ᑲᓓᔕᐊᓇ 6 - ᐅᔅᑭ ᑎᔅᑌᒥᓐᑦᐗᐎᒋᐃᑐᒃ ᑭᑖᓕᒥᓯᐎᓂᐗᐤ 1 ᓂᒋᔖᓂᑐᒃ, ᑮᔥᐱᓐ ᐊᐌᓇ ᐊᑎᒥᑯᒋ ᒪᒋᐋᔨᑎᐎᓂᓕᐤ, ᑭᓚᐗᐤ ᑳ ᐊᒑᑯᐎᔦᒃ ᐯᒋ ᑭᐌᑕᐃᒃ ᐊᓇ ᓗᔅᐹᑌᓕᑕᒧᐎᓂᒃ; ᐁ ᒫᒥᑐᓀᓕᒥᑎᓱᔭᓐ, ᒫᔅᑯᒡ ᑭᓚ ᓀᔥᑕ ᑭ ᑳ ᑲᑴᒋᐃᑲᐎᓐ᙮ 2 ᓇᔭᑕᒫᑐᒃ ᒣᒥᔅᑯᒡ ᑭ ᓇᔭᒋᑲᓂᐗᐗ, ᐁᑯ ᑫ ᐃᔑ ᑎᐱᑐᑕᒬᒃ ᐅᑦ ᐅᓚᔓᐌᐎᓐ ᙭᙮ 3 ᐌᓴ ᑮᔥᐱᓐ ᐊᐌᓇ ᐃᓕᓕᐤ ᐙᔦᔥ ᐁᑌᓕᒥᑎᓱᒋ, ᐋᑕ ᐁᑳ ᐙᔦᔥ ᐁ ᐃᑌᓕᑖᑯᓯᑦ, ᐙᔦᔑᐃᑎᓱ᙮ 4 ᒫᑲ ᐁᑯᔑ ᒥᓯᐌ ᑕᑐ ᐃᓕᓕᐤ ᒥᑐᓂ ᑲᑕ ᑲᑴᒋᑕᐤ ᑎᐱᓚᐌ ᐅᑦ ᐅᑑᔅᑫᐎᓐ, ᐁᑯ ᒫᑲ ᑫ ᐯᔭᑯ ᐋᔮᑦ ᑎᐱᓚᐌ ᐅ ᒥᓚᐙᑕᒧᐎᓐ, ᓇᒪ ᒫᑲ ᑯᑕᑭᔭ ᑲᑕ ᐅᒋ ᒥᓚᐙᑕᒻ᙮ 5 ᐌᓴ ᒥᓯᐌ ᑕᑐ ᐃᓕᓕᐤ ᑲᑕ ᓇᔭᑕᒻ ᑎᐱᓚᐌ ᐅ ᓇᔭᒋᑲᓐ᙮ 6 ᐁᑯᔑ ᐊᓇ ᑳ ᑭᔅᑭᓄᐊᒫᑦ ᐋᔭᒥᐎᓂᓕᐤ ᑲᑕ ᐅᒋᔅᑕᒪᐌᐤ ᐊᓂᐃ ᑳ ᑭᔅᑭᓄᐊᒫᑫᓕᒋ ᒥᓯᐌ ᑳ ᒥᓦᔑᓂᓕᑭ᙮ 7 ᐁᑳᐎᓚ ᐙᔦᔑᐃᑎᓱᒃ; ᑭᒋᒪᓂᑐ ᓇᒪᐎᓚ ᐋᔭᓵᒋᐊᐤ: ᐌᓴ ᐱᑯ ᑫᒀᓕᐤ ᑳ ᐗᓴᓶᐱᓇᒃ ᐃᓕᓕᐤ, ᐁᐗᑴᓕᐤ ᓀᔥᑕ ᑫ ᒪᓂᔕᒃ᙮ 8 ᐌᓴ ᐊᓇ ᐎᔮᓯᐎᓂᒃ ᑳ ᐃᔑ ᐗᓴᓶᐱᓂᑫᑦ, ᐎᔮᓯᐎᓂᒃ ᑲᑕ ᐅᒋ ᒪᐗᒋᑕᐤ ᓂᔑᐗᓈᑎᓯᐎᓂᓕᐤ; ᒫᑲ ᐊᓇ ᐊᒑᑯᒃ ᑳ ᐃᔑ ᐗᓴᓶᐱᓂᑫᑦ ᐊᒑᑯᒃ ᑲᑕ ᐅᒋ ᒪᐗᒋᑕᐤ ᑳᑭᑫ ᐱᒫᑎᓯᐎᓂᓕᐤ᙮ 9 ᐁᑳᐎᓚ ᒫᑲ ᐋᔦᔅᑯᓯᑖᐤ ᐁ ᒥᓗᑐᑖᑫᔭᒃ; ᐌᓴ ᐃᔅᐱ ᓇᐃᐸᓕᑫ ᑭ ᑳ ᒪᐗᒋᒋᑳᓈᓇᐤ, ᐁᑳ ᓄᑌᔑᓂᔮᑫ᙮ 10 ᒣᒀᒡ ᒫᑲ ᐁ ᓇᐃᐸᓕᐃᑯᔭᒃ, ᐁᑯᔑ ᒥᓄᑐᑕᐙᑖᓇᒃ ᒥᓯᐌ ᐃᓕᓕᐗᒃ, ᐅᓵ ᒫᑲ ᐊᓂᑭ ᑳ ᐊᔑᑕᑭᒫᑲᓂᐎᒋᒃ ᐊᓂᐃ ᑳ ᑖᐺᔦᓕᑕᒥᓕᒋ᙮ ᐹᓪ ᔮᑾᒥᒥᐌᐤ ᓀᔥᑕ ᐙᒉᑫᒧ 11 ᑭ ᐙᐸᑌᓇᐗᐤ ᐁᔅᐱᒋ ᒥᔖᒃ ᒪᓯᓇᐃᑲᓐ ᐁ ᑮ ᒪᓯᓇᐊᒫᑕᑾᒃ ᑎᐱᓚᐌ ᓂᒋᒋ ᐅᒋ᙮ 12 ᑕᑐ ᑳ ᓇᑕᐌᓕᑕᑭᒃ ᑭᒋ ᒥᓗᐊᓕᒧᒫᑲᓂᐎᒋᒃ ᐎᔮᓯᐎ ᑫᒀᓇ ᐅᒋ, ᑮ ᔖᑯᒋᒥᑯᐗᐗᒃ ᑭᒋ ᑭᔅᑭᓄᐙᒋᔓᑲᐎᔦᒃ, ᐱᑯ ᐁᑳ ᑭᒋ ᑲᒀᑕᑭᐋᑲᓂᐎᒋᒃ ᙭ ᐅᑦ ᐊᔑᑌᐋᑎᑯᒻ ᐅᒋ᙮ 13 ᐌᓴ ᓇᒪᐎᓚ ᓀᔥᑕ ᐎᓚᐗᐤ ᑳ ᑭᔅᑭᓄᐙᒋᔡᑲᓂᐎᒋᒃ ᑲᓇᐌᓕᑕᒶᒃ ᐅᓚᔓᐌᐎᓂᓕᐤ; ᒫᑲ ᓇᑕᐌᓕᑕᒶᒃ ᑭᓚᐗᐤ ᑭᒋ ᑭᔅᑭᓄᐙᒋᔓᑲᐎᔦᒃ, ᑭᒋ ᑮ ᒫᒪᑖᑯᒧᒋᒃ ᑭ ᐎᔭᓯᐙᒃ᙮ 14 ᒫᑲ ᑭᒋᒪᓂᑐ ᑲᑕ ᐎ ᑭᐱᒋᑕᐤ ᓂᓚ ᑭᒋ ᒫᒪᑖᑯᒧᔮᓐ, ᐱᑯ ᑭ ᑎᐯᓕᒋᑫᒥᓇᐤ ᒋᓴᔅ ᙭ ᐅᑦ ᐋᔑᑌᐋᑎᑯᒻ ᐅᒋ, ᑳ ᐅᒋ ᒋᔅᑖᔅᑾᐊᒫᑲᐎᔮᓐ ᐊᔅᑭ, ᓂᓚ ᓀᔥᑕ ᐊᔅᑮᒃ ᐃᔑ᙮ 15 ᐌᓴ ᙭ ᒋᓴᓯᒃ ᑭᔅᑭᓄᐙᒋᔓᑲᐎᓐ ᓇᒪᐎᓚ ᐙᔦᔥ ᐃᑖᐸᑕᓐ, ᓇᒪ ᓀᔥᑕ ᓇᒪᑭᔅᑭᓄᐙᒋᔓᑲᐎᓐ, ᒫᑲ ᐅᔥᑭ ᐅᔑᐋᑲᓐ᙮ 16 ᒥᓯᐌ ᐊᓂᑭ ᒫᑲ ᑳ ᐱᒧᑖᑕᑭᒃ ᐅᒣᓕᐤ ᐅᓚᔓᐌᐎᓂᓕᐤ, ᑲᑕ ᐎ ᐅᑎᑎᑯᐗᒃ ᑳᔮᒣᓕᑕᒧᐎᓂᓕᐤ, ᓀᔥᑕ ᔕᐌᓕᒋᑫᐎᓂᓕᐤ, ᐊᓯᒋ ᓀᔥᑕ ᑭᒋᒪᓂᑐ ᐅᑦ ᐃᔅᕃᐃᓕᒪ᙮ 17 ᐊᓄᒃ ᐅᒋ ᐁᑳᐎᓚ ᐊᐌᓇ ᐃᓕᓕᐤ ᓂ ᑳ ᒥᑯᔥᑳᒋᐃᒃ: ᐌᓴ ᓂ ᑭᑭᔥᑫᓐ ᓂᔭᐎ ᐅᒋᓯᓯᐎᓇ ᑳ ᐅᒋ ᑭᔅᑫᓕᑖᑯᓯᔮᓐ ᐁ ᑎᐯᓕᒥᑦ ᒋᓴᔅ ᐅᑎᐯᓕᒋᑫᐤ᙮ 18 ᓂᒋᔖᓂᑐᒃ, ᐅ ᔕᐌᓕᒋᑫᐎᓐ ᑭ ᑎᐯᓕᒋᑫᒥᓇᐤ ᒋᓴᔅ ᙭ ᑭ ᑳ ᐎ ᐎᒉᐎᑯᐙᓇᐗᐤ ᑭᑦ ᐊᒑᑯᐙᒃ᙮ ᐁᒣᓐ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society