ᓂᔓ ᑯᕆᓐᑎᐊᓇ 6 - ᐅᔅᑭ ᑎᔅᑌᒥᓐᑦ1 ᓂᓚᓈᓐ ᒫᑲ ᐁ ᒫᒪᐄ ᐎᒋᐊᑑᔅᑫᒪᑭᑦ, ᑭ ᓇᑐᑕᒫᑎᓈᓐ ᐁᑳ ᐸᑾᓐᑕᐤ ᑭᒋ ᐅᑎᓇᒬᒃ ᑭᒋᒪᓂᑐ ᐅ ᔕᐌᓕᒋᑫᐎᓐ᙮ 2 ᐌᓴ ᐃᑗᐤ, ᑭ ᑮ ᐯᑖᑎᓐ ᐊᓂᒪ ᐃᔅᐱ ᑳ ᓇᐃᐸᓕᒃ, ᓀᔥᑕ ᐁ ᐱᒫᒋᐃᐌᐎ ᑭᔑᑳᒃ ᑭ ᑮ ᓂᔓᑲᒫᑎᓐ: ᒫᑎᑲ, ᐊᓄᒡ ᐁᑯ ᑳ ᓇᐃᐸᓕᒃ; ᒫᑎᑲ, ᐊᓄᒡ ᐁᐗᑯ ᐱᒫᒋᐃᐌᐎ ᑭᔑᑳᐤ᙮ 3 ᐁᑳ ᑫᒀᓐ ᐁ ᑐᑕᒫᒃ ᑫ ᐅᒋ ᓈᔦᑕᐌᓕᑕᒥᐃᐌᔮᒃ, ᐋᔭᒥᐋᐎ ᐊᑑᔅᑭᐎᓐ ᐁᑳ ᑭᒋ ᒪᒋ ᐋᓕᒧᒋᑳᑌᓐ; 4 ᒫᑲ ᒥᓯᐌ ᑫᒀᓇ ᐁ ᑐᑕᒫᒃ ᐁ ᐙᐸᑎᓕᐌᔮᒃ ᐁ ᐅᑦ ᐋᔭᒥᐋᐎ ᐊᑑᔅᑫᓛᑲᓂᔭᒥᒋᒃ, ᒥᔅᑕᐃ ᔑᐱᓚᐌᓯᐎᓂᒃ, ᑲᒀᑕᑭᓯᐎᓂᒃ, ᒪᓀᓯᐎᓂᒃ, ᓇᓀᑳᑌᓕᒧᐎᓂᒃ, 5 ᐁ ᐸᓴᔅᑌᐅᑳᐎᔮᒃ, ᐁ ᑭᐸᐅᑳᐎᔮᒃ, ᐁ ᓂᔑᐗᓈᑕᑲᒥᑭᓯᓈᓂᐗᒃ, ᐁ ᐊᑑᔅᑫᔮᒃ, ᐁ ᐊᔕᐙᐱᔮᒃ, ᐁ ᓂᑲᓱᔮᒃ; 6 ᐸᓓᑭᓯᐎᓂᒃ, ᑭᔅᑫᓕᑕᒧᐎᓂᒃ, ᓴᓯᐯᓕᑕᒧᐎᓂᒃ, ᑭᔐᐙᑎᓯᐎᓂᒃ, ᐸᓓᑭ ᐊᒑᒃ ᐅᒋ, ᑖᐺ ᓵᑭᐃᐌᐎᓂᒃ, 7 ᑖᐺᐎᓂ ᐋᔭᒥᐎᓂᒃ, ᑭᒋᒪᓂᑐ ᐅ ᑲᔥᑭᐅᐎᓂᒃ, ᐁ ᑭᑭᔥᑲᒫᒃ ᓇᑐᐸᓕᐎ ᐋᐸᒋᑖᐎᓇ ᒀᔭᔅᑭᑖᑎᓱᐎᓂᒃ ᑳ ᐅᒋᐸᓕᑭ ᑭᒋᓂᔅᑮᒃ ᐃᑌᑫ ᓀᔥᑕ ᓇᒪᑎᓂᔅᑭᒃ ᐃᑌᑫ, 8 ᐁ ᑭᔅᑌᓕᑖᑯᓯᔮᒃ ᓀᔥᑕ ᐁ ᒪᒉᓕᑖᑯᓯᔮᒃ, ᐁ ᒪᒋ ᐋᓕᒧᒥᑲᐎᔮᒃ ᓀᔥᑕ ᐁ ᒥᓗ ᐋᓕᒪᒥᑲᐎᔮᒃ; ᑖᐱᔅᑯᒡ ᐁ ᐙᔦᔑᒥᐌᒋᒃ, ᐁᓕᐌᒃ ᒫᑲ ᐁ ᑖᐺᔮᒃ; 9 ᑖᐱᔅᑯᒡ ᐁᑳ ᐁ ᑭᔅᑫᓕᑖᑯᓯᒋᒃ, ᐁᓕᐌᒃ ᒫᑲ ᒥᑐᓂ ᐁ ᑭᔅᑫᓕᒥᑲᐎᔮᒃ; ᑖᐱᔅᑯᒡ ᐁ ᓂᐱᒋᒃ, ᒫᑎᑲ, ᒫᑲ, ᓂ ᐱᒫᑎᓯᓈᓐ; ᑖᐱᔅᑯᒡ ᐁ ᐸᐸᓴᔅᑌᐅᒋᒃ ᐁᑳ ᒫᑲ ᐁ ᓂᐸᐃᑳᐎᔮᒃ; 10 ᑖᐱᔅᑯᒡ ᐁ ᒫᒥᔕᒣᓕᑕᑭᒃ, ᐁᓕᐌᒃ ᒫᑲ ᒧᔕᒃ ᐁ ᒧᒋᑫᓕᑕᒫᒃ; ᑖᐱᔅᑯᒡ ᐁ ᒪᓀᓯᒋᒃ, ᐁᓕᐌᒃ ᒫᑲ ᒥᒉᑦ ᐁ ᒥᔕᑭᐊᑭᒋᒃ, ᑖᐱᔅᑯᒡ ᐁᑳ ᑫᒀᓕᐤ ᐁ ᐋᔮᒋᒃ, ᐁᓕᐌᒃ ᒫᑲ ᒥᓯᐌ ᑫᒀᓇ ᐁ ᐋᔮᔮᒃ᙮ 11 ᐊ ᑯᕆᔅᑎᔮᓂᑐᒃ, ᑭ ᐹᔅᑭᑌᓇᒫᑎᓈᓐ ᓂᑐᓂᓈᓐ, ᓂᑌᐃᓈᓐ ᑮ ᐊᑎ ᒥᔕᐤ᙮ 12 ᓇᒪᐎᓚ ᑭ ᔕᑯᐎᐃᑲᐎᓇᐗᐤ ᐁ ᐯᒋᔅᑳᐎᔦᒃ, ᒫᑲ ᑭ ᔕᑯᐎᐃᑲᐎᓇᐗᐤ ᑎᐱᓚᐌ ᑭᔭᐎᐙᒃ᙮ 13 ᐁᑯ ᐊᓂᒪ ᐁ ᑎᐸᐊᒣᒃ, ᑭᑦ ᐊᔭᒥᐃᑎᓇᐗᐤ ᑖᐱᔅᑯᒡ ᓂᑦ ᐊᐙᔑᒥᔕᒃ, ᑭᓚᐗᐤ ᓀᔥᑕ ᑲᑕ ᐊᑎ ᒥᔕᐤ ᑭᑌᐃᐗᐤ᙮ ᐁᑳᐎᓚ ᐎᒉᐙᑲᓂᒃ ᐁᑳ ᑳ ᑖᐺᔦᓕᑕᒃ 14 ᐁᑳᐎᓚ ᓇᔅᐹᒡ ᑭ ᑳ ᐊᓯᒋᐱᓱᓇᐗᐤ ᐊᓂᑭ ᐁᑳ ᑳ ᑖᐺᑕᑭᒃ: ᐌᓴ ᑖᓂ ᑫ ᐃᔑ ᐎᒉᑐᒪᑲᒃ ᒀᔭᔅᑭᑖᑎᓯᐎᓐ ᐊᓯᒋ ᒪᒑᑎᓯᐎᓐ? ᓀᔥᑕ ᑖᓂ ᑫ ᐃᔑ ᐎᒉᑐᒪᑲᒃ ᐙᓭᔮᓯᐎᓐ ᐊᓯᒋ ᐗᓂᑎᐱᔅᑭᓯᐎᓐ? 15 ᓀᔥᑕ ᑖᓂ ᑫ ᐃᔑ ᒥᓜᓕᒥᑐᒋᒃ ᙭ ᓀᔥᑕ ᐱᓕᔭᓐ? ᓀᔥᑕᐱᑯ ᑖᓂ ᑫ ᐃᔑ ᐎᒉᐙᑦ ᐊᓇ ᑳ ᑖᐺᑕᒃ ᐊᓂᐃ ᐁᑳ ᑳ ᑖᐺᑕᒥᓕᒋ? 16 ᓀᔥᑕ ᑖᓂ ᑫ ᐃᔑ ᓇᔅᑯᒥᑐᒪᑲᒃ ᐅᑦ ᐋᔭᒥᐁᐎᑲᒥᒃ ᑭᒋᒪᓂᑐ ᓀᔥᑕ ᒪᓂᑐᑳᓇᒃ? ᐌᓴ ᑭᓚᐗᐤ ᐁᐗᑯ ᐅᑦ ᐋᔭᒥᐁᐎᑳᒥᒃ ᐯᒫᑎᓰᑦ ᑭᒋᒪᓂᑐ; ᑳ ᐃᔑ ᐃᑗᑯᐸᓀ ᑭᒋᒪᓂᑐ, ᓂ ᑳ ᐎᑭᒪᐗᐤ, ᓀᔥᑕ ᓂ ᑳ ᐎᒋᐱᒧᑌᒪᐗᒃ: ᓀᔥᑕ ᓂ ᑳ ᐅ ᑭᒋᒪᓂᑐᒥᒥᑾᒃ, ᓀᔥᑕ ᓂ ᑳ ᐅᑦ ᐃᓕᓕᒥᒪᐗᒃ᙮ 17 ᐁᐗᑯ ᐅᒋ ᐯᒋ ᐙᓚᐎᒃ ᐃᑕ ᐁ ᐃᑖᒋᒃ, ᓀᔥᑕ ᐸᑳᓂᐃᑎᓱᒃ, ᐃᑗᐤ ᐅᑎᐯᓕᒋᑫᐤ, ᐁᑳᐎᓚ ᓀᔥᑕ ᓵᒥᓇᒧᒃ ᐊᓂᒪ ᑳ ᐎᓕᐹᒃ; ᑭ ᑳ ᐅᑎᓂᑎᓇᐗᐤ ᒫᑲ, 18 ᓀᔥᑕ ᑭ ᑳ ᐅᑦ ᐅᑕᐎᒥᓇᐗᐤ, ᓀᔥᑕ ᑭᓚᐗᐤ ᑭ ᑳ ᐅᑯᓯᓯᒥᑎᓇᐗᐤ ᓀᔥᑕ ᑭ ᑳ ᐅᑖᓂᓯᒥᑎᓇᐗᐤ, ᐃᑗᐤ ᐅᑎᐯᓕᒋᑫᐤ ᒥᓯᐌ ᓯᔫᑳᑎᓰᑦ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society