ᐊᐸᔅᑕᓚᒃ 3 - ᐅᔅᑭ ᑎᔅᑌᒥᓐᑦᐁ ᒫᔅᑭᓯᑦ ᓈᐯᐤ ᒥᓇᐙᒋᐋᑲᓂᐎᐤ 1 ᐱᑕᕐ ᓀᔥᑕ ᒑᓐ ᑖᐱᔅᑯᒡ ᑮ ᐃᑐᑌᐗᒃ ᑭᒋᐋᔭᒥᐁᐎᑲᒥᑯᒃ ᐃᔅᐱ ᐌᑎᒋᐸᓕᒃ ᑭᒋ ᐋᔭᒥᐋᓂᐗᒃ, ᐁᐗᒀᓂᒪ ᔖᑭᑖᑦ ᑎᐹᐃᑲᓐ ᒣᒀᒡ ᐁ ᑭᔑᑳᒃ᙮ 2 ᐯᔭᒃ ᐃᓕᓕᐤ ᒫᑲ, ᐁᑳ ᑳ ᓂᑖᐅᑌᑦ ᐃᔅᑯᓈᒃ ᑳ ᓂᑖᐎᑭᑦ, ᑮ ᐱᒥᐎᓛᑲᓂᐎᐤ, ᑕᑡᐤ ᑳᔑᑳᒃ ᒫᑲ ᑮ ᐸᑭᑎᓀᐗᒃ ᐁ ᐃᔥᒀᑌᒥᐗᒃ ᑭᒋᐋᔭᒥᐁᐎᑲᒥᑯᓕᐤ ᑳ ᒥᓗᓇᑾᒃ ᑳ ᐃᔑᓂᑳᑌᒃ, ᑭᒋ ᐸᑯᔑᐙᑦ ᑫᒀᓕᐤ ᐊᓂᐃ ᑳ ᐱᑐᑫᓕᒋ ᑭᒋᐋᔭᒥᐁᐎᑲᒥᑯᒃ; 3 ᐁ ᐙᐸᒫᑦ ᒫᑲ ᐱᑕᕐ ᓀᔥᑕ ᒑᓇ ᐁ ᐎ ᐊᑎ ᐱᑐᑫᓕᒋ ᑭᒋᐋᔭᒥᐁᐎᑲᒥᑯᒃ ᑮ ᓇᑐᑕᒪᐌᐤ ᑫᒀᓕᐤ ᑭᒋ ᒥᓕᑯᑦ᙮ 4 ᐱᑕᕐ ᒫᑲ ᓲᑲ ᐁ ᑲᓇᐙᐸᒫᑦ ᐊᓯᒋ ᐊᓇ ᒑᓐ, ᑮ ᐃᑌᐤ, ᑲᓇᐙᐸᒥᓈᓐ᙮ 5 ᑮ ᑲᓇᐙᐸᒣᐤ ᒫᑲ, ᐁ ᐸᑯᓭᓕᒫᑦ ᑫᒀᓕᐤ ᑭᒋ ᒥᓕᑯᑦ᙮ 6 ᐁᑯ ᒫᑲ ᐱᑕᕐ ᑳ ᐃᑖᑦ, ᔔᓕᐋᓇᐱᔉ ᓀᔥᑕ ᐅᓴᐎᔔᓕᐊᓇᐱᔉ ᓇᒪᐎᓚ ᓂᑦ ᐊᔭᐗᐤ; ᐱᑯ ᒫᑲ ᐁ ᐃᔑ ᐊᔮᔮᓐ ᑭ ᒥᓕᑎᓐ: ᐅᑦ ᐃᔑᓂᑳᓱᐎᓂᒃ ᐊᓇ ᒋᓴᔅ ᙭ ᓈᓴᕋᑎᒃ ᑳ ᐅᒌᑦ, ᐸᓯᑰ ᓀᔥᑕ ᐱᒧᑌ᙮ 7 ᑮ ᓴᑭᒋᒉᓀᐤ ᒫᑲ ᐅ ᑭᒋᓂᔅᑭᓕᒃ, ᓀᔥᑕ ᑮ ᐅᐱᓀᐤ: ᑣᔦᒃ ᒫᑲ ᐅᓯᑕ ᓀᔥᑕ ᐅ ᐱᔅᑯᑲᓈᓇ ᑮ ᓵᐱᒪᑲᓂᓕᐗ᙮ 8 ᐎᓚ ᒫᑲ ᐁ ᐸᓯᑯᔑᐸᓕᑦ ᑮ ᓂᐸᐎᐤ, ᓀᔥᑕ ᑮ ᐱᒧᑌᐤ, ᑮ ᐎᒋᐱᑐᑫᒣᐤ ᒫᑲ ᑭᒋᐊᔭᒥᐁᐎᑲᒥᑯᒃ, ᐁ ᐱᒧᑌᑦ, ᐁ ᒀᔅᑯᑎᑦ, ᓀᔥᑕ ᐁ ᒫᒥᒋᒫᑦ ᑭᒋᒪᓂᑐᐗ᙮ 9 ᒥᓯᐌ ᐃᓕᓕᐗ ᒫᑲ ᑮ ᐙᐸᒥᑯ ᐁ ᐱᒧᑌᑦ, ᓀᔥᑕ ᐁ ᒫᒥᒋᒫᑦ ᑭᒋᒪᓂᑐᐗ: 10 ᑮ ᑭᔅᑫᓕᒥᑯ ᒫᑲ ᐁ ᐋᐎᑦ ᐊᓇ ᑳ ᑮ ᐊᐱᑦ ᐁ ᐸᑯᔑᐃᐌᑦ ᑳ ᒥᓗᓇᑾᒃ ᐃᔥᒀᑌᒥᒃ ᑭᒋᐋᔭᒥᐁᐎᑲᒥᑯᒃ, ᓈᔅᐱᒡ ᒫᑲ ᑮ ᒫᒪᔅᑳᑌᓕᑕᒶᒃ ᐊᓂᐁᓕᐤ ᑳ ᐃᑭᓂᓕᒃ᙮ ᐱᑕᕐ ᐅᑎᐹᒋᒧᐎᓐ ᐲᒋ ᐊᔭᒥᐁᐎᑲᒥᑯᒃ 11 ᒣᒀᒡ ᒫᑲ ᐊᓇ ᐃᓕᓕᐤ ᐁᑳ ᑳ ᑮ ᓂᑖᐅᑌᑦ ᑳ ᑮ ᒥᓇᐗᒋᐊᑲᓂᐎᑦ ᒣᒋᒥᓈᑦ ᐱᑕᕋ ᓀᔥᑕ ᒑᓇ, ᒥᓯᐌ ᐃᓕᓕᐗᒃ ᑖᐱᔅᑯᒡ ᒫᒪᐤ ᑮ ᒧᔅᑭᔅᑖᐌᐗᒃ ᐱᒋ ᐊᓂᒪ ᐱᔅᑭᒋᐋᔅᑲᔨᑲᓂᒃ, ᓵᓚᒪᓐ ᐅ ᐱᔅᑭᒋᐙᔅᑲᔨᑲᓐ ᑳ ᐃᔑᓂᑳᑌᒃ ᓈᔅᐱᒡ ᐁ ᒫᒪᔅᑳᑌᓕᑕᑭᒃ᙮ 12 ᐃᔅᐱ ᒫᑲ ᐲᑕᕐ ᐅᒪ ᐎᐋᐸᑕᒃ, ᑭᑮ ᓇᔥᑴᐗᔑᐁᐤ ᐊᓂᐃ ᐃᓕᓕᐗ, ᑭᓚᐗᐤ ᑳ ᐃᔅᕃᐃᓕᐎᓕᓕᐎᔦᒃ, ᑕᓀᑭ ᐌᒋ ᐅᒪ ᓈᔅᐱᒡ ᒫᒪᔅᑳᑌᓕᑕᒣᒃ? ᓀᔥᑕᐱᑯ ᑕᓀᑭ ᐌᒋ ᓱᑳ ᑲᓇᐙᐸᒥᔮᒃ, ᑖᐱᔅᑯᒡ ᓂᓚᓇᓐ ᑎᐱᓚᐌ ᓂ ᑲᔥᑭᐅᐎᓂᓈᓐ ᓀᔥᑕᐱᑯ ᓂ ᐸᓓᑭᓯᐎᓂᓇᓐ ᐁ ᑮ ᐅᒋ ᑐᑕᐗᑭᑦ ᐊᐗ ᐃᓕᓕᐤ ᑭᒋ ᐱᒧᑌᑦ? 13 ᐅ ᑭᒋᒪᓂᑐᒪ ᐃᑉᕃᐊᒻ, ᐋᐃᓴᒃ, ᓀᔥᑕ ᒉᑲᑉ, ᐅ ᑭᒋᒪᓂᑐᒥᐗᐗ ᑯᑖᐎᓇᐗᒃ, ᑮ ᑭᔅᑌᓕᑖᑯᐁᐤ ᐅᑯᓯᓴ ᒋᓴᓴ: ᐊᓇ ᑳ ᑮ ᐙᔦᔑᐸᑭᑎᓀᒃ, ᓀᔥᑕ ᑳ ᑮ ᐋᓉᑕᐌᒃ ᐁ ᐅᑎᔥᑲᐎᑳᐸᐎᔅᑕᐌᒃ ᐹᐃᓚᑦ, ᐃᔅᐱ ᑳ ᑫᔅᑎᓈᑌᓕᑕᒃ ᑭᒋ ᐸᑭᑎᓈᑦ᙮ 14 ᑭ ᑮ ᐋᓉᑕᐗᐗᐤ ᒫᑲ ᐊᓇ ᑳ ᐸᓓᑭᓯᑦ, ᓀᔥᑕ ᑳ ᒀᔭᔅᑭᑎᑦ, ᒥᔅᑯᒡ ᒫᑲ ᑭ ᑮ ᓇᑕᐌᓕᒫᐗᐤ ᐅᓂᐸᔨᐌᐤ ᑭᒋ ᒥᓕᑲᐎᔦᒃ; 15 ᑭ ᑮ ᓂᐸᐋᐗᐤ ᒫᑲ ᐊᓇ ᑳ ᑎᐯᓕᑕᒃ ᐱᒫᑎᓯᐎᓂᓕᐤ, ᐊᓇ ᑭᒋᒪᓂᑐᐗ ᑳ ᑮ ᐗᓂᔥᑳᓂᑯᑦ ᐅᓂᐱᐗ ᐅᒋ; ᐁᐗᒀᓇ ᑳ ᑎᐸᒋᒪᑭᑦ᙮ 16 ᐎᓚ ᒫᑲ ᐅᑦ ᐃᔑᓂᑳᓱᐎᓇ, ᐁ ᑖᐺᔦᓕᒋᑳᑌᒃ ᐅᑦ ᐃᔑᓂᑲᓱᐎᓂᒃ ᑮ ᐅᒋ ᑐᑕᐙᑲᓂᐎᐤ ᐊᐗ ᐃᓕᓕᐤ ᑭᒋ ᓵᐱᑦ, ᑳ ᑲᓇᐙᐸᒣᒃ ᓀᔥᑕ ᑳ ᑭᔅᑫᓕᒣᒃ; ᐁᐁ ᐊᓂᒪ ᑖᐺᔦᓕᑕᒧᐎᓐ ᐎᓚ ᐅᒋ ᑳ ᐅᒋᒪᑲᒃ ᑮ ᒥᓕᑯ ᐊᐗ ᒥᑐᓂ ᑭᒋ ᒥᓗᐊᔮᑦ ᐅᑕ ᐅᑎᔥᑲᐤ ᒥᓯᐌ ᐁ ᐃᑕᔑᔦᒃ᙮ 17 ᐁᑯ ᒫᑲ, ᓂᒋᔖᓂᑐᒃ, ᓂ ᑭᔅᑫᓕᑌᓐ ᐁᑳ ᑮ ᑭᔅᑫᓕᑕᒣᒃ ᐌᒋ ᑮ ᑐᑕᒣᒃ, ᑖᐱᔅᑯᒡ ᓀᔥᑕ ᑳ ᑮ ᑐᑕᑭᒃ ᑭᑦ ᐅᑭᒪᒥᐙᐗᒃ᙮ 18 ᐊᓂᐃ ᑫᒀᓇ ᒫᑲ, ᑭᒋᒪᓂᑐ ᓂᔮᑲᓇ ᑳ ᑮ ᐗᐸᑎᓕᐌᑦ ᐅᑐᓂᐙᒃ ᐅᒋ ᒥᓯᐌ ᐅᑭᔅᑭᐗᐃᑫᐎᓕᓕᒪ, ᙭ ᑭᒋ ᐎᓴᑫᓕᑕᒃ, ᐎᓚ ᐅᒪ ᐃᔑ ᑮ ᑎᐱᐸᓕᑖᐤ᙮ 19 ᐁᐗᑯ ᐅᒋ ᒥᒋᓚᐌᔦᓕᑕᒧᒃ, ᑴᔅᑳᑎᓰᒃ ᒫᑲ, ᑭ ᒪᒋᑖᐎᓂᐙᐗ ᑭᒋ ᑮ ᑳᓯᐃᑳᑌᑭ, ᐃᔅᐱ ᐹᐸᓕᓕᑫ ᑭᒋ ᒥᓜᓕᒧᓇᓂᐗᒃ ᐅᑎᔥᑲᐤ ᐅᑎᐯᓕᒋᑫᐤ ᐅᒋ; 20 ᑲᑕ ᐯᒋᑎᔕᐌᐤ ᒫᑲ ᒋᓴᔅ ᙭ᑕ, ᐊᓇ ᐋᔕᔾ ᑳ ᑮ ᐋᓕᒧᑕᒫᑲᐎᔦᒃ: 21 ᐊᓇ ᑭᒋᑭᔑᑰᒃ ᒫᑲ ᑫ ᐃᑖᑦ ᐱᓕᔥ ᐅᑎᒋᐸᓕᑫ ᑭᒋ ᐅᔥᑭᑖᓂᐗᑭ ᒥᓯᐌ ᑫᒀᓇ, ᑳ ᐃᔑ ᐋᔭᒥᑦ ᑭᒋᒪᓂᑕ ᐅᑐᓂᐙᒃ ᐅᒋ ᒥᓯᐌ ᐅ ᐸᓓᑭ ᑭᔅᑭᓄᐊᒪᑫᐎᓕᓕᒪ ᐃᔅᑯᓈᒃ ᑳ ᒫᒋ ᐊᔅᑭᐗᒃ᙮ 22 ᐌᓴ ᒧᓯᔅ ᑖᐺ ᑮ ᐃᑌᐤ ᐌᔅᑲᒡ ᐅᑖᐎᒫᐗ, ᐅᑭᔅᑭᐗᐃᑫᐗ ᐅᑎᐯᓕᒋᑫᐤ ᑭ ᑭᒋᒪᓂᑐᒥᐗᐤ ᑭ ᑳ ᐸᓯᑯᓇᒫᑯᐗᐤ ᑭᒋᔖᓂᐗᐙ ᐅᒋ, ᑫ ᓇᔅᐱᑕᐎᑦ; ᐁᐗᑯ ᑫ ᐱᔑᒋᐁᒃ ᒥᓯᐌ ᑫᒀᓇ ᐅᒋ, ᐱᑯ ᑫ ᐃᔑ ᐎᑕᒫᑖᒃ᙮ 23 ᑲᑕ ᐃᑭᓐ ᒫᑲ, ᒥᓯᐌ ᑕᑐ ᐊᐌᓇ, ᐁᑳ ᑫ ᐱᔑᒋᐋᑴ ᐊᓂᐃ ᐅᑭᔅᑭᐗᐃᑫᐗ, ᑲᑕ ᓂᔑᐗᓈᒋᐋᑲᓂᐎᐤ ᐊᓐᑕ ᐁ ᐃᑖᓕᒋ ᐃᓕᓕᐗ ᐅᒋ᙮ 24 ᐁᐁ, ᓀᔥᑕ ᒥᓯᐌ ᐅᑭᔅᑭᐗᐃᑫᐗᒃ ᓵᒻᔪᐃᓪ ᐅᒋ, ᓀᔥᑕ ᐊᓂᑭ ᐹᑎᒪ ᑳ ᓄᔅᐱᓇᔑᐌᒋᒃ, ᐱᑯ ᑕᑐ ᑳ ᑮ ᐋᔭᒥᒋᒃ, ᐅᐅ ᑭᔑᑳᐗ ᓀᔥᑕ ᓂᔮᑲᓇ ᑮ ᑎᐸᑐᑕᒶᒃ᙮ 25 ᑭᓚᐗᐤ ᐌᑕᐙᔑᒥᔑᒥᑖᑾᒃ ᐅᑭᔅᑭᐗᐃᑫᐗᒃ, ᓀᔥᑕ ᐊᓂᒪ ᓇᔅᑯᒥᑐᐎᓐ ᑭᒋᒪᓂᑐ ᑳ ᑮ ᐎᑕᒪᐙᑦ ᐊᓂᐃ ᑯᑕᐎᓇᐗ, ᐁ ᐃᑖᑦ ᐁᑉᕃᐊᒪ, ᑭᓚ ᑭᑦ ᐊᐙᔑᒥᔕᒃ ᐅᒋ ᑲᑕ ᒥᓦᑭᒪᑲᓂᐎᐗᒃ ᒥᓯᐌ ᑳ ᐱᒪᑎᓯᒋᒃ ᐅᑕ ᐊᔅᑭᒃ᙮ 26 ᑭᓚᐗᐤ ᐅᒋ ᓃᔥᑕᒻ ᑭᒋᒪᓂᑐ, ᐁ ᑮ ᐗᓂᔥᑳᓇᑦ ᐅᑯᓯᓴ ᒋᓴᓴ, ᑮ ᐃᔑᑎᔕᐌᐤ ᑭᒋ ᒥᓦᑭᒥᑖᒃ, ᐁ ᑴᔅᑭᓂᑖᒃ ᑕᑐ ᐁ ᐃᑕᔑᔦᒃ ᑭ ᒪᒑᑎᓯᐎᓂᐙᒃ ᐅᒋ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society