᒪᐗᐱᐎᓂᓕᐤ, ᐅᑎᔥᑲᐤ ᓀᔥᑕ ᐊᓂᐃ ᓀᐤ ᐅᐱᒫᑌᓴ, ᓀᔥᑕ ᐊᓂᐃ ᑳ ᓂᑳᓀᓕᑖᑯᓯᓕᒋ; ᓇᒪᐎᓚ ᐊᐌᓇ ᒫᑲ ᑮ ᑲᔥᑭᑕᐤ ᑭᒋ ᑭᔅᑫᓕᑕᒃ ᐊᓂᐁᓕᐤ ᓂᑲᒧᐎᓂᓕᐤ, ᐱᑯ ᐊᓂᑭ ᒥᑖᑐᒥᑕᓇᐗᐤ ᓀᔥᑕ ᒥᑐᑕᓇᐤ ᓀᐅᔖᑄᐤ ᑭᒋᒥᑖᑐᒥᑕᓇᐤ, ᑳ ᑭ ᐱᒫᒋᐋᑲᓂᐎᒋᒃ ᐊᔅᑮᒃ ᐅᒋ᙮ 4 ᐅᑯ ᐁᐗᒀᓂᑭ ᐁᑳ ᑳ ᑮ ᐎᓂᐃᑯᒋᒃ ᐃᔅᑴᐗ; ᐌᓴ ᐅᔥᑭᓂᑭᐗᒃ; ᐅᑯ ᐁᐗᒀᓂᑭ ᑳ ᓄᔅᐱᓇᑖᒋᒃ ᒫᓂᔥᒑᓂᔑᔕ ᐱᑯ ᐃᑌ ᐁᑐᑌᓕᒋ᙮ ᐅᑯ ᑮ ᐅᒋ ᐱᒫᒋᐋᐗᒃ ᐃᓕᓕᓍᒃ, ᐁ ᐋᐎᓕᒋ ᓂᔥᑕᒻ ᐅ ᓂᑕᐎᑭᑖᑲᓇ ᑭᒋᒪᓂᑐ ᓀᔥᑕ ᒫᓂᔥᒑᓂᔑᔥ᙮ 5 ᐅᑐᓂᐙᒃ ᒫᑲ ᓇᒪᐎᓚ ᑮ ᒥᔅᑭᑳᑌᓕᐤ ᐙᔦᔑᒥᐌᐎᓐ: ᐌᓴ ᒥᑐᓂ ᓇᒪᐎᓚ ᐗᓂᑎᐗᒃ ᐅᑎᔥᑲᐤ ᑭᒋᒪᓂᑐᐗ ᓀᔥᑕ ᐅᑭᒪᐗᐱᐎᓂᓕᐤ᙮ ᐊᓂᑭ ᓂᔅᑐ ᐁᓐᒐᓚᒃ 6 ᓂ ᑮ ᐙᐸᒪᐤ ᒫᑲ ᑯᑕᒃ ᐁᓐᒐᓪ ᐁ ᔖᐳᓛᑦ ᑭᔑᑯᒃ, ᐁ ᐋᔮᑦ ᑳᑭᑫ ᒥᓗᐋᒋᒧᐎᓂᓕᐤ ᑭᒋ ᑲᑫᔅᑭᒫᑦ ᐊᓂᐃ ᐊᔅᑮᒃ ᑳ ᑕᔑᑫᓕᒋ, ᓀᔥᑕ ᒥᓯᐌ ᑳ ᑕᑐᔅᑳᓀᓯᓕᒋ ᐃᓕᓕᐗ, ᓀᔥᑕ ᑳ ᑕᑐᑌᐎᓯᓕᒋ, ᓀᔥᑕ ᐹᐱᑐᔥ ᐁ ᐃᔑᑭᔗᓕᒋ, ᓀᔥᑕ ᐃᓕᓕᐗ, 7 ᐁ ᐃᑗᑦ, ᐁ ᑭᔗᐌᑦ, ᓇᓂᒋᔅᑕᐎᒃ ᑭᒋᒪᓂᑐ, ᑭᔅᑖᒋᒥᒃ ᒫᑲ; ᐌᓴ ᑎᐹᔅᑯᓂᑫᐎᓂ ᑎᐹᔨᑲᓐ ᐋᔕᔾ ᐅᑎᒋᐸᓕᐤ: ᓇᐗᑮᔅᑕᐎᒃ ᒫᑲ ᐊᓇ ᑳ ᑭ ᐅᔑᑖᑦ ᑭᔑᑯᓕᐤ, ᓀᔥᑕ ᐊᔅᑭᓕᐤ, ᓀᔥᑕ ᑭᒋᑲᒥᓕᐤ, ᓀᔥᑕ ᒧᔅᑭᒋᐗᓂᐯᑾ᙮ 8 ᑮ ᐱᒥᓄᔅᐱᓇᔑᐌᐤ ᒫᑲ ᑯᑕᒃ ᐁᓐᒐᓪ, ᐁ ᐃᑗᑦ, ᐹᐱᓚᓐ ᐸᑭᑎᓐ, ᐸᑭᑎᓐ, ᐊᓂᒪ ᑭᒋ ᐃᑖᐎᓐ, ᐁ ᑮ ᑐᑕᐙᑦ ᒥᓯᐌ ᑳ ᑕᑐᔅᑳᓀᓯᓕᒋ ᐃᓕᓕᐗ ᑭᒋ ᒥᓂᑴᓕᒋ ᐊᑯᓚᐌᓯᐎᓂ ᔓᒥᓈᐳᓕᐤ ᐅ ᐱᔑᒀᑎᓯᐎᓂᒃ ᑳ ᐅᒋᐸᓕᓕᒃ᙮ 9 ᐊᓇ ᓂᔅᑐ ᐁᓐᒐᓪ ᓀᔥᑕ ᑮ ᐱᒥᓄᔅᐱᓇᔑᐌᐤ, ᐁ ᐃᑗᑦ, ᐁ ᑭᔗᐌᑦ, ᑮᔥᐱᓐ ᐊᐌᓇ ᓇᐗᑮᔅᑕᐙᑌ ᐊᓂᐃ ᐊᐌᓯᓴ ᓀᔥᑕ ᐅ ᒪᓯᓕᓕᒥᓕᐗ, ᓀᔥᑕ ᐅᑎᓇᒸᑌ ᐅ ᑭᔅᑭᓄᐙᒋᐅᐎᓂᓕᐤ ᐅᔅᑲᑎᑯᒃ, ᓀᔥᑕᐱᑯ ᐅᒌᒌᒃ, 10 ᐁᐗᒀᓇ ᑫ ᒥᓂᑴᑦ ᔓᒥᓈᐳᓕᐤ ᑭᒋᒪᓂᑐ ᐅᑦ ᐊᑯᓚᐌᓯᐎᓂᒃ ᑳ ᐅᒋᐸᓕᓕᒃ, ᑳ ᓯᑭᐌᐱᓂᑳᑌᓕᒃ ᐁᑳ ᐁ ᑭᓕᑲᐤᐃᓂᑳᑌᓕᒃ ᐅ ᑭᓯᐙᓯᐎᓂ ᒥᓂᒀᑲᓂᒃ: ᐃᔥᑯᑌᓕᐤ ᒫᑲ ᓀᔥᑕ ᐅᓵᐙᐱᔅᑯᓯᓂᔭ ᑮ ᐅᒋ ᑲᒀᑕᑭᓯᐗᒃ ᐁ ᑲᓇᐙᐸᒥᑯᒋᒃ ᐸᓓᑭ ᐁᓐᒐᓚ, ᐁ ᑲᓇᐙᐸᒥᑯᒋᒃ ᓀᔥᑕ ᒫᓂᔥᒑᓂᔑᔕ: 11 ᐁ ᑲᔥᑳᐸᑌᓕᒃ ᒫᑲ ᐅ ᑲᒀᑕᑭᓯᐎᓂᐗᐤ ᐅᐱᐸᓕᓕᐤ ᑳᑭᑫ ᓀᔥᑕ ᑳᑭᑫ; ᓇᒪ ᓀᔥᑕ ᐋᓜᐱᐗᒃ ᐁ ᑭᔑᑳᓕᒃ ᓀᔥᑕ ᐁ ᑎᐱᔅᑳᓕᒃ, ᐊᓂᑭ ᑳ ᓇᐗᑮᔅᑕᐙᒋᒃ ᐊᐌᓯᓴ ᓀᔥᑕ ᐅ ᒪᓯᓕᓕᒥᓕᐗ, ᐊᓇ ᓀᔥᑕ ᑳ ᑭᔅᑭᓄᐙᒋᐋᑲᓂᐎᑦ ᐁ ᐃᔑᓂᑳᓱᓕᒋ᙮ 12 ᐅᑕ ᐃᑕᑾᓂᓕᐤ ᐅ ᔑᐱᓚᐌᓯᐎᓂᐗᐤ ᐅᐸᓓᑭᓴᒃ: ᐅᑕ ᐃᑖᐗᒃ ᐊᓂᑭ ᑳ ᑲᓇᐌᓕᑕᒸᒋᒃ ᐅ ᑲᑫᔅᑴᐎᓂᓕᐗ ᑭᒋᒪᓂᑐᐗ, ᓀᔥᑕ ᐅ ᑖᐺᔦᓕᑕᒧᐎᓂᓕᐤ ᒋᓴᓴ᙮ 13 ᓂ ᑮ ᐯᑌᓐ ᒫᑲ ᐯᑖᑯᓯᐎᓐ ᑭᒋᑭᔑᑯᒃ ᐅᒋ, ᐁ ᐃᑎᑯᔮᓐ, ᒪᓯᓇᐊ, ᔕᐌᓕᑖᑯᓯᐗᒃ ᐅᓂᐱᐗᒃ ᑳ ᓂᐱᒋᒃ ᐅᑎᐯᓕᒋᑫᒃ ᐊᓄᒡ ᐅᒋ: ᐁᐁ, ᐃᑗᐤ ᐊᒑᒃ, ᐅᑦ ᐊᑑᔅᑫᐎᓂᐙᒃ ᑭᒋ ᐅᒋ ᐋᓜᐱᒋᒃ: ᓄᔅᐱᓈᑎᑯᐗᒃ ᒫᑲ ᐅᑦ ᐊᑑᔅᑫᐎᓂᐙᐗ᙮ ᐊᔅᑭᒃ ᑮᔥᑭᔑᑫᐎᓐ 14 ᓂ ᑮ ᐃᑖᐱᓐ ᒫᑲ, ᒫᑎᑲ ᒫᑲ ᐁ ᐙᐹᒃ ᐗᔅᑯ, ᓀᔥᑕ ᑕᑯᒡ ᐗᔅᑯᒃ ᐯᔭᒃ ᑮ ᐊᐱᐤ ᐃᓕᓕᐎᑯᓯᓵᓐ ᐁ ᐃᔑᓈᑯᓯᑦ, ᐁ ᑭᑭᔥᑲᒃ ᐅᔅᑎᒀᓂᒃ ᐅᓵᐎᔔᓕᐊᓈᐱᔉ ᐅᑭᒪᐗᔅᑐᑎᓂᓕᐤ, ᓀᔥᑕ ᐅᒋᒋᒃ ᐁ ᑳᔖᓕᒃ ᑭᔥᑭᓯᑲᓂᓕᐤ᙮ 15 ᑯᑕᒃ ᐁᓐᒐᓪ ᒫᑲ ᑭᒋᐋᔭᒥᐁᐎᑲᒥᑯᒃ ᑮ ᐅᒋ ᐯᒋ ᐗᓚᐎᐤ, ᐁ ᑌᑆᑖᑦ ᐁ ᑭᔗᐌᑦ ᐊᓂᐃ ᑳ ᐊᐱᓕᑭ ᐗᔅᑯᒃ, ᐃᔑ ᐸᑭᑎᓇ ᑮ ᑭᔥᑭᔑᑲᓐ, ᑮᔥᑭᔑᑫ ᒫᑲ; ᐌᓴ ᐋᔕᔾ ᐅᑎᒋᐸᓕᐤ ᑭᒋ ᑮᔥᑭᔑᑫᔮᓐ; ᐌᓴ ᑳ ᓂᑖᐎᑭᑭ ᐊᔅᑮᒃ ᐋᔕᔾ ᐊᑎᑌᐗ᙮ 16 ᐊᓇ ᒫᑲ ᐗᔅᑯᒃ ᑳ ᐊᐱᑦ ᑮ ᐃᔑ ᐸᑭᑎᓇᒻ ᐅ ᑭᔥᑭᔑᑲᓐ ᐊᔅᑭᒃ; ᐊᔅᑭ ᒫᑲ ᑮ ᑭᔥᑭᔑᑳᑌᐤ᙮ 17 ᑯᑕᒃ ᐁᓐᒐᓪ ᒫᑲ ᑭᒋᐋᔭᒥᐁᐎᑲᒥᑯᒃ ᑭᒋᑭᔑᑯᒃ ᑳ ᐃᑕᑾᒃ ᑮ ᐅᒋ ᐯᒋ ᐗᓚᐎᐤ, ᐎᓚ ᓀᔥᑕ ᐁ ᐋᔮᑦ ᑭᔥᑭᔑᑲᓂᓕᐤ ᐁ ᑳᔖᓕᒃ᙮ 18 ᑯᑕᒃ ᐁᓐᒐᓪ ᒫᑲ ᐸᑭᒋᑲᓈᐱᔅᑯᒃ ᑮ ᐯᒋ ᐅᑐᑌᐤ, ᑳ ᑎᐯᓕᑕᒃ ᐃᔥᑯᑌᓕᐤ; ᑮ ᑌᑆᑌᐤ ᒫᑲ ᐁ ᑭᔗᐌᑦ ᐊᓂᐃ ᑳ ᐋᔮᓕᒋ ᐁ ᑳᔖᓕᒃ ᑭᔥᑭᔑᑲᓂᓕᐤ, ᐁ ᐃᑗᑦ, ᐃᔑ ᐸᑭᑎᓇ ᑮ ᑭᔥᑭᔑᑲᓐ ᑳ ᑳᔖᒃ, ᒫᐗᒋᐃᒃ ᒫᑲ ᔓᒥᓂᔕᒃ ᔓᒥᓈᑎᑯᒃ ᐅᒋ ᐅᑕ ᐊᔅᑮᒃ; ᐌᓴ ᐅ ᔓᒥᓂᔕ ᑭᔕᑎᓱᓕᐗ᙮ 19 ᐁᓐᒐᓪ ᒫᑲ ᐊᔅᑮᒃ ᑮ ᐃᔑ ᐸᑭᑎᓇᒻ ᐅ ᑭᔥᑭᔑᑲᓐ, ᑮ ᒪᐗᒋᐁᐤ ᔓᒥᓈᑎᑾ ᒫᑲ ᐅᑕ ᐊᔅᑮᒃ, ᑮ ᐌᐱᓀᐤ ᒫᑲ ᑭᒋ ᔓᒥᓈᐳ ᒫᑾᐃᑲᓂᒃ ᐃᑕ ᐁ ᐃᑕᑾᓂᓕᒃ ᑭᒋᒪᓂᑐ ᐅᑦ ᐋᑯᓚᐌᓯᐎᓐ᙮ 20 ᔔᒥᓇᐳ ᒫᑾᐃᑲᓐ ᒫᑲ ᑮ ᑕᑕᑯᔥᑳᒋᑲᑌᐤ ᐗᓚᐎᑎᒥᒃ ᐃᑖᐎᓂᒃ, ᒥᑯ ᒫᑲ ᔓᒥᓈᐳ ᒫᑾᐃᑲᓂᒃ ᑮ ᐅᒋᑲᐎᓐ, ᐁ ᐃᔅᐸᓕᓕᒃ ᒥᔅᑕᑎᒧ ᑖᐱᑐᓀᐱᒋᑲᓂᒃ ᐃᔑ, ᐁ ᐃᔅᒀᒃ ᑭᒋᒥᑖᑕᒥᑕᓇᐤ ᓀᔥᑕ ᓂᑯᑣᓱᒥᑕᓇᐤ ᑎᐹᐸᓇ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society