ᐦᐃᑉᕉᐗ 2 - ᐅᔅᑭ ᑎᔅᑌᒥᓐᑦᐱᒫᒋᐃᐌᐎᓐ ᑳ ᑭᒋᐃᑌᓕᑖᑾᒃ 1 ᐁᐗᑯ ᒫᑲ ᐅᒋ, ᐊᐙᓯᑌ ᑭ ᑳ ᓈᑲᑕᐌᓕᑌᑖᓇᐤ ᐊᓂᐃ ᑫᒀᓇ ᑳ ᑮ ᐯᑕᒪᒃ, ᐁᑳ ᐎᔅᑳᑦ ᑭᒋ ᔓᔥᑯᓇᒪᒃ᙮ 2 ᐌᓴ ᑮᔥᐱᓐ ᐊᓂᒪ ᐊᔭᒥᐎᓐ ᑳ ᑮ ᐃᑗᒋᒃ ᐁᓐᒐᓚᒃ ᑮ ᒪᔥᑲᐗᔅᑌᒃ, ᓀᔥᑕ ᒥᓯᐌ ᑕᑐ ᐗᓂᑐᑕᒧᐎᓐ ᓀᔥᑕ ᔑᐱᑕᒧᐎᓐ ᑮ ᐅᑎᓇᒧᒪᑲᒃ ᑳ ᐃᔑ ᑲᔥᑭᑕᒫᓱᒪᑲᒃ ᑎᐸᐊᒫᑫᐎᓐ; 3 ᑖᓂ ᑫ ᐃᔑ ᐅᔑᒧᔭᒃ, ᑮᔥᐱᓐ ᐋᑕᐌᓕᑕᒪᒃ ᐁᔅᐱᒋ ᑭᒋ ᐱᒫᒋᐃᐌᐎᓐ; ᐊᓂᒪ ᓂᔥᑕᒻ ᑳ ᑮ ᒫᒋ ᐋᓕᒧᑕᒃ ᐅᑎᐯᓕᒋᑫᐤ, ᓀᔥᑕ ᑳ ᑮ ᐊᔨᒋ ᐎᑕᒫᑕᑾᒃ ᐊᓂᑭ ᑳ ᑮ ᐯᑕᐙᒋᒃ; 4 ᑭᒋᒫᓂᑐ ᓀᔥᑕ ᐁ ᑎᐹᒋᒧᑦ, ᑭᔅᑭᓄᐙᒋᒋᑲᓇ ᐅᒋ ᓀᔥᑕ ᓇᓈᑲᐤ ᒫᒪᑖᐎ ᐃᔑᒋᑫᐎᓇ, ᓀᔥᑕ ᐹᐱᑐᔥ ᒫᒪᔅᑳᒋ ᐋᔨᑎᐎᓇ, ᓀᔥᑕ ᐁ ᒫᒥᓕᐌᑦ ᐸᓓᑭ ᐊᒑᑾ, ᑳ ᐃᑕᔅᑌᓕᒃ ᑎᐱᓚᐌ ᐅᑦ ᐃᑌᓕᑕᒧᐎᓐ? ᐊᓇ ᑳ ᑭᔅᑭᓄᑕᐃᑕᒃ ᐱᒫᒋᐃᐌᐎᓂᒃ ᐃᔑ 5 ᐌᓴ ᐊᓂᐃ ᐁᓐᒐᓚ ᓇᒪᐎᓚ ᑮ ᑎᐯᓕᑕᒥᐁᐤ ᐊᓂᐁᓕᐤ ᐊᔅᑭᓕᐤ ᑫ ᐹᐸᓕᓕᒃ; ᐊᓂᒪ ᑳ ᐋᓕᒧᑕᒪᒃ᙮ 6 ᒫᑲ ᐯᔭᒃ ᐊᐌᓇ ᓈᓐᑕᐤ ᐃᑕ ᑮ ᐃᑖᒋᒧ, ᐁ ᐃᑗᑦ, ᑫᒀᓐ ᐁᑌᓕᑖᑯᓯᑦ ᐃᓕᓕᐤ, ᐁ ᐱᓯᔅᑫᓕᒪᑦ? ᓀᔥᑕᐱᑯ ᐃᓕᓕᐎᑯᓯᓵᓐ ᐁ ᒪᐗᑎᑕᑦ? 7 ᐋᐱᔑᔥ ᑭ ᑮ ᑕᐸᑌᓂᑖᑯᐊᐤ ᐃᔥᐱᔥ ᐁᓐᒐᓚ; ᑭ ᑮ ᐳᔅᑕᔅᑐᑎᓂᐊᐤ ᑭᔅᑌᓕᑖᑯᓯᐎᓂᓕᐤ ᓀᔥᑕ ᑭᔅᑎᓯᐎᓂᓕᐤ, ᓀᔥᑕ ᑭ ᑮ ᑎᐯᓕᑕᒥᐊᐤ ᐊᓂᐃ ᑭᒋᒋᔭ ᑳ ᑮ ᐅᒋ ᐅᔑᑖᔭᓐ: 8 ᒥᓯᐌ ᑫᒀᓇ ᑭᑭ ᑎᐯᓕᑕᒥᐊᐤ ᔑᐹ ᐅᓯᑎᒃ᙮ ᐌᓴ ᒥᓯᐌ ᐁ ᑮ ᑎᐯᓕᑕᒥᐋᑦ, ᓇᒪ ᐙᐙᒡ ᑫᒀᓐ ᑮ ᐃᔥᑯᓇᒻ ᐁᑳ ᑳ ᑮ ᑎᐯᓕᑕᒥᐋᑦ᙮ ᒫᑲ ᐁᑯ ᐁᑳ ᐁ ᐙᐸᑕᒪᒃ ᐁᔥᑾ ᒥᓯᐌ ᑫᒀᓇ ᐁ ᑎᐯᓕᑕᒥᐋᑲᓂᐎᑦ᙮ 9 ᒫᑲ ᑭ ᐙᐸᒫᓇᐤ ᒋᓴᔅ, ᐊᓇ ᐋᐱᔑᔥ ᑳ ᑮ ᑖᐸᑌᓕᑖᑯᐋᑲᓂᐎᑦ ᐃᔥᐱᔥ ᐁᓐᒐᓚ ᑭᒋ ᐎᓴᑫᓕᑕᒃ ᓂᐱᐎᓂᓕᐤ, ᐁ ᐳᔅᑕᔅᑐᑎᓂᐋᑲᓂᐎᑦ ᑭᔅᑌᓕᑖᑯᓯᐎᓂᓕᐤ ᓀᔥᑕ ᑭᔅᑎᓯᐎᓂᓕᐤ; ᐎᓚ ᐅ ᔕᐌᓕᒋᑫᐎᓐ ᑭᒋᒪᓂᑐ ᐅᒋ ᑭᒋ ᑯᒋᔅᑕᒪᐙᑦ ᓂᐱᐎᓂᓕᐤ ᒥᓯᐌ ᑕᑐ ᐃᓕᓕᐗ᙮ 10 ᐌᓴ ᑮ ᐃᑕᔅᑌᓕᐤ, ᐊᓇ ᑳ ᐅᒋ ᐃᑕᑾᑭ ᒥᓯᐌ ᑫᒀᓇ, ᓀᔥᑕ ᑳ ᐅᒋᐸᓕᑭ ᒥᓯᐌ ᑫᒀᓇ, ᐁ ᐯᔑᐙᑦ ᒥᒉᑦ ᐅᑯᓯᓯᒪᐗ ᑭᔅᑌᓕᑖᑯᓯᐎᓂᒃ ᐃᔑ, ᑭᒋ ᒥᑐᓂᐎᐗᑦ ᐊᓂᐃ ᑳ ᑎᐯᓕᑕᒥᓕᒋ ᐅ ᐱᒫᒋᐃᑯᓯᐎᓂᐗᐤ ᐎᓴᑫᓕᑕᒧᐎᓇ ᐅᒋ᙮ 11 ᐌᓴ ᐊᓇ ᑳ ᐸᓓᑭᐃᐌᑦ, ᐊᓂᑭ ᓀᔥᑕ ᑳ ᐸᓓᑭᐋᑲᓂᐎᒋᒃ ᐯᔭᑯᔭᑭᓯᐗᒃ: ᐁᐗᑯ ᐅᒋ ᓇᒪᐎᓚ ᓇᓀᐯᐎᓯᐤ ᓂᒋᔖᓇᒃ ᑭᒋ ᐃᔑᓂᑳᑖᑦ, 12 ᐁ ᐃᑗᑦ, ᑭᑦ ᐃᔑᓂᑳᓱᐎᓐ ᓂ ᑳ ᐙᐎᑕᒪᐙᐗᒃ ᓂᒋᔖᓇᒃ: ᒣᑴᔭᔥ ᒫᒪᐎᐋᔭᒥᐊᐗ ᑭ ᑳ ᒫᒥᒋᒥᑎᓐ ᐁ ᓂᑲᒧᔮᓐ᙮ 13 ᒥᓇ ᒫᑲ, ᓂ ᑳ ᒪᒥᔑᑐᑕᐗᐤ᙮ ᒥᓇ ᒫᑲ, ᒫᑎᑲ ᓂᓚ, ᓀᔥᑕ ᐊᓂᑭ ᐊᐙᔑᔕᒃ ᑳ ᑮ ᒥᓕᑦ ᑭᒋᒪᓂᑐ᙮ 14 ᓀᔥᑕ ᒫᑲ ᐊᐙᔑᔕᒃ ᑳ ᐃᔑ ᐎᒋ ᐅᑎᓇᒧᒥᐌᒋᒃ ᐎᔮᓯᓕᐤ ᓀᔥᑕ ᒥᑯᓕᐤ, ᐎᓚ ᓀᔥᑕ ᑫᒋᐙᒃ ᑮ ᐅᑎᓇᒻ; ᓂᐱᐎᓐ ᐅᒋ ᑭᒋ ᓂᔑᐗᓈᒋᐋᑦ ᐊᓂᐃ ᑳ ᑎᐯᓕᑕᒥᓕᒋ ᓂᐱᐎᓂᓕᐤ, ᐁᐗᑯ ᒪᒋᒪᓂᑐ; 15 ᓀᔥᑕ ᑭᒋ ᐎᑾᒋᐋᑦ ᐊᓂᐃ ᐁ ᑯᔅᑕᒥᓕᒋ ᓂᐱᐎᓂᓕᐤ ᐅᒋ ᒧᔕᒃ ᐃᔥᐱᔥ ᑳ ᐱᒫᑎᓯᓕᒋ ᑳ ᑮ ᑎᐯᓕᒥᑯᓕᒋ ᐊᐗᑳᔑᐌᐎᓂᓕᐤ᙮ 16 ᐌᓴ ᑖᐺ ᓇᒪᐎᓚ ᑮ ᐅᑎᓇᒫ ᐅᑦ ᐃᔑ ᐋᔭᐎᓂᓕᐤ ᐁᓐᒐᓚ, ᒫᑲ ᑮ ᐅᑎᓇᒫᓱ ᑭᒋ ᐅᑦ ᐊᐙᔑᒥᔑᒥᑯᑦ ᐁᑉᕃᐊᒪ᙮ 17 ᐁᐗᑯ ᒫᑲ ᐅᒋ ᒥᓯᐌ ᐃᔑ ᑮ ᐃᑕᔅᑌᓕᐤ ᑭᒋ ᐃᔑᐋᑲᓂᐎᑦ ᑖᐱᔅᑯᒡ ᐎᒋᔖᓇ; ᑭᒋ ᔕᐌᓕᒋᑫᐎ ᓀᔥᑕ ᑾᔭᔅᑭᑎᐎ ᑭᒋᓵᓵᑭᐎᓕᐌᐎᓕᓕᐎᑦ, ᐊᓂᐃ ᑫᒀᓇ ᐅᒋ ᑳ ᑎᐯᓕᑕᒥᓕᒋ ᑭᒋᒪᓂᑐᐗ, ᑭᒋ ᑎᐸᐊᒸᑦ ᐃᓕᓕᐗ ᐅ ᒪᒋᑣᐎᓂᓕᐗ᙮ 18 ᐌᓴ ᐎᓚ ᐁ ᑮ ᐎᓴᑫᓕᑕᒃ ᐁ ᑮ ᑲᑴᒋᐋᑲᓂᐎᑦ, ᑲᔥᑭᑕᐤ ᓀᔥᑕ ᑭᒋ ᓂᔓᑲᒪᐙᑦ ᐊᓂᐃ ᑳ ᑲᑴᒋᐋᑲᓂᐎᓕᒋ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society