ᐃᐱᓯᔭᓇ 4 - ᐅᔅᑭ ᑎᔅᑌᒥᓐᑦ

ᑖᓐ ᐁ ᒫᒫᐤ ᐊᑐᐢᑫᒪᑲᒃ ᒥᔭᐤ

¹ ᐁᐗᑯ ᐅᒋ ᓂᓚ ᐅᑎᐯᓕᒋᑫᐤ ᐅ ᑭᐸᐙᑲᓇ, ᑭ ᓇᑐᑕᒫᑎᓇᐗᐤ, ᑭᒋ ᑌᐸᑫᓕᑖᑯᓯᐎ ᐱᒧᑌᔦᒃ ᐊᓂᒪ ᓇᑐᒥᑯᓯᐎᓂᒃ ᑳ ᐃᔑ ᓇᑐᒥᑲᐎᔦᒃ;

² ᒥᓯᐌ ᑕᐸᑌᓕᒧᐎᓂᒃ ᓀᔥᑕ ᓗᔅᐹᑎᓯᐎᓂᒃ, ᔑᐱᓚᐌᓯᐎᓂᒃ, ᐁ ᔑᐱᓚᐗᓰᔅᑖᑐᔦᒃ ᓵᑭᐃᐌᐎᓂᒃ;

³ ᐁ ᓇᒋᑖᔦᒃ ᑭᒋ ᑲᓇᐌᓕᑕᒬᒃ ᐊᒑᒃ ᐅ ᐯᔭᑯᐎᓐ, ᐁ ᒫᒪᐗᐱᑎᑯᔦᒃ ᑳᔮᒣᓕᑕᒧᐎᓐ᙮

⁴ ᐯᔭᑾᓐ ᒥᔭᐤ, ᓀᔥᑕ ᐯᔭᑯ ᐊᒑᒃ, ᑖᐱᔅᑯᒡ ᐁ ᐃᔑ ᓇᑐᒥᑲᐎᔦᒃ ᑭᒋ ᐯᔭᑯ ᐊᔅᐯᓕᒧᔦᒃ ᑭ ᓇᑐᒥᑯᓯᐎᓂᐙᒃ;

⁵ ᐯᔭᑯ ᐅᑎᐯᓕᒋᑫᐤ, ᐯᔭᑾᓐ ᑖᐺᔦᓕᑕᒧᐎᓐ, ᐯᔭᑾᓐ ᓯᑲᐊᑖᑫᐎᓐ,

⁶ ᐯᔭᑯ ᑭᒋᒪᓂᑐ ᓀᔥᑕ ᑳ ᐅᑕᐎᒥᑯᑦ ᒥᓯᐌ, ᑳ ᑎᐯᓕᒫᑦ ᒥᓯᐌ, ᑳ ᔖᐳᔥᑲᐙᑦ ᒥᓯᐌ ᓀᔥᑕ ᑳ ᐱᒋᔅᑳᑖᒃ ᒥᓯᐌ ᐁ ᐃᑕᔑᔦᒃ᙮

⁷ ᒫᑲ ᒥᓯᐌ ᐁ ᐃᑕᔑᔭᒃ ᑭ ᒥᓕᑲᐎᓈᓇᐤ ᔕᐌᓕᒋᑫᐎᓐ, ᐁ ᐃᔥᐱᔑ ᒫᑎᓇᒫᑕᒃ ᙭᙮

⁸ ᐁᐗᑯ ᐌᒋ ᐃᑗᑦ, ᐃᔅᐱ ᐃᔥᐱᒥᒃ ᐁᔑ ᐅᐱᔅᑳᑦ, ᑮ ᑭᒋᐎᓓᐤ ᒥᒉᑦ ᑳ ᒫᒫᒋᑯᐱᓱᓕᒋ ᓀᔥᑕ ᑮ ᒥᓓᐤ ᐃᓕᓕᐗ ᒥᓕᐌᐎᓇ᙮

⁹ ᐊᓂᒪ ᒫᑲ ᐁ ᑮ ᐅᐱᔅᑳᑦ, ᑫᒀᓐ ᐱᑯ ᓃᔥᑕᒻ ᐁ ᑮ ᓛᔑᑦ ᐅᑕ ᐊᔅᑮᒃ ᑕᐸᔑᔥ?

¹⁰ ᐊᓇ ᑳ ᑮ ᓛᔑᑦ ᐁᐗᒀᓇ ᓀᔥᑕ ᑳ ᑮ ᐅᐱᔅᑳᑦ ᓈᔅᐱᒡ ᐃᔥᐱᒥᒃ ᒥᓯᐌ ᑭᔑᒀ, ᑭᒋ ᑎᐱᑐᑕᒃ ᒥᓯᐌ ᑫᒀᓇ᙮

¹¹ ᑮ ᒥᓕᐌᐤ ᒫᑲ ᐋᑎᑦ ᑭᒋ ᐋᐎᓕᒋ ᐊᐸᔅᑕᓚᒃ; ᐋᑎᑦ ᓀᔥᑕ, ᐅᑭᔅᑭᐙᐃᑫᐗᒃ; ᐋᑎᑦ ᓀᔥᑕ ᒥᓗᐋᒋᒧᐎᓕᓕᐗᒃ; ᐋᑎᑦ ᓀᔥᑕ, ᐅᑲᓇᐌᓕᒥᐌᐗᒃ ᓀᔥᑕ ᐅᑭᔅᑭᓄᐊᒫᑫᐗᒃ;

¹² ᑭᒋ ᒥᑐᓂᐎᐋᑲᓂᐎᒋᒃ ᐅᐸᓓᑭᓴᒃ, ᑭᒋ ᐋᔭᒥᐋᐎ ᐊᑑᔅᑫᒋᒃ, ᑭᒋ ᐅᒋ ᓚᑭᑭᓂᓕᒃ ᙭ ᐎᔭᐤ:

¹³ ᐹᑎᒫ ᒥᓯᐌ ᐁ ᐃᑕᔑᔭᒃ ᐅᑎᑕᒪᑴ ᒫᒪᐎ ᑖᐺᔦᓕᑕᒧᐎᓐ, ᓀᔥᑕ ᑖᐱᔅᑯᒡ ᑭᔅᑫᓂᒥᒪᑴ ᑭᒋᒪᓂᑐ ᐅᑯᓯᓴ, ᑭᒋ ᐅᑎᑕᒪᒃ ᑭᔑᓂᑖᐎᑭᐎ ᐃᓕᓕᐎᐎᓐ, ᒥᑐᓂ ᐁ ᐃᔅᐱ ᑎᑭᑎᑦ ᙭:

¹⁴ ᐁᑳ ᑫᔮᐸᒡ ᑭᒋ ᐊᐙᔑᔑᐎᔭᒃ ᐁ ᒫᒦᔅᑯᒋᐸᓕᔭᒃ ᐸᐹᐌᐹᔅᑎᒥᑯᔭᒃ ᒥᓯᐌ ᐹᐱᑐᔥ ᑭᔅᑭᓄᐊᒫᑫᐎᓐ, ᐁ ᒋᔑᐃᑕᑾᒃ ᐙᔦᔑᐃᐌᐎᓕᓕᐗᒃ, ᓀᔥᑕ ᐅ ᒪᒋ ᑲᑳᔦᓕᓯᐎᓂᐗᐤ, ᐃᑕ ᑳ ᐅᒋ ᐊᔣᐃᑫᒋᒃ ᑭᒋ ᐙᔦᔑᐃᐌᒋᒃ;

¹⁵ ᒫᑲ ᐁ ᑖᐺᔭᒃ ᓵᑭᐃᐌᐎᓂᒃ, ᑭᒋ ᐅᑎᒋᑭᒪᒃ ᒥᓯᐌ ᑫᒀᓂᒃ, ᐊᓇ ᑳ ᒥᔅᑎᒀᓂᐎᑦ, ᙭ ᐅᑎ:

¹⁶ ᐊᓇ ᒥᓯᐌ ᒥᔭᐤ ᑳ ᐅᒋ ᒥᓗ ᒫᒪᐗᒧᑖᑲᓂᐗᒃ ᓀᔥᑕ ᐋᓕᑕᐱᑳᑌᒃ ᐊᓂᒪ ᐅᒋ ᑳ ᒥᓕᐌᒪᑲᒃ ᒥᓯᐌ ᐁ ᐊᔮᓂᔅᑳᓂᐗᒃ ᒥᔭᐤ ᐁ ᐃᔑ ᑖᐺ ᐋᐸᑎᓯᒪᑲᒃ ᒥᓯᐌ ᐁ ᓇᓈᑲᐗᒃ, ᑭᒋ ᓚᑭᑭᒪᑲᒃ ᒥᔭᐤ, ᑭᒋ ᓚᑭᐃᑎᓱᒪᑲᒃ ᓵᑭᐃᐌᐎᓂᒃ᙮

᙭ ᒥᓕᐌᐤ ᐅᔥᑭ ᐱᒫᑎᓯᐎᓐ

¹⁷ ᐁᐗᑯ ᐌᒋ ᐅᒪ ᐃᑗᔮᓐ, ᓀᔥᑕ ᐎᑕᒫᓐ ᐅᑎᐯᓕᒋᑫᒃ, ᐊᓄᒡ ᐅᒋ ᐁᑳ ᑭᒋ ᐱᒧᑌᔦᒃ ᐁ ᐃᔑ ᐱᒧᑌᒋᒃ ᑯᑕᑭᔭᒃ ᒉᓐᑖᐃᓚᒃ, ᑲᑫᐹᑎᓯᐎᓂᒃ ᑳ ᐅᒋᐸᓕᓕᒃ ᐅ ᒥᑐᓀᓕᒋᑲᓂᐙᒃ,

¹⁸ ᐁ ᑎᐱᔅᑭᓯᒪᑲᓂᓕᒃ ᐅ ᓂᓯᑐᑕᒧᐎᓂᐗᐤ, ᐁᑳ ᐁ ᑭᔅᑫᓕᑕᒸᒋᒃ ᑭᒋᒪᓂᑐᐗ ᐅᑦ ᐃᔑᐱᒫᑎᓯᐎᓂᓕᐤ ᑲᑫᐹᑎᓯᐎᓂᓕᐤ ᐅᒋ ᑳ ᐱᒋᔅᑳᑯᒋᒃ, ᐁ ᒪᔥᑲᐎᑌᐁᒋᒃ:

¹⁹ ᐅᑯ, ᐁ ᑮ ᐳᓂ ᓂᓯᑐᒪᒋᐅᒋᒃ ᑮ ᐸᑭᑎᓂᑎᓱᐗᒃ ᐱᔑᒀᑎᓯᐎᓂᒃ, ᑭᒋ ᑐᑕᑭᒃ ᒥᓯᐌ ᐎᓂᓯᐎᓂᓕᐤ ᐁ ᐎᓴᓶᓕᒧᒋᒃ᙮

²⁰ ᒫᑲ ᓇᒪᐎᓚ ᐅᒪ ᑭ ᑮ ᐃᔑ ᑭᔅᑭᓄᐊᒫᑯᐗᐤ ᙭;

²¹ ᑮᔥᐱᓐ ᑳ ᐯᑕᐙᐌᑴ, ᓀᔥᑕ ᑳ ᑭᔅᑭᓄᐊᒫᑖᑾ, ᑳ ᐃᔑ ᐙᐸᑎᓕᐌᑦ ᑖᐺᐎᓂᓕᐤ ᒋᓴᔅ:

²² ᑭᒋ ᑫᒋᑾᓇᒣᒃ ᑭ ᑳᔮᔥ ᐃᔑᐱᒫᑎᓯᐎᓂᐗᐤ ᐊᓂᒪ ᑳᔮᔥ ᐃᑖᑎᓯᐎᓐ, ᑳ ᒫᓛᑕᒃ, ᑖᐱᔅᑯᒡ ᐁ ᐃᔑ ᐙᔦᔑᐃᐌᒪᑲᑭ ᒪᒋ ᓇᑕᐌᓕᑕᒧᐎᓇ;

²³ ᓀᔥᑕ ᑭᒋ ᐅᔥᑭᐃᑲᐎᔦᒃ ᐁ ᐃᔑ ᓇᑕᐌᓕᑕᒧᒪᑲᒃ ᑭ ᒥᑐᓀᓕᒋᑲᓂᐗᐤ:

²⁴ ᓀᔥᑕ ᑭᒋ ᐳᔅᑎᔥᑲᒣᒃ ᐅᔥᑭ ᐃᓕᓕᐎᐎᓐ ᑳ ᐅᔑᑖᓂᐗᒃ ᑭᒋ ᓇᔅᐱᑖᑯᓐ ᑭᒋᒪᓂᑐ ᑲᔭᔅᑭᑖᑎᓯᐎᓂᒃ ᓀᔥᑕ ᑖᐺ ᐸᓓᑭᓯᐎᓂᒃ᙮

²⁵ ᐁᐗᑯ ᐅᒋ, ᐁ ᐌᐱᓇᒣᒃ ᑭᓛᔅᑭᐎᓐ, ᐁᑯᔑ ᒥᓯᐌ ᐊᐌᓇ ᑲᑕ ᑖᐺᒣᐤ ᐎᒋᐃᓕᓕᐗ: ᐌᓴ ᑭ ᐯᔭᑯᑌᐎᓯᓈᓇᐤ᙮

²⁶ ᑭᓯᐙᓯᒃ, ᐁᑳ ᒫᑲ ᒪᒋᑐᑕᒧᒃ: ᐁᑳᐎᓚ ᑲᑕ ᐸᑭᔑᒧ ᑫᔮᐸᒡ ᐁ ᐋᑯᓚᐌᓯᔦᒃ:

²⁷ ᐁᑳᐎᓚ ᓀᔥᑕ ᐸᑭᑎᓂᑎᓱᒃ ᑭᒋ ᐙᔦᔑᐃᑖᒃ ᒪᒋᒪᓂᑐ᙮

²⁸ ᐊᓇ ᑳ ᑮ ᑭᒧᑎᑦ, ᐁᑯᔑ ᐁᑳᐎᓚ ᒥᓇ ᑲᑕ ᑭᒧᑎᐤ: ᒫᑲ ᐊᐙᓯᑌ ᑲᑕ ᐊᑑᔅᑫᐤ, ᐁ ᑐᑕᒃ ᐅᒋᒋᔭ ᐅᒋ ᐊᓂᐁᓕᐤ ᑳ ᒥᓨᔑᓂᓕᒃ, ᑭᒋ ᑮ ᒥᓛᑦ ᐊᓂᐃ ᑳ ᒪᓀᓯᓕᒋ᙮

²⁹ ᐁᑳᐎᓚ ᒪᒋ ᐋᔭᒥᐎᓐ ᑲᑕ ᐅᒋᐸᓕᐤ ᑭᑐᓂᐙᒃ, ᒫᑲ ᐊᓂᒪ ᑳ ᒥᓨᔑᒃ ᐁ ᐃᑖᐸᑕᒃ ᑭᒋ ᑭᔅᑭᓄᐊᒫᑫᒪᑲᒃ, ᑭᒋ ᑮ ᒥᓗᑐᑖᑯᒋᒃ ᐊᓂᑭ ᑳ ᐯᑕᑭᒃ᙮

³⁰ ᐁᑳᐎᓚ ᓀᔥᑕ ᒪᒥᔕᒣᓕᑕᒥᐃᒥᒃ ᑭᒋᒪᓂᑐ ᐅ ᐸᓓᑭ ᐊᒑᑾ, ᑳ ᐅᒋ ᑭᔅᑭᓄᐙᒋᐃᑲᐎᔦᒃ ᐹᑎᒪ ᑎᐸᐊᒫᑫᔅᑕᒫᑫᐎ ᑮᔑᑳᑫ᙮

³¹ ᐌᐱᓇᒧᒃ ᒥᓯᐌ ᐊᒀᑎᓯᐎᓐ, ᓀᔥᑕ ᐋᑯᓚᐌᓯᐎᓐ, ᓀᔥᑕ ᑭᓯᐙᓯᐎᓐ, ᓀᔥᑕ ᑭᓯᐙᓯᐎ ᐋᔭᒥᐎᓐ, ᓀᔥᑕ ᒪᒋ ᐋᔭᒥᐎᓐ, ᓀᔥᑕ ᒥᓯᐌ ᑭᒧᒋᐸᒀᑎᑐᐎᓐ:

³² ᓀᔥᑕ ᒫᑲ ᑭᔐᐙᑐᑖᑐᒃ, ᐁ ᔕᐎᑌᐁᔦᒃ, ᐁ ᐌᐯᓕᑕᒫᑐᔦᒃ, ᑖᐱᔅᑯᒡ ᑭᒋᒪᓂᑐ ᙭ ᐅᒋ ᐁ ᑮ ᐌᐯᓕᑕᒫᑖᒃ᙮