ᓂᔓ ᑯᕆᓐᑎᐊᓇ 8 - ᐅᔅᑭ ᑎᔅᑌᒥᓐᑦᐁ ᐃᔑ ᒥᓕᐌᑦ ᑲᕆᔅᑎᔭᓐ 1 ᓀᔥᑕ ᒫᑲ, ᓂᒋᔖᓂᑐᒃ, ᑭ ᐎ ᑭᔅᑫᓕᑕᒥᐃᑎᓇᐗᐤ ᐅ ᔕᐌᓕᒋᑫᐎᓐ ᑭᒋᒪᓂᑐ ᑳ ᑮ ᒥᓛᑲᓂᐎᒋᒃ ᐊᓂᑭ ᒫᒪᐎᐋᔭᒥᐋᐗᒃ ᒫᓯᑐᓂᔭᐃᒃ ᑳ ᐃᑖᒋᒃ: 2 ᑳ ᑮ ᐃᑎᒋᒃ, ᑭᒋ ᑲᑴᒋᐃᑯᐎ ᑲᒀᑕᑭᓯᐎᓂᒃ, ᐁ ᒥᔖᓕᒃ ᐅ ᒥᓚᐙᑕᒧᐎᓂᐗᐤ ᓀᔥᑕ ᐅ ᑭᒋ ᑭᑎᒫᑭᓯᐎᓂᐗᐤ ᐁ ᑮ ᐅᒋ ᐌᓗᒋᐸᓕᓕᒃ ᑳ ᐃᔑ ᒥᔅᑕᐃ ᒥᓕᐌᒋᒃ᙮ 3 ᐌᓴ ᑳ ᐃᔑ ᑲᔥᑭᑖᒋᒃ, ᓂᑦ ᐊᓕᒧᑌᓐ, ᐁᐁ, ᓀᔥᑕ ᐊᐙᓯᑌ ᐃᔥᐱᔥ ᑳ ᑲᔥᑭᑖᒋᒃ ᐎᓚᐗᐤ ᑫᒋᐙᒃ ᑮ ᓇᐁᓕᑕᒶᒃ; 4 ᐁ ᓇᑕᐌᓕᒥᔭᒥᒋᒃ ᓈᔅᐱᒡ ᐁ ᓇᑐᑕᒪᐎᔭᒥᒋᒃ ᑭᒋ ᐅᑎᓇᒫᒃ ᐊᓂᒪ ᒥᓕᐌᐎᓐ, ᓀᔥᑕ ᑭᒋ ᐅᑎᓇᒫᓱᔮᒃ ᐊᓂᒪ ᐎᒉᐅᑐᐎᓐ ᐁ ᒫᑎᓇᒫᒋᒃ ᐅᐸᓓᑭᓴᒃ᙮ 5 ᐅᒪ ᓀᔥᑕ ᑮ ᑐᑕᒶᒃ, ᓇᒪᐎᓚ ᑳ ᐃᔑ ᐊᔅᐯᓕᒧᔮᑭᐸᓐ, ᓂᔥᑕᒻ ᒫᑲ ᑮ ᐸᑭᑎᓂᑎᓱᔅᑕᐌᐗᒃ ᐅᑎᐯᓕᒋᑫᐗ ᓂᓚᓈᓐ ᐊᓯᒋ ᑳ ᐃᑌᓕᑕᒃ ᑭᒋᒪᓂᑐ᙮ 6 ᐁᑯ ᑳ ᐅᒋ ᓇᑕᐌᓕᑕᒧᐗᑭᑎᐸᓐ ᑕᐃᑕᔅ, ᑳ ᑮ ᐃᔑ ᒫᒋᑐᑕᒃ, ᐁᑯ ᑖᐱᔅᑯᒡ ᓀᔥᑕ ᑭᒋ ᑭᔑᑕᒫᑖᒃ ᐊᓂᒪ ᔕᐌᓕᒋᑫᐎᓐ᙮ 7 ᐁᐗᑯ ᒫᑲ ᐅᒋ, ᐁ ᐃᔑ ᐌᓗᑎᓯᔦᒃ ᒥᓯᐌ ᑫᒀᓐ, ᑖᐺᔦᓕᑕᒧᐎᓂᒃ, ᓀᔥᑕ ᐋᔭᒥᐎᓂᒃ, ᓀᔥᑕ ᑭᔅᑫᓕᑕᒧᐎᓂᒃ, ᓀᔥᑕ ᒥᓯᐌ ᑭᓯᓴᐎᓯᐎᓂᒃ, ᓀᔥᑕ ᐁ ᐃᔑ ᓵᑭᐃᔮᒃ, ᐁᑯᔑ ᐅᒪ ᐃᔑ ᔕᐌᓕᒋᑫᐎᓂᒃ ᐌᓗᑎᓰᒃ ᓀᔥᑕ᙮ 8 ᓇᒪᐎᓚ ᑲᑫᔅᑴᐎᓐ ᓂᑦ ᐅᒋ ᐋᔭᒥᓐ, ᒫᑲ ᐅ ᓂᑳᓀᓕᒧᐎᓂᐗᐤ ᑯᑕᑭᔭᒃ ᐅᒋ, ᓀᔥᑕ ᑭᒋ ᑭᔅᑫᓕᑖᑾᒃ ᐁ ᐃᔑ ᑫᒋᓈᔦᓕᑖᑾᒃ ᑭ ᓵᑭᐃᐌᐎᓂᐗᐤ᙮ 9 ᐌᓴ ᑭ ᑭᔅᑫᓕᑕᒸᓇᐗᐤ ᐅ ᔕᐌᓕᒋᑫᐄᓐ ᑭ ᑎᐯᓕᒋᑫᒥᓇᐤ ᒋᓴᔅ ᙭, ᐋᑕ ᐁ ᑮ ᒥᔕᑭᓯᑦ, ᐁᓕᐌᒃ ᑭᓚᐗᐤ ᐅᒋ ᑮ ᐊᑎ ᑭᑎᒫᑭᓯᐤ, ᑭᓚᐗᐤ ᐅ ᑭᑎᒫᑭᓯᐎᓂᒃ ᐅᒋ ᑭᒋ ᒥᔕᑭᓯᔦᒃ᙮ 10 ᐅᑕ ᒫᑲ ᓂ ᒥᓕᐙᓐ ᓂ ᑲᑫᔅᑭᒥᐗᐎᓐ: ᐌᓴ ᐅᒪ ᑮ ᓇᐃᐸᓕᔅᑳᑯᓐ, ᑭᓚᐗᐤ ᐊᔕᔾ ᑳ ᑮ ᒫᒋᑐᑕᒣᒃ, ᓇᒪᐎᓚ ᐱᑯ ᑭᒋ ᑐᑕᒣᒃ, ᒫᑲ ᐊᓯᒋ ᐁ ᑮ ᓂᑳᓀᓕᒧᔦᒃ ᐱᐴᓄᒃ᙮ 11 ᐁᑯᔑ ᒫᑲ ᐁᑯ ᑎᐱᑐᑕᒧᒃ ᐊᓂᒪ ᑳ ᐎ ᑐᑕᒣᒃ; ᑳ ᑮ ᐃᔑ ᓂᑳᓀᓕᒧᔦᒃ, ᐁᑯ ᑖᐱᔅᑯᒡ ᓀᔥᑕ ᑭᒋ ᑎᐱᑐᒋᑳᑌᒃ ᐊᓂᒪ ᐅᒋ ᑳ ᐋᔮᔦᒃ᙮ 12 ᐌᓴ ᑮᔥᐱᓐ ᓃᔥᑕᒻ ᐁᑕᑾᑭ ᓇᐁᓕᑕᒧᐎ ᒥᑐᓀᓕᒋᑲᓐ, ᐅᑎᓂᑳᑌᓕᐤ ᐁ ᐃᔅᐱᒋ ᐋᔮᑦ ᐊᐌᓇ ᐃᓕᓕᐤ, ᓇᒪ ᒫᑲ ᐁᑳ ᑳ ᐃᔑ ᐋᔮᑦ᙮ 13 ᐌᓴ ᓂᑦ ᐃᑌᓕᑌᓐ ᓇᒪᐎᓚ ᑯᑕᑭᔭᒃ ᐃᓕᓕᐗᒃ ᑭᒋ ᐌᑎᓯᒋᒃ, ᓀᔥᑕ ᑭᓚᐗᐤ ᑭᒋ ᑄᐗᑌᔦᒃ: 14 ᒫᑲ ᑭᒋ ᐃᔑ ᑖᐱᔅᑯᒋᐸᓕᒃ, ᐊᓄᒡ ᐁᑯᔅᐱ, ᑭ ᐌᓗᑎᓯᐎᓂᐗᐤ ᑭᒋ ᐅᒋ ᐋᔮᒋᒃ ᑳ ᓄᑌᐸᓚᒋᒃ, ᓀᔥᑕ ᐅ ᐌᓗᑎᓯᐎᓂᐙᒃ ᑭᒋ ᐅᒋ ᐋᔭᔦᒃ ᑳ ᓄᑌᐸᓕᔦᒃ, ᐁᑯ ᑭᒋ ᐃᔑ ᑖᐱᔅᑯᒋᐸᓕᒃ; 15 ᐁ ᐃᑕᓯᓇᐃᑳᑌᒃ, ᐊᓇ ᒥᔅᑕᐃ ᑳ ᑮ ᒪᐗᒋᑖᑦ ᓇᒪᐎᓚ ᐋᓕᐙᒃ ᑮ ᐋᔭᐤ; ᓀᔥᑕ ᐊᓇ ᐋᐱᔒᔥ ᑳ ᑮ ᒪᐗᒋᑖᑦ ᓇᒪᐎᓚ ᑮ ᓄᑌᐸᓕᐃᑯ᙮ ᑖᐃᑕᔅ ᓀᔥᑕ ᐅᐎᒉᐗᑲᓇ 16 ᒫᑲ ᑲᑕ ᐎ ᓇᓈᔅᑯᒪᐤ ᑭᒋᒪᓂᑐ, ᑳ ᑮ ᐃᑕᔅᑖᑦ ᐅᑌᐃᒃ ᑕᐃᑕᐧᔅ ᓈᔅᐱᒡ ᑭᒋ ᐃᑌᓕᒥᑖᒃ᙮ 17 ᐌᓴ ᑖᐺ ᑮ ᐅᑎᓇᒻ ᐊᓂᐁᓕᐤ ᔑᑭᒥᐌᐎᓂᓕᐤ; ᒫᑲ ᐊᐙᓯᑌ ᐁ ᓂᑳᓀᓕᒧᑦ, ᐎᓚ ᑫᒋᐙᒃ ᐁ ᐃᑌᓕᑕᒃ, ᑭ ᑮ ᓈᑎᑯᐗᐤ᙮ 18 ᓂ ᑮ ᐃᔑᑎᔕᐙᓈᓐ ᓀᔥᑕ ᐊᓯᒋ ᐊᓇ ᐎᒋᔖᓂᓇᐤ, ᑳ ᒫᒪᑖᑯᒫᑲᓂᐎᑦ ᒥᓗᐋᒋᒧᐎᐤ ᐅᒋ ᒣᑴᔭᔥ ᒥᓯᐌ ᒫᒪᐎᐋᔭᒥᐋᐗᒃ; 19 ᓇᒪᐎᓚ ᐊᓂᒪ ᐱᑯ, ᒫᑲ ᑳ ᑮ ᐙᐌᓛᐸᒥᑯᑦ ᓀᔥᑕ ᒫᒪᐎᐋᔭᒥᐋᐗ ᑭᒋ ᐎᒋᐱᒥᐱᒋᒥᔭᒥᑦ ᐁ ᑲᓇᐌᓕᑕᒪᒃ ᐅᒪ ᔕᐌᓕᒋᑫᐎᓐ, ᑳ ᒫᑎᓇᒫᑫᔮᒃ, ᑫ ᐅᒋ ᒫᒥᒋᒪᑲᓂᐎᑦ ᐁᐗᑯ ᐊᓇ ᐅᑎᐯᓕᒋᑫᐤ, ᓀᔥᑕ ᑭᒋ ᐅᒋ ᐎᒋᒋᑳᑌᒃ ᑮ ᓂᑳᓀᓕᑕᒧᐎᓂᐗᐤ: 20 ᐅᒪ ᐁ ᒥᔮᔥᑲᒫᒃ, ᐁᑳᐎᓚ ᐊᐌᓇ ᐃᓕᓕᐤ ᑭᒋ ᐊᑖᒥᒥᔭᒥᑦ ᐅᒪ ᐌᓗᑎᓯᐎᓐ ᐅᒋ ᑳ ᒫᑎᓇᒫᑫᔮᒃ: 21 ᐁ ᓄᑯᑖᔮᒃ ᐁ ᒀᔭᔅᑭᑎᔮᒃ, ᓇᒪᐎᓚ ᐱᑯ ᐁ ᑲᓇᐙᐸᒥᔭᒥᑦ ᑭᒋᒪᓂᑐ, ᒫᑲ ᐁ ᑲᓇᐙᐸᒥᔭᒥᒋᒃ ᓀᔥᑕ ᐃᓕᓕᐗᒃ᙮ 22 ᐊᓯᒋ ᐅᑯ ᓀᔥᑕ ᓂ ᑮ ᐃᔑᑎᔕᐙᓈᓐ ᓂᒋᔖᓂᓈᓐ, ᒥᒉᑡᐤ ᑳ ᑮ ᒥᔅᑲᐗᑭᑦ ᐁ ᑭᓯᓴᐎᓯᑦ ᒥᓯᐌ ᑫᒀᓇ, ᒫᑲ ᐊᓄᒡ ᓈᔅᐱᒡ ᐊᐙᓯᑌ ᐁ ᑭᓯᓴᐎᓰᑦ, ᐁ ᐃᔅᐱᒋ ᓈᔅᐱᒡ ᒪᒥᔑᑐᑕᑾᒃ ᐅᒋ᙮ 23 ᑮᔥᐱᓐ ᐊᐌᓇ ᑲᑴᒋᑫᒧᑌ ᑖᐃᑕᔅ ᐅᒋ, ᓂᑦ ᐅ ᐎᒉᐙᑲᓂᒪᐤ ᓀᔥᑕ ᓂᑦ ᐅ ᐎᒋᐙᑲᓂᒪᐤ ᑭᓚᐙᐤ ᐅᒋ, ᓀᔥᑕᐱᑯ ᓂᒋᔖᓂᓈᓇᒃ, ᐎᓚᐗᐤ ᐁᐗᑳᓂᑭ ᐅᑦ ᐃᔑᑎᔕᐙᑲᓂᐙᐗ ᒫᒪᐎᐊᔭᒥᐋᐗᒃ, ᑫ ᐅᒋ ᒫᒥᒋᒫᑲᓂᐎᑦ ᙭᙮ 24 ᐁᐗᑯ ᐅᒋ, ᐙᐸᑎᓕᑯᒃ, ᐅᑎᔥᑲᐤ ᓀᔥᑕ ᒫᒪᐎᐋᔭᒥᐋᐗᒃ, ᐁ ᑫᒋᓈᔦᓕᑖᑾᒃ ᑭ ᓵᑭᐃᐌᐎᐎᓂᐗᐤ, ᓀᔥᑕ ᓂ ᒫᒪᑖᑯᒧᐎᓂᓈᓐ ᑭᓚᐗᐤ ᐅᒋ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society