ᐅᐸᓓᑭᔅ ᒫᑎᐤ 17 - ᐅᔅᑭ ᑎᔅᑌᒥᓐᑦᑴᔅᑭᓈᑯᓯᐤ ᒋᓴᔅ ( ᒫᕐᒃ 9:2–13 ; ᓘᒃ 9:28–36 ) 1 ᑳ ᐳᓂᐸᓕᑭ ᒫᑲ ᓂᑰᑡᓱ ᑭᒋᑳᐗ ᒋᓴᔅ ᐅᑎᓀᐤ ᐱᑕᕋ, ᒉᒻᓴ, ᓀᔥᑕ ᐎᒋᔖᓇ ᒑᓇ, ᑮ ᐃᑐᑕᐁᐤ ᒫᑲ ᐁ ᐃᔅᐸᑎᓈᓕᒃ ᐗᒌᒃ; 2 ᑮ ᑴᔅᑭᓈᑯᓯᐤ ᒫᑲ ᐁ ᑲᓇᐙᐸᒥᑯᑦ: ᐅᑖᔅᑕᒥᒃ ᒫᑲ ᑮ ᐙᓯᑌᓕᐤ ᑖᐱᔅᑯᒡ ᐱᓯᒻ, ᓀᔥᑕ ᐅ ᐎᓛᒋᑲᓇ ᑮ ᐙᐹᓕᐗ ᑖᐱᔅᑯᒡ ᐙᓯᔮᓯᐎᓐ᙮ 3 ᒫᑎᑲ, ᒫᑲ, ᑮ ᐯᒋ ᓄᑯᓰᔅᑕᑯᐗᒃ ᒧᓯᓴ ᓀᔥᑕ ᐃᓛᐃᒐᐗ, ᐁ ᐎᒋᐋᔭᒥᒥᑯᑦ᙮ 4 ᐁᑯ ᓀᔥᑴᐗᔑᐃᐌᑦ ᐱᑕᕐ ᐁ ᐃᑖᑦ ᒋᓴᓴ, ᑌᐯᓕᒋᑫᔭᓐ, ᒥᓨᔑᓐ ᐅᑕ ᐁ ᐃᑖᔮᒃ ᑮᔥᐱᓐ ᓇᔅᑯᒧᔭᓐ, ᐁᑯᔑ ᐅᑕ ᓂ ᑳ ᐅᔑᑖᓈᓐ ᓂᔅᑐ ᒥᑭᐙᒪ; ᐯᔭᒃ ᑭᓚ ᑭᒋ ᐋᔮᔭᓐ, ᐯᔭᒃ ᓀᔥᑕ ᒧᓯᔅ, ᐯᔭᒃ ᓀᔥᑕ ᐃᓛᐃᒐ᙮ 5 ᒣᒀᒡ ᑫᔮᐸᒡ ᐁ ᐋᔭᒥᐤ, ᒫᑎᑲ, ᐁ ᐙᓭᔮᒃ ᐗᔅᑯ ᑮ ᐊᑳᐙᔅᑌᐅᑯᐗᒃ: ᒫᑎᑲ, ᒫᑲ, ᐯᑖᑯᓯᐎᓐ ᐗᔅᑯᒃ ᐅᒋ, ᑳ ᐃᑗᒪᑲᒃ, ᐊᐗ ᐁᐗᑯ ᓂᑯᓯᔅ ᑳ ᓵᑭᐊᒃ, ᓈᔅᐱᒡ ᑳ ᓇᐃᓚᐌᐃᑦ; ᓇᑐᑖᐎᒃ᙮ 6 ᐃᔅᐱ ᒫᑲ ᑭᔅᑭᓄᐊᒪᐙᑲᓇᒃ ᐱᐁᑕᑭᒃ ᑮ ᐅᑎᑌᐱᐸᓕᐅᐗᒃ, ᓈᔅᐱᒡ ᒫᑲ ᑮ ᓭᑭᓯᐗᒃ᙮ 7 ᒋᓴᔅ ᒫᑲ ᑮ ᐯᒋ ᓵᒥᓀᐤ, ᐁ ᐃᑗᑦ, ᐗᓂᔥᑳᒃ, ᐁᑳᐎᓚ ᒫᑲ ᑯᔅᑖᒋᒃ᙮ 8 ᐃᔅᐱ ᒫᑲ ᑳ ᑕᔅᑕᓵᐱᒋᒃ, ᓇᒪᐎᓚ ᐊᐌᓕᐗ ᑮ ᐅᒋ ᐙᐸᒣᐗᒃ, ᒋᓴᓴ ᐱᑯ᙮ 9 ᐁ ᐊᑎ ᓂᑕᒪᒋᐌᒋᒃ ᐗᒌᒃ ᐅᒋ, ᒋᓴᔅ ᑮ ᐃᑕᔓᒣᐤ, ᐁ ᐃᑗᑦ, ᐁᑳᐎᓚ ᐊᐌᓇ ᐎᑕᒫᒃ, ᐹᑎᒫ ᐃᓕᓕᐎᑯᓯᓵᓐ ᑮ ᐗᓂᔥᑳᑌ ᐅᓂᐱᐗ ᐅᒋ᙮ 10 ᑮ ᑲᑴᒋᒥᑯ ᒫᑲ ᐅ ᑭᔅᑭᓄᐊᒪᐙᑲᓇ, ᐁ ᐃᑗᓕᒋ, ᑖᓀᑭ ᐌᒋ ᐃᑗᒋᒃ ᐅᒪᓯᓇᐃᑫᐗᒃ ᐃᓛᐃᒐ ᓃᔥᑕᒻ ᑭᒋ ᑕᑯᔑᒃ? 11 ᒋᓴᔅ ᒫᑲ ᐁ ᓇᔥᑴᐗᔑᐋᑦ, ᑮ ᐃᑌᐤ, ᐃᓛᐃᒐ ᑖᐺ ᓃᔥᑕᒻ ᑲᑕ ᑕᑯᔑᓐ, ᑲᑕ ᒥᓗᑕᐤ ᒫᑲ ᒥᓯᐌ ᑫᒀᓇ: 12 ᒫᑲ ᑭᑦ ᐃᑎᓇᐗᐤ, ᐃᓛᐃᒐ ᐋᔕᔾ ᑮ ᑕᑯᔑᓐ, ᓇᒪᐎᓚ ᒫᑲ ᑮ ᐅᒋ ᑭᔅᑫᓕᒣᐗᒃ, ᒫᑲ ᑮ ᑐᑕᐌᐗᒃ ᐱᑯ ᐁ ᐃᑌᓕᑕᑭᒃ: ᐁᑯ ᓀᔥᑕ ᑫ ᐃᔑ ᐙᐎᓴᑫᓕᑕᒥᐋᒋᒃ ᐃᓕᓕᐎᑯᓯᓵᓇ᙮ 13 ᐁᑯ ᑭᔅᑭᓄᐊᒪᐙᑲᓇᒃ ᓀᓯᑐᑕᑭᒃ ᒑᓐ ᐅᓯᑲᐋᑖᑫᐤ ᐁ ᐋᓕᒧᑕᒫᑯᒋᒃ᙮ ᒋᓴᔅ ᒥᓇᐙᒋᐁᐤ ᓈᐯᓯᓴ ᑳ ᑮ ᑭᑭᔅᑳᑯᑦ ᒪᒋ ᐊᒑᑾ ( ᒫᕐᒃ 9:14–29 ; ᓘᒃ 9:37–43ᐯ ) 14 ᐃᔅᐱ ᒫᑲ ᐌᑎᑖᒋᒃ ᒥᔮᒪᐎᒥᒉᑎᓕᒋ ᐃᓕᓕᐗ, ᑮ ᐯᒋ ᓈᑎᑯ ᐯᔭᒃ ᐃᓕᓕᐗ, ᐁ ᐅᒋᒋᑾᓇᐲᔅᑖᑯᑦ, ᐁ ᐃᑎᑯᑦ ᒫᑲ, 15 ᑌᐯᓕᒋᑫᔭᓐ, ᔕᐌᓕᒻ ᓂᑯᓯᔅ; ᐌᓴ ᑮᔥᑶᐤ, ᓈᔅᐱᒡ ᐁ ᐎᓴᑫᓕᑕᒃ: ᐌᓴ ᒥᒉᑡᐤ ᒪᒎᔅᑌᐸᓕᐤ, ᒥᒉᑡᐤ ᓀᔥᑕ ᐸᑲᔅᑕᐌᐸᓕᐤ᙮ 16 ᐋᑕ ᓂ ᑮ ᐯᑐᐙᐗᒃ ᑭ ᑭᔅᑭᓄᐊᒪᐙᑲᓇᒃ, ᓇᒪᐎᓚ ᒫᑲ ᑮ ᒥᓇᐙᒋᐁᐗᒃ᙮ 17 ᐁᑯ ᒋᓴᔅ ᓀᔥᑴᐗᔑᐃᐌᑦ ᐁ ᐃᑗᑦ, ᐅ ᐁᑳ ᐌᑖᐺᑕᒧᐎᓂᔦᒃ ᓀᔥᑕ ᓀᔦᑕᐙᑎᓯᔦᒃ ᑳ ᐋᓂᔅᑫᐱᒫᑎᓯᔦᒃ, ᑖᓀᓕᑯᒃ ᑫ ᐎᒉᐎᑕᑾᒃ? ᑖᓀᓕᑯᒃ ᑫ ᐯᐃᑕᑾᒃ! ᐯᑐᐎᓐ ᓂᓚ᙮ 18 ᒋᓴᔅ ᒫᑲ ᑮ ᑭᑐᑌᐤ ᒪᒋ ᐊᒑᑾ, ᐁᑯ ᒫᑲ ᐌᓚᐎᓕᒋ ᐎᔭᐎᒃ ᐅᒋ: ᐁᐗᑯ ᑎᐹᔨᑲᓂᒃ ᐱᓯᒧᑳᓂᒃ ᒫᑲ ᑮ ᒥᓇᐙᒋᐊᐤ ᐊᓇ ᐊᐙᔑᔥ᙮ 19 ᐁᑯ ᒋᓴᔅ ᐱᐁᒋ ᓈᑎᑯᑦ ᐅ ᑭᔅᑭᓄᐊᒪᐙᑲᓇ ᐅᐱᒣ, ᐁ ᐃᑎᑯᑦ, ᑖᓀᑭ ᐌᒋ ᐁᑳ ᓂᓚᓈᓐ ᑳ ᑲᔥᑭᑖᔮᒃ ᑭᒋ ᐗᓚᐎᐌᐱᓇᑭᑦ? 20 ᒋᓴᔅ ᒫᑲ ᑮ ᐃᑌᐤ, ᐁ ᐅᑦ ᐋᓉᑕᒧᐎᓂᔦᒃ: ᐌᓴ ᑖᐺ ᑭᑦ ᐃᑎᓇᐗᐤ, ᑮᔥᐱᓐ ᐁᔮᐌᑴ ᑖᐺᔦᓕᑕᒧᐎᓐ ᑖᐱᔅᑯᒡ ᐯᔭᒃ ᒪᔅᑕᑦ ᓯᒥᓐ, ᑭ ᑳ ᐃᑌᓇᐗᐤ ᐅᒪ ᐗᒋ, ᓀᑌ ᐃᔑ ᐋᒋᐸᓕ; ᑲᑕ ᐋᒋᐸᓕᐤ ᒫᑲ; ᓇᒪᐎᓚ ᑫᒀᓐ ᒫᑲ ᑭ ᑳ ᔖᑯᒋᐃᑯᓈᐗᐤ᙮ 21 ᒫᑲ ᐅᒪ ᑐᐎ ᓇᒪᐎᓚ ᐗᓚᐎᐸᓕᐤ ᐋᔭᒥᐋᐎᓐ ᓀᔥᑕ ᓂᑲᓱᐎᓐ ᐅᒋ ᐱᑯ᙮ ᒋᓴᔅ ᒦᓇ ᐋᓕᒧᑕᒻ ᐅᓂᐱᐎᓐ ( ᒫᕐᒃ 9:30–32 ; ᓘᒃ 9:43b–45 ) 22 ᒣᒀᒡ ᒫᑲ ᑳᓕᓕᒃ ᑳ ᑕᔑᑫᒋᒃ, ᒋᓴᔅ ᑮ ᐃᑌᐤ, ᐃᓕᓕᐎᑯᓯᓵᓐ ᑲᑕ ᐙᔦᔑᐸᑭᑎᓇᐤ ᐃᓕᓕᐗ ᐅᒋᒌᓕᒃ; 23 ᑲᑕ ᓂᐸᐁᐗᒃ ᒫᑲ, ᓂᔅᑐ ᑭᔑᑳᓕᑫ ᒫᑲ ᒥᓇ ᑲᑕ ᐗᓂᔥᑳᓇᐤ᙮ ᓈᔅᐱᒡ ᒫᑲ ᑮ ᒥᒋᓚᐌᓯᐗᒃ᙮ ᒋᓴᔅ ᐋᓕᒧᑕᒻ ᑎᐯᓕᒋᑫᐎ ᔔᓕᐋᓇ 24 ᐃᔅᐱ ᒫᑲ ᐌᑎᑕᑭᒃ ᑲᐸᕐᓀᔭᒻ, ᐊᓂᑭ ᑳ ᑮ ᐅᑎᓈᒋᒃ ᑎᐯᓕᒋᑫᐎ ᔔᓕᐋᓇ ᑮ ᐯᒋ ᓈᑌᐗᒃ ᐱᑕᕋ, ᐁ ᐃᑖᒋᒃ, ᓇᒪ ᓈ ᑭᑦ ᐅᑭᒫᒥᐗᐤ ᐸᑭᑎᓀᐤ ᑎᐯᓕᒋᑫᐎ ᔔᓕᐋᓇ? 25 ᐁᐁ, ᐃᑗᐤ᙮ ᐃᔅᐱ ᒫᑲ ᑳ ᐱᑐᑫᑦ ᐙᔅᑳᔨᑲᓂᒃ, ᑮ ᑭᑐᑎᑯ ᒋᓴᓴ, ᐁ ᐃᑎᑯᑦ, ᑖᓐ ᐁᑌᓕᑕᒪᓐ ᓵᐃᒪᓐ? ᐊᐌᓕᐗ ᑳ ᒥᓕᑯᒋᒃ ᑭᒋᐅᑭᒪᐗᒃ ᐅᑕ ᐊᔅᑮᒃ ᑎᐯᓕᒋᑫᐎᓐ ᔔᓕᐋᓇ? ᑎᐯᓚᐌ ᐅᑦ ᐊᐙᔑᒥᔑᐙᐗ ᓀᔥᑕᐱᑯ ᒫᓐᑌᐗ? 26 ᐱᑕᕐ ᐃᑌᐤ, ᒫᓐᑌᐗ᙮ ᒋᓴᔅ ᐃᑌᐤ, ᐁᑯ ᐃᓴ ᑌᐯᓕᒥᑎᓱᒋᒃ ᐊᐙᔑᔕᒃ᙮ 27 ᐁᓕᐌᒃ ᒫᑲ, ᐁᑳ ᑭᒋ ᑭᔑᐗᐊᑯᒃ, ᐃᑐᑌ ᑭᒋᑲᒦᒃ, ᐸᑲᔅᑕᐌᐋ ᒀᔅᑴᐱᒋᑲᓐ ᒫᑲ, ᐅᑎᓐ ᓀᔥᑕ ᐊᓇ ᓇᒣᔅᓃᔥᑕᒻ ᑫ ᒀᔅᑴᐱᑕᑦ; ᐃᔅᐱ ᒫᑲ ᑭ ᐋᐸᐊᒶᑌ ᐅᑐᓐ, ᑭ ᑳ ᒥᔅᑲᐗᐤ ᔔᓕᐋᓐ: ᐁᐗᑯ ᐅᑎᓐ, ᒥᓕᒃ ᒫᑲ ᓂᓚ ᓀᔥᑕ ᑭᓚ ᐅᒋ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society