ᐦᐃᑉᕉᐗ 9 - ᐅᔅᑭ ᑎᔅᑌᒥᓐᑦ

ᐊᔅᑭᐎ ᓀᔥᑕ ᑭᒋᑭᔑᑯ ᐊᔭᒥᐋᐎᓐ

¹ ᑖᐺ ᒫᑲ ᐊᓂᒪ ᓃᔥᑕᒻ ᓇᔅᑯᒥᑐᐎᓐ ᑮ ᐋᔮᒪᑲᓐ ᐁ ᐃᑕᔓᐙᓂᐗᒃ ᒪᓂᑐᐎ ᐊᑑᔅᑫᐎᓐ, ᓀᔥᑕ ᐊᔅᑭᐎ ᐋᔭᒥᐋᐎ ᒥᑭᐙᒻ᙮

² ᐌᓴ ᑮ ᐅᔑᑖᓂᐗᓐ ᐋᔭᒥᐋᐎ ᒥᑭᐙᒻ: ᐊᓂᒪ ᓃᔥᑕᒻ, ᐃᑕ ᑳ ᑮ ᐃᑕᑾᒃ ᐙᔅᑌᓇᒫᑲᓈᑎᒃ, ᓀᔥᑕ ᒥᒋᓱᓈᑎᒃ, ᓀᔥᑕ ᐅᓚᔅᑣᑯᐎ ᐊᓚᑯᓇᐤ; ᐸᓓᑭᐎᑲᒥᒃ ᑳ ᐃᔑᓂᑳᑌᒃ:

³ ᐱᒋ ᒫᑲ ᐊᓂᒪ ᓂᔓ ᐊᑯᐃᑲᓂᒃ ᐊᓂᒪ ᐋᔭᒥᐋᐎ ᒥᑭᐙᒻ ᒥᔭᐗᒋ ᐸᓓᑲᒃ ᑳ ᐃᔑᓂᑳᑌᒃ;

⁴ ᐁᑯᑕ ᑳ ᐃᑕᑾᒃ ᐅᓵᐎᔔᓕᐋᓈᐱᔉ ᐸᑭᒋᑫᐎᓛᑲᓐ, ᓀᔥᑕ ᐊᓂᒪ ᓇᔅᑯᒥᑐᐎᓂ ᐋᕐᒃ ᐅᓵᐎᔔᓕᐋᓈᐱᔉ ᑳ ᐅᒋ ᐊᑾᓇᐃᑳᑌᒃ, ᐱᒋ ᐁ ᐃᑕᑾᒃ ᐅᓵᐎᔔᓕᐊᓈᐱᔉ ᐊᓱᐗᒋᑲᓐ ᐁᑯᑕ ᑳ ᐃᑕᔅᑌᒃ ᒫᓇ, ᓀᔥᑕ ᐁᕋᓐ ᐅ ᒥᔅᑎᑯᒻ ᑳ ᓵᑭᐸᑳᓕᒃ, ᓀᔥᑕ ᐊᓂᐃ ᓇᔅᑯᒥᑐᐎᓂ ᓇᐸᑲᓯᓂᔭ;

⁵ ᐗᑭᒡ ᒫᑲ ᐊᓂᑭ ᑭᔅᑌᓕᑖᑯᓯᐎᓂ ᒉᕋᐱᒪᒃ ᐁ ᒐᑳᔅᑌᔅᑕᑭᒃ ᔕᐌᓕᒋᑫᐎ ᐊᐱᐎᓂᓕᐤ: ᐅᐅ ᓇᒪᐎᓚ ᐊᓄᒡ ᒥᑐᓂ ᓂ ᑮ ᐋᓕᒧᑌᓈᓐ᙮

⁶ ᐃᔅᐱ ᒫᑲ ᐅᐅ ᐅᒪ ᐃᔑ ᑳ ᑮ ᐅᓚᑭᒋᑳᑌᑭ, ᓵᓵᑭᐎᓕᐌᐎᓕᓕᐗᒃ ᒧᔕᒃ ᑮ ᐱᑐᑫᐗᒃ ᐊᓂᒪ ᓃᔥᑕᒻ ᐋᔭᒥᐋᐎ ᒥᑭᐙᒥᒃ, ᐁ ᑎᐱᑐᑕᒸᒋᒃ ᑭᒋᒪᓂᑐᐗ ᐅᑦ ᐊᑑᔅᑫᔅᑖᑯᓯᐎᓂᓕᐤ᙮

⁷ ᒫᑲ ᐱᒋ ᐊᓂᒪ ᓂᔓ ᑮ ᐱᑐᑫᐤ ᑭᒋ ᓵᓵᑭᐎᓕᐌᐎᓕᓕᐤ ᐁ ᐯᔭᑯᑦ, ᐯᔭᑾᐤ ᒣᔕᑯᐱᐴᓐ, ᐁ ᐱᑐᑲᑖᑦ ᒥᑯᓕᐤ, ᑳ ᑮ ᐸᑭᑎᓂᑫᔅᑕᒫᓱᑦ, ᐊᓯᒋ ᓀᔥᑕ ᐅ ᐙᓂᐊᔨᑎᐎᓂᐙᐗ ᐃᓕᓕᐗᒃ ᐅᒋ:

⁸ ᐯᓓᑭᓯᑦ ᐊᒑᒃ ᐅᒪ ᐁ ᐃᔑ ᐙᐸᑎᓕᐌᑦ, ᐁ ᐃᔑ ᐱᑐᑳᓂᐗᒃ ᐃᑕ ᒥᔭᐗᒋ ᐸᓓᑲᒃ ᐁᑳ ᐁᔥᑾ ᐁ ᑮ ᐹᔭᑌ ᓄᑯᑖᓂᐗᒃ, ᒣᒀᒡ ᑫᔮᐸᒡ ᐊᓂᒪ ᓃᔥᑕᒻ ᐋᔭᒥᐋᐎ ᒥᑭᐙᒻ ᐁ ᑮ ᓂᐸᐎᒪᑲᒃ;

⁹ ᐁᐗᑯ ᑭᔅᑭᓄᐙᒋᒋᑲᓐ ᐁᑯᔅᐱ ᑭᒋ ᐃᑕᑾᒃ, ᐁᑯᑕ ᑳ ᐃᔑ ᐸᑭᑎᓂᑳᓂᐗᑭ ᒥᓕᐌᐎᓇ ᓀᔥᑕ ᓵᓵᑭᐎᓕᐌᐎᓇ, ᐁᑳ ᑳ ᑲᔥᑭᐅᒪᑲᑭ ᑭᒋ ᒥᑐᓂᐎᐃᑯᑦ ᐊᓇ ᑳ ᐊᑐᔅᑫᔅᑕᒃ, ᒥᑐᓀᓕᒋᑲᓂᒃ ᐃᔑ;

¹⁰ ᐃᑕ ᑳ ᐃᑕᑾᑭ ᒥᒋᓱᐎᓇ ᐱᑯ ᓀᔥᑕ ᒥᓂᑴᐎᓇ, ᓀᔥᑕ ᓇᓈᑲᐤ ᑭᒋᔅᑕᐸᐗᓕᑎᓱᐎᓇ, ᓀᔥᑕ ᐎᔮᓯᐎ ᐃᑕᔓᐌᐎᓇ, ᑳ ᑮ ᐅᓚᔓᐙᓂᐗᑭ ᐱᓕᔥ ᑫ ᐅᑎᒋᐸᓕᑯᐸᓀ ᒥᑐᓂ ᒀᔭᔉ ᐋᔭᒥᐋᐎᓐ᙮

¹¹ ᒫᑲ ᙭ ᐁ ᑮ ᑕᑯᔑᒃ, ᐊᓇ ᑭᒋ ᓵᓵᑭᐎᓕᐌᐎᓕᓕᐤ ᐊᓂᐃ ᒥᓗ ᑫᒀᓇ ᐅᒋ ᑫ ᐅᑎᒋᐸᓕᑭ, ᐊᐙᓯᑌ ᑫᔅᑌᓕᑖᑾᒃ ᓀᔥᑕ ᐯᔅᑭᓛᑫᒃ ᐋᔭᒥᐋᐎ ᒥᑭᐙᒥᒃ, ᐁᑳ ᒥᒋᒋᔭ ᑳ ᐅᒋ ᐅᔑᑖᓂᐗᒃ, ᐁᐗᑯ, ᐁᑳ ᐅᒪ ᐁ ᐃᔑ ᐅᔑᑖᓂᐗᒃ;

¹² ᐁᑳ ᓀᔥᑕ ᑯᑕ ᓀᔥᑕ ᒥᔅᑐᔑᔕ ᐅᒥᑯᓕᐤ ᐅᒋ, ᒫᑲ ᑎᐱᓚᐌ ᐅᒥᑯ, ᐯᔭᑾᐤ ᑮ ᐅᒋ ᐱᑐᑫᐤ ᐃᑕ ᐁ ᐸᓓᑲᓂᓕᒃ, ᐁ ᑮ ᑲᔥᑭᑕᒫᑕᒃ ᑳᑭᑫ ᑎᐸᐊᒫᑫᔅᑕᒫᑫᐎᓂᓕᐤ᙮

¹³ ᐌᓴ ᑮᔥᐱᓐ ᒥᔅᑐᓴᒃ ᓀᔥᑕ ᑯᑕᒃ ᐅᒥᑯᐗᐤ, ᓀᔥᑕ ᓄᔐ ᒥᔅᑐᔅ ᐅ ᐱᑯᑌᐤ, ᐁ ᐅᒋ ᐗᓴᓶᐱᓇᒫᒋᒃ ᑳ ᐎᓕᐱᓯᒋᒃ, ᐯᓓᑭᐃᐌᒪᑲᓄᑴ ᑭᒋ ᐸᓓᑲᒃ ᒥᔮᔅ;

¹⁴ ᑖᓐ ᐃᔥᐱᔥ ᐊᐙᓯᑌ ᙭ ᐅᒥᑯᒻ, ᐊᓇ ᑳᑭᑫ ᐊᒑᑾ ᐅᒋ, ᒥᑐᓂ ᐁᑳ ᐁ ᒪᒋᐃᑎᑦ, ᑳ ᑮ ᐸᑭᑎᓂᑎᓱᔅᑕᐙᑦ ᑭᒋᒪᓂᑐᐗ, ᑫ ᐸᔦᑭᑖᑦ ᑭ ᒥᑐᓀᓕᒋᑲᓂᐗᐤ ᓂᐱᐎ ᐋᔨᑎᐎᓇ ᐅᒋ, ᑭᒋ ᐊᑑᔅᑲᐌᒃ ᐯᒫᑎᓰᑦ ᑭᒋᒪᓂᑐ?

¹⁵ ᐁᐗᑯ ᐅᒋ ᐎᓚ ᐁᐗᒀᓇ ᑳ ᐋᔭᒥᐁᔅᑕᒫᑫᑦ ᐅᔥᑭ ᓇᔅᑯᒥᑐᐎᓂᒃ, ᓂᐱᐎᓂᓕᐤ ᐁ ᐅᒋ ᑎᐸᐊᒃ ᐊᓂᐃ ᐗᓂᑐᑕᒧᐎᓇ ᑳ ᑮ ᑐᒋᑳᑌᑭ ᒣᒀᒡ ᓃᔥᑕᒻ ᓇᔅᑯᒥᑐᐎᓐ ᑳ ᑮ ᐃᑕᑾᒃ, ᐊᓂᑭ ᑳ ᓇᑐᒫᑲᓂᐎᒋᒃ ᑭᒋ ᐋᔭᒋᒃ ᐊᔓᑕᒫᑫᐎᓂᓕᐤ ᑭᒋ ᐋᔮᒋᒃ ᐊᓂᐁᓕᐤ ᑳᑭᑫ ᑎᐯᓕᒋᑲᓂᓕᐤ᙮

¹⁶ ᐌᓴ ᐃᑕ ᐁ ᐃᑕᑾᒃ ᓇᑲᑕᒫᑫᐎ ᒪᓯᓇᐃᑲᓐ, ᐅᒋᑕᐤ ᓂᐱᐤ ᐊᓇ ᑳ ᑮ ᐅᔑᑖᑦ ᓇᑲᑕᒫᑫᐎ ᒪᓯᓇᐃᑲᓂᓕᐤ᙮

¹⁷ ᐌᓴ ᓇᑲᑕᒫᑫᐎ ᒪᓯᓇᐃᑲᓐ ᐋᐸᑕᓐ ᑳ ᓂᐱᑡᐌ ᐃᓕᓕᐗᒃ: ᓀᔥᑕ ᒫᑲ ᓇᒪᐎᓚ ᐙᔦᔥ ᐃᑖᐸᑕᓐ ᒣᒀᒡ ᐁ ᐱᒫᑎᓰᑦ ᐊᓇ ᑳ ᐅᔑᑖᑦ ᓇᑲᑕᒫᑫᐎ ᒪᓯᓇᐃᑲᓂᓕᐤ᙮

¹⁸ ᐁᐗᑯ ᐌᒋ ᐊᓂᒪ ᓃᔥᑕᒻ ᒪᓯᓇᐃᑲᓐ ᓇᒪᐎᓚ ᑮ ᐅᒋ ᐸᓓᑭ ᐸᑳᓐ ᐊᔅᑖᓂᐗᓐ ᐁᑳ ᐁ ᓯᑲᐃᑳᑌᒃ ᒥᑯ:

¹⁹ ᐌᓴ ᐃᔅᐱ ᒧᓯᔅ ᒥᓯᐌ ᑲᑫᔅᑴᐎᓇ ᑳ ᑮ ᐃᑖᑦ ᒥᓯᐌ ᐃᓕᓕᐗ, ᑳ ᐃᔑ ᐃᑗᒪᑲᒃ ᐅᓚᔓᐌᐎᓐ, ᑮ ᐅᑎᓇᒬᐤ ᒥᔅᑐᔑᔕ ᓀᔥᑕ ᑯᑕ ᐅᒥᑯᓕᐤ, ᐊᓯᒋ ᓂᐱᓕᐤ, ᐁ ᒥᒀᑭ ᒫᓂᔥᒑᓂᔑᐱᐌᔭ, ᓀᔥᑕ ᐁ ᐎᑭᒫᑾᑭ ᓂᑕᐎᑭᑖᑲᓂᔕ, ᓀᔥᑕ ᑮ ᐸᑭᑲᐎᐯᑲᐋᑕᒻ ᒪᓯᓇᐃᑲᓂᓕᐤ ᓀᔥᑕ ᒥᓯᐌ ᐃᓕᓕᐗ,

²⁰ ᐁ ᐃᑗᑦ, ᐁᐗᑯ ᐅᒪ ᒥᑯ ᑳ ᐅᒋ ᐊᓕᑕᒃ ᓇᑲᑕᒫᑫᐎ ᒪᓯᓇᐃᑲᓐ ᑳ ᑮ ᐃᑕᔕᐙᑎᑕᒃ ᑭᒋᒪᓂᑐ᙮

²¹ ᓀᔥᑕ ᒫᑲ ᒥᑯᓕᐤ ᑮ ᐅᒋ ᐸᑭᑲᐎᐯᑲᐋᑕᒻ ᐋᔭᒥᐋᐎ ᒥᑭᐙᒥᓕᐤ, ᓀᔥᑕ ᒥᓯᐌ ᐊᓱᐗᒋᑲᓇ ᑳ ᐋᔭᒥᐋᐎ ᐋᐸᒋᑖᓂᐗᑭ᙮

²² ᓀᔥᑕ ᐅᓚᔓᐌᐎᓂᒃ ᑫᑳᑦ ᒥᓯᐌ ᑫᒀᓇ ᒥᑯ ᐅᒋ ᐸᔦᑭᑖᓂᐗᓋ: ᐁᑳ ᒫᑲ ᐁ ᓯᑲᐃᑳᑌᒃ ᒥᑯ ᓇᒪᐎᓚ ᐃᑕᑾᓐ ᐊᔐᓇᒫᑫᐎᓐ᙮

᙭ ᐅᐸᑭᑎᓂᑎᓱᐎᓐ ᐊᔕᑳᑌᐗ ᒪᒋᐃᑎᐎᓇ

²³ ᐁᐗᑯ ᐅᒋ ᐅᒋᑕᐤ ᑮ ᐃᑌᓕᑖᑾᓐ ᐊᓂᐃ ᑳ ᓇᔅᐱᑕᒧᒪᑲᑭ ᑫᒀᓇ ᑭᒋᑭᔑᑯᒃ ᑳ ᐃᑕᑾᑭ ᐅᐅ ᑭᒋ ᐅᒋ ᐹᔦᑭᑖᓂᐗᑭ; ᒫᑲ ᑫᒋᐙᒃ ᑭᒋᑭᔑᑳᐎ ᑫᒀᓇ, ᐊᐙᓯᑌ ᐁ ᒥᓨᔑᑭ ᓵᓵᑭᐎᓕᐌᐎᓇ ᐅᒋ ᐃᔥᐱᔥ ᐅᐅ᙮

²⁴ ᐌᓴ ᙭ ᓇᒪᐎᓚ ᑮ ᐱᑐᑫᐤ ᐃᑕ ᑳ ᐸᓓᑲᑭ ᒥᒋᒋᔭ ᑳ ᐅᒋ ᐅᔑᑖᓂᐗᑭ, ᑳ ᓇᔅᐱᑕᒧᒪᑲᑭ ᐃᑕ ᑖᐺ ᑳ ᐸᓓᑲᒃ; ᒫᑲ ᑭᒋᑭᔑᑯᒃ ᑫᒋᐙᒃ ᐁᑯᑕ ᐊᓄᒡ ᑭᒋ ᓄᑯᓯᔅᑕᒫᑕᒃ ᐅᑎᔥᑲᐤ ᑭᒋᒪᓂᑐᐗ:

²⁵ ᐁᑳ ᓀᔥᑕ ᐁᔥᑾ ᒥᒉᑡᐤ ᑭᒋ ᐸᑭᑎᓂᑎᓱᑦ, ᑖᐱᔅᑯᒡ ᑭᒋ ᓵᓵᑭᐎᓕᐌᐎᓕᓕᐤ ᐁ ᑮ ᐱᑐᑫᑦ ᐃᑕ ᐁ ᐸᓓᑲᒃ ᒣᔕᑯᐱᐴᓐ ᐁ ᐋᔭᐙᑦ ᑯᑕᑭᔭ ᐅᒥᑯᓕᐤ;

²⁶ ᐌᓴ ᐅᒣᓕᐤ ᑮ ᑐᑕᒧᑯᐸᓀ ᒥᒉᑡᐤ ᑲᑕ ᑮ ᐎᓴᑫᓕᑕᒧᐸᓐ ᐃᔅᑯᓈᒃ ᑳ ᒫᒋ ᐊᔅᑭᐗᒃ: ᒫᑲ ᐊᓄᒡ ᐯᔭᑾᐤ ᐁ ᒫᒋᒡ ᑭᔑᑳᑭ ᑮ ᓄᑯᓯᐤ ᑭᒋ ᐃᑲᑌᓇᒃ ᒪᒋᑣᐎᓂᓕᐤ ᐁ ᓵᓵᑭᐎᓕᐌᐎ ᐸᑭᑎᓂᑎᓱᑦ᙮

²⁷ ᓀᔥᑕ ᒫᑲ ᐁ ᐃᑕᔓᐙᒋᑳᑌᓕᒃ ᐃᓕᓕᐗᒃ ᐯᔮᑾᐤ ᑭᒋ ᓂᐱᒋᒃ, ᑭᐃᔥᑾ ᐊᓂᒪ ᒫᑲ ᑭᒋ ᑎᐹᔅᑯᓈᑲᓂᐎᒋᒃ;

²⁸ ᐁᑯ ᓂᔥᑕ ᙭ ᐯᔭᑾᐤ ᑳ ᐸᑭᑎᓈᑲᓂᐎᑦ ᑭᒋ ᓇᔭᑕᒸᑦ ᒥᒉᑦ ᐅ ᒪᒋᑣᐎᓂᓕᐗ: ᐊᓂᐃ ᒫᑲ ᑳ ᐊᔕᐙᐸᒥᑯᑦ ᒥᓇ ᑲᑕ ᓄᑯᓰᔅᑕᐌᐤ, ᐁᑳ ᐁ ᐅᑎᓇᒃ ᒪᒋᑣᐎᓂᓕᐤ, ᑭᒋ ᐱᒫᒋᐋᑦ᙮