ᓂᔓ ᑯᕆᓐᑎᐊᓇ 2 - ᐅᔅᑭ ᑎᔅᑌᒥᓐᑦ1 ᒫᑲ ᐎᓚ ᓂ ᑮ ᐃᔑ ᐅᓀᓕᑕᒫᓱᓐ, ᐁᑳ ᒥᓇ ᑭᒋ ᐯᒋ ᓈᑎᑖᑾᒃ ᑯᓯᑴᓕᑕᒧᐎᓂᒃ᙮ 2 ᐌᓴ ᑮᔥᐱᓐ ᒥᒋᓚᐌᓯᐃᑕᑾᒃ, ᐊᐌᓇ ᐊᓇ ᑳ ᓯᑭᓓᐃᑦ, ᐊᓇ ᐱᑯ ᑳ ᒥᒋᓚᐌᓯᐊᒃ? 3 ᐁᐗᑯ ᓀᔥᑕ ᑳ ᑮ ᐃᑕᓯᓇᐊᒫᑕᑾᒃ, ᒫᔅᑯᒡ ᒥᔅᑲᐤ ᐃᔅᐱ ᐯᒋ ᑕᑯᔑᓂᔮᓐ ᓂ ᑳ ᒥᒋᓚᐌᓯᑖᔾ ᐊᓂᑭ ᑫ ᐅᒋ ᒧᒋᑫᓕᑕᒫᐸᓐ; ᐁ ᑫᒋᓀᓕᒥᑕᑾᒃ ᒥᓯᐌ ᐁ ᐃᑕᔑᔦᒃ, ᓂ ᒧᒋᑫᓕᑕᒧᐎᓐ ᑭᒋ ᐅ ᒧᒋᑫᓕᑕᒧᐎᓂᔦᒃ ᒥᓯᐌ ᐁ ᐃᑕᔑᔦᒃ᙮ 4 ᐌᓴ ᑭᒋ ᑲᒀᑕᑫᓕᒧᐎᓂᒃ ᓀᔥᑕ ᓇᓀᑳᑌᓕᒧᐎᑌᐁᐎᓂᒃ, ᑭ ᑮ ᒪᓯᓇᐊᒫᑎᓇᐗᐤ ᒥᔅᑕᐃ ᐁ ᒫᑐᔮᓐ; ᐁᑳᐎᓚ ᑭᒋ ᒪᒥᔕᒣᓕᑕᒣᒃ, ᒫᑲ ᑭᒋ ᑭᔅᑫᓕᑕᒣᒃ ᐁᔅᐱᒋ ᓈᔅᐱᒡ ᓵᑭᐃᑕᑾᒃ᙮ ᒋ ᐌᐯᓕᑕᒪᐗᑲᓂᐎᑦ ᑳ ᒪᒋᑐᑕᒃ 5 ᒫᑲ ᑮᔥᐱᓐ ᐊᐌᓇ ᑳ ᒥᔕᒣᓕᑕᒥᐃᐌᑴ, ᓇᒪᐎᓚ ᓂᓚ ᓂ ᑮ ᒥᔕᒣᓕᑕᒥᐃᒃ, ᐋᐱᔑᔥ ᐱᑯ: ᐁᑳ ᑭᒋ ᐋᑕᒣᓕᒥᑕᑾᒃ ᒥᓯᐌ ᐁ ᐃᑕᔑᔦᒃ᙮ 6 ᐁᒀᓂ ᐋᑖᒣᓕᑕᒧᐎᓐ ᑭᒋ ᐋᔮᑦ ᐊᓇ ᐃᓕᓕᐤ, ᑳ ᑮ ᑐᑖᑯᑦ ᑳ ᒥᒉᑎᓕᒋ᙮ 7 ᐁᑯ ᑴᔅᑭᐃᔑ ᒫᑲ, ᓇᐗᒡ ᑭ ᑳ ᐌᐯᓕᑕᒪᐙᑕᐗᐤ, ᓀᔥᑕ ᑲᑮᒋᐋᑕᐗᐤ, ᒫᔅᑯᒡ ᒥᔅᑲᐤ ᐁᐗᑯ ᑐᐎᑳᓐ ᑲᑕ ᒥᓯᐌᐸᓕᐃᑯᐸᓐ ᐅᓵᒻ ᒥᔅᑕᐃ ᒥᒋᓚᐌᓯᐎᓂᓕᐤ᙮ 8 ᐁᐗᑯ ᐅᒋ ᑭ ᐸᑯᓭᓕᒥᑎᓇᐗᐤ ᑭᒋ ᐋᔨᒋᑕᒪᐌᒃ ᑭ ᓵᑭᐃᐌᐎᓂᐗᐤ᙮ 9 ᐌᓴ ᐅᒪ ᐅᒋ ᓀᔥᑕ ᑭ ᑮ ᒪᓯᓇᐊᒫᑎᓇᐗᐤ, ᑭᒋ ᑭᔅᑫᓕᒥᑕᑾᒃ ᑮᔅᐱᓐ ᓀᓇᐃᑕᒧᐌᑴ ᒥᓯᐌ ᐃᔑ᙮ 10 ᐊᓇ ᐙᔦᔥ ᑳ ᐌᐯᓕᑕᒧᐌᒃ, ᓂᓚ ᓀᔥᑕ ᓂ ᐌᐯᓕᑕᒧᐗᐤ: ᐌᓴ ᑮᔥᐱᓐ ᐙᔦᔥ ᐎᐁᐯᓕᑕᒫᑫᔮᓂ, ᐊᓇ ᑳ ᐌᐯᓕᑕᒧᐗᒃ, ᑭᓚᐗᐤ ᐅᒋ ᓂ ᑮ ᐌᐯᓕᑌᓐ, ᐅᑎᔥᑲᐤ ᙭ᑕ; 11 ᓭᑕᓐ ᐁᑳ ᑭᒋ ᐙᔦᔑᐃᑕᒃ: ᐌᓴ ᑭ ᑭᔅᑫᓕᑕᒸᓈᓇᐤ ᐅ ᑲᑳᔦᓕᓯᐎᓇ᙮ ᐹᓪ ᐗᐙᓀᓕᑕᒻ ᒣᑾᒡ ᐁ ᐃᑖᑦ ᐃᑦᕉᐊᔅ 12 ᓀᔥᑕ ᒫᑲ, ᐃᔅᐱ ᐱᐁᒋ ᐅᑎᑕᒫᓐ ᑦᕈᐊᔅ, ᑭᒋ ᐙᐎᑕᒶᒃ ᙭ ᐅ ᒥᓗᐋᒋᒧᐎᓐ, ᓀᔥᑕ ᐁ ᑮ ᐹᔅᑭᑌᓇᒪᐎᑦ ᐅᑎᐯᓕᒋᑫᐤ ᐃᔥᒀᑌᒥᓕᐤ, 13 ᓇᒪᐎᓚ ᓂ ᑮ ᐋᔮᓐ ᐋᓜᓯᐎᓐ ᓂᑦ ᐊᒑᑯᒃ, ᐁᑳ ᐁ ᑮ ᒥᔅᑲᐗᒃ ᓂᒋᔖᓐ ᑕᐃᑕᔅ: ᒫᑲ, ᐁ ᐊᑎ ᓇᑲᑕᑭᒃ, ᐊᓐᑕ ᐁ ᐅᑐᑌᔮᓐ ᓂ ᑮ ᐃᑐᑖᓐ ᒫᓯᑐᓂᔭᐃᒃ᙮ ᙭ ᑭ ᒥᓕᑯᓇᐤ ᐸᔅᑭᓛᑫᐎᓂᓕᐤ 14 ᐁᑯᔑ ᒫᑲ ᑲᑕ ᐎ ᓇᓈᔅᑯᒪᐤ ᑭᒋᒪᓂᑐ, ᒧᔕᒃ ᑳ ᑐᑖᐎᔭᒥᑦ ᑭᒋ ᔖᑯᒋᐃᐌᔮᒃ ᙭ᑎᒃ, ᓀᔥᑕ ᑳ ᑭᔅᑫᓕᑖᑯᑖᒃ ᐁ ᐃᔑ ᒥᓨᔑᓂᓕᒃ ᐅ ᑭᔅᑫᓕᒥᑯᓯᐎᓐ ᓂᓚᓈᓐ ᐅᒋ ᒥᓯᐌ ᐃᑌ᙮ 15 ᐌᓴ ᓂᑦ ᐃᑌᓕᒥᑯᓈᓐ ᑭᒋᒪᓂᑐ ᑖᐱᔅᑯᒡ ᐁ ᐎᑭᒫᑯᓯᑦ ᙭, ᐊᓂᑭ ᐅᒋ ᑳ ᐱᒫᒋᐋᑲᓂᐎᒋᒃ, ᐊᓂᑭ ᓀᔥᑕ ᐅᒋ ᑳ ᓂᔑᐗᓈᑎᓯᒋᒃ: 16 ᐯᔭᒃ ᑐᐎᑳᓇᒃ ᓂᐱᐎᓂᒃ ᐃᔑ ᒥᓛᒣᐗᒃ ᑭᒋ ᓂᐱᒋᒃ; ᑯᑕᒃ ᑐᐎᑳᓇᒃ ᒫᑲ ᐱᒫᑎᓯᐎᓂᒃ ᐃᔑ ᒥᓛᒣᐗᒃ ᑭᒋ ᐱᒫᑎᓯᒋᒃ: ᐊᐌᓇ ᒫᑲ ᑫ ᑮ ᑌᐱᐸᓕᔅᑕᒃ ᐅᐅ? 17 ᐌᓴ ᓂᓚᓈᓐ ᓇᒪᐎᓚ ᑖᐱᔅᑯᒡ ᒥᒉᑦ ᑳ ᒪᒋ ᐋᐸᒋᑕᐙᒋᒃ ᑭᒋᒪᓂᑐᐗ ᐅᑦ ᐗᔭᒥᐎᓂᓕᐤ: ᒫᑲ ᒀᔭᔉ ᐃᑌᓕᑕᒧᐎᓂᒃ, ᒫᑲ ᑖᐱᔅᑯᒡ ᑭᒋᒪᓂᑐ ᐅᒋ, ᐁ ᑲᓇᐙᐸᒥᔭᒥᑦ ᑭᒋᒪᓂᑐ, ᓂᑦ ᐋᔭᒥᓈᓐ ᙭ᑎᒃ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society