ᓂᔓ ᑌᓴᓗᓂᔭᓇ 1 - ᐅᔅᑭ ᑎᔅᑌᒥᓐᑦ

¹ ᐹᓪ, ᓀᔥᑕ ᓵᐃᓚᔅ, ᓀᔥᑕ ᑎᒧᑎ, ᐁ ᒪᓯᓇᐊᒪᐙᒋᒃ ᐊᓂᐃ ᑌᓴᓗᓂᔭ ᒫᒪᐎᐋᔭᒥᐊᐗ, ᑳ ᐃᑖᓕᒋ ᑭᒋᒪᓂᑐᒃ ᑯᑖᐎᓇᐤ ᓀᔥᑕ ᐅᑎᐯᓕᒋᑫᒃ ᒋᓴᔅ ᙭:

² ᔕᐌᓕᒋᑫᐎᓐ ᑭ ᑳ ᐎ ᐋᔮᓇᐗᐤ, ᓀᔥᑕ ᑳᔮᒣᓕᑕᒧᐎᓐ, ᑭᒋᒪᓂᑐ ᐅᒋ ᑯᑖᐎᓇᐤ, ᓀᔥᑕ ᐅᑎᐯᓕᒋᑫᐤ ᒋᓴᔅ ᙭᙮

ᐊᓂᒪ ᑎᐹᑯᓂᑫᐎᓐ ᑕᑯᔑᑫ ᙭

³ ᓂᑦ ᐃᑌᓕᑖᑯᓯᓈᓐ ᒧᔕᒃ ᑭᒋ ᓇᓈᔅᑯᒪᑭᑦ ᑭᒋᒪᓂᑐ ᑭᓚᐗᐤ ᐅᒋ ᓂᒋᔖᓂᑐᒃ, ᐁ ᐃᔑ ᒥᓗᐃᑌᓕᑖᑾᒃ, ᑭ ᑖᐺᔦᓕᑕᒧᐎᓂᐗᐤ ᐁ ᐌᓗᒋ ᓂᑕᐎᑭᒃ, ᓀᔥᑕ ᑭ ᓵᑭᐃᑐᐎᓂᐗᐤ ᐁ ᐃᔑ ᓵᑭᐃᑐᔦᒃ ᐁ ᐌᓗᒋᐸᓕᒃ;

⁴ ᑳ ᐅᒋ ᒫᒪᑖᑯᒧᔮᒃ ᓂᓚᓈᓐ ᑫᒋᐗᒃ ᑭᓚᐗᐤ ᐅᒋ, ᐃᑕ ᐁ ᐃᑖᓕᒋ ᑭᒋᒪᓂᑐ ᐅ ᒫᒪᐎᐋᔭᒥᐋᒪ, ᑭ ᔑᐱᓚᐌᓯᐎᓂᐗᐤ ᐅᒋ ᓀᔥᑕ ᑭ ᑖᐺᔦᓕᑕᒧᐎᓂᐗᐤ, ᒥᓯᐌ ᑭ ᑲᒀᑕᑭᓯᐎᓂᐙᒃ ᓀᔥᑕ ᑭᑦ ᐊᓕᒥᓯᐎᓂᐙᒃ ᑳ ᑮ ᐅᑎᑎᑯᔦᒃ:

⁵ ᐁᐗᑯ ᑳ ᐸᔭᑌᓈᑾᒃ ᑮᔅᑭᓄᐙᒋᒋᑲᓐ ᐁ ᒀᔭᔅᑯ ᑎᐹᔅᑯᓂᑫᑦ ᑭᒋᒪᓂᑐ, ᑭᒋ ᑌᐸᑫᓕᑖᑯᒥᑲᐎᔦᒃ ᑭᒋᒪᓂᑐ ᐅᑦ ᐅᑭᒫᐎᐎᓂᒃ, ᐁᐗᑯ ᑳ ᐅᒋ ᐎᓴᑫᓕᑕᒣᒃ:

⁶ ᐁ ᐙᐸᒋᑲᑌᒃ ᐁ ᒥᓜᓕᑕᒃ ᑭᒋᒪᓂᑐ ᐊᓕᒥᓯᐎᓂᓕᐤ ᑭᒋ ᑎᐸᐊᒪᐙᑦ ᐊᓂᐃ ᑳ ᒥᑯᔥᑳᒋᐃᑕᑾᒃ;

⁷ ᑭᓚᐗᐤ ᓀᔥᑕ ᑳ ᐊᓕᒥᐃᑲᐎᔦᒃ ᑭ ᐎᒋᐋᓜᐱᒥᓈᓐ, ᐃᔅᐱ ᐅᑎᐯᓕᒋᑫᐤ ᒋᓴᔅ ᑭᒋᑭᔑᑯᒃ ᑫ ᐅᒋ ᐯᒋ ᓄᑯᓯᑦ, ᐊᓯᒋ ᑳ ᓱᑳᑎᓯᓕᑭ ᐅᑦ ᐁᓐᒐᓕᒪ,

⁸ ᐁ ᐙᓚᑌᒃ ᐃᔥᑯᑌᒃ, ᐁ ᐊᑯᓚᐌᓰᔅᑕᐙᑦ ᐊᓂᐃ ᐁᑳ ᑳ ᑭᔅᑫᓕᒫᓕᒋ ᑭᒋᒪᓂᑐᐗ, ᐁᑳ ᓀᔥᑕ ᑳ ᓇᓇᐃᑕᒥᓕᒋ ᐅ ᒥᓗᐋᒋᒧᐎᓐ ᑭ ᑎᐯᓕᒋᑫᒥᓇᐤ ᒋᓴᔅ ᙭:

⁹ ᐊᓂᑭ ᑫ ᑲᒀᑕᑭᐋᑲᓂᐎᒋᒃ ᑳᑭᑫ ᓂᔑᐗᓈᑎᓯᐎᓂᒃ ᐅᑖᔅᑕᒥᒃ ᐅᒋ ᐅᑎᐯᓕᒋᑫᐤ, ᓀᔥᑕ ᐁ ᐃᔑ ᑭᔅᑌᓕᑖ ᑲᓂᓕᒃ ᐅ ᑲᔥᑭᐅᐎᓐ ᐅᒋ;

¹⁰ ᐃᔅᐱ ᐯᒋ ᑕᑯᔑᑫ ᑭᒋ ᑭᔅᑌᓕᑖᑯᐃᑯᑦ ᐅ ᐸᓓᑭᓯᒪ, ᓀᔥᑕ ᑭᒋ ᑭᔅᑌᓕᒥᑯᑦ ᒥᓯᐌ ᐊᓂᐃ ᑳ ᑖᐺᑕᒥᓕᑭ (ᐌᓴ ᓂ ᑎᐹᒋᒧᐎᓂᓈᓐ ᑮ ᑖᐺᒋᑳᑌᐤ ᐃᑕ ᐁ ᐃᑖᔦᒃ,) ᐁᑯᔅᐱ ᐁ ᑭᔑᑳᒃ᙮

¹¹ ᐁᐗᑯ ᐅᒋ ᒧᔕᒃ ᑭᑦ ᐋᔭᒥᐁᔅᑕᒫᑎᓈᓐ, ᑭ ᑭᒋᒪᓂᑐᒥᓇᐤ ᑭᒋ ᑌᐸᑫᓕᒥᑖᒃ ᐅᒪ ᓇᑐᑫᐎᓂᒃ, ᓀᔥᑕ ᑭᒋ ᑎᐱᑐᑕᒫᑖᒃ ᒥᓯᐌ ᐁ ᐃᔑ ᒥᓨᔑᑭ, ᓀᔥᑕ ᑖᐺᔦᓕᑕᒧᐎᓂ ᐊᑑᔅᑫᐎᓐ ᑲᔅᑭᐅᐎᓂᒃ;

¹² ᐅᑦ ᐃᔑᓂᑳᓱᐎᓐ ᑭ ᑎᐯᓕᒋᑫᒥᓇᐤ ᒋᓴᔅ ᙭ ᑭᒋ ᑭᔅᑌᓕᑖᑯᑕᐌᒃ, ᓀᔥᑕ ᑭᒋ ᐱᒋᔥᑲᐌᒃ, ᑳ ᐃᑕᔅᑌᓕᒃ ᐅ ᔕᐌᓕᒋᑫᐎᓐ ᑭ ᑭᒋᒪᓂᑐᒥᓇᐤ, ᓀᔥᑕ ᐅᑎᐯᓕᒋᑫᐤ ᒋᓴᔅ ᙭᙮