ᑯᓚᔑᔭᓇ 2 - ᐅᔅᑭ ᑎᔅᑌᒥᓐᑦ

¹ ᐌᓴ ᓂ ᓇᑕᐌᓕᑌᓐ ᑭᑭ ᑭᔅᑫᓕᑕᒣᒃ ᐁᔅᐱᒋ ᓈᔅᐱᒡ ᑯᔅᐸᓀᓕᑕᒫᑕᑾᒃ, ᐊᓂᑭ ᓀᔥᑕ ᓓᐅᑕᓯᐊᐃᒃ ᑳ ᐃᑖᒋᒃ, ᓀᔥᑕ ᒥᓯᐌ ᐊᓂᑭ ᐁᑳ ᑳ ᑮ ᐙᐸᒥᒋᒃ ᓂ ᐎᔮᓯᒃ;

² ᐅᑌᐃᐙᐗ ᑭᒋ ᑳᑭᒋᑖᓂᐗᓂᓕᑭ, ᐁ ᒪᐗᓴᑯᓈᑲᓂᐎᒋᒃ ᓵᑭᐃᐌᐎᓂᒃ, ᓀᔥᑕ ᑭᒋ ᒥᑐᓂᑫᒋᓇᐅᐎ ᓂᓯᑐᑕᑭᒃ ᐁ ᐃᔑ ᐌᓗᑕᓂᓕᒃ, ᒥᑐᓂ ᑭᒋ ᑭᔅᑫᓕᑕᒸᒋᒃ ᑭᒋᒪᓂᑐᐗ ᐅ ᒫᒪᔅᑳᑌᓕᑖᑯᓯᐎᓂᓕᐤ, ᓀᔥᑕ ᐅᑖᐎᒪᐗ, ᓀᔥᑕ ᙭ᑕ;

³ ᐊᓇ ᑳ ᐱᒋᔅᑳᑯᑦ ᒥᓯᐌ ᐌᓗᒋ ᑲᑫᑕᐌᓕᑕᒧᐎᓂᓕᐤ ᓀᔥᑕ ᑭᔅᑫᓕᑕᒧᐎᓂᓕᐤ᙮

⁴ ᐅᒪ ᒫᑲ ᓂᑦ ᐃᑣᓐ, ᐁᑳ ᐊᐌᓇ ᐃᓕᓕᐤ ᑭᒋ ᐙᔦᔑᒥᑖᒃ ᔓᔅᒀᒋᐋᔭᒥᐎᓇ ᐅᒋ᙮

⁵ ᐌᓴ ᐋᑕ ᐁ ᐃᑖᐱᒋᔮᓐ ᐎᔮᓯᒃ, ᐁᓕᐌᒃ ᒫᑲ ᑭ ᐎᒉᐎᑎᓇᐗᐤ ᐊᒑᑯᒃ, ᐁ ᒥᓚᐙᑕᒫᓐ ᓀᔥᑕ ᐁ ᑲᓇᐙᐸᑕᒫᓐ ᐁ ᒀᔭᔉ ᐋᔨᑎᔦᒃ, ᓀᔥᑕ ᐁ ᐋᔨᒋ ᑖᐺᔦᓕᒣᒃ ᙭᙮

ᒥᔭᑭᓯᐤ ᐅᐱᒫᑎᓯᐎᓂᒃ ᑳ ᐊᑑᔅᑲᐙᑦ ᙭ᑕ

⁶ ᑳ ᑮ ᐃᔑ ᐅᑎᓀᒃ ᙭ ᒋᓴᔅ ᐅᑎᐯᓕᒋᑫᐤ, ᐁᑯ ᐃᔑ ᐱᒧᑖᑎᒃ;

⁷ ᐎᓚ ᐃᔑ ᐁ ᐅᒉᐱᑭᐎᔦᒃ ᓀᔥᑕ ᐁ ᐋᔨᒋᑳᐸᐎᔦᒃ, ᐁ ᒪᔥᑳᐎᑳᐸᐎᔦᒃ ᑖᐺᔦᓕᑕᒧᐎᓂᒃ, ᑖᐱᔅᑯᒡ ᑳ ᑮ ᐃᔑ ᑭᔅᑭᓄᐊᒫᑲᐎᔦᒃ, ᐁᑯᑕ ᐁ ᒥᔕᑭᓯᔦᒃ ᐁ ᓇᓈᔅᑯᒧᔦᒃ ᓀᔥᑕ᙮

⁸ ᔮᒀᒥᓯᒃ ᐁᑳᐎᓚ ᐊᐌᓇ ᐃᓕᓕᐤ ᑭᒋ ᐊᐗᑳᓂᐃᑖᒃ ᒥᔅᑲᐙᑕᐎᓐ ᐅᒋ ᓀᔥᑕ ᐸᑾᓐᑕᐤ ᑲᑳᔦᓕᓯᐎᓐ, ᐁ ᐃᔑ ᑭᔅᑭᓄᐊᒫᑫᒋᒃ ᐃᓕᓕᐗᒃ, ᑳ ᐃᑕᔅᑌᑭ ᓂᔥᑕᒻ ᑭᔅᑭᓄᐊᒫᑫᐎᓇ ᐅᑕ ᐊᔅᑮᒃ, ᓇᒪᐎᓚ ᒫᑲ ᑳ ᐃᔑ ᑭᔅᑭᓄᐊᒫᑫᑦ ᙭᙮

⁹ ᐌᓴ ᐎᓚ ᐎᔭᐎᔥᑳᑯ ᐁ ᐃᔑ ᒫᒪᐌᓕᑖᑾᓂᓕᒃ ᑭᒋᒪᓂᑐ ᐅᑦ ᐃᑌᓕᑖᑯᓯᐎᓐ᙮

¹⁰ ᑭᓚᐗᐤ ᒫᑲ ᑭ ᒥᑐᓂᐎᓯᓇᐗᐤ ᐎᔭᐎᒃ, ᐊᓇ ᑳ ᑎᐯᓕᑕᒃ ᒥᓯᐌ ᑎᐯᓕᒋᑫᐎᓂᓕᐤ ᓀᔥᑕ ᑲᔥᑭᐅᐎᓂᓕᐤ:

¹¹ ᐊᓇ ᑭᓚᐗᐤ ᓀᔥᑕ ᑳ ᐅᒋ ᑭᔅᑭᓄᐙᒋᔓᑲᐎᔦᒃ ᐊᓂᒪ ᑭᔅᑭᓄᐙᒋᔓᐎᓐ ᐅᒋ ᐁᑳ ᒥᒋᒋᔭ ᑳ ᐅᒋ ᐅᔑᑖᓂᐗᒃ, ᐁ ᐃᑲᑌᔅᑖᔦᒃ ᐁ ᐎᔭᐎᒪᑲᑭ ᐎᔮᓯᐎᓂ ᒪᒋᑣᐎᓇ, ᐅ ᑭᔅᑭᓄᐙᒋᔔᐃᓐ ᙭ ᐅᒋ:

¹² ᐁ ᐎᒋᓇᐃᑳᑲᐎᒣᒃ ᓯᑲᐋᑖᑫᐎᓂᒃ, ᐃᑕ ᓀᔥᑕ ᐁ ᑮ ᐎᒋᐗᓂᔥᑳᒣᒃ, ᐁ ᑖᐺᔦᓕᑕᒬᒃ ᑭᒋᒪᓂᑐ ᐅ ᑐᑕᒧᐎᓐ, ᑳ ᑮ ᐗᓂᔥᑳᓈᑦ ᐅᓂᐱᐗ ᐅᒋ᙮

¹³ ᑭᓚᐗᐤ ᒫᑲ, ᐁ ᑮ ᓂᐱᔦᒃ ᑭ ᒪᒋᑣᐎᓂᐙᒃ, ᓀᔥᑕ ᐁᑳ ᐁ ᑮ ᑭᔅᑭᓄᐙᒋᔑᑳᑌᒃ ᑭ ᐎᔮᓯᐗᐤ, ᐊᓯᒋ ᐎᓚ ᑭ ᑮ ᐱᒫᑎᓯᐃᑯᐗᐧ, ᐁ ᑮ ᐌᐯᓕᑕᒫᑖᒃ ᒥᓯᐌ ᐗᓂᑐᑕᒧᐎᓇ;

¹⁴ ᐁ ᑮ ᑳᓯᐊᒃ ᐊᓂᒪ ᒥᒋᒋᐎ ᒪᓯᓇᐃᑫᐎᓐ ᐊᓂᐃ ᐃᑕᔓᐌᐎᓇ ᑳ ᑮ ᐸᑲᒥᔅᑳᑯᔭᒃ ᐊᓂᒪ ᑳ ᑮ ᑭᐱᔥᑳᑯᔭᒃ, ᒣᔅᑲᓈᒃ ᒫᑲ ᐁ ᑮ ᐅᒋ ᐃᑲᑌᓇᒃ, ᐁ ᑮ ᒋᔅᑖᔅᒀᑕᒃ ᐅᑦ ᐋᔑᑌᐋᑎᑯᒥᒃ;

¹⁵ ᐁ ᑮ ᐃᑲᑌᓇᒃ ᒫᑲ ᒥᓯᐌ ᑎᐯᓕᒋᑫᐎᓇ ᓀᔥᑕ ᑲᔥᑭᐅᐎᓇ, ᒧᔐ ᐁ ᓄᑯᑖᑦ, ᐎᓚ ᑫᒋᐙᒃ ᐁ ᑮ ᔖᑯᒋᑖᑦ᙮

¹⁶ ᐁᑳᐎᓚ ᒫᑲ ᐊᐌᓇ ᐃᓕᓕᐤ ᑭ ᑳ ᑎᐹᔅᑯᓂᑯᐗᐤ ᒥᒋᓱᐎᓂᒃ, ᓀᔥᑕᐱᑯ ᒥᓂᑴᐎᓂᒃ, ᓀᔥᑕᐱᑯ ᐸᓓᑭ ᑭᔑᑳᐤ ᐅᒋ, ᓀᔥᑕᐱᑯ ᐅᔥᑭ ᐱᓯᒻ ᐅᒋ, ᓀᔥᑕᐱᑯ ᐋᓜᐱᐎ ᑭᔑᑲᐗ ᐅᒋ:

¹⁷ ᐁᐗᑯ ᐱᑯ ᐁᑎᑳᔅᑌᑎᑭ ᐁᔥᑾ ᑫ ᐅᑎᒋᐸᓕᑭ; ᒫᑲ ᒥᔭᐤ ᑎᐱᓚᐌᐎᓯᐤ ᙭᙮

¹⁸ ᐁᑳᐎᓚ ᐊᐌᓇ ᐃᓕᓕᐤ ᑭ ᑳ ᐙᔦᔑᒥᑯᐗᐤ ᑭ ᑎᐸᐊᒫᑯᓯᐎᓂᐗᐤ, ᐃᑌᓕᑕᒪᐎ ᑕᐸᑌᓕᒥᑎᓱᐎᓂᒃ, ᓀᔥᑕ ᐁ ᓇᐗᑮᔅᑕᐙᒋᒃ ᐁᓐᒐᓚ, ᐁ ᑭᔅᑫᓕᑕᒥᑳᓱᑦ ᐊᓂᐃ ᐁᑳ ᑳ ᑮ ᐙᐸᑕᒃ, ᐸᑾᓐᑕᐤ ᐁ ᑭᔅᑌᓕᒧᐃᑯᑦ ᐅ ᐎᔮᓯᐎ ᒥᑐᓀᓕᒋᑲᓐ,

¹⁹ ᐁᑳ ᒫᑲ ᐁ ᒥᒋᒥᓇᒃ ᒥᔅᑎᒀᓐ, ᐊᓂᒪ ᐅᒋ ᒥᓯᐌ ᒥᔭᐤ ᐋᓂᔅᑲᐎᑲᓇᓇ ᐅᒋ ᓀᔥᑕ ᐸᔅᑫᓯᐎᓇ ᐁ ᐊᓯᒋᑳᑌᒃ, ᓀᔥᑕ ᐁ ᒪᒪᐎᐱᒋᑳᑌᒃ, ᓚᑭᐸᓕᐤ ᑭᒋᒪᓂᑐ ᐅ ᓚᑭᐃᐌᐎᓐ ᐅᒋ᙮

ᐁ ᐃᔑ ᓂᐱᔭᒃ ᓀᔥᑕ ᐁ ᐃᔑ ᐎᒋᐱᒫᑎᓯᔦᒃ ᙭

²⁰ ᐁᐗᑯ ᐅᒋ, ᑮᔥᐱᓐ ᑮ ᐎᒋᓂᐱᒣᒃ ᙭ ᐊᔅᑭᐎ ᓂᔥᑕᒻ ᑭᔅᑭᓄᐊᒫᑫᐎᓇ ᐅᒋ, ᑖᓀᑭ ᐌᒋ, ᑖᐱᔅᑯᒡ ᐁ ᐱᒫᑎᓯᔦᒃ ᐊᔅᑮᒃ, ᑎᐯᓕᒥᑯᔦᒃ ᐃᑕᔓᐌᐎᓇ,

²¹ (ᐁᑳᐎᓚ ᓴᒥᓇᒧᒃ, ᐁᑳᐃᓚ ᑯᒋᔅᑕᒧᒃ, ᐁᑳᐎᓚ ᒥᒋᒥᓇᒧᒃ,

²² ᒥᓯᐌ ᑫ ᓂᔑᐗᓈᑕᑭ ᐁ ᐋᐸᒋᑖᓂᐗᑭ,) ᑳ ᐃᑕᔅᑌᓕᑭ ᐅ ᑲᑫᔅᑴᐎᓂᐗᐗ ᓀᔥᑕ ᐅ ᑭᔅᑭᓄᐊᒫᑫᐎᓂᐗᐗ ᐃᓕᓕᐗᒃ?

²³ ᐊᓂᐃ ᑖᐺ ᐃᔑᓈᑾᓋ ᑖᐱᔅᑯᒡ ᑲᑫᑕᐌᓕᑕᒧᐎᓐ, ᐃᑌᓕᑕᒧᐎ ᐋᔭᒥᐋᐎᓂᒃ, ᓀᔥᑕ ᑕᐸᑌᓕᒥᑎᓱᐎᓂᒃ, ᓀᔥᑕ ᐁᑳ ᐁ ᒪᓈᒋᑖᓂᐗᒃ ᒥᔭᐤ; ᓇᒪᐎᓚ ᐁ ᑭᔅᑌᓕᒋᑳᑌᒃ ᑭᒋ ᑌᐯᓕᒋᑳᑌᒃ ᐎᔮᔅ᙮