ᐦᐃᑉᕉᐗ 4 - ᐅᔅᑭ ᑎᔅᑌᒥᓐᑦ1 ᐁᑯᔑ ᒫᑲ ᑯᔅᐹᓀᓕᑖᑕᐤ, ᐋᑕ ᐁ ᑮ ᐊᔓᑕᒫᑲᐎᔭᒃ ᑭᒋ ᐱᑐᑫᐗᒃ ᐅᑦ ᐋᓜᓯᐎᓂᒃ ᐊᐌᓂᑳᓇᒃ ᐁ ᐃᑕᔑᔦᒃ ᑭᒋ ᓄᑌᔥᑲᑭᒃ᙮ 2 ᐌᓴ ᑭᓚᓈᓇᐤ ᓀᔥᑕ ᑭ ᑮ ᐎᑕᒫᑲᐎᓈᓇᐤ ᒥᓗᐋᒋᒧᐎᓐ, ᑖᐱᔅᑯᒡ ᐎᓚᐗᐤ: ᒫᑲ ᐊᓂᐁᓕᐤ ᐋᔭᒥᐎᓂᓕᐤ ᑳ ᑮ ᐯᑕᑭᒃ ᓇᒪᐎᓚ ᐙᔦᔥ ᑮ ᐃᑖᐸᒋᐃᑯᐗᒃ, ᐁᑳ ᐊᓯᒋ ᐁ ᑮ ᑖᐺᔦᓕᑕᑭᒃ ᐊᓂᑭ ᑳ ᑮ ᐯᑕᑭᒃ᙮ 3 ᐌᓴ ᑭᓚᓈᓇᐤ ᑳ ᑮ ᑖᐺᑕᒪᒃ ᑭ ᐱᑐᑲᓈᓇᐤ ᐋᓜᓯᐎᓂᒃ; ᑖᐱᔅᑯᒡ ᑳ ᑮ ᐃᑗᑦ, ᑳ ᐃᔑ ᑭᒋᐃᑗᔮᓐ ᓂᑦ ᐊᑯᓚᐌᓯᐎᓂᒃ, ᑮᔥᐱᓐ ᑮ ᐱᑐᑫᐗᑴ ᓂᑦ ᐋᓜᓯᐎᓂᒃ: ᐋᑕ ᒫᑲ ᐊᓂᐃ ᐊᑑᔅᑫᐎᓇ ᐁ ᑮ ᑭᔑᑖᓂᐗᑭ ᐁ ᒫᒋ ᐊᔅᑭᐗᒃ ᐊᔅᐱᓐ᙮ 4 ᐌᓴ ᓈᓐᑕᐤ ᐃᑕ ᐅᒪ ᐃᔑ ᑮ ᐋᓕᒧᑕᒻ ᐊᓂᐁᓕᐤ ᓂᔂᔅ ᐁ ᑭᔑᑳᓕᒃ, ᑭᒋᒪᓂᑐ ᒫᑲ ᑮ ᐊᓜᐱᐤ ᓂᔂᔅ ᐁ ᑭᔑᑳᓕᒃ ᒥᓯᐌ ᐅᑦ ᐊᑑᔅᑫᐎᓇ ᐅᒋ᙮ 5 ᐁᑯᑕ ᐅᑕ ᒥᓇ ᓀᔥᑕ, ᑮᔥᐱᓐ ᑫ ᐱᑐᑫᐙᑴ ᓂᑦ ᐋᓜᓯᐎᓂᒃ᙮ 6 ᐁ ᓄᑾᒃ ᒫᑲ, ᐁ ᐃᑭᒃ ᐋᑎᑦ ᐁᑯᑕ ᑭᒋ ᐱᑐᑫᒋᒃ, ᓀᔥᑕ ᐊᓂᑭ ᓃᔥᑕᒻ ᑳ ᑮ ᐎᑕᒪᐙᑲᓂᐎᒋᒃ ᒥᓗᐋᒋᒧᐎᓂᓕᐤ ᐁᑳ ᐁ ᑮ ᐱᑐᑫᒋᒃ ᐁᑳ ᐁ ᑮ ᑕᐺᑕᑭᒃ: 7 ᒥᓇ ᒫᑲ, ᐋᓕᒧᑕᒻ ᓈᓐᑕᐤ ᐯᔭᒃ ᑭᔑᑳᐤ, ᐁ ᐃᑗᑦ, ᑌᐱᑎᒃ, ᐊᓄᒡ ᐁ ᑭᔑᑳᒃ, ᐋᑕ ᑭᓉᔥ ᐁ ᑮ ᐃᔅᐸᓕᒃ; ᑖᐱᔅᑯᒡ ᑳ ᐃᑣᓂᐗᒃ, ᐊᓄᒡ ᐁ ᑭᔑᑳᒃ, ᑮᔥᐱᓐ ᐎ ᓇᑐᑕᒬᒃ ᑳ ᐃᑗᑦ, ᐁᑳᐎᓚ ᒪᔥᑲᐎᑖᒃ ᑭᑌᐃᐙᐗ᙮ 8 ᐌᓴ ᑮᔥᐱᓐ ᒋᓴᔅ ᑮ ᒥᓛᑯᐸᓀ ᐋᓜᓯᐎᓂᓕᐤ, ᓇᒪᐎᓚ ᒥᓇ ᑲᑕ ᑮ ᐋᓕᒧᑕᒧᑯᐸᓐ ᑯᑕᑭᓕᐤ ᐁ ᑭᔑᑳᓕᒃ᙮ 9 ᐁᐗᑯ ᐅᒋ ᐃᑕᑾᓐ ᐋᓜᓯᐎᓐ ᑫ ᐋᔮᓕᒋ ᐅᑦ ᐃᓕᓕᒪ ᑭᒋᒪᓂᑐ᙮ 10 ᐌᓴ ᐊᓇ ᑳ ᑮ ᐱᑐᑫᑦ ᐅᑦ ᐋᓜᓯᐎᓂᒃ, ᐎᓚ ᓀᔥᑕ ᑮ ᐳᓂᑕᐤ ᐅᑦ ᐊᑑᔅᑫᐎᓇ, ᑖᐱᔅᑯᒡ ᑭᒋᒪᓂᑐ ᑳ ᑮ ᐃᔑ ᐳᓂᑖᑦ ᐅᑦ ᐊᑑᔅᑫᐎᓇ᙮ 11 ᐁᑯᔑ ᒫᑲ ᐊᑐᔅᑫᑕᐤ ᑭᒋ ᐱᑐᑫᔭᒃ ᐊᓂᒪ ᐋᓜᓯᐎᓂᒃ, ᐁᑳᐎᓚ ᐊᐌᓇ ᑭᒋ ᐸᑭᔑᒃ ᐊᓂᒪ ᑳ ᑮ ᐃᔑ ᐸᑭᔑᓈᓂᐗᒃ ᐁᑳ ᐁ ᑮ ᑖᐺᔦᓕᒋᑳᑌᒃ᙮ 12 ᐌᓴ ᑭᒋᒪᓂᑐ ᐅᑦ ᐋᔭᒥᐎᓐ ᐱᒫᑎᓯᒪᑲᓂᓕᐤ, ᓀᔥᑕ ᓱᑳᑎᓯᒪᑲᓂᓕᐤ, ᓀᔥᑕ ᐊᐙᓯᑌ ᑳᔖᓕᐤ ᐃᔥᐱᔥ ᐁ ᓂᔓᐱᔅᑲᒧᑭ ᔑᒫᑲᓐ, ᐁ ᔖᐳᐸᓕᓕᒃ ᐃᔥᐱᔥ ᑮ ᐅᒋ ᓀᓇᐎᓂᑳᑌᒃ ᐊᒑᒃ ᓀᔥᑕ ᒥᑐᓀᓕᒋᑲᓐ, ᓀᔥᑕ ᐋᓂᔅᑲᐎᑲᓇᓇ ᓀᔥᑕ ᐅᔅᑲᓂᐱᒥ, ᓀᔥᑕ ᓂᓯᑕᐌᓕᑕᒧᒪᑲᓂᓕᐤ ᑳ ᒥᑐᓀᓕᒋᑳᑌᒃ ᓀᔥᑕ ᑳ ᐃᑌᓕᒋᑳᑌᒃ ᒥᑌᐃᒃ᙮ 13 ᓇᒪᐎᓚ ᓀᔥᑕ ᐊᐌᓇ ᐃᑖᐤ ᐁᑳ ᑳ ᐹᔭᑌᓈᑯᓯᑦ ᐁ ᑲᓇᐙᐸᒥᑯᑦ: ᒫᑲ ᒥᓯᐌ ᑫᒀᓇ ᒧᔐᔅᑌᐗ ᓀᔥᑕ ᐸᔭᑕᔅᑌᐗ ᐅᔅᑭᔑᑯᒃ ᐊᓇ ᑳ ᑲᓇᐙᐸᒥᑕᒃ᙮ ᒋᓴᔅ ᐊᓇ ᒪᐗᒋ ᑭᒋ ᓵᓵᑭᐎᓕᐌᐎᓕᓕᐤ 14 ᐁ ᓄᑾᒃ ᒫᑲ ᐁ ᐋᔭᐗᒃ ᑫᔅᑎᓯᑦ ᑭᒋ ᓵᓵᑭᐎᓕᐌᐎᓕᓕᐤ, ᐊᓇ ᑭᒋᑭᔑᑯᒃ ᑳ ᐃᑐᑌᑦ, ᒋᓴᔅ ᑭᒋᒪᓂᑐ ᐅᑯᓯᓴ, ᐁᑯᔑ ᒥᒋᒥᓈᑕᐤ ᑭᑦ ᐃᑣᓱᐎᓂᓇᐤ᙮ 15 ᐌᓴ ᓇᒪᐎᓚ ᑭᑦ ᐋᔭᐙᓇᐤ ᑭᒋ ᓵᓵᑭᐎᓕᐌᐎᓕᓕᐤ ᐁᑳ ᑫ ᑮ ᐃᑕᒪᒋᑖᑦ ᑭᑦ ᐊᓕᒥᓯᐎᓂᓇᐗ; ᒫᑲ ᒥᓯᐌ ᐃᔑ ᑮ ᑲᑴᒋᐊᐤ ᑖᐱᔅᑯᒡ ᑭᓚᓈᓇᐤ, ᓇᒪᐎᓚ ᒫᑲ ᑮ ᒪᒋᑐᑕᒻ᙮ 16 ᐁᐗᑯ ᐅᒋ ᐁᑯᔑ ᓱᑭᑌᐁᐎ ᐯᒋ ᓈᑖᑕᐤ ᔕᐌᓕᒋᑫᐎ ᐅᑭᒪᐗᐱᐎᓐ, ᑭᒋ ᑮ ᐅᑎᓇᒪᒃ ᑭᑎᒫᑫᓕᒋᑫᐎᓐ, ᓀᔥᑕ ᑭᒋ ᒥᔅᑲᒪᒃ ᔕᐌᓕᒋᑫᐎᓐ ᑭᒋ ᐎᒋᐃᑯᔭᒃ ᐃᐊᓕᒥᓯᔭᑯ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society