ᓂᔓ ᑯᕆᓐᑎᐊᓇ 12 - ᐅᔅᑭ ᑎᔅᑌᒥᓐᑦᐹᓪ ᐅᑎᔑᓇᒧᐎᓇ ᓀᔥᑕ ᑭᔅᑫᓕᑖᑯᑖᑫᐎᓇ 1 ᓇᒪᐎᓚ ᑭᔅᑎᓈᒡ ᒥᓗᐸᓕᐤ ᑭᒋ ᒫᒪᑖᑯᒧᔮᓐ᙮ ᓂ ᑳ ᒫᒋ ᐋᓕᒧᑕᒸᓐ ᐅ ᐙᐸᑎᓕᐌᐎᓇ ᓀᔥᑕ ᐅ ᑭᔅᑫᓕᑖᑯᑖᑫᐎᓇ ᐅᑎᐯᓕᒋᑫᐤ᙮ 2 ᓂ ᑮ ᑭᔅᑫᓕᒪᐤ ᐃᓕᓕᐤ ᙭ᑎᒃ ᓀᐅᔖᑉ ᑕᑐ ᐱᐴᓋ ᐊᔅᐱᓐ, ᑮᔥᐱᓐ ᒥᔭᐎᒃ, ᓇᒪᐎᓚ ᓂ ᑭᔅᑫᓕᑌᓐ; ᓀᔥᑕᐱᑯ ᐁᑳ ᒥᔭᐎᒃ, ᓇᒪᐎᓚ ᓂ ᑭᔅᑫᓕᑌᓐ: ᑭᒋᒪᓂᑐ ᑭᔅᑫᓕᑕᒻ; ᐁᐗᑯ ᐊᐗ ᑮ ᐅᐱᓇᐤ ᐃᑕ ᐁ ᓂᔅᑐ ᐊᑎ ᑭᔑᑯᐗᒃ᙮ 3 ᓂ ᑮ ᑭᔅᑫᓕᒪᐤ ᒫᑲ ᐁᐗᑯ ᐃᓕᓕᐤ, ᑮᔥᐱᓐ ᒥᔮᐎᒃ, ᓀᔥᑕᐱᑯ ᐁᑳ ᒥᔭᐎᒃ, ᓇᒪᐎᓚ ᓂ ᑭᔅᑫᓕᑌᓐ: ᑭᒋᒪᓂᑐ ᑭᔅᑫᓕᑕᒻ, 4 ᐊᐗ ᐁ ᑮ ᐅᐱᓈᑲᓂᐎᑦ ᐹᕋᑖᐃᓯᒃ, ᓀᔥᑕ ᐁ ᑮ ᐯᑕᒃ ᐋᔭᒥᐎᓇ ᐁᑳ ᑫ ᑮ ᐃᑣᓂᐗᑭ, ᐊᓂᐃ ᐁᑳ ᑫ ᑮ ᑲᔥᑭᑖᑦ ᐃᓕᓕᐤ ᑭᒋ ᐋᔭᒥᑦ᙮ 5 ᐊᐗ ᒫᑲ ᓂ ᑳ ᐅᒋ ᒫᒪᑖᑯᒧᓐ: ᓂᓚ ᑫᒋᐙᒃ ᒫᑲ ᓇᒪᐎᓚ ᓂ ᑳ ᐅᒋ ᒫᒪᑖᑯᒧᓐ, ᐱᑯ ᓂ ᓕᓚᒥᓯᐎᓂᒃ᙮ 6 ᐌᓴ ᐋᑕ ᐁ ᐎ ᓇᑕᐌᓕᑕᒫᐸᓐ ᑭᒋ ᒫᒪᑖᑯᒧᔮᓐ, ᓇᒪᐎᓚ ᓂ ᑳ ᑮᔥᒀᓐ: ᐌᓴ ᓂ ᑳ ᑖᑆᓐ: ᒫᑲ ᐊᓄᒡ ᓂ ᐳᓃᓐ, ᐁᑳᐎᓚ ᐊᐌᓇ ᐃᓕᓕᐤ ᐊᐙᓯᑌ ᑭᒋ ᐃᑌᓕᒥᑦ ᐃᔥᐱᔥ ᐊᓂᒪ ᐁ ᐃᔑ ᐙᐸᒥᑦ, ᓀᔥᑕᐱᑯ ᐃᔥᐱᔥ ᑳ ᐯᑕᒃ ᐁ ᐃᑖᒋᒥᑲᐎᔮᓐ᙮ 7 ᓀᔥᑕ ᒫᑲ ᐁᑳ ᐋᓕᐙᒃ ᑭᒋ ᐃᔑ ᐃᔥᐯᓕᒥᑎᓯᔮᓐ, ᐁ ᒥᒉᑎᑭ ᑭᔅᑫᓕᑖᑯᑖᑫᐎᓇ ᐅᒋ, ᓂ ᑮ ᒥᓕᑲᐎᓐ ᒥᔑᑲᐎᒥᓇᑯᔑ ᓂ ᐎᔮᓯᒃ, ᐅᑦ ᐃᔑᑎᔕᐙᑲᓇ ᓭᑖᓐ ᑭᒋ ᐸᐸᑲᒥᐅᓕᒋ, ᐁᑳ ᐋᓕᐙᒃ ᑭᒋ ᐃᔥᐯᓕᒥᑎᓱᔮᓐ᙮ 8 ᐁᐗᑯ ᐅᒪ ᐅᒋ ᓂᔅᑡᐤ ᓂ ᑮ ᓇᑐᑕᒪᐗᐤ, ᑭᒋ ᓇᑲᑎᑯᔮᓐ᙮ 9 ᓂ ᑮ ᐃᑎᒃ ᒫᑲ, ᓂ ᔕᐌᓕᒋᑫᐎᓐ ᑭ ᑳ ᑌᐱᐸᓕᐃᑯᓐ; ᐌᓴ ᓂ ᒪᔥᑲᐎᓯᐎᓐ ᑭᔑᑖᓂᐗᓐ ᓕᓚᒥᓯᐎᓂᒃ᙮ ᐁᐗᑯ ᐅᒋ ᒫᑲ ᓇᐗᒡ ᓂ ᑳᒫᒪᑖᑯᒧᓐ ᓂ ᓕᓚᒥᓯᐎᓂᒃ, ᐅ ᑲᔥᑭᐅᐎᓐ ᙭ ᑭᒋ ᑗᐅᑐᑕᑯᐗᒃ᙮ 10 ᐁᐗᑯ ᐌᒋ ᒥᓜᓕᑕᒫᓐ ᓕᓚᒥᓯᐎᓂᒃ, ᑭᑐᑎᑯᓯᐎᓂᒃ, ᐙᐙᓀᓕᑕᒧᐎᓂᒃ, ᑲᒀᑕᑭᐃᑯᓯᐎᓂᒃ, ᐊᓕᒥᐃᑯᓯᐎᓂᒃ ᙭ ᐅᒋ: ᐌᓴ ᐃᔅᐱ ᓕᓚᒥᓯᔮᓐ, ᐁᑯ ᒣᔥᑲᐎᓯᔮᓐ᙮ ᑳ ᐃᔑ ᓵᑭᐋᑦ ᐹᓪ ᐅᑖᐺᔦᓕᑕᒧᐗ ᑯᕆᓐᑎᒃ 11 ᓂ ᑮ ᐊᑎ ᑭᔥᑴᑳᓂᐎᓐ ᐁ ᒫᒪᑖᑯᒧᔮᓐ; ᑭᓚᐗᐤ ᑳ ᑮ ᑲᔥᑭᐃᔦᒃ: ᐌᓴ ᔮᓕᑌᓐ ᑭ ᑳ ᑮ ᒥᓗᐋᓕᒧᒥᑕᐗᐤ; ᐌᓴ ᓇᒪᐎᓚ ᑫᒀᓐ ᓂ ᐅᒋ ᓄᑌᐸᓕᓐ ᐊᓂᑭ ᒪᐗᒡ ᑳ ᓂᑳᓀᓕᑖᑯᓯᒋᒃ ᐊᐸᔅᑕᓚᒃ᙮ 12 ᑖᐺ ᐅ ᑭᔅᑭᓄᐙᒋᒋᑲᓇ ᐊᐸᔅᑕᓪ ᑮ ᑐᒋᑳᑌᐗ ᐃᑕ ᐁ ᐃᑖᔦᒃ ᒥᓯᐌ ᐃᔑ ᔑᐱᓚᐌᓯᐎᓂᒃ, ᑭᔅᑭᓄᐙᒋᒋᑲᓂᒃ, ᒫᒪᑕᐎ ᐃᔑᒋᑫᐎᓂᒃ, ᓀᔥᑕ ᒫᒪᔅᑳᒋ ᑐᑕᒧᐎᓂᒃ᙮ 13 ᐌᓴ ᑫᑾᓄᒃ ᑳ ᓄᑌᐸᓕᔦᒃ ᑭᓚᐗᐤ ᐃᔥᐱᔥ ᑯᑕᑭᔭᒃ ᒫᒪᐎᐋᔭᒥᐋᐗᒃ, ᐱᑯ ᓂᓚ ᐁᑳ ᐁ ᑮ ᐅᒋ ᑄᐗᑌᐃᑕᑾᒃ? ᐳᓀᓕᑕᒪᐎᒃ ᐅᒪ ᐗᓂᐃᑎᐎᓐ᙮ 14 ᒫᑎᑲ, ᐁᑯ ᐅᒪ ᓂᔅᑡᐤ ᓂ ᓂᓵᐎᓐ ᑭᒋ ᐯᒋ ᓈᑎᑖᑾᒃ; ᓇᒪᐎᓚ ᓀᔥᑕ ᑭ ᑳ ᑄᐗᑌᐃᑎᓇᐗᐤ; ᐌᓴ ᓇᒪᐎᓚ ᓂ ᓈᓇᑕᐌᓕᑌᓐ ᑭᑦ ᐋᔮᓇᐗᐤ, ᒫᑲ ᑭᓚᐗᐤ ᑫᒋᐙᒃ: ᐌᓴ ᓇᒪᐎᓚ ᓇᑕᐌᓕᑖᑯᓯᐗᒃ ᐊᐙᔑᔕᒃ ᑭᒋ ᐊᔅᑣᐳᓂᑲᐙᒋᒃ ᐅᓂᑭᐃᑯᐗᐗ, ᒫᑲ ᐅᓂᑭᐃᑯᒪᐗᒃ ᐊᐙᔑᔕ᙮ 15 ᓀᔥᑕ ᒫᑲ ᓈᔅᐱᒡ ᓂ ᑳ ᒥᓜᓕᑌᓐ ᑭᒋ ᒑᑭᓇᒫᓐ ᓀᔥᑕ ᑭᒋ ᒑᑭᐸᓕᔮᓐ ᑭᓚᐗᐤ ᐅᒋ; ᐋᑕ ᐊᐙᓯᑌ ᐁ ᐃᔑ ᓵᑭᐃᑕᑾᒃ, ᐋᐱᔑᔥ ᐱᑯ ᐁ ᓵᑭᐃᑳᐎᔮᓐ᙮ 16 ᒫᑲ ᐁᑯᔑ ᑲᑕ ᐃᑭᓐ, ᓇᒪᐎᓚ ᑭ ᑮ ᑄᐗᑌᐃᑎᓇᐗᐤ; ᐁᓕᐌᒃ ᒫᑲ ᐁ ᑲᑳᔦᓕᓯᔮᓐ, ᑲᑳᔦᓕᓯᐎᓂᒃ ᑭ ᑮ ᒥᒋᒥᓂᑎᓇᐗᐤ᙮ 17 ᓂ ᑮ ᐅᑎᓰᓐ ᓈ ᑭᓚᐗᐤ ᐅᒋ ᐊᓂᑭ ᐅᒋ ᑳ ᑮ ᐃᔑᑎᔕᐊᒫᑕᑾᒃ? 18 ᓂ ᑮ ᓇᑕᐌᓕᒪᐤ ᑕᐃᑕᔅ, ᓀᔥᑕ ᐎᓚ ᐊᓯᒋ ᓂ ᑮ ᐃᔑᑎᔕᐗᐤ ᐯᔭᒃ ᐎᒋᔖᓂᒪᐤ: ᑕᐃᑕᔅ ᓈ ᑮ ᐅᑎᓯᐤ ᑭᓚᐗᐤ ᐅᒋ? ᓇᒪ ᓈ ᐯᔭᑾᓐ ᐊᒑᑯᐎᓐ ᑳ ᑮ ᐱᒧᑖᑕᒫᒃ? ᓇᒪ ᓈ ᐯᔭᑾᓐ ᑳ ᑮ ᐃᑕᑯᔅᑫᔮᒃ? 19 ᒥᓇ, ᑭᑦ ᐃᑌᓕᑌᓇᐗᐤ ᓈ ᐁ ᐎ ᒫᒥᓄᒥᑎᓯᔅᑖᑕᑾᒃ? ᐅᑎᔥᑲᐤ ᑭᒋᒪᓂᑐ ᙭ᑎᒃ ᓂᑦ ᐋᔭᒥᓈᓐ: ᒫᑲ ᒥᓯᐌ ᑫᒀᓇ ᓂ ᑐᑌᓈᓐ, ᑫᒋ ᓵᑭᐃᑕᑾᒃ, ᑭᓚᐗᐤ ᑭᒋ ᑭᔅᑭᓄᐊᒫᑲᐎᔦᒃ᙮ 20 ᐌᓴ ᓂ ᑯᔅᑖᒋᓐ, ᒫᔅᑯᒡ, ᐃᔅᐱ ᑕᑯᔑᓂᔮᓀ, ᓇᒪᐎᓚ ᑭ ᑳ ᒥᔅᑳᑎᓇᐗᐤ ᑫ ᐃᔑ ᓇᑕᐌᓕᑕᒫᓐ, ᓀᔥᑕ ᓇᒪᐎᓚ ᑭ ᑳ ᒥᔅᑲᐎᓇᐗᐤ ᒬᒋ ᐁ ᐃᔑ ᓇᑕᐌᓕᑕᒣᒃ: ᒫᔅᑯᒡ ᑲᑕ ᐃᑕᑾᓋ ᐊᔑᑌᒥᑐᐎᓇ, ᐅᑌᓕᒥᑐᐎᓇ, ᐋᑯᓚᐌᓰᐎᓇ, ᒀᓗᑐᑖᑐᐎᓇ, ᐸᑾᓄᒥᑐᐎᓇ, ᑭᒧᒋᐃᑗᐎᓇ, ᑭᔅᑌᓕᒥᑎᓱᐎᓇ, ᐊᓕᒥᒥᑐᐎᓇ: 21 ᒫᔅᑯᒡ ᓀᔥᑕ, ᐃᔅᐱ ᒥᓇ ᑕᑯᔑᓂᔮᓀ, ᓂ ᑭᒋᒪᓂᑐᒻ ᓂ ᑳ ᑕᐸᒥᓕᒥᐃᒃ ᐃᑕ ᐁ ᐃᑖᔦᒃ, ᓀᔥᑕ ᓂ ᑳ ᒫᑐᑐᑕᐙᐗᒃ ᒥᒉᑦ ᐋᔕᔾ ᑳ ᑮ ᒪᒋᑐᑕᑭᒃ, ᐁᑳ ᓀᔥᑕ ᑳ ᑮ ᒥᑖᑕᑭᒃ ᐎᓂᓯᐎᓂᓕᐤ, ᓀᔥᑕ ᐱᔑᒀᑎᓯᐎᓂᓕᐤ, ᓀᔥᑕ ᐱᔑᒀᑎᓯᐎ ᐃᑌᓕᑕᒧᐎᓂᓕᐤ ᑳ ᑮ ᐋᔨᑐᑕᑭᒃ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society