ᓂᔓ ᑯᕆᓐᑎᐊᓇ 4 - ᐅᔅᑭ ᑎᔅᑌᒥᓐᑦᐊᒑᑯ ᐌᓘᑎᓯᐎᓐ ᐊᔑᔥᑭ ᐊᓴᐗᒋᑲᓇ ᐁ ᐃᑕᑾᑭ 1 ᐁ ᐙᐸᑕᒫᒃ ᒫᑲ ᐁ ᐋᔮᔮᒃ ᐅᒪ ᐋᔭᒥᐋᐎ ᐊᑐᔅᑫᐎᓐ, ᑳ ᑮ ᐃᔑ ᒥᓕᑲᐎᔮᒃ ᔕᐌᓕᒋᑫᐎᓐ, ᓇᒪᐎᓚ ᓂ ᔖᑯᑌᐋᓈᓐ; 2 ᒫᑲ ᓂ ᑮ ᐌᐱᓀᓈᓐ ᐊᓂᐃ ᑭᒧᒡ ᑫᒀᓇ ᓇᓀᐯᐎᓯᐎᓂᒃ ᑳ ᐃᑕᑾᑭ, ᐁᑳ ᐁ ᐱᒧᑌᔮᒃ ᑲᑳᔦᓕᓯᐃᓂᒃ, ᐁᑳ ᓀᔥᑕ ᐁ ᐙᔦᔑᐃᐌᐎ ᑕᑯᓇᒶᒃ ᑭᒋᒪᓂᑐ ᐅᑦ ᐋᔭᒥᐎᓐ; ᒫᑲ ᐁ ᑭᔅᑫᓕᑖᑯᑖᔮᒃ ᑖᐺᐎᓐ, ᓂ ᒥᓗᐋᒋᒥᑎᓱᔅᑕᐙᓈᓐ ᒥᓯᐌ ᑕᑐ ᐃᓕᓕᐤ ᐅ ᒥᑐᓀᓕᒋᑲᓂᒃ ᐁ ᑲᓇᐙᐸᒥᑦ ᑭᒋᒪᓂᑐ᙮ 3 ᒫᑲ ᑮᔥᐱᓐ ᓂ ᒥᓗᐋᒋᒧᐎᓂᓈᓐ ᑭᐋᒋᑳᑌᑭ, ᑳᑕᒪᐙᐗᒃ ᐊᓂᑭ ᑳ ᐗᓂᔑᑭᒃ: 4 ᐊᓂᐃ ᐅᒋ ᐊᓇ ᑳ ᒪᓂᑐᐎᑦ ᐅᑕ ᐊᔅᑮᒃ ᑮ ᑭᑆᐱᓇᒬᐤ ᐅ ᒥᑐᓀᓕᒋᑲᓂᓕᐗ ᐊᓂᐃ ᐁᑳ ᑳ ᑖᐺᑕᒥᓕᒋ, ᐊᓂᒪ ᐙᔅᑌᐎᓐ ᑳ ᐅᒋᐸᓕᒃ ᐅ ᑭᔅᑌᓕᑖᑯᓯᐎ ᒥᓗᐋᒋᒧᐎᓂᒃ ᙭, ᑳ ᓇᔅᐱᑕᐙᑦ ᑭᒋᒪᓂᑐᐗ, ᐁᑳ ᑭᒋ ᓵᑳᔅᑌᔅᑳᑯᒋᒃ᙮ 5 ᐌᓴ ᓇᒪᐎᓚ ᓂ ᑲᑫᔅᑭᒥᐙᓱᓈᓐ, ᒫᑲ ᒋᓴᔅ ᙭ ᐅᑎᐯᓕᒋᑫᐤ; ᓂᓚᓈᓐ ᓀᔥᑕ ᑭᑦ ᐊᑐᔅᑫᓚᑲᓂᐗᐗᒃ ᒋᓴᔅ ᐅᒋ᙮ 6 ᐌᓴ ᑭᒋᒪᓂᑐ ᑳ ᑮ ᐃᑕᔓᐗᑕᒃ ᐙᓭᔮᓯᐎᓐ ᑭᒋ ᓵᑳᔅᑌᓕᒃ ᐁ ᐗᓂᑎᐱᔅᑳᒃ ᐅᒋ, ᓂ ᑮ ᓵᑳᔅᑌᔅᑳᑯᓈᓐ ᓂᑌᐃᓈᒃ, ᑭᒋ ᒥᓕᔮᒃ ᐊᓂᒪ ᐙᔅᑌᐎᓐ ᑳ ᐃᑕᑾᒃ ᐁ ᑭᔅᑫᓕᒋᑳᑌᓕᒃ ᐅ ᑭᔅᑌᓕᑖᑯᓯᐎᓐ ᑭᒋᒪᓂᑐ ᐅᑖᔅᑕᒥᑯᒃ ᒋᓴᔅ ᙭᙮ 7 ᒫᑲ ᐅᒪ ᐌᓗᑎᓯᐎᓐ ᐊᔅᑭᐎ ᐊᓯᐗᒋᑲᓂᒃ ᓂᑦ ᐋᔮᓈᓐ, ᐁ ᐃᔅᐱᒋ ᑭᒋᐃᑌᓕᑖᑾᓂᓕᒃ ᑲᔥᑭᐅᐎᓂᓕᐤ ᑭᒋ ᑎᐱᓚᐌᐎᓯᑦ ᑭᒋᒪᓂᑐ, ᓇᒪᐎᓚ ᓂᓚᓈᓐ᙮ 8 ᒥᓯᐌ ᐋᔨᑕᐤ ᓂ ᒥᑯᔥᑳᒋᐃᑲᐎᓈᓐ, ᓇᒪᐎᓚ ᒫᑲ ᓂ ᑲᒀᑕᑫᓕᒧᓈᓐ; ᓂ ᐙᐙᓀᓕᑌᓇᓐ, ᒫᑲ ᓇᒪᐎᓚ ᒥᑐᓂ ᓂ ᑮ ᐗᓂᑖᓈᓐ ᐊᔅᐯᓕᒧᐎᓐ; 9 ᓂ ᑲᒀᑕᑭᐃᑲᐎᓈᓐ, ᒫᑲ ᓇᒪᐎᓚ ᓂ ᐌᐱᓂᑲᐎᓈᓐ; ᓂ ᐌᐱᔑᒥᑲᐎᓈᓐ, ᒫᑲ ᓇᒪᐎᓚ ᓂ ᓂᔑᐗᓈᒋᐃᑲᐄᓈᓐ; 10 ᒧᔕᒃ ᐁ ᐸᐸᒧᑕᑖᐗᑭᑦ ᓂᔭᐎᓈᒃ ᐅ ᓂᐱᐎᓐ ᐅᑎᐯᓕᒋᑫᐤ ᒋᓴᔅ, ᐅ ᐱᒫᑎᓯᐎᓐ ᓀᔥᑕ ᒋᓴᔅ ᑭᒋ ᓄᑯᑖᓂᐗᓂᓕᒃ ᓂᔭᐎᓋᒃ᙮ 11 ᐌᓴ ᓂᓚᓈᓐ ᑳ ᐱᒫᑎᓯᔮᒃ ᒧᔕᒃ ᓂᑦ ᐃᔑ ᐸᑭᑎᓂᑲᐎᓈᓐ ᓂᐱᐎᓂᒃ ᐎᓚ ᐅᒋ ᒋᓴᔅ, ᐅ ᐱᒫᑎᓯᐎᓐ ᒋᓴᔅ ᑭᒋ ᓄᑯᑖᓂᐗᓂᓕᒃ ᓂ ᓂᐱᐎᓂᐎᔮᓯᓈᒃ᙮ 12 ᐁᑯ ᐃᔑ ᒫᑲ ᓂᐱᐎᓐ ᓂ ᓄᒋᐃᑯᓈᓐ, ᒫᑲ ᑭᓚᐗᐤ ᐱᒫᑎᓯᐎᓐ᙮ 13 ᓂᓚᓈᓐ ᐁ ᐋᔭᐗᑭᑦ ᐁᐗᑯ ᑫᔮᐸᒡ ᑖᐺᔦᓕᑕᒧᐎᓂ ᐊᒑᒃ, ᐁ ᐃᑕᓯᓇᐃᑳᑌᒃ, ᓂ ᑮ ᑖᐺᑌᓐ, ᐁᐗᑯ ᐌᒋ ᒫᑲ ᐋᔭᒥᔮᓐ; ᓂᓚᓈᓐ ᓀᔥᑕ ᓂ ᑖᐺᑌᓈᓐ, ᐁᐗᑯ ᐌᒋ ᒫᑲ ᐋᔭᒥᔮᒃ; 14 ᐁ ᑭᔅᑫᓕᑕᒫᒃ ᐊᓇ ᑳ ᑮ ᐗᓂᔥᑳᓈᑦ ᐅᑎᐯᓕᒋᑫᐗ ᒋᓴᓴ, ᐊᓯᒋ ᓀᔥᑕ ᑭᒋ ᐗᓂᔥᑳᓂᔭᒥᑦ ᒋᓴᔅ ᐅᒋ, ᓀᔥᑕ ᑭᒋ ᐸᑭᑎᓂᔭᒥᑦ ᐊᓯᒋ ᑭᓚᐗᐤ᙮ 15 ᐌᓴ ᒥᓯᐌ ᑫᒀᓇ ᑭᓚᐗᐤ ᐅᒋ ᐃᑭᓋ, ᐊᓂᒪ ᐁ ᒥᒉᑎᒃ ᔕᐌᓕᒋᑫᐎᓐ, ᐅ ᓇᓈᔅᑯᒧᐎᓂᐗᐤ ᐁ ᒥᒉᑎᒋᒃ ᐅᒋ, ᑭᒋ ᐃᔅᐸᓕᓕᒃ ᑭᒋ ᐅᒋ ᑭᔅᑌᓕᑖᑯᐋᑲᓂᐎᑦ ᑭᒋᒪᓂᑐ᙮ ᑫ ᐃᔑ ᐱᒫᑎᓯᑦ ᐊᐌᓇ ᑖᐺᔦᓕᑕᒧᐎᓂᒃ 16 ᐁᐗᑯ ᐅᒋ ᓇᒪᐎᓚ ᓂ ᔖᑯᑌᐋᓈᓐ; ᒫᑲ ᐋᑕ ᐗᔅᑭᒡ ᓂᑦ ᐃᓕᓕᐎᓂᓈᓐ ᐁ ᓂᔑᐗᓈᑕᒃ, ᐁᓕᐌᒃ ᒫᑲ ᐱᒋ ᓂᑦ ᐃᓕᓕᐎᓂᓈᓐ ᐅᔥᑭᐸᓕᑖᓂᐗᓐ ᑕᑡᐤ ᐁ ᑭᔑᑳᒃ᙮ 17 ᐌᓴ ᑳ ᓛᑯᔑᒃ ᑭ ᑲᒀᑕᑭᓯᐎᓂᓇᐤ, ᐱᑕᒫ ᐱᑯ ᑳ ᐃᑭᒃ, ᓂ ᑲᔥᑭᑕᒫᑯᓈᓐ ᓈᔅᐱᒡ ᐊᐙᓯᑌ ᑴᓯᑾᒃ ᓀᔥᑕ ᑳᑭᑫ ᑭᔅᑌᓕᑖᑯᓯᐎᓐ; 18 ᒣᒀᒡ ᐁᑳ ᐁ ᑲᓇᐙᐸᑕᒪᒃ ᐊᓂᐃ ᑳ ᓄᑾᑭ, ᒫᑲ ᐊᓂᐃ ᐁᑳ ᑳ ᓀᑾᑭ: ᐌᓴ ᐊᓂᐃ ᑳ ᓄᑾᑭ ᐊᒋᓚᐤ ᐃᑕᑾᓋ; ᒫᑲ ᐊᓂᐃ ᐁᑳ ᑳ ᓄᑾᑭ ᑳᑭᑫ ᐃᑕᑾᓋ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society