ᑭᔅᑫᓕᑖᑯᑖᑫᐎᓐ 11 - ᐅᔅᑭ ᑎᔅᑌᒥᓐᑦᐊᓂᑭ ᓃᔓ ᐅᑎᐹᒋᒧᐗᒃ 1 ᓂ ᑮ ᒥᓕᑳᐎᓐ ᒫᑲ ᐎᐹᔉ ᑖᐱᔅᑯᒡ ᒥᔅᑎᒃ ᐁ ᐃᔑᓈᑾᒃ: ᐁᓐᒐᓪ ᒫᑲ ᑮ ᓂᐸᐎᐤ, ᐁ ᐃᑗᑦ, ᐸᓯᑯ, ᑎᐸᐊᒻ ᒫᑲ ᐅ ᑭᒋᐋᔭᒥᐁᐎᑲᒥᒃ ᑭᒋᒪᓂᑐ, ᓀᔥᑕ ᐸᑭᒋᑲᓈᐱᔉ, ᓀᔥᑕ ᐊᓂᑭ ᐁᑯᑕ ᑳ ᐋᔭᒥᐁᔅᑖᑫᒋᒃ᙮ 2 ᒫᑲ ᐊᓂᒪ ᒪᐗᒋᐃᑐᐎᑲᒥᒃ ᑳ ᐃᑕᑾᒃ ᐗᓚᐎᑎᒥᒃ ᑭᒋᐋᔭᒥᐁᐎᑲᒥᑯᒃ ᑭ ᑳ ᒥᔮᔥᑫᓐ, ᓇᒪ ᒫᑲ ᑭ ᑳ ᑎᐸᐁᓐ; ᐌᓴ ᑮ ᒥᓛᐗᒃ ᒉᓐᑖᐃᓚᒃ: ᐸᓓᑭ ᐃᑖᐎᓐ ᒫᑲ ᑲᑕ ᑕᑕᑯᔥᑳᑕᒶᒃ ᐃᔥᐱᔥ ᓀᒥᑕᓇ ᓂᔓᔖᑉ ᓀᔥᑕ ᐱᓯᒶ᙮ 3 ᓂ ᑳ ᒥᓚᐗᒃ ᒫᑲ ᓂ ᑎᐹᒋᒧᐗᒃ ᑳ ᓂᔑᒋᒃ, ᑭᒋ ᑭᔅᑭᐙᐃᑫᒋᒃ ᐃᔥᐱᔥ ᑭᒋᒥᑖᑐᒥᑕᓇᐤ ᓂᔡᐤ ᒥᑖᑐᒥᑕᓇᐤ ᓀᔥᑕ ᓂᑯᑡᓱᒥᑕᓇᐤ ᐁ ᑭᔑᑳᑭ ᐁ ᑭᑭᔥᑲᑭᒃ ᓱᑫᑭᓂᓕᐤ᙮ 4 ᐅᑯ ᐁᐗᒀᓂᑭ ᓂᔓ ᐊᓕᑉ ᒥᔅᑎᑾᒃ, ᓀᔥᑕ ᐊᓂᐃ ᓂᔓ ᐙᔅᑌᓇᒫᑲᓈᑎᑾ ᑳ ᓂᐸᐎᒪᑲᑭ ᐅᑎᔥᑲᐤ ᑭᒋᒪᓂᑐ ᑳ ᑎᐯᓕᑕᒃ ᐊᔅᑭᓕᐤ᙮ 5 ᑮᔥᐱᓐ ᒫᑲ ᐊᐌᓇ ᑫ ᐋᑯᐋᑴ, ᐃᔥᑯᑌᐤ ᐅᒋᐸᓕᓕᐤ ᐅᑐᓂᐙᒃ, ᑳ ᐅᒋ ᓂᔑᐗᓈᑎᓯᓕᒋ ᐊᓂᐃ ᑳ ᐸᒀᑎᑯᒋᒃ: ᑮᔥᐱᓐ ᒫᑲ ᐊᐌᓇ ᑫ ᐋᑯᐋᑴ, ᐁᑯ ᑫ ᐃᔑ ᓂᐸᐋᑲᓂᐎᑦ᙮ 6 ᐅᑯ ᐋᔭᐗᒃ ᑲᔥᑭᐅᐎᓂᓕᐤ ᑭᒋ ᑭᐸᐊᑭᒃ ᑭᔑᒃ; ᐁᑳ ᑭᒋ ᑭᒥᐗᓂᓕᒃ ᐁ ᑭᔑᑳᑭ ᐁ ᑭᔅᑭᐙᐃᑫᒋᒃ: ᑎᐯᓕᑕᒶᒃ ᓀᔥᑕ ᓂᐱᔭ ᑭᒋ ᒥᑯᑖᑦ, ᓀᔥᑕ ᑭᒋ ᐸᑲᒪᐊᑭᒃ ᐊᔅᑭᓕᐤ ᒥᓯᐌ ᐋᑯᐃᑖᔅᐱᓀᐎᓇ ᐅᒋ, ᐃᓕᑯᒃ ᐁ ᐃᑌᓕᑕᑭᒃ᙮ 7 ᐃᔅᐱ ᒫᑲ ᑮ ᑭᔑᑖᑣᐌ ᐅ ᑎᐹᒋᒧᐎᓂᐗᐤ, ᑲᑕ ᓇᑐᐸᓕᔅᑖᑯᐗᒃ ᐊᓂᐃ ᐊᐌᓯᓴ ᐁᑳ ᒥᓴᔅᑫᔮᒃ ᐙᑎᑳᓂᒃ ᑳ ᐯᒋ ᐅᐱᔅᑳᓕᒋ, ᑲᑕ ᔖᑯᒋᐃᑯᐗᒃ ᒫᑲ, ᓀᔥᑕ ᑲᑕ ᓂᐹᐃᑯᐗᒃ᙮ 8 ᐎᔮᐗᐗ ᒫᑲ ᑲᑕ ᐱᒥᑎᓂᓕᐗ ᐱᒧᑌᔅᑲᓈᒃ ᑭᒋ ᐃᑖᐎᓂᒃ, ᑳ ᐊᒑᑯᐎ ᐃᔑᓂᑳᑌᒃ ᓴᑕᒻ, ᓀᔥᑕ ᐃᒋᑉᑦ, ᐃᑕ ᓀᔥᑕ ᑳ ᐃᔑ ᒋᔅᑖᔅᑾᐙᑲᓂᐎᑦ ᑭ ᑎᐯᓕᒋᑫᒥᓇᐤ᙮ 9 ᐋᑎᑦ ᒫᑳ ᐁ ᐃᑕᓯᒋᒃ ᐃᓕᓕᐗᒃ, ᓀᔥᑕ ᐁ ᑕᑐᑌᐎᓯᒋᒃ, ᓀᔥᑕ ᐹᐱᑐᔥ ᐁ ᐃᔑ ᑭᔗᒋᒃ ᓀᔥᑕ ᐁ ᐃᑕᔅᑳᓀᓯᒋᒃ ᐃᓕᓕᐗᒃ ᑲᑕ ᐙᐸᑕᒬᐗᒃ ᐎᔭᐎᓕᐗ ᐃᔥᐱᔥ ᓂᔅᑐ ᑭᔑᑳᐗ ᓀᔥᑕ ᐋᐱᑕᐤ, ᓇᒪ ᓀᔥᑕ ᑲᑕ ᐃᓕᓇᒶᒃ ᐎᔭᐎᓕᐗ ᒋᐹᔨᑲᒥᑯᒃ ᑭᒋ ᐃᑕᔅᑖᓂᐗᓂᓕᑭ᙮ 10 ᐊᓂᑭ ᒫᑲ ᐊᔅᑮᒃ ᑳ ᑕᔑᑫᒋᒃ ᑲᑕ ᒥᓚᐙᑕᒶᒃ, ᓀᔥᑕ ᑲᑕ ᒧᒋᑫᓕᑕᒶᒃ, ᓀᔥᑕ ᒥᓕᐌᐎᓇ ᑲᑕ ᐃᔑᑎᔕᐊᒫᑐᐗᒃ; ᐌᓴ ᐅᑯ ᓂᔓ ᐅᑭᔅᑭᐙᐃᑫᐗᒃ ᑮ ᑲᑾᑕᑭᐁᐗᒃ ᐊᓂᐃ ᐊᔅᑮᒃ ᑳ ᑕᔑᑫᓕᒋ᙮ 11 ᑮ ᐳᓂᐸᓕᑾᐌ ᒫᑲ ᓂᔅᑐ ᑭᔑᑳᐗ ᓀᔥᑕ ᐋᐱᑕᐤ, ᐱᒫᑎᓯᐎᓂ ᐊᒑᒃ ᑭᒋᒪᓂᑐ ᐅᒋ ᑮ ᐱᑐᑫᔅᑳᑲᐌᐤ, ᐅ ᓯᑎᓕᒃ ᒫᑲ ᑮ ᐃᔑ ᓂᐸᐎᓕᐗ; ᑭᒋ ᓭᑭᓯᐎᓂᓕᐤ ᒫᑲ ᑮ ᐅᑎᑎᑯᐗᒃ ᒥᓯᐌ ᐊᓂᑭ ᑳ ᑭ ᐙᐸᒫᒋᒃ᙮ 12 ᑮ ᐯᑕᒶᒃ ᒫᑲ ᑭᒋ ᐯᑖᑯᓯᐎᓂᓕᐤ ᑭᒋᑭᔑᑯᒃ ᐅᒋ, ᐁ ᐃᑎᑯᒋᒃ, ᐅᑕ ᐯᒋ ᐃᑐᑌᒃ, ᐗᔅᑯᒃ ᒫᑲ ᑮ ᐃᔑ ᐅᐱᔅᑲᐗᒃ ᑭᒋᑭᔑᑯᒃ; ᑮ ᐙᐸᒥᑯᐗᒃ ᒫᑲ ᐊᓂᐃ ᑳ ᐸᒀᑎᑯᒋᒃ᙮ 13 ᐁᐗᑯ ᑫᔮᐸᒡ ᑎᐹᔨᑲᓂᒃ ᐱᓯᒧᑳᓂᒃ ᑮ ᑭᒋ ᑶᑾᓐ, ᒥᑖᑡᐤ ᐃᓕᑯᒃ ᐃᑖᐎᓐ ᒫᑲ ᑮ ᐸᑭᑎᓐ, ᐊᓐᑕ ᒫᑲ ᐁ ᑶᑾᒃ ᑮ ᓂᐸᐋᐗᒃ ᓂᔂᔀᐤ ᑭᒋᒥᑖᑐᒥᑕᓇᐤ ᐃᓕᓕᐗᒃ: ᑯᑕᑭᔭᒃ ᒫᑲ ᑮ ᓭᑭᐋᐗᒃ, ᑮ ᒫᒥᒋᒣᐗᒃ ᒫᑲ ᑭᒋᒪᓂᑐᐗ ᑭᒋᑭᔑᑯᒃ ᑳ ᐃᑖᓕᒋ᙮ 14 ᐊᓂᒪ ᓂᔓ ᑲᒀᑕᑭᓯᐎᓐ ᒫᔭᐎᐸᓕᐤ; ᒫᑎᑲ ᒪᑲ, ᐊᓂᒪ ᓂᔅᑐ ᑲᒀᑕᑭᓯᐎᓐ ᐯᒋ ᑭᔑᐸᓕᐤ᙮ ᐊᓂᒪ ᓂᔂᔅ ᐳᑖᒋᑲᓐ 15 ᐊᓇ ᓂᔂᔅ ᐁᓐᒐᓪ ᒫᑲ ᑮ ᑭᑐᑕᐤ: ᑮ ᐃᑕᑾᓋ ᒫᑲ ᑭᒋ ᐯᑖᑯᓯᐎᓇ ᑭᒋᑭᔑᑯᒃ, ᐁ ᐃᑗᒪᑲᑭ, ᐊᓂᐃ ᐅᑭᒪᐎᐎᓇ ᐅᑕ ᐊᔅᑮᒃ ᑳ ᐃᑕᑾᑭ ᐋᔕᔾ ᑎᐯᓕᑕᒻ ᑭ ᑎᐯᓕᒋᑫᒥᓇᐤ, ᓀᔥᑕ ᐅ ᙭ᑎᒪ; ᑲᑕ ᑎᐯᓕᒋᑫᐤ ᒫᑲ ᑳᑭᑫ ᓀᔥᑕ ᑳᑭᑫ᙮ 16 ᐊᓂᑭ ᒫᑲ ᓂᔑᑕᓇᐤ ᓀᔥᑕ ᓀᐅᔖᑉ ᑳ ᓂᑳᓀᓕᑖᑯᓯᒋᒃ, ᑳ ᐅᑎᔥᑲᐗᐲᔅᑕᐙᒋᒃ ᑭᒋᒪᓂᑐᐗ, ᑮ ᐅᑎᐱᐸᓕᐅᐗᒃ, ᓀᔥᑕ ᐋᔭᒥᐁᔅᑕᐌᐗᒃ ᑭᒋᒪᓂᑐᐗ, 17 ᐁ ᐃᑗᒋᒃ, ᑭ ᓇᓈᔅᑯᒥᑎᓈᓐ, ᐅ ᑎᐯᓕᒋᑫᔭᓐ ᑭᒋᒪᓂᑐ ᒥᓯᐌ ᓯᔪᑳᑎᓯᔭᓐ, ᑳ ᐃᑖᔭᓐ, ᑳ ᑮ ᐃᑖᔭᓐ, ᓀᔥᑕ ᑫ ᑕᑯᔑᓇᓐ; ᐌᓴ ᑭ ᑮ ᐅᑎᓇᒫᓱᓐ ᑭ ᑭᒋ ᑲᔥᑭᐅᐎᓐ, ᓀᔥᑕ ᑭ ᑮ ᑎᐯᓕᒋᑳᓐ᙮ 18 ᑳ ᑕᑐᔅᑳᓀᓯᒋᒃ ᐃᓕᓕᐗᒃ ᒫᑲ ᑮ ᑭᓯᐙᓯᐗᒃ, ᑭᑦ ᐋᑯᓚᐌᓯᐎᓐ ᓀᔥᑕ ᐅᑎᒋᐸᓕᐤ, ᓀᔥᑕ ᐅᑎᒋᐸᓕᓕᐤ ᐅᓂᐱᐗᒃ ᑭᒋ ᑎᐹᔅᑯᓈᑲᓂᐎᒋᒃ, ᓀᔥᑕ ᑭᒋ ᑎᐸᐊᒪᐗᒋᒃ ᑭᑦ ᐊᑑᔅᑫᓛᑲᓇᒃ ᐅᑭᔅᑭᐙᐃᑫᐗᒃ, ᓀᔥᑕ ᐅᐸᓓᑭᓴᒃ, ᐊᓂᑭ ᓀᔥᑕ ᑳ ᑯᔅᐸᓀᓕᑕᑭᒃ ᑭᑦ ᐃᔑᓂᑳᓱᐎᓂᓕᐤ, ᐁ ᐋᐱᔅᑌᓕᑖᑯᓯᒋᒃ ᓀᔥᑕ ᐁ ᑭᔅᑎᓯᒋᒃ; ᓀᔥᑕ ᑭᒋ ᓂᔑᐗᓈᒋᐊᒋᒃ ᐊᓂᑭ ᑳ ᓂᔑᐗᓈᒋᑖᒋᒃ ᐊᔅᑭᓕᐤ᙮ 19 ᑭᒋᒪᓂᑐ ᐅ ᑭᒋᐋᔭᒥᐁᐎᑲᒥᒃ ᒫᑲ ᑮ ᐹᔅᑭᑌᓂᑳᑌᓕᐤ ᑭᒋᑭᔑᑯᒃ, ᑮ ᓄᑾᓂᓕᐤ ᒫᑲ ᐅ ᑭᒋᐋᔭᒥᐁᐎᑲᒥᑯᒃ ᐅ ᓇᔅᑯᒥᑐᐎᓂ ᐋᕐᒃ: ᑮ ᐙᐙᔅᑌᐸᓕᐤ ᒫᑲ, ᓀᔥᑕ ᑮ ᐯᐯᑖᑯᓯᓈᓂᐗᓐ, ᓀᔥᑕ ᑮ ᑶᑾᓐ, ᓀᔥᑕ ᑮ ᑭᒋ ᓭᓭᑲᓐ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society