ᐃᐱᓯᔭᓇ 3 - ᐅᔅᑭ ᑎᔅᑌᒥᓐᑦ

ᐹᓪ ᐁ ᐊᑐᔅᑫᔅᑕᒪᐙᑦ ᒉᓐᑖᐃᓚ

¹ ᐁᐗᑯ ᐅᒪ ᐅᒋ ᓂᓚ ᐹᓪ, ᒋᓴᔅ ᙭ ᐅ ᑭᐸᐙᑲᓇ ᑭᓚᐗᐤ ᒉᓐᑖᐃᓚᒃ ᐅᒋ;

² ᑮᔥᐱᓐ ᑳ ᐯᑕᒧᐌᑴ ᐁ ᑲᓇᐌᓕᑕᒥᐋᑲᓂᐎᐗᒃ ᑭᒋᒪᓂᑐ ᐅ ᔕᐌᓕᒋᑫᐎᓐ ᑭᓚᐗᐤ ᐅᒋ:

³ ᑳ ᐃᔑ ᑭᔅᑫᓕᑕᒥᐃᑲᐎᔮᓐ ᐊᓂᒪ ᑳ ᒫᒪᔅᑳᑌᓕᑖᑾᒃ ᑭᔅᑫᓕᑖᑯᑖᑫᐎᓂᒃ; ᑖᐱᔅᑯᒡ ᐊᓄᒋᑫ ᐁ ᑮ ᒪᓯᓇᐊᒫᓐ ᒐᑲᐙᔑᔥ ᐋᔭᒥᐎᓂᒃ;

⁴ ᐁᑯᑕ ᒫᑲ ᐅᒋ, ᐋᔭᒥᑕᔦᑴ, ᑭ ᑳ ᓂᓯᑐᑌᓇᐗᐤ ᐁᔅᐱᒋ ᑭᔅᑫᓕᑕᒶᒃ ᐅ ᒫᒪᔅᑳᑌᓕᑖᑯᓯᐎᓐ ᙭᙮

⁵ ᐁᐗᒀᓂ ᐌᔅᑲᒡ ᐁᑳ ᑳ ᑮ ᑭᔅᑫᓕᑕᒥᐋᑲᓂᐎᒋᒃ ᐃᓕᓕᐎᑯᓯᓵᓇᒃ, ᑖᐱᔅᑯᒡ ᐊᓄᒡ ᐁ ᐃᔑ ᐙᐸᑎᓛᑲᓂᐎᓕᒋ ᐅ ᐸᓓᑭ ᐊᐸᔅᑕᓕᒪ ᓀᔥᑕ ᐅ ᑭᔅᑭᐙᐃᑫᒪ ᐊᒑᑾ ᐅᒋ;

⁶ ᒉᓐᑖᐃᓚᒃ ᑭᒋ ᐎᒋ ᑎᐯᓕᑕᒧᒥᐌᒋᒃ, ᐊᓂᒪ ᑫᔮᐸᒡ ᒥᔭᐎᒃ ᓀᔥᑕ ᑭᒋ ᑕᑯᐋᑲᓂᐎᒋᒃ, ᓀᔥᑕ ᑭᒋ ᐎᒋ ᐅᑎᓇᒧᒥᐌᒋᒃ ᐅᑦ ᐊᔓᑕᒫᑫᐎᓂᓕᐤ ᙭ᑎᒃ ᒥᓗᐋᒋᒧᐎᓐ ᐅᒋ:

⁷ ᐁᐗᒀᓂᒪ ᑳ ᐅᒋ ᐋᔭᒥᐋᐎ ᐊᑑᔅᑫᓛᑲᓂᐎᔮᓐ, ᐁᔅᐱᔑ ᒥᓕᑲᐎᐗᒃ ᐅ ᔕᐌᓕᒋᑫᐎᓐ ᑭᒋᒪᓂᑐ, ᒀᔭᔉ ᐁ ᐃᔑᐃᑯᐗᒃ ᐅ ᑲᔥᑭᐅᐎᓐ᙮

⁸ ᓂᓚ, ᐊᐙᓯᑌ ᑳ ᐋᐱᔅᑌᓕᑖᑯᓯᔮᓐ ᐃᔥᐱᔥ ᒥᓯᐌ ᐁ ᒫᐗᒋ ᐋᐱᔅᑌᓕᑖᑯᓯᒋᒃ ᐅᐸᓓᑭᓴᒃ, ᐅᒪ ᔕᐌᓕᒋᑫᐎᓐ ᓂ ᒥᓕᑲᐃᓐ, ᑭᒋ ᑮ ᑲᑫᔅᑭᒥᐌᐗᒃ ᐃᑕ ᐁ ᐃᑖᒋᒃ ᒉᓐᑖᐃᓚᒃ ᙭ ᐅ ᒥᔕᑭᓯᐎᓇ ᐁᑳ ᑫ ᑮ ᑌᐱ ᑭᔅᑫᓕᑖᑾᓂᓕᑭ,

⁹ ᑭᒋ ᑐᑕᐗᑭᒃ ᒫᑲ ᒥᓯᐌ ᐃᓕᓕᐗᒃ ᑭᒋ ᐙᐸᑕᑭᒃ ᐊᓂᐁᓕᐤ ᐅᑐᑌᒥᒥᑐᐎᓂᓕᐤ ᑳ ᒫᒪᔅᑳᑌᓕᑖᑾᓂᓕᒃ, ᐊᔅᐱᓐ ᓂᔥᑕᒻ ᐁ ᐊᔅᑭᐗᒃ ᑳ ᑮ ᑳᑖᓂᐗᓂᓕᒃ ᑭᒋᒪᓂᑐᒃ, ᒥᓯᐌ ᑫᒀᓇ ᑳ ᑮ ᐅᔑᑖᑦ ᒋᓴᔅ ᙭ ᐅᒋ:

¹⁰ ᐊᓂᑭ ᑳ ᑎᐯᓕᒋᑫᒋᒃ ᓀᔥᑕ ᑳ ᓯᑳᑎᓯᒋᒃ ᑭᒋᑭᔑᑯᒃ ᐊᓄᒡ ᒫᒪᐎᐋᔭᒥᐊᐗ ᐅᒋ, ᑭᒋ ᑭᔅᑫᓕᑕᒸᒋᒃ ᑭᒋᒪᓂᑐᐗ ᐅ ᑲᑫᑕᐌᓕᑕᒧᐎᓂᓕᐤ ᑳ ᐋᔭᑶᑕᐗᓂᓕᒃ,

¹¹ ᑳ ᐃᑕᔅᑌᒃ ᐊᓂᒪ ᑳᑭᑫ ᑫᒋᓀᓕᑕᒧᐎᓐ, ᑳ ᑮ ᑫᒋᓀᓕᑕᒃ ᙭ ᒋᓴᓯᒃ ᑭ ᑎᐯᓕᒋᑫᒥᓇᐤ;

¹² ᐁᐗᒀᓇ ᑳ ᐅᒋ ᓱᑭᑌᐁᔭᒃ ᓀᔥᑕ ᐁ ᑫᒋᓇᐅᔭᒃ ᐁ ᓈᒋᑫᔮᒃ, ᐁ ᑖᐺᔦᓕᒪᒃ᙮

¹³ ᐁᐗᑯ ᒫᑲ ᐅᒋ ᓂ ᓇᑕᐌᓕᑌᓐ ᐁᑳ ᑭᒋ ᐊᑲᐌᓕᑕᒥᐃᑯᔦᒃ ᓂᑦ ᐊᓕᒥᓯᐎᓇ ᑭᓚᐗᐤ ᑳ ᐅᒋ ᐅᑎᑎᑯᔮᓐ, ᑳ ᐃᔅᐯᓕᑖᑯᐃᑯᔦᒃ᙮

ᐅᓵᑭᐃᐌᐎᓐ ᙭

¹⁴ ᐁᐗᑯ ᐌᒋ ᐱᑭᒋᑾᓀᔅᑖᒪᑭ ᒋᓴᔅ ᙭ ᑭ ᑎᐯᓕᒋᑫᒥᓇᐤ ᐅᑖᐎᔭ,

¹⁵ ᐊᓇ ᑳ ᐅᒋ ᐎᓛᑲᓂᐎᒋᒃ ᒥᓯᐌ ᐁ ᒫᒪᐤ ᐅᑌᐎᓯᒋᒃ ᑭᒋᑭᔑᑯᒃ ᓀᔥᑕ ᐊᔅᑮᒃ;

¹⁶ ᑭᒋ ᐸᑭᑎᓇᒫᑖᒃ, ᐁ ᐃᔅᐱᒋ ᐌᓗᑕᓂᓕᒃ ᐅ ᑭᔅᑌᓕᑖᑯᓯᐎᓐ, ᑭᒋ ᒪᔥᑲᐎᐃᑯᔦᒃ ᓱᑳᑎᓯᐎᓐ, ᐅᑦ ᐊᒑᑾ ᐅᒋ, ᑭ ᐱᒋ ᐃᑖᑎᓯᐎᓂᐙᒃ;

¹⁷ ᙭ ᑭᒋ ᐎᑭᑦ ᑭᑌᐃᐙᒃ ᑖᐺᔦᓕᑕᒧᐎᓐ ᐅᒋ; ᑭᓚᐗᐤ ᐁ ᒪᔥᑲᐎ ᑳᐸᐎᐃᑲᐎᔦᒃ ᓀᔥᑕ ᐊᓕᒋᐃᑲᐎᔦᒃ ᓵᑭᐃᐌᐎᓂᒃ,

¹⁸ ᑭᒋ ᑮ ᓂᓯᑐᑕᒣᒃ ᐊᓯᒋ ᒥᓯᐌ ᐅᐸᓓᑭᓴᒃ ᐁᔅᐱᒋ ᐋᓚᑲᔥᑳᒃ, ᓀᔥᑕ ᑭᓍᒃ, ᓀᔥᑕ ᑭᔅᐸᑳᒃ, ᓀᔥᑕ ᐃᔥᐹᒃ;

¹⁹ ᓀᔥᑕ ᑭᒋ ᑭᔅᑫᓕᑕᒬᒃ ᙭ ᐅ ᓵᑭᐃᐌᐎᓐ, ᑳ ᒥᔮᔥᑲᒧᒪᑲᐤ ᑭᔅᑫᓕᑕᒧᐎᓐ, ᑭᒋ ᐅᒋ ᓵᑲᔅᑭᓇᐃᑲᐎᔦᒃ ᒥᓯᐌ ᐅ ᓵᑲᔅᑭᓀᐎᓐ ᑭᒋᒪᓂᑐ᙮

²⁰ ᐊᓇ ᑳ ᑲᔥᑭᑖᑦ ᑭᒋ ᑐᑕᒃ ᓈᔅᐱᒡ ᐊᐙᓯᑌ ᐃᔥᐱᔥ ᐁ ᓇᑐᑕᒫᔭᒃ, ᓀᔥᑕ ᐃᑌᓕᑕᒪᒃ, ᑖᐱᔅᑯᒡ ᐁ ᑐᑕᒧᒪᑲᒃ ᓱᑳᑎᓯᐎᓐ ᑳ ᐱᒋᔅᑳᑯᔮᒃ;

²¹ ᐁᑯ ᑫ ᐎ ᒫᒥᒋᒫᑲᓂᐎᑦ ᒣᑴᔭᔥ ᒫᒪᐎᐋᔭᒥᐋᐗ ᒋᓴᔅ ᙭ ᐅᒋ, ᑳᑭᑫ ᓀᔥᑕ ᑳᑭᑫ, ᐊᔅᑮᒃ ᐁᑳ ᐎᔅᑳᑦ ᑫ ᐃᔥᒀᐸᓕᒃ᙮ ᐁᒣᓐ᙮