ᐦᐃᑉᕉᐗ 3 - ᐅᔅᑭ ᑎᔅᑌᒥᓐᑦᒋᓴᔅ ᐊᐗᓯᑌ ᑭᔅᑎᓯᐤ ᐃᔥᐱᔥ ᒧᓯᔅ 1 ᐁᐗᑯ ᒫᑲ ᐅᒋ, ᑳ ᐸᓓᑭᓯᔦᒃ ᓂᒋᔖᓂᑐᒃ, ᑳ ᐎᒋᐃᐌᔦᒃ ᑭᒋᑭᔑᑳᐎ ᓂᑐᑫᐎᓐ, ᓈᓈᑲᑕᐌᓕᒥᒃ ᐊᓇ ᐊᐸᔅᑕᓪ, ᓀᔥᑕ ᑭᒋ ᓵᓵᑭᐎᓕᐌᐎᓕᓕᐤ ᑭᑦ ᐃᑣᓱᐎᓂᓈᒃ, ᙭ ᒋᓴᔅ; 2 ᐊᓇ ᑳ ᒀᔭᔅᑯᑐᑕᐙᑦ ᐊᓂᐃ ᑳ ᑮ ᐅᓚᑭᒥᑯᑦ, ᑖᐱᔅᑯᒡ ᒧᓯᔅ ᑳ ᑮ ᐃᔑ ᒀᔭᔅᑭᑎᑦ ᑳ ᐃᑕᔑᑦ ᐎᑭᒃ᙮ 3 ᐌᓴ ᐊᐗ ᐃᓕᓕᐤ ᐊᐙᓯᑌ ᑮ ᐃᑕᑭᒪᐤ ᑭᒋ ᑭᔅᑌᓕᑖᑯᐋᑲᓂᐎᑦ ᐃᔥᐱᔥ ᒧᓯᔅ, ᑖᐱᔅᑯᒡ ᐊᓇ ᑳ ᐙᔅᑳᔨᑲᓂᑫᑦ ᐊᐙᓯᑌ ᐁ ᑭᔅᑌᓕᑖᑯᓯᑦ ᐃᔥᐱᔥ ᐊᓂᒪ ᐙᔅᑳᔨᑲᓐ᙮ 4 ᐌᓴ ᒥᓯᐌ ᑕᑐ ᐙᔅᑳᔨᑲᓐ ᓈᓐᑕᐤ ᐊᐌᓇ ᑮ ᐅᔑᑕᐤ; ᒫᑲ ᐊᓇ ᒥᓯᐌ ᑫᒀᓇ ᑳ ᑮ ᐅᔑᑖᑦ ᐁᐗᑯ ᑭᒋᒪᓂᑐ᙮ 5 ᒧᓯᔅ ᒫᑲ ᑖᐺ ᑮ ᒀᔭᔅᑭᑎᐤ ᑳ ᐃᑕᔑᑦ ᐎᑭᒃ, ᑖᐱᔅᑯᒡ ᐊᑑᔅᑫᓛᑲᓐ, ᑭᒋ ᐅᒋ ᐋᓕᒧᒋᑳᑌᑭ ᐊᓂᐃ ᐁᔥᑾ ᑫ ᐎᒋᑳᑌᑭ; 6 ᒫᑲ ᙭ ᑖᐱᔅᑯᒡ ᐌᐅᑯᓯᓯᒪᐎᑦ ᐁ ᑎᐯᓕᑕᒃ ᑎᐱᓚᐌ ᐎᑭ; ᑭᓚᓈᓇᐤ ᒫᑲ ᐁᐗᑯ ᐅ ᐙᔅᑳᔨᑲᓂᒻ, ᑮᔥᐱᓐ ᒪᔥᑲᐎ ᒥᒋᒥᓇᒪᒃ ᐊᓂᒪ ᑫᒋᓀᓕᑕᒧᐎᓐ, ᓀᔥᑕ ᐁ ᒥᓚᐙᑕᒪᒃ ᐁ ᐋᔨᒋ ᐊᔅᐯᓕᒧᔭᒃ ᐱᓕᔥ ᑫ ᐃᔥᒀᐸᓕᒃ᙮ ᐊᓜᐱᐎᓐ ᑭᒋᒪᓂᑐ ᐅᑎᓕᓖᒪ 7 ᐁᐗᑯ ᐌᒋ, ᑖᐱᔅᑯᒡ ᑳ ᐃᑗᑦ ᐯᓓᑭᓯᑦ ᐊᒑᒃ, ᐊᓄᒡ ᐁ ᑭᔑᑳᒃ ᑮᔥᐱᓐ ᐎ ᓇᑐᑕᒬᒃ ᑳ ᐃᑗᑦ, 8 ᐁᑳᐎᓚ ᒪᔥᑲᐎᑖᒃ ᑭᑌᐃᐙᐗ, ᑳ ᑮ ᐃᑭᑭᐸᓐ ᐊᓂᒪ ᑳ ᑭᔑᐙᐃᐙᓂᐗᒃ, ᓀᔥᑕ ᑲᑴᒋᐃᐌᐎ ᐁ ᑭᔑᑳᒃ ᐸᑾᑕᔅᑲᒥᑳᒃ; 9 ᐃᔅᐱ ᑯᑖᐎᐗᐗᒃ ᐁ ᑮ ᓈᓈᑐᑯᐃᒋᒃ, ᐁ ᑮ ᑲᑴᒋᐃᒋᒃ, ᓀᔥᑕ ᐁ ᑮ ᐙᐸᑕᑭᒃ ᓂᑦ ᐊᑑᔅᑫᐎᓇ ᓀᒥᑕᓇ ᑕᑐ ᐱᐴᓋ᙮ 10 ᐁᐗᑯ ᐅᒋ, ᓂ ᑮ ᑭᔕᐌᓕᒪᐗᒃ ᐊᓂᑭ ᑳ ᐋᓂᔅᑫ ᐱᒫᑎᓯᒋᒃ, ᓂ ᑮ ᐃᑡᓐ ᒫᑲ, ᒧᔕᒃ ᐗᓂᑎᐗᒃ ᐅᑌᐃᐙᒃ, ᓇᒪ ᓀᔥᑕ ᑮ ᐅᒋ ᑭᔅᑫᓕᑕᒶᒃ ᓂᑦ ᐃᔑᑣᐎᓇ᙮ 11 ᐁᑯ ᒫᑲ ᑳ ᑭᒋᐃᑗᔮᓐ ᓂᑦ ᐋᑯᓚᐌᓯᐎᓂᒃ, ᐅᑯ ᓇᒪᐎᓚ ᑲᑕ ᐱᑐᑫᐗᒃ ᓂᑦ ᐋᓜᓯᐎᓂ᙮ 12 ᔮᒀᒥᓰᒃ, ᓂᒋᔖᓂᑐᒃ, ᐁᑳ ᐊᐌᓇ ᐁ ᐃᑕᔑᔦᒃ ᑭᒋ ᒪᒋᑌᐁᑦ ᐋᓉᑕᒧᐎᓂᒃ ᐃᔑ, ᐁ ᓇᑲᑖᑦ ᐯᒫᑎᓯᓕᒋ ᑭᒋᒪᓂᑐᐗ᙮ 13 ᒫᑲ ᒧᔕᒃ ᑲᑫᔅᑭᒥᑐᒃ, ᒣᒀᒡ ᐊᓄᒡ ᐁ ᑭᔑᑳᒃ ᐁ ᐃᔑᓂᑳᑌᒃ, ᐁᑳ ᐊᐌᓇ ᐁ ᐃᑕᔑᔦᒃ ᑭᒋ ᒪᔥᑲᐎᑌᐁᔅᑳᑯᑦ ᐁ ᐃᔑ ᑲᑳᔦᓕᓯᒪᑲᓂᓕᒃ ᒪᒋᑣᐎᓐ᙮ 14 ᐌᓴ ᑭ ᑮ ᐅᑎᓈᓇᐤ ᙭, ᑮᔥᐱᓐ ᒪᔥᑲᐎ ᒥᒋᒥᓇᒪᒃ ᑭ ᒫᒋ ᑫᒋᓇᐅᐎᓂᓇᐤ ᐱᓕᔥ ᑫ ᐃᔥᒀᐸᓕᒃ᙮ 15 ᒣᒀᒡ ᐁ ᐃᑣᓂᐗᒃ, ᐊᓄᒡ ᐁ ᑭᔑᑳᒃ, ᑮᔥᐱᓐ ᐎ ᓇᑐᑕᒬᒃ ᑳ ᐃᑗᑦ, ᐁᑳᐎᓚ ᒪᔥᑲᐎᑖᒃ ᑭᑌᐃᐙᐗ, ᑖᐱᔅᑯᒡ ᑳ ᑮ ᐃᑭᑭᐸᓐ ᒣᒀᒡ ᐊᓂᒪ ᑳ ᑭᔑᐙᐃᐙᓂᐗᒃ᙮ 16 ᐌᓴ ᐋᑎᑦ, ᐃᔅᐱ ᑳ ᑮ ᐯᑕᑭᒃ, ᑮ ᑭᔑᐙᐃᐌᐗᒃ: ᐋᑕᐎᓚ ᒫᑲ ᓇᒪᐎᓚ ᒥᓯᐌ ᐊᓂᑭ ᐃᒋᑉᑎᒃ ᑳ ᑮ ᐅᑐᑕᐃᑯᒋᒃ ᒧᓯᓴ᙮ 17 ᒫᑲ ᐊᐌᓕᐗ ᑳ ᑮ ᑭᔕᐌᓕᒫᑦ ᓀᒥᑕᓇ ᑕᑐ ᐱᐴᓋ? ᓇᒪ ᓈ ᐊᓂᐃ ᑳ ᑮ ᒪᒋᑐᑕᒥᓕᒋ, ᐊᓂᐃ ᐎᔭᐎᓕᐗ ᐸᑾᑕᔅᑲᒥᑳᒃ ᑳ ᑮ ᐸᑭᑎᓂᓕᑭ? 18 ᐊᐌᓕᐗ ᓀᔥᑕ ᑳ ᑮ ᑭᒋᐃᑖᑦ ᐁᑳ ᑭᒋ ᐱᑐᑫᓕᒋ ᐅᑦ ᐋᓜᓯᐎᓂᒃ, ᐊᓂᐃ ᐱᑯ ᐁᑳ ᑳ ᑮ ᑖᐺᑕᒥᓕᒋ? 19 ᑭ ᐙᐸᑌᓈᓇᐤ ᒫᑲ ᐁᑳ ᐁ ᑮ ᐱᑐᑫᒋᒃ ᐁᑳ ᐁ ᑮ ᑖᐺᑕᑭᒃ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society