ᐊᐸᔅᑕᓚᒃ 15 - ᐅᔅᑭ ᑎᔅᑌᒥᓐᑦᒪᐗᒋᐃᑐᐗᒃ ᒋᕉᓴᓚᒥᒃ 1 ᐊᑎᑦ ᒫᑲ ᐃᓕᓕᐗᒃ ᑳ ᑮ ᐯᒋ ᐅᑐᑌᒋᒃ ᒎᑎᐊᐃᒃ ᑮ ᑭᔅᑭᓄᐊᒪᐌᐗᒃ ᑳ ᐎᒋᔕᓂᑐᓕᒋ, ᓀᔥᑕ ᑮ ᐃᑗᐗᒃ, ᑮᔥᐱᓐ ᐁᑳ ᑭᔅᑭᓄᐙᒋᔓᑲᐎᔦᑴ ᑳ ᐃᔑ ᑲᑫᔅᑭᒥᐌᑦ ᒧᓯᔅ, ᓇᒪᐎᓚ ᑭ ᑳ ᑮ ᐱᒫᒋᐅᓈᐙᐤ᙮ 2 ᐁᐗᑯ ᐅᒋ ᐃᔅᐱ ᐹᓪ ᓀᔥᑕ ᐹᕐᓇᐸᔅ ᐁᑳ ᐊᐱᔑᔥ ᑳ ᐋᓉᑕᐙᒌᒃ ᓀᔥᑕ ᐋᔑᑌᒫᒋᒃ, ᑮ ᐃᑌᓕᑕᒶᒃ ᐊᓇ ᐹᓪ ᓀᔥᑕ ᐸᕐᓇᐸᔅ ᓀᔥᑕ ᐊᑎᑦ ᑯᑕᑭᔭᒃ ᐁ ᐃᑕᔑᒋᒃ, ᑭᒋ ᐃᑐᑌᒋᒃ ᒋᕉᓴᓚᒥᒃ, ᑭᒋ ᓈᑖᒋᒃ ᐋᐸᔅᑎᓚ ᓀᔥᑕ ᑳ ᓂᑳᓀᓕᑖᑯᓯᓕᒋ, ᐅᒪ ᑲᑴᒋᑫᒧᐎᓐ ᐅᒋ᙮ 3 ᓀᔥᑕ ᐁ ᑮ ᐎᒋᐃᑯᒋᒃ ᒫᒪᐎᐋᔭᒥᐋᐗ ᐁ ᐊᑎ ᐃᑐᑌᒋᒃ, ᑮ ᔕᐳᔥᑲᒶᒃ ᐱᓂᓯᔭ ᓀᔥᑕ ᓵᒣᕆᔭ, ᐁ ᐙᐎᑕᒫᑫᒋᒃ ᐅ ᑴᔅᑳᑎᓯᐎᓂᓕᐤ ᐊᓂᐃ ᒉᓐᑖᐃᓚ, ᑮ ᐃᑐᑕᐌᐗᒃ ᒫᑲ ᓈᔅᐱᒡ ᑭᒋ ᒥᓨᑕᒥᓕᒋ ᒥᓯᐌ ᑳ ᐎᒋᔖᓂᑐᓕᒋ᙮ 4 ᐃᔅᐱ ᒫᑲ ᑳ ᑕᑯᔑᑭᒃ ᒋᕉᓴᓚᒥᒃ, ᑮ ᐅᑎᓂᑯᐗᒃ ᒫᒪᐎᐋᔭᒥᐋᐗ, ᓀᔥᑕ ᐊᐸᔅᑎᓚ, ᓀᔥᑕ ᐊᓂᐃ ᑳ ᓂᑳᓀᓕᑖᑯᓯᓕᒋ, ᑮ ᑎᐹᑐᑕᒶᒃ ᒫᑲ ᒥᓯᐌ ᑫᒀᓇ ᑭᒋᒪᓂᑐᐗ ᑳ ᑮ ᑐᑕᒫᑯᒋᒃ᙮ 5 ᒫᑲ ᑮ ᐸᓯᑯᐗᒃ ᐋᑎᑦ ᑳ ᐎᒉᐗᒋᒃ ᐹᕋᓯᔭ ᑳ ᑖᐺᑕᑭᒃ, ᐁ ᐃᑗᒋᒃ, ᐁ ᓇᑕᐌᓕᑖᑾᒃ ᑭᒋ ᑭᔅᑭᓄᐗᒋᔣᑲᓂᐎᒋᒃ, ᓀᔥᑕ ᑭᒋ ᐃᑕᔓᐙᑎᒋᒃ ᑭᒋ ᑲᓇᐌᓕᑕᒸᒋᒃ ᒧᓯᔅ ᐅᑦ ᐅᓚᔓᐌᐎᓂᓕᐤ᙮ 6 ᐊᐸᔅᑕᓚᒃ ᒫᑲ, ᓀᔥᑕ ᑳ ᓂᑳᓀᓕᑖᑯᓯᒋᒃ ᑮ ᐯᒋ ᒫᐗᒋᐃᑐᐗᒃ, ᑭᒋ ᒫᒥᑐᓀᓕᑕᑭᒃ ᐅᒣᓕᐤ᙮ 7 ᐃᔅᐱ ᒫᑲ ᒥᔅᑕᐃ ᑳ ᑮ ᐋᔑᑌᒥᑐᒋᒃ, ᐱᑕᕐ ᑮ ᐸᓯᑯ, ᓀᔥᑕ ᑮ ᐃᑌᐤ, ᐃᓕᓕᑐᒃ ᓀᔥᑕ ᓂᒋᔖᓂᑐᒃ, ᑭ ᑭᔅᑫᓕᑌᓈᐗᐤ ᐌᔅᑲᒡ ᓇᐗᒡ ᑭᒋᒪᓂᑐ ᐁ ᑮ ᐗᐌᓓᓕᒥᑕᒃ, ᐊᓂᑭ ᒉᓐᑖᐃᓚᒃ ᓂᓚ ᓂᑐᓐ ᐅᒋ ᑭᒋ ᐯᑕᑭᒃ ᒥᓗᐋᒋᒧᐎ ᐋᔭᒥᐎᓐ, ᓀᔥᑕ ᑭᒋ ᑖᐺᑕᑭᒃ᙮ 8 ᑭᒋᒪᓂᑐ ᒫᑲ ᑳ ᑭᔅᑫᓕᑕᒃ ᒥᑌᐊ, ᑮ ᑎᐹᒋᒣᐤ, ᐁ ᒥᓛᑦ ᑳ ᐸᓓᑭᓯᓕᒋ ᐊᒑᑾ ᑖᐱᔅᑯᒡ ᑭᓚᓈᓇᐤ ᑳ ᑮ ᑐᑖᑕᒃ: 9 ᐁᑳ ᒫᑲ ᐱᑐᔥ ᐁ ᑐᑖᑕᒃ ᑭᓚᓈᓇᐤ ᓀᔥᑕ ᐎᓚᐙᐤ, ᐁ ᐸᓓᑭᑕᐙᑦ ᐅᑌᐃᓖᐗ ᑖᐺᔦᓕᑕᒨᐎᓂᓕᐤ ᐅᒋ᙮ 10 ᐊᓄᒡ ᒫᑲ ᑖᓀᑭ ᐌᒋ ᑲᑴᒋᐁᒃ ᑭᒋᒪᓂᑐ, ᐁ ᐎ ᐳᒋ ᑖᐱᔅᑳᑲᓇᐌᑾᒃ ᐊᓂᑭ ᑭᔅᑫᓄᐊᒪᐗᑲᓇᒃ ᐊᓂᒪ ᐅᒋ, ᐁᑳ ᑯᑖᐎᓇᐗᒃ ᓀᔥᑕ ᑭᓚᓈᓇᐤ ᑳ ᑮ ᐱᒥᐎᑖᔭᒃ? 11 ᒫᑲ ᑭ ᑖᐺᑌᓈᓇᐤ, ᐅ ᔕᐌᓕᒋᑫᐎᓐ ᐅᒋ ᐅᑎᐯᓕᒋᑫᐤ ᒋᓴᔅ ᙭ ᑭᒋ ᐱᒫᒋᐃᑲᐎᔭᒃ, ᑖᐱᔅᑯᒡ ᐎᓚᐗᐤ 12 ᐁᑯ ᒥᓯᐌ ᑳ ᒫᒪᐎᒥᒉᑎᒋᒃ ᐃᓕᓕᐗᒃ ᑭ ᑭᐱᑐᐌᐗᒃ, ᓀᔥᑕ ᑮ ᓇᑐᑕᐌᐗᒃ ᐹᕐᓇᐸᓴ ᓀᔥᑕ ᐹᓚ, ᐁ ᐙᐎᑕᒥᓕᒋ ᐊᓂᐃ ᒫᒪᔅᑳᒋᐃᓯᒋᑫᐎᓇ ᓀᔥᑕ ᒫᒪᑖᐎ ᐊᑑᔅᑫᐎᓇ ᑭᒋᒪᓂᑐ ᑳ ᑮ ᑐᑕᒪᐙᑦ ᐊᓂᐃ ᒉᓐᑖᐃᓚ, ᐎᓚᐗᐤ ᐅᒋ᙮ 13 ᐃᔅᐱ ᒫᑲ ᑳ ᑭᐱᑐᐌᒋᒃ, ᒉᒻᔅ ᑮ ᓇᔥᑴᐗᔑᐃᐌᐤ, ᐁ ᐃᑗᑦ, ᐃᓕᓕᑐᒃ ᓀᔥᑕ ᓂᒋᔖᓂᑐᒃ, ᓇᑐᑕᐐᒃ: 14 ᓯᒥᔭᓐ ᑮ ᐙᐎᑕᒪᒻ ᑭᒋᒪᓂᑐ ᓃᔥᑕᒻ ᑳ ᐃᔑ ᒫᐗᑎᑖᑦ ᐊᓂᐃ ᒉᓐᑖᐃᓚ, ᐁᐗᒀᓂᐃ ᑭᒋ ᐅᒋ ᐅᑎᓈᑦ ᐃᓕᓕᐗ ᐅᑦ ᐃᔑᓂᑳᓱᐎᓐ ᐅᒋ᙮ 15 ᐅᒪ ᒫᑲ ᐅᒋ ᑎᐱᐹᓕᐗ ᐅᑦ ᐋᔭᒥᐎᓂᐙᐗ ᐅᑭᔅᑭᐗᐃᑫᐗᒃ; ᑳ ᐃᑕᓯᓇᐃᑳᑌᒃ, 16 ᐹᑎᒪ ᐅᒪ ᓂ ᑳ ᑭᐙᓐ, ᒥᓇ ᒫᑲ ᓂ ᑳ ᒋᒪᑖᐙᓐ ᐎᑭ ᐊᓇ ᑌᐱᑦ, ᑳ ᑮ ᑳᐎᐸᓕᓕᒃ; ᓀᔥᑕ ᒥᓇ ᓂ ᑳ ᐅᔑᑖᓐ ᐊᓂᐃ ᑳ ᓂᔑᐗᓈᑕᑭ, ᒥᓇ ᒫᑲ ᓂ ᑳ ᒋᒪᔅᑭᑖᓐ: 17 ᐊᓂᑭ ᐃᓕᓕᐗᒃ ᑳ ᑮ ᐃᔥᑯᐸᓕᒋᒃ ᑭᒋ ᑮ ᓇᓈᑐᓇᐗᒋᐤ ᐅᑎᐯᓕᒋᑫᐗ, ᓀᔥᑕ ᒥᓯᐌ ᐊᓂᑭ ᒉᓐᑖᐃᓚᒃ ᑳ ᐃᔑᓂᑳᑖᑲᓂᐎᒋᒃ ᐁ ᐃᔑᓂᑳᓱᔮᓐ, ᐃᑗᐤ ᐅᑎᐯᓕᒋᑫᐤ, ᐊᓇ ᑳ ᑐᑕᒃ ᒥᓯᐌ ᐅᐅ ᑫᒀᓇ᙮ 18 ᑭᔅᑫᓕᑕᒻ ᑭᒋᒪᓂᑐ ᒥᓯᐌ ᐅᑦ ᐊᑐᔅᑫᐎᓇ, ᒫᐗᒡ ᓃᔥᑕᒻ ᐁ ᐊᔅᑭᐗᒃ ᐅᒋ᙮ 19 ᐁᐗᑯ ᐅᒋ ᐅᒪ ᓂᑦ ᐃᑣᓐ, ᐁᑳ ᑭᒋ ᒥᑯᔅᑳᒋᐊᑯᒃ, ᐊᓂᑭ ᒉᓐᑖᐃᓚᒃ ᐅᒋ ᑳ ᑮ ᑴᔅᑭᔅᑕᐙᒋᒃ ᑭᒋᒪᓂᑐᐗ: 20 ᒫᑲ ᑭᒋ ᒪᓯᓇᐊᒪᐗᑭᒃ, ᑭᒋ ᐌᐱᓇᑭᒃ ᐎᓕᐱᓯᐎᓇ ᒪᓂᑐᑲᓇ ᐅᒋ, ᓀᔥᑕ ᐱᔑᑾᑎᓯᐎᓐ, ᓀᔥᑕ ᐊᓂᐃ ᑫᒀᓇ ᑳ ᑭᐱᑴᐱᒋᑳᑌᑭ ᐅᒋ, ᓀᔥᑕ ᒥᑯ᙮ 21 ᐌᓴ ᒧᓯᔅ ᐌᔅᑲᒡ ᐅᒋ ᐊᔮᐌᐤ ᒥᓯᐌ ᑕᑐ ᐃᑖᐎᓂᒃ ᐊᓂᐃ ᑳ ᐋᓕᒧᒥᑯᑦ, ᐁ ᐋᔭᒥᑕᓂᐗᓂᓕᒃ ᑕᑡᐤ ᐁ ᐋᔭᒥᐁᑭᔑᑳᓕᒃ ᐱᒋ ᐋᔭᒥᐁᐎᑲᒥᑾ᙮ ᒪᓯᓇᐊᒪᐗᑲᓂᐎᐗᒃ ᒉᓐᑖᐃᓪ ᐅᑖᐺᑕᒧᐗᒃ 22 ᐁᑯ ᑳ ᓇᐁᓕᑕᒥᐃᑯᒋᒃ ᐊᓂᑭ ᐊᐸᔅᑕᓚᒃ ᓀᔥᑕ ᑳ ᓂᑳᓀᓕᑖᑯᓯᒋᒃ, ᓀᔥᑕ ᒥᓯᐌ ᒫᒪᐎᐋᔭᒥᐋᐗᒃ ᐊᓯᒋ, ᑭᒋ ᐃᔑᑎᔕᐙᒋᒃ ᑳ ᐗᐌᓚᐸᒥᒥᒋ ᐃᓕᓕᐗ ᐎᓚᐙᐤ ᑎᐱᓚᐌ ᐁ ᐃᑕᓯᒋᒃ ᐅᒋ ᐊᓐᑕ ᐊᓐᑎᐊᑭᒃ, ᑭᒋ ᐎᒉᐙᒋᒃ ᐊᓂᐃ ᐹᓪ ᓀᔥᑕ ᐸᕐᓇᐸᔅ: ᐁᐗᑯ ᐅᑯ, ᒍᑕᔅ ᑳ ᐊᔅᐱᓂᑳᓱᑦ ᐹᕐᓴᐸᔅ, ᓀᔥᑕ ᓵᐃᓚᔅ, ᓂᑳᓐ ᑳ ᐃᑕᑭᒥᒋᒃ ᐃᓕᓕᐗᒃ ᒫᒪᐤ ᐁ ᐃᑕᓯᓕᒋ ᑳ ᐎᒋᔕᓂᑐᓕᒋ; 23 ᑮ ᒪᓯᓇᐊᒪᐌᐗᒃ ᒫᑲ ᐎᓚᐊᐤ ᐅᒋ ᐅᒪ ᐃᔑ; ᐊᓂᑭ ᐊᐸᔅᑕᓚᒃ, ᓀᔥᑕ ᑳ ᓂᑳᓀᓕᑖᑯᓯᒋᒃ ᓀᔥᑕ ᑳ ᐎᒋᔕᓂᑐᒋᒃ, ᐃᔑᑎᔕᐊᒫᑫᐗᒃ ᐁ ᐊᑕᒥᔅᑲᐙᒋᒃ ᐊᓂᐃ ᑳ ᐎᒋᔕᓂᑐᓕᒋ ᑳ ᒉᓐᑕᐃᓕᐎᓕᒋ ᐋᓐᑎᐊᑭᒃ ᑳ ᐃᑖᓕᒋ, ᓀᔥᑕ ᓯᕆᐊᐃᒃ, ᓀᔥᑕ ᓯᓕᓯᐊᐃᒃ; 24 ᐁ ᑮ ᐯᑕᒫᒃ, ᐋᑎᑦ ᑳ ᑮ ᐗᓚᐎᒋᒃ ᓂᓚᓈᓐ ᐅᒋ ᐁ ᑮ ᒥᑯᔅᑳᒋᐃᑖᑾᒃ ᐋᔭᒥᐎᓇ ᐅᒋ, ᐁ ᐎ ᐗᓂᔑᒫᒋᒃ ᑭᑦ ᐊᒑᑯᐙᐗ, ᐁ ᐃᑗᒋᒃ, ᑭ ᑳ ᑭᔅᑭᓄᐗᒋᔓᑲᐎᑖᐗᐤ ᐃᓴ, ᓀᔥᑕ ᑭ ᑳ ᑲᓇᐌᓕᑌᑖᐗᐤ ᐅᓚᔓᐌᐎᓐ: ᐊᓂᑭ ᐁᑳ ᑳ ᑮ ᐃᔑ ᐅᓚᔓᒪᑭᒋᒃ; 25 ᒥᓨᔑᓐ ᓂ ᑮ ᐃᑌᓕᑌᓈᓐ, ᐁ ᑮ ᒫᐗᒋᐃᑐᔮᒃ ᐯᔭᑾᓐ ᐁ ᐃᑌᓕᑕᒫᒃ, ᑭᒋ ᐃᔑᑎᔕᐊᒪᑖᒃ ᐃᓕᓕᐗᒃ ᑳ ᐗᐌᓚᐸᒥᒋᒃ, ᐊᓯᒋ ᑳ ᓵᑭᐊᑭᒋᒃ ᐹᕐᓇᐸᔅ ᓀᔥᑕ ᐹᓪ᙮ 26 ᐃᓕᓕᐗᒃ ᑳ ᑮ ᓇᓂᓵᓂᑖᒋᒃ ᐅ ᐱᒫᑎᓯᐎᓂᐙᐗ ᐅᑦ ᐃᔑᓂᑳᓱᐎᓐ ᐅᒋ ᑳ ᑎᐯᓕᒥᑕᒃ ᒋᓴᔅ ᙭᙮ 27 ᐁᐗᑯ ᐅᒋ ᓂ ᑮ ᐃᔑᑎᔕᐙᓈᓇᒃ ᒎᑕᔅ ᓀᔥᑕ ᓵᐃᓚᔅ, ᐎᓚᐗᐤ ᓀᔥᑕ ᑭ ᑳ ᐎᑕᒫᑯᐙᐗᒃ ᐅᐅ ᑫᒀᓇ᙮ 28 ᐌᓴ ᒥᓨᔑᓐ ᑮ ᐃᑌᓕᑕᒻ ᑳ ᐹᓓᑭᓯᑦ ᐊᒑᒃ, ᓀᔥᑕ ᓂᓚᓈᓐ, ᐁᑳ ᐊᐙᓯᑌ ᑭᒋ ᑌᑕᔅᑡᑖᒃ ᐁ ᑯᓯᑾᒃ ᐎᐙᔑᐎᓐ ᐃᔥᐱᔥ ᐅᐅ ᑳ ᓇᑕᐌᓕᑖᑾᑭ ᑫᒀᓇ; 29 ᑭᒋ ᐌᐱᓇᒣᒃ ᐊᓂᐃ ᒥᒋᒪ ᑳ ᐸᑭᑎᓇᒫᒋᒃ ᒪᓂᑐᑳᓇᒃ, ᓀᔥᑕ ᒥᑯ, ᓀᔥᑕ ᐊᓂᐃ ᑫᒀᓇ ᑳ ᑮ ᑭᐱᑴᐱᒋᑳᑌᑭ, ᓀᔥᑕ ᐱᔑᒀᑎᓯᐎᓐ; ᑮᔅᐱᓐ ᐅᐅ ᐅᒋ ᑲᓇᐌᓕᒥᑎᓱᔦᑴ, ᑾᔮᔉ ᑭ ᑳ ᑐᑌᓈᐗᐤ᙮ ᐙᒋᔭ᙮ 30 ᐃᔅᐱ ᒫᑲ ᑳ ᑮ ᑭᒋᑎᔖᐙᒋᒃ, ᑮ ᐯᒋ ᐃᑐᑌᐗᒃ ᐋᓐᑎᐊᑭᒃ: ᓀᔥᑕ ᒫᑲ ᐃᔅᐱ ᑳ ᑮ ᒫᒪᐎᒫᐗᒋᐋᒋᒃ ᑳ ᒥᒉᑎᓕᒋ ᐃᓕᓕᐗ, ᑮ ᒥᓜᐗᒃ ᐊᓂᐁᓕᐤ ᒪᓯᓇᐊᒫᑐᐎᓂᓕᐤ: 31 ᐊᓂᐁᓕᐤ ᐃᔅᐱ ᑳ ᑮ ᐋᔭᒥᑖᒋᒃ, ᑮ ᒥᓚᐙᑕᒶᒃ ᐌᓴ ᑮ ᒥᓗᑌᐁᐃᑯᐗᒃ᙮ 32 ᒎᑕᔅ ᒫᑲ ᓀᔥᑕ ᓵᐃᓚᔅ ᐁ ᐅᑭᔅᑭᐙᐃᑫᐎᒋᒃ ᐎᓚᐗᐤ ᓀᔥᑕ, ᑮ ᑲᑫᔅᑭᒣᐗᒃ ᑳ ᐎᒋᔕᓂᑐᓕᒋ ᒥᒉᑦ ᐋᔭᒥᐎᓇ ᐅᒋ, ᓀᔥᑕ ᑮ ᐊᔨᒋᐁᐗᒃ᙮ 33 ᐃᔅᐱ ᒫᑲ ᐎᓕᐱᔉ ᐊᓐᑕ ᑳ ᐃᑖᒋᒃ, ᑮ ᐸᑭᑎᓂᑯᐗᒃ ᑭᒋ ᑭᑐᑌᒋᒃ ᑳᔭᒣᓕᑕᒧᐎᓂᒃ ᐊᓂᐃ ᑳ ᐎᒋᔖᓂᑐᓕᒋ ᑭᒋ ᓈᑖᒋᒃ ᐊᓂᐃ ᐊᐸᔅᑕᓚ᙮ 34 ᐁᓕᐌᒃ ᒫᑲ, ᑮ ᓇᐁᓕᑕᒻ ᓵᐃᓚᔅ ᑫᔮᐸᒡ ᐊᓐᑕ ᑭᒋ ᑕᔑᑫᑦ᙮ 35 ᐹᓪ ᒫᑲ ᓀᔥᑕ ᐹᕐᓇᐸᔅ ᑫᔮᐸᒡ ᑮ ᐃᑖᐗᒃ ᐊᓐᑎᐊᑭᒃ, ᐁ ᑭᔅᑭᓄᐊᒫᑫᒋᒃ ᓀᔥᑕ ᐁ ᐙᐎᑕᒸᒋᒃ ᐅᑎᐯᓕᒋᑫᐗ ᐅᑦ ᐋᔭᒥᐎᓂᓕᐤ, ᐊᓯᒋ ᒥᒉᑦ ᑯᑕᑭᔭᒃ ᓀᔥᑕ᙮ ᑄᓪ ᓀᔥᑕ ᐹᕐᓇᐸᔅ ᐸᑳᓂᐃᑝᐗᒃ 36 ᐹᑎᒪ ᒫᑲ ᐊᑎᑦ ᑭᔑᑳᐗ, ᐹᓪ ᑮ ᐃᑌᐤ ᐊᓂᐃ ᐹᕐᓇᐸᓴ, ᐁᑯᔑ ᒥᓇ ᐃᑐᑌᑕᐤ ᓀᔥᑕ ᒪᐗᑎᑖᑖᓈᒃ ᑭᒋᔕᓂᓈᐗᒃ ᒥᓯᐌ ᑕᑐ ᐃᑖᐎᓂᒃ ᑳ ᑮ ᐃᔑ ᐙᐎᑕᒶᒃ ᐅᑎᐯᓕᒋᑫᐤ ᐅᑦ ᐋᔭᒥᐎᓂᓕᐤ, ᐙᐸᑕᑕᐤ ᒫᑲ ᑖᓀ ᐃᑎᒋᒃ᙮ 37 ᐹᕐᓇᐸᔅ ᒫᑲ ᑮ ᓇᑕᐌᓕᑕᒻ ᑭᒋ ᐎᒉᐎᑯᒋᒃ ᒑᓇ, ᐊᓇ ᑳ ᐊᔅᐱᓂᑳᓱᑦ ᒫᕐᒃ᙮ 38 ᐹᓪ ᒫᑲ ᑮ ᐃᑌᓕᑕᒻ ᐁᑳ ᑭᒋ ᒥᓦᔑᓂᓕᒃ ᑭᒋ ᐎᒉᐎᑯᒋᒃ, ᑳ ᓇᑲᑎᑯᒋᒃ ᐸᒻᐱᓕᐊᐃᒃ ᐅᒋ, ᐁᑳ ᓀᔥᑕ ᐁ ᑮ ᐎᒉᐎᑯᒋᒃ ᐁ ᓇᑕᐎ ᐊᑐᔅᑫᒋᒃ᙮ 39 ᓈᔅᐱᒡ ᒫᑲ ᐁ ᑮ ᐊᔑᑌᒥᑐᒋᒃ, ᑮ ᐸᔅᑫᐎᓂᑐᐗᒃ, ᐁᑯᔑ ᒫᑲ ᐹᕐᓇᐸᔅ ᑮ ᐅᑎᓀᐤ ᒫᕐᑲ, ᓀᔥᑕ ᑮ ᐃᑖᔑᐗᒃ ᓵᐃᑉᕋᓯᒃ: 40 ᐹᓪ ᒫᑲ ᑮ ᐅᓓᓕᒣᐤ ᓵᐃᓚᓴ, ᓀᔥᑕ ᑮ ᑭᑐᑌᐗᒃ, ᐁ ᑮ ᐸᑭᑎᓂᑯᒋᒃ ᐊᓂᐃ ᑳ ᐎᒋᔖᓂᑐᓕᒋ ᑭᒋᒪᓂᑐ ᐅ ᔕᐌᓕᒋᑫᐎᓂᒃ᙮ 41 ᑮ ᐸᐹᒥᔕᐳᔥᑲᒻ ᒫᑲ ᓯᕆᐊ ᓀᔥᑕ ᓯᓕᓯᐊ, ᐁ ᐋᔨᒋᐋᑦ ᒫᒪᐎᐋᔭᒥᐋᐗ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society