ᐦᐃᑉᕉᐗ 10 - ᐅᔅᑭ ᑎᔅᑌᒥᓐᑦ1 ᐌᓴ ᐅᓚᔓᐌᐎᓐ ᐁᐗᑯ ᐁ ᑎᑳᔅᑌᑎᑭ ᒥᓗ ᑫᒀᓈ ᑫ ᐅᑎᒋᐸᓕᑭ, ᓇᒪ ᒫᑲ ᒥᑐᓂ ᐁ ᐃᔑᓈᑾᒃ ᑖᐱᔅᑯᒡ ᐁ ᐃᔑᓈᑾᑭ, ᓇᒪᐎᔅᑳᑦ ᑲᑕ ᑮ ᑐᑕᒧᒪᑲᓐ, ᐊᓂᐃ ᓵᓵᑭᐎᓕᐌᐎᓇ ᐅᒋ, ᑳ ᑮ ᐸᑭᑎᓂᑫᒋᒃ ᒧᔕᒃ ᑕᑡᐤ ᐯᐴᓂᓕᑭ, ᑭᒋ ᒥᑐᓂᐎᐃᑯᒋᒃ ᐊᓂᑭ ᑳ ᐯᒋ ᓈᑕᑭᒃ᙮ 2 ᐌᓴ ᑮᔥᐱᓐ ᑮ ᑐᑕᒧᒪᑲᒃ, ᓇᒪ ᓈ ᑲᑕ ᑮ ᐳᓂ ᐸᑭᑎᓂᑳᑌᑯᐸᓐ? ᐌᓴ ᐅᑕᔭᒥᐊᐗᐤ, ᐯᔭᑾᐤ ᐁ ᐹᔦᑭᐋᑲᓂᐎᒋᒃ, ᓇᒪᐎᓚ ᑫᔮᐸᒡ ᑲᑕ ᑮ ᒥᑯᔥᑳᑌᓕᑕᒥᐃᑯᐸᓇᒃ ᒪᒋᑣᐎᓂᓕᐤ ᐅ ᒥᑐᓀᓕᒋᑲᓂᐙᒃ᙮ 3 ᒫᑲ ᐅᐅ ᓵᓵᑭᐎᓕᐌᐎᓂᒃ ᑭᔅᑭᓯᑐᑖᑲᓂᐎᐗ ᒪᒋᑐᑕᒧᐎᓇ ᒣᔕᑯᐱᐴᓐ᙮ 4 ᐌᓴ ᓇᒪᐎᓚ ᑲᑕ ᑮ ᐃᑭᓐ ᓈᐯ ᒥᔅᑐᓴᒃ ᓀᔥᑕ ᑯᑕᒃ ᐅᒥᑯᐗᐤ ᑭᒋ ᐅᒋ ᐊᔐᓂᑳᑌᑭ ᒪᒋᑐᑕᒧᐎᓇ᙮ 5 ᐁᐗᑯ ᐌᒋ, ᐃᔅᐱ ᐊᔅᑮᒃ ᑌᑯᔑᒃ, ᐃᑗᐤ, ᓵᓵᑭᐎᓕᐌᐎᓐ ᓀᔥᑕ ᐸᑭᑎᓂᑫᐎᓐ ᓇᒪᐎᓚ ᑭ ᑮ ᓇᑕᐌᓕᑌᓐ, ᒫᑲ ᒥᔭᐤ ᑭ ᑮ ᐋᔦᔅᑲᐎᑕᒪᐎᓐ: 6 ᑳ ᐃᔅᒀᓯᑳᑌᑭ ᐸᑭᑎᓂᑫᐎᓇ ᓀᔥᑕ ᓵᓵᑭᐎᓕᐌᐎᓇ ᒪᒋᑣᐎᓐ ᐅᒋ, ᓇᒪᐎᓚ ᑭ ᑮ ᐅᒋ ᒥᓜᓕᑌᓐ᙮ 7 ᐁᑯ ᐁᑗᔮᓐ, ᒫᑎᑲ, ᓂ ᑕᑯᔑᓂᓐ, (ᐱᔅᑭᑕᓯᓇᐃᑲᓂᒃ ᒪᓯᓇᐃᑲᓂᒃ ᒪᓯᓇᐃᑳᑌᐤ ᐁ ᐋᓕᒧᒥᑲᐎᔮᓐ,) ᑭᒋ ᑐᑐᒫᓐ ᑭᑦ ᐃᑌᓕᑕᒧᐎᓐ, ᐅ ᑭᒋᒪᓂᑐ᙮ 8 ᓂᑳᓐ, ᐃᔅᐱ ᑳ ᐃᑗᑦ, ᓵᓵᑭᐎᓕᐌᐎᓐ ᓀᔥᑕ ᐸᑭᑎᓂᑫᐎᓐ, ᓀᔥᑕ ᑳ ᐃᔅᒀᓯᑳᑌᑭ ᐸᑭᑎᓂᑫᐎᓇ, ᓀᔥᑕ ᐸᑭᑎᓂᑫᐎᓇ ᒪᒋᑣᐎᓇ ᐅᒋ, ᓇᒪᐎᓚ ᑭ ᑮ ᓇᑕᐌᓕᑌᓐ, ᐁᑳ ᓀᔥᑕ ᑳ ᐅᒋ ᒥᓜᓕᑕᒪᓐ; (ᑳ ᐸᑭᑎᓂᑳᑌᑭ ᐅᓚᔓᐌᐎᓂᒃ;) 9 ᐁᑯ ᑳ ᐃᑗᑦ, ᒫᑎᑲ, ᓂ ᑕᑯᔑᓂᓐ ᑭᒋ ᑐᑕᒫᓐ ᑭᑦ ᐃᑌᓕᑕᒧᐎᓐ, ᐅ ᑭᒋᒪᓂᑐ᙮ ᐅᑎᓇᒻ ᐊᓂᐁᓕᐤ ᓃᔥᑕᒻ, ᑭᒋ ᐋᔨᒋᑖᑦ ᑯᑕᑭᓕᐤ᙮ 10 ᐊᓂᒪ ᐃᑌᓕᑕᒧᐎᓂᒃ ᑭ ᐸᓓᑭᐃᑲᐎᓈᓇᐤ, ᐁ ᑮ ᐸᑭᑎᓂᑳᑌᓕᒃ ᒋᓴᔅ ᙭ ᐎᔭᐤ ᐯᔭᑾᐤ ᐱᑯ ᐁ ᑌᐱᐸᓕᓕᒃ᙮ 11 ᒥᓯᐌ ᑕᑐ ᓵᓵᑭᐎᓕᐌᐎᓕᓕᐤ ᒫᑲ ᓂᐸᐎᐤ ᑕᑡᐤ ᐁ ᑭᔑᑳᓕᒃ ᐁ ᐋᔭᒥᐋᐎ ᐊᑑᔅᑫᑦ, ᐁ ᐸᑭᑎᓂᑫᑦ ᒫᑲ ᑖᐱᔅᑯᒡ ᐃᔑ ᓵᓵᑭᐎᓕᐌᐎᓇ, ᐁᑳᐎᔅᑳᑦ ᑫ ᑮ ᐊᔐᓇᒧᒪᑲᑭ ᒪᒋᑐᑕᒧᐎᓇ; 12 ᒫᑲ ᐊᐗ ᐃᓕᓕᐤ ᐹᑎᒫ ᑳ ᑮ ᐸᑭᑎᓂᑫᑦ ᐯᔭᒃ ᓵᓵᑭᐎᓕᐌᐎᓂᓕᐤ ᒪᒋᑐᑕᒧᐎᓇ ᐅᒋ, ᑳᑭᑫ ᑮ ᓇᐊᐱᐌᐤ ᐅ ᑭᒋᓂᔅᑭᓕᒃ ᑭᒋᒪᓂᑐᐗ; 13 ᐁᑯᔅᐱ ᐅᒋ ᐁ ᐯᐅᑦ ᐹᑎᒫ ᐊᓂᐃ ᑳ ᐸᒀᑎᑯᑦ ᑭᒋ ᐅᑕᑯᔅᑳᒋᑲᓂᑦ᙮ 14 ᐌᓴ ᐯᔭᒃ ᐸᑭᑎᓂᑫᐎᓂᓕᐤ ᑮ ᐅᒋ ᒥᑐᓂᐎᐁᐤ ᐊᓂᐃ ᑳ ᐸᓓᑭᐋᑲᓂᐎᓕᒋ᙮ 15 ᑳ ᐅᒋ ᐯᓓᑭᓯᑦ ᐊᒑᒃ ᓀᔥᑕ ᐋᓕᒧᑕᒫᑕᒃ: ᐌᓴ ᑭᐃᔥᑾ ᐊᓂᐁᓕᐤ ᓂᑳᓐ ᑳ ᑮ ᐃᑗᑦ, 16 ᐅᒪ ᐁᐗᑯ ᓇᔅᑯᒥᑐᐎᓐ ᑫ ᐅᔑᑕᒪᐗᑭᒃ ᑭᐃᔥᑾ ᐊᓂᐃ ᑭᔑᑳᐗ, ᐃᑗᐤ ᐅᑎᐯᓕᒋᑫᐤ; ᓂ ᑳ ᐸᑭᑎᓀᓐ ᓄᓚᔓᐌᐎᓇ ᐅᑌᐃᐙᒃ, ᓀᔥᑕ ᐅ ᒥᑐᓀᓕᒋᑲᓂᐙᒃ ᓂ ᑳ ᒪᓯᓇᐁᓐ; 17 ᐅ ᒪᒋᑐᑕᒧᐎᓂᐗᐗ ᒫᑲ ᓀᔥᑕ ᐅ ᒫᒑᑎᓯᐎᓂᐙᐗ ᓇᒪᐎᔅᑳᑦ ᒥᓇ ᓂ ᑳ ᑭᔅᑭᓯᑐᑕᒸᓐ᙮ 18 ᐃᑕ ᒫᑲ ᐁ ᐃᑕᑾᒃ ᐊᔐᓇᒫᑫᐎᓐ, ᓇᒪᐎᓚ ᑫᔮᐸᒡ ᐃᑕᑾᓐ ᐸᑭᑎᓂᑫᐎᓐ ᒪᒋᑐᑕᒧᐎᓐ ᐅᒋ᙮ ᒫᑎ ᐯᒋ ᓈᑖᑕᐤ ᑭᒋᒪᓂᑐ 19 ᐁ ᐋᔮᔭᒃ ᒫᑲ, ᓂᒋᔖᓂᑐᒃ, ᓱᑭᑌᐁᐎᓐ ᑭᒋ ᐱᑐᑫᔭᒃ ᐃᑕ ᐁ ᒪᐗᒋ ᐸᓓᑲᒃ ᒋᓴᔅ ᐅᒥᑯ ᐅᒋ, 20 ᐅᔥᑭ ᓀᔥᑕ ᐱᒫᑎᓯᐎ ᒣᔅᑲᓈᒃ ᑳ ᐅᔥᑭ ᐅᔑᑕᒫᑕᒃ, ᔖᐳ ᐊᑯᐃᑲᓂᒃ, ᐁᐗᑯ ᐎᔮᔅ; 21 ᓀᔥᑕ ᐁ ᐋᔭᐗᒃ ᑭᒋ ᓵᓴᑭᐎᓕᐌᐎᓕᓕᐤ ᑳ ᑎᐯᓕᑕᒸᑦ ᑭᒋᒪᓂᑐᐗ ᐅ ᐙᔅᑳᔨᑲᓂᒥᓕᐤ; 22 ᐁᑯᔑ ᓈᑖᑕᐤ ᐁ ᑖᐺᐎᓂ ᒥᑌᐃᔭᒃ, ᐁ ᑫᒋᓇᐅᔭᒃ ᑖᐺᔦᓕᑕᒧᐎᓂᒃ, ᑭᑌᐃᓇᐗ ᐸᑭᑲᐎᐯᑳᐋᒋᑳᑌᑭ ᒪᒋ ᒥᑐᓀᓕᒋᑲᓐ ᐅᒋ, ᓀᔥᑕ ᑭᔭᐎᓇᐗ ᐁ ᑭᒋᔅᑖᐸᐗᑖᑲᓂᐎᑭ ᐁ ᐸᔦᑳᑲᒥᒃ ᓂᐱᒃ᙮ 23 ᐁᑯᔑ ᒥᒋᒥᓈᑕᐤ ᐁ ᐙᐎᑕᒪᒃ ᑭ ᑖᐺᔦᓕᑕᒧᐎᓂᓇᐤ ᐁᑳ ᐁ ᑳᑭᐁᔦᓕᑕᒪᒃ; ᐌᓴ ᒀᔭᔅᑭᑎᐤ ᐊᓇ ᑳ ᑮ ᐊᔓᑕᒫᑫᑦ: 24 ᐁᑯᔑ ᒫᑲ ᒪᒥᑐᓀᓕᒥᑐᑕᐤ ᑭᒋ ᔑᑭᐃᑐᔭᒃ ᑭᒋ ᐙᐸᑎᓕᐌᔭᒃ ᓵᑭᐃᐌᐎᓐ, ᓀᔥᑕ ᒥᓗ ᐊᑑᔅᑫᐎᓇ; 25 ᐁᑳ ᐁ ᐳᓂ ᒪᐗᒋᐃᑐᔭᒃ, ᑖᐱᔅᑯᒡ ᐁ ᑐᑕᑭᒃ ᐋᑎᑦ; ᒫᑲ ᐁ ᑲᑫᔅᑭᒥᑐᔭᒃ, ᐊᐙᓯᑌ ᒫᑲ ᑫᔮᐸᒡ ᐁ ᑐᑕᒪᒃ ᐁ ᑆᐸᑕᒣᒃ ᐊᓂᒪ ᐁ ᑭᔑᑳᒃ ᐁ ᐹᐸᓕᒃ᙮ 26 ᐌᓴ ᑮᔥᐱᓐ ᐅᒋᑕᐤ ᒪᒋᑐᑕᒪᒃ ᐃᔅᐱ ᐁ ᑮ ᐅᑎᓇᒪᒃ ᑖᐺᐎᓂ ᑭᔅᑫᓕᑕᒧᐎᓐ, ᓇᒪᐎᓚ ᑫᔮᐸᒡ ᐃᑕᑾᓐ ᓵᓵᑭᐎᓕᐌᐎᓐ ᒪᒋᑐᑕᒧᐎᓇ ᐅᒋ, 27 ᒫᑲ ᐱᑯ ᑭᐁᒋᓈᔦᓕᑖᑾᒃ ᐁ ᑯᔅᑖᑌᓕᑖᑾᒃ ᐁ ᐊᔕᐙᐸᒋᑳᑌᒃ ᑎᐹᔅᑯᓂᑫᐎᓐ, ᓀᔥᑕ ᐃᔥᑯᑌᐎ ᐊᑯᓚᐌᓯᐎᓐ, ᑫ ᓂᔑᐗᓈᒋᐃᑯᒋᒃ ᐅᒫᓓᓕᒋᑫᔅᑲᒃ᙮ 28 ᐊᓇ ᑳ ᑮ ᒫᓓᓕᑕᒸᑦ ᒧᓯᓴ ᐅᑦ ᐅᓚᔓᐌᐎᓂᓕᐤ ᑮ ᓂᐱᐤ ᐁᑳ ᐁ ᑭᑎᒫᑫᓕᒫᑲᓂᐎᑦ, ᐁ ᐃᑖᒋᒥᑯᑦ ᓂᔓ ᓀᔥᑕᐱᑯ ᓂᔅᑐ ᐅᑎᐹᒋᒧᐗ: 29 ᑖᓀᓕᑯᒃ ᒫᑲ ᐊᐙᓯᑌ ᐁᑌᓕᑖᑯᓯᑦ ᑭᒋ ᑲᒀᑕᑭᐋᑲᓂᐎᑦ, ᑭᑦ ᐃᑌᓕᑌᓇᐗᐤ, ᐊᓇ ᑳ ᑮ ᑕᑕᑯᔅᑳᐃᒫᑦ ᑭᒋᒪᓂᑐ ᐅᑯᓯᓴ, ᓀᔥᑕ ᐁᑳ ᐁ ᐸᓓᑲᒃ ᑳ ᑮ ᐃᑕᑭᑕᒃ ᓇᔅᑯᒥᑐᐎᓂ ᒥᑯᓕᐤ, ᐊᓂᐁᓕᐤ ᐅᒋ ᑳ ᑮ ᐸᓓᑭᐃᑯᑦ, ᓀᔥᑕ ᑳ ᐋᔭᓵᒋᐋᑦ ᔕᐌᓕᒋᑫᐎᓂ ᐊᒑᑾ? 30 ᐌᓴ ᑭ ᑭᔅᑫᓕᒪᓇᐤ ᐊᓇ ᑳ ᑮ ᐃᑗᑦ, ᐋᔅᑯᒋᐃᐌᐎᓐ ᓂᓚ ᓂ ᑎᐱᓚᐌᐎᓯᓐ; ᓂᓚ ᓂ ᑳ ᑭᐌᑎᐸᐊᒫᑳᓐ, ᐃᑗᐤ ᐅᑎᐯᓕᒋᑫᐤ᙮ ᒥᓇ ᒫᑲ ᐅᑎᐯᓕᒋᑫᐤ ᑲᑕ ᑎᐹᔅᑯᓀᐤ ᐅᑦ ᐃᓕᓕᒪ᙮ 31 ᑯᔅᑖᑌᓕᑖᑾᓐ ᑭᒋ ᐸᑭᔑᓈᓂᐗᒃ ᐅᒋᒋᒃ ᐯᒫᑎᓰᑦ ᑭᒋᒪᓂᑐ᙮ 32 ᒫᑲ ᑭᔅᑭᓯᒃ ᐊᓂᐃ ᑳᔮᔥ ᑭᔑᑳᐗ, ᐁᑯᔅᐱ, ᐹᑎᒫ ᐁ ᑮ ᐙᔅᑌᓇᒫᑲᐎᔦᒃ, ᑭ ᑮ ᒧᔑᑖᓇᐗᐤ ᑭᒋ ᐊᓕᒥᓯᐎᓂ ᓄᑎᓂᑫᐎᓐ; 33 ᐸᔅᑭ, ᒣᒀᒡ ᐁ ᑮ ᐃᔑᐃᑲᐎᔦᒃ ᑭᒋ ᐹᐱᐃᑲᐎᔦᒃ, ᐁ ᑮ ᑭᑳᒥᑲᐎᔦᒃ ᓀᔥᑕ ᐁ ᑮ ᐊᓕᒥᐃᑲᐎᔦᒃ; ᐸᔅᑭ ᓀᔥᑕ, ᒣᒀᒡ ᐁ ᑮ ᐅ ᐎᒉᐗᑲᓂᔦᒃ ᐊᓂᑭ ᐁᑯ ᐃᔑ ᑳ ᑐᑕᐙᑲᓂᐎᒋᒃ᙮ 34 ᐌᓴ ᑭ ᑮ ᑭᑎᒫᑫᓕᒥᓇᐗᐤ ᐁ ᑮ ᒫᒫᒋᒀᐱᓱᔮᓐ, ᓀᔥᑕ ᑭ ᑮ ᒥᓜᓕᑌᓇᐗᐤ ᐁ ᑮ ᒪᔅᑲᒥᑲᐎᔦᒃ ᑭᑦ ᐋᔮᓂᐗᐗ, ᐁ ᑭᔅᑫᓕᑕᒣᒃ ᐁ ᐋᔮᔦᒃ ᑭᔑᑭᔑᑯᒃ ᐊᐙᓯᑌ ᐁ ᒥᓨᔑᒃ ᓀᔥᑕ ᑳᑭᑫ ᐌᓗᑎᓯᐎᓐ᙮ 35 ᐁᑳᐎᓚ ᒫᑲ ᐌᐱᓇᒧᒃ ᑭ ᑫᒋᓇᐅᐎᓂᐗᐤ, ᑳ ᐋᔮᒪᑲᒃ ᑭᒋ ᑎᐸᐊᒫᑫᐎᓐ᙮ 36 ᐌᓴ ᑭ ᓇᑕᐌᓕᑌᓇᐗᐤ ᔑᐱᓚᐌᓯᐎᓐ; ᐹᑎᒫ ᑮ ᑐᑕᒬᑴ ᐅᑦ ᐃᑌᓕᑕᒧᐎᓐ ᑭᒋᒪᓂᑐ, ᑭᒋ ᒥᓕᑲᐎᔦᒃ ᐊᓂᒪ ᐊᔓᑕᒫᑫᐎᓐ᙮ 37 ᐌᓴ ᐁᔥᑾ ᐊᒋᓚᐤ, ᐁᑯ ᑫ ᑕᑯᔑᒃ ᐊᓇ ᑳ ᐃᑌᓕᑖᑯᓯᑦ ᑭᒋ ᑕᑯᔑᒃ, ᓇᒪ ᒫᑲ ᑲᑕ ᑆᔅᑕᐎᐤ 38 ᑳ ᒀᔭᔅᑭᑎᒋᒃ ᒫᑲ ᑖᐺᔦᓕᑕᒧᐎᓐ ᑲᑕ ᐅᒋ ᐱᒫᑎᓯᐗᒃ; ᒫᑲ ᑮᔥᐱᓐ ᐊᐌᓇ ᐃᓕᓕᐤ ᐊᔐᑳᐸᐎᑌ, ᓇᒪᐎᓚ ᑲᑕ ᓵᐯᓕᒥᑯ ᓂᑦ ᐊᒑᑾ᙮ 39 ᒫᑲ ᑭᓚᓈᓇᐤ ᓇᒪᐎᓚ ᑭᑦ ᐅ ᐎᒉᐙᑲᓂᓇᐤ ᐊᓂᑭ ᓂᔑᐗᓈᑎᓯᐎᓂᒃ ᑳ ᐃᔑ ᐊᔐᑳᐸᐎᒋᒃ, ᒫᑲ ᐊᓂᑭ ᑳ ᑖᐺᔦᓕᑕᑭᒃ ᑭᒋ ᐅᒋ ᐱᒫᒋᐋᒋᒃ ᐅᑦ ᐊᒑᑯᐗᐗ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society