ᐦᐃᑉᕉᐗ 7 - ᐅᔅᑭ ᑎᔅᑌᒥᓐᑦᐊᓇ ᑭᒋ ᓵᓵᑭᐎᓕᐌᐎᓕᓕᐤ ᒣᓪᑭᓯᑌᒃ 1 ᐌᓴ ᐊᐗ ᒣᓪᑭᓯᑌᒃ, ᓭᓕᒻ ᑭᒋᐅᑭᒪᐤ, ᐅ ᓵᓵᑭᐎᓕᐌᐎᓕᓕᒪ ᒥᔭᐗᒋ ᑭᔅᑎᓯᑦ ᑭᒋᒪᓂᑐ, ᑳ ᑮ ᓇᑭᔥᑲᐙᑦ ᐁᑉᕃᐊᒪ ᐁ ᐯᒋᑭᐌᓕᒋ ᐁ ᑮ ᓂᐸᐋᓕᒋ ᐊᓂᐃ ᑭᒋᐅᑭᒪᐗ, ᓀᔥᑕ ᑳ ᑮ ᒥᓦᑭᒫᑦ; 2 ᐊᓇ ᓀᔥᑕ ᑳ ᑮ ᒥᓕᑯᑦ ᐁᑉᕃᐊᒪ ᐯᔭᒃ ᐃᔥᐱᔥ ᒥᓯᐌ ᐁ ᑮ ᒥᑖᑐᑖᓂᐗᑭ; ᓃᔥᑕᒻ ᐁ ᐃᑗᔅᒋᑳᑌᒃ ᑳ ᐅᑭᒫᑲᑕᒃ ᒀᔭᔅᑭᑖᑎᓯᐎᓂᓕᐤ, ᒥᓇ ᒫᑲ ᐊᓯᒋ ᓭᓕᒻ ᑭᒋᐅᑭᒪᐤ, ᐁᐗᑯ ᐊᓇ ᑳ ᐅᑭᒫᑲᑕᒃ ᑳᔮᒣᓕᑕᒪᐎᓂᓕᐤ; 3 ᐁᑳ ᐁ ᐅᑕᐎᑦ, ᐁᑳ ᐁ ᐅᑳᐎᑦ, ᐁᑳ ᐁ ᐋᓂᔅᑫᐃᑖᒋᒥᑦ, ᐁᑳ ᐁ ᒫᒋ ᐅᑭᔑᑳᒥᑦ, ᐁᑳ ᓀᔥᑕ ᐁ ᐃᔥᒀᐸᓕᓕᒃ ᐅ ᐱᒫᑎᓯᐎᓐ; ᒫᑲ ᐁ ᑮ ᐃᔑᐋᑲᓂᐎᑦ ᑖᐱᔅᑯᒡ ᑭᒋᒪᓂᑐ ᐅᑯᓯᓴ, ᑳᑭᑫ ᐁ ᓵᓵᑭᐎᓕᐌᐎᓕᓕᐎᑦ᙮ 4 ᒫᒥᑐᓀᓕᑕᒧᒃ ᒫᑲ ᐁᔅᐱᒋ ᑭᔅᑎᓯᑦ ᐊᐗ ᐃᓕᓕᐤ, ᐊᓇ ᐅᑕᐎᐅᑭᒪᐗ ᐁᑉᕃᐊᒪ ᑳ ᑮ ᒥᓕᑯᑦ ᐯᔭᒃ ᐃᔥᐱᔥ ᐁ ᑮ ᒥᑖᑐᑖᓂᐗᑭ ᐊᓂᐃ ᒪᔅᑲᑗᐎᓇ᙮ 5 ᑖᐺ ᒫᑲ, ᐊᓂᑭ ᑳ ᐅᑯᓯᓯᒥᑯᒋᒃ ᓕᐹᐃᔭ, ᑳ ᐅᑎᓇᑭᒃ ᓵᓵᑭᐎᓕᐌᐎᓕᓕᐎ ᐃᑖᐸᑎᓯᐎᓂᓕᐤ, ᐋᔭᐗᒃ ᐅᓚᔓᐌᐎᓂᓕᐤ, ᑭᒋ ᒥᓕᑯᒋᒃ ᒥᓕᐌᐎᓇ ᐃᓕᓕᐗ ᐁ ᐃᑕᔅᑌᒃ ᐅᓚᔓᐌᐎᓐ, ᐁᐗᒀᓂᐃ ᐎᒋᔖᓂᐙᐗ ᐋᑕ ᐎᔭᐎᓕᒃ ᐁᑉᕃᐊᒪ ᐁ ᐅᒋᓕᒋ: 6 ᒫᑲ ᐎᓚ, ᐅᑦ ᐋᓂᔅᑫ ᓂᑖᐎᑭᐎᓐ ᐁᑳ ᑳ ᐊᔑᑕᑭᒋᑳᑌᓕᒃ ᐊᓯᒋ ᐎᓚᐗᐤ, ᒥᓕᐌᐎᓇ ᑮ ᒥᓕᑯ ᐁᑉᕃᐊᒪ, ᑮ ᒥᓦᑭᒣᐤ ᒫᑲ ᐊᓂᐃ ᑳ ᑮ ᐋᔮᓕᒋ ᐊᓂᐃ ᐊᔓᑕᒫᑫᐎᓇ᙮ 7 ᐁᑳ ᒫᑲ ᐁ ᐋᓉᔦᓕᒋᑳᑌᒃ, ᑳ ᑭᔅᑌᓕᑖᑯᓯᑦ ᒥᓦᑭᒣᐤ ᐊᓂᐃ ᑳ ᑕᐸᑌᓕᑖᑯᓯᓕᒋ᙮ 8 ᐅᑕ ᒫᑲ ᐃᓕᓕᐗᒃ ᑳ ᓂᐱᒋᒃ ᐅᑎᓇᒶᒃ ᒥᓕᐌᐎᓇ: ᒫᑲ ᐊᓐᑕ ᐎᓚ ᐅᑎᓇᒻ ᐊᓇ ᑳ ᐃᑖᒋᒫᑲᓂᐎᑦ ᐁ ᐱᒫᑎᓰᑦ᙮ 9 ᓀᔥᑕ ᒫᑲ, ᑫ ᐃᔑ ᐃᑗᔮᐸᓐ, ᓕᐹᐃ ᐊᓯᒋ, ᑳ ᐅᑎᓇᒃ ᒥᓕᐌᐎᓐ, ᑮ ᑎᐸᐊᒻ ᒥᓕᐌᐎᓇ ᐁᑉᕃᐊᒥᒃ: 10 ᐌᓴ ᑫᔮᐸᒡ ᑮ ᐃᑕᐤ ᐎᔭᐎᓕᒃ ᐁᑉᕃᐊᒪ, ᐃᔅᐱ ᒣᓪᑭᓯᑌᒃ ᑳ ᑮ ᓇᑭᔥᑲᐙᑦ᙮ 11 ᑮᔥᐱᓐ ᒫᑲ ᒥᑐᓂᐎᓯᐎᓐ ᐌᒋᐸᓕᒃ ᓕᐹᐃ ᐅ ᓵᓵᑭᐎᓕᐌᐎᓕᓕᐎᐎᓂᒃ, ᐌᓴ ᐁᑯᑕ ᐌᑎᓇᑭᒃ ᐅᓚᔓᐌᐎᓂᓕᐤ ᐃᓕᓕᐗᒃ, ᑫᒀᓐ ᐌᒋ ᓇᑕᐌᓕᒋᑳᑌᒃ ᑯᑕᒃ ᓵᓵᑭᐎᓕᐌᐎᓕᓕᐤ ᑭᒋ ᐯᒋ ᐃᑐᑌᑦ ᑖᐱᔅᑯᒡ ᑳ ᐃᑎᓕᔅᐸᓐ ᒣᓪᑭᓯᑌᑲ, ᐁᑳ ᒫᑲ ᑳ ᐃᑖᑲᓂᐎᑦ ᐁ ᐃᑎᑦ ᑖᐱᔅᑯᒡ ᑳ ᐃᑎᓕᔅᐸᓐ ᐁᕋᓇ? 12 ᐌᓴ ᓵᓵᑭᐎᓕᐌᐎᓕᓕᐎᐎᓐ ᐁ ᑮ ᑴᔅᑭᓂᑳᑌᒃ, ᐅᒋᑕᐤ ᓀᔥᑕ ᑴᔅᑭᓂᑳᑌᐤ ᐅᓚᔓᐌᐎᓐ᙮ 13 ᐌᓴ ᐊᓇ ᐅᐅ ᑳ ᐃᑖᒋᒫᑲᓂᐎᑦ ᐱᑐᔥ ᐁ ᐯᔭᑯᑌᐎᓯᓕᒋ ᐃᓕᓕᒃ ᑮ ᐅᒋᐸᓕᐤ, ᐊᓂᐃ ᐁᑳ ᐊᐌᓇ ᐁ ᐅᒌᑦ ᑳ ᐋᐸᑎᓯᑦ ᐸᑭᒋᑲᓈᐱᔅᑯᒃ᙮ 14 ᐌᓴ ᐸᔭᑌᓈᑾᓐ ᑭ ᑎᐯᓕᒋᑫᒥᓇᐤ ᒎᑕᐃᒃ ᐁ ᑮ ᐅᒋᑦ; ᐊᓂᐃ ᑳ ᐯᔭᑯᑌᐎᓯᓕᒋ ᐁᑳ ᐙᔦᔥ ᑳ ᑮ ᐋᓕᒧᒫᑦ ᒧᓯᔅ ᓵᓵᑭᐎᓕᐌᐎᓕᓕᐎᐎᓐ ᐅᒋ᙮ ᑯᑕᒃ ᓵᓵᑭᐎᓕᐌᐎᓕᓕᐤ ᑖᐱᔥᑯᒡ ᒣᓪᑭᓯᑌᒃ 15 ᑫᔮᐸᒡ ᓀᔥᑕ ᓈᔅᐱᒡ ᐊᐙᓯᑌ ᐸᔭᑌᓈᑾᓐ; ᐌᓴ ᐅ ᓇᔅᐱᑐᐌᐎᓂᓕᒃ ᒣᓪᑭᓯᑌᑲ ᐯᒋ ᐃᑐᑌᐤ ᑯᑕᒃ ᓵᓵᑭᐎᓕᐌᐎᓕᓕᐤ, 16 ᑳ ᐃᔑᐋᑲᓂᐎᑦ ᓇᒪᐎᓚ ᐁ ᐃᑕᔓᐌᒪᑲᒃ ᐎᔮᓯᐎ ᑲᑫᔅᑴᐎᓐ, ᒫᑲ ᐁ ᐃᔑ ᑲᔥᑭᐅᒪᑲᒃ ᐊᓂᒪ ᐁᑳ ᑫ ᐳᓂᐸᓕᒃ ᐱᒫᑎᓯᐎᓐ᙮ 17 ᐌᓴ ᐃᑖᒋᒧ, ᑭᓚ ᑳᑭᑫ ᑭ ᓵᓵᑭᐎᓕᐌᐎᓕᓕᐎᓐ ᑳ ᑮ ᐃᑎᔅᐸᓐ ᒣᓪᑭᓯᑌᒃ᙮ 18 ᐌᓴ ᑖᐺ ᑮ ᓂᑳᓂᐸᓕᐤ ᑭᒋ ᐃᑲᑌᓂᑳᑌᒃ ᑲᑫᔅᑴᐎᓐ, ᐁ ᓕᓚᒥᓯᒪᑲᒃ ᓀᔥᑕ ᐁᑳ ᓈᓐᑕᐤ ᐁ ᐃᑖᐸᑕᒃ᙮ 19 ᐌᓴ ᐅᓚᔓᐌᐎᓐ ᓇᒪᐎᓚ ᑫᒀᓐ ᑮ ᒥᑐᓂᐎᑖᒪᑲᓐ, ᒫᑲ ᑮ ᐃᑭᓐ ᐊᐙᓯᑌ ᑳ ᒥᓨᔑᒃ ᐊᔅᐯᓕᒧᐎᓐ ᐁ ᑮ ᐯᑖᓂᐗᒃ; ᐊᓂᒪ ᑳ ᐅᒋ ᐯᔣᐸᒪᒃ ᑭᒋᒪᓂᑐ᙮ 20 ᓀᔥᑕ ᒫᑲ ᐁ ᑮ ᑭᒋᐃᑣᓂᐗᒃ ᑭ ᓵᓵᑭᐎᓕᐌᐎᓕᓕᐎᐊᐤ; 21 ᐌᓴ ᐅᑯ ᓵᓵᑭᐎᓕᐌᐎᓕᓕᐗᒃ ᑮ ᐃᔑᐊᐗᒃ ᐁᑳ ᐁ ᑭᒋᐃᑣᓂᐗᒃ ᑭᒋᐃᑗᐎᓐ; ᒫᑲ ᐊᐗ ᐁ ᑮ ᑭᒋᐃᑣᓂᐗᒃ ᑭᒋᐃᑗᐎᓐ ᑮ ᐃᔑᐃᑯ ᐊᓂᐃ ᑳ ᑮ ᐃᑎᑯᑦ, ᐅᑎᐯᓕᒋᑫᐤ ᑮ ᑭᒋᐃᑗᐤ, ᓇᒪ ᒫᑲ ᑲᑕ ᑴᔅᑫᓕᑕᒻ, ᑭᓚ ᑳᑭᑫ ᑭ ᓵᓵᑭᐎᓕᐌᐎᓕᓕᐎᓐ ᑖᐱᔅᑯᒡ ᑳ ᑮ ᐃᑎᔅᐸᓐ ᒣᓪᑭᓯᑌᒃ; 22 ᒫᑲ ᐁᑯ ᐃᔥᐱᔥ ᒋᓴᔅ ᐊᐙᓯᑌ ᑭ ᑫᒋᓇᐅᐎᓂᐊᐤ ᓇᐗᒡ ᑳ ᒥᓨᔑᒃ ᓇᔅᑯᒥᑐᐎᓐ ᐅᒋ᙮ 23 ᐎᓚᐗᐤ ᒫᑲ ᑖᐺ ᑮ ᒥᒉᑎᐗᒃ ᓵᓵᑭᐎᓕᐌᐎᓕᓕᐗᒃ, ᐁᑳ ᐁ ᑮ ᐃᓕᓈᑲᓂᐎᒋᒃ ᑳᑭᑫ ᑭᒋ ᐃᑖᒋᒃ ᐁ ᑮ ᓂᐱᒋᒃ: 24 ᒫᑲ ᐊᐗ ᐃᓕᓕᐤ, ᑳᑭᑫ ᐁ ᐃᑖᑦ, ᐋᔭᐤ ᐁᑳ ᑳ ᒦᔅᑯᑐᓂᑳᑌᓕᒃ ᓵᓵᑭᐎᓕᐌᐎᓕᓕᐎᐎᓂᓂᐤ᙮ 25 ᐁᐗᑯ ᐅᒋ ᑲᔥᑭᑕᐤ ᓀᔥᑕ ᑳᑭᑫ ᑭᒋ ᐱᒫᒋᐋᑦ ᐊᓂᐃ ᐎᓚ ᐅᒋ ᑳ ᐯᒋ ᓈᑖᓕᒋ ᑭᒋᒪᓂᑐᐗ, ᐁ ᓄᑾᒃ ᑳᑭᑫ ᐁ ᐱᒫᑎᓰᑦ ᑭᒋ ᐋᔭᒥᐁᔅᑕᒪᐙᑦ᙮ 26 ᐌᓴ ᐁᑯ ᑐᐎ ᑭᒋ ᓵᓵᑭᐎᓕᐌᐎᓕᓕᐤ ᑭᑦ ᐋᔭᐗᓇᐤ, ᑳ ᐸᓓᑭᓯᑦ, ᑳᑳᔮᒣᐎᓰᑦ, ᑳ ᒥᓗᑣᑦ, ᑳ ᐹᑳᓂᓯᑦ ᐅᒪᒋᑣᐗ ᐅᒋ, ᓀᔥᑕ ᐊᐙᓯᑌ ᑳ ᑭᔅᑎᓯᐋᑲᓂᐎᑦ ᐃᔥᐱᔥ ᑭᒋᑭᔑᑾ; 27 ᐁᑳ ᑳ ᓇᑕᐌᓕᑖᑯᓯᑦ ᒧᔕᒃ, ᑖᐱᔅᑯᒡ ᐁᑯ ᑭᒋ ᓵᓵᑭᐎᓕᐌᐎᓕᓕᐗᒃ, ᑭᒋ ᓵᓵᑭᐎᓕᐌᑦ, ᓃᔥᑕᒻ ᑎᐱᓚᐌ ᐅ ᒪᒋᑐᑕᒧᐎᓇ ᐅᒋ, ᐁᑯ ᒫᑲ ᐃᓕᓕᐗ ᐅ ᒪᒋᑐᑕᒧᐎᓂᓕᐗ ᐅᒋ; ᐌᓴ ᐅᒣᓕᐤ ᐯᔭᑾᐤ ᑮ ᑐᑕᒻ, ᐃᔅᐱ ᐯᑭᑎᓂᑎᓱᑦ᙮ 28 ᐌᓴ ᐅᓚᔓᐌᐎᓂᓕᐤ ᑭᒋ ᓵᓵᑭᐎᓕᐌᐎᓕᓕᐎᐃᑯᐗᒃ ᐃᓕᓕᐗᒃ ᑳ ᓕᓚᒥᓯᒋᒃ; ᒫᑲ ᑳ ᐃᑗᒪᑲᓂᓕᒃ ᑭᒋᐃᑗᐎᓐ, ᑳ ᐃᑕᑾᒃ ᐊᔅᐱᓐ ᐅᓚᔓᐌᐎᓐ, ᐃᔑᐃᑯ ᐅᑯᓯᓯᒪᐤ, ᑳ ᒥᑐᓂᐎᐋᑲᓂᐎᑦ ᑳᑭᑫ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society