ᓂᔓ ᑯᕆᓐᑎᐊᓇ 11 - ᐅᔅᑭ ᑎᔅᑌᒥᓐᑦᐹᓪ ᓀᔥᑕ ᐊᓂᑭ ᓇᔅᐹᒋ ᐊᑄᔅᓚᓚᒃ 1 ᓇᑕᒫ ᑮ ᔑᐱᓚᐌᓯᔅᑕᐎᔦᒃ ᒫᓐᔑᔥ ᓂ ᑲᑫᐹᑎᓯᐎᓂᒃ: ᑖᐺ ᐃᓴ ᔑᐱᓚᐌᓰᔅᑕᐎᒃ᙮ 2 ᐌᓴ ᑭ ᑲᑴᓕᑕᒫᑎᓇᐗᐤ ᒪᓂᑐᐎ ᑲᑴᓕᑕᒧᐎᓂᒃ; ᐌᓴ ᑭ ᑮ ᐸᑭᑎᓂᑎᓇᐗᐤ ᑭᒋ ᐎᑭᒣᒃ ᐯᔭᒃ ᑳ ᐅᑦ ᐃᔅᑴᐎᑦ, ᑭᒋ ᐸᑭᑎᓂᑕᑾᒃ ᑖᐱᔅᑯᒡ ᐯᓓᑭᓯᑦ ᐅᔥᑭᓂᑭᔅᑴᐤ ᙭ ᐅᒋᒋᒃ᙮ 3 ᒫᑳ ᓂ ᑯᔅᑖᒋᓐ, ᓈᓐᑕᐤ ᐃᔑ, ᑖᐱᔅᑯᒡ ᒥᔑᑭᓀᐱᒃ ᑳ ᑮ ᐃᔑ ᐙᔦᔑᐋᑦ ᐃᐸ ᐅ ᑲᑳᔦᓕᓯᐎᓂᒃ ᐅᒋ, ᐁᑯ ᑖᐱᔅᑯᒡ ᑭ ᒥᑐᓀᓕᒋᑲᓂᐗᐗ ᑭᒋ ᐙᔦᔑᑖᓂᐗᑭ ᐸᓓᑭᑌᓕᑕᒧᐎᓂᐤ ᐅᒋ ᙭ᑎᒃ ᑳ ᐃᑕᑾᓂᓕᒃ᙮ 4 ᐌᓴ ᑮᔥᐱᓐ ᐊᓇ ᑳ ᐯᒋ ᐃᑐᑌᑦ ᑲᑫᔅᑭᒥᐌᑌ ᑯᑕᑭᔭ ᒋᓴᓴ, ᐁᑳ ᑳ ᑮ ᑲᑫᔅᑭᒥᐌᔮᒃ ᓂᓚᓈᓐ, ᓀᔥᑕᐱᑯ ᑮᔥᐱᓐ ᐅᑎᓀᑴ ᑯᑕᒃ ᐊᒑᒃ ᐁᑳ ᑳ ᑮ ᐅᑎᓀᒃ, ᓀᔥᑕᐱᑯ ᑯᑕᒃ ᒥᓗᐋᒋᒧᐎᓐ, ᐁᑳ ᑳ ᑮ ᐅᑎᓇᒣᒃ, ᑖᐺ ᑭ ᑳ ᔑᐱᓚᐌᓯᔅᑕᐙᑕᐗᐤ᙮ 5 ᐌᓴ ᓂᑦ ᐃᑌᓕᑌᓐ ᐁᑳ ᒥᑐᓂ ᐁ ᓄᑌᐸᓕᔮᓐ ᐃᔥᐱᔥ ᒫᐗᒡ ᑳ ᓂᑳᓀᓕᑖᑯᓯᒋᒃ ᐊᐸᔅᑕᓚᒃ᙮ 6 ᒫᑲ ᐋᑕ ᐁ ᒫᓂᑖᑾᒃ ᓂᑦ ᐋᔭᒥᐎᓐ, ᐁᓕᐌᒃ ᓇᒪᐎᓚ ᓂᑦ ᐃᔑᓈᑯᓯᓐ ᑭᔅᑫᓕᑕᒧᐎᓂᒃ: ᒫᑲ ᒥᑐᓂ ᓂ ᑭᔅᑫᓕᑖᑯᓯᓈᓐ ᐃᑕ ᐁ ᐃᑖᔦᒃ ᒥᓯᐌ ᐃᔑ᙮ 7 ᓂ ᑮ ᓈᔦᑕᐎᑐᑌᓐ ᓈ ᐁ ᑮ ᑕᐸᑌᓕᑖᑯᐃᑎᓯᔮᓐ ᑭᓚᐗᐤ ᑭᒋ ᐃᔅᐯᓕᑖᑯᓯᔦᒃ, ᒧᔐ ᐁ ᑮ ᑲᑫᔅᑭᒥᑕᑾᒃ ᑭᒋᒪᓂᑐ ᐅ ᒥᓗᐋᒋᒧᐎᓐ? 8 ᓂ ᑮ ᒪᔅᑲᒪᐗᒃ ᑯᑕᑭᔭᒃ ᒫᒪᐎᐋᔭᒥᐊᐗᒃ ᐁ ᐅᑎᓇᒫᓐ ᑳ ᑮ ᑎᐸᐊᒪᐎᒋᒃ, ᐁ ᐎ ᐋᔭᒥᐋᐎ ᐊᑑᔅᑳᑕᑾᒃ᙮ 9 ᐃᔅᐱ ᒫᑲ ᑳ ᐎᒉᐎᑕᑾᒃ, ᐁ ᑮ ᑶᑕᒫᔮᓐ ᒫᑲ, ᓇᒪᐎᓚ ᐊᐌᓇ ᐃᓕᓕᐤ ᓂ ᑮ ᐅᑎᓇᒫᒃ: ᐌᓴ ᐊᓂᒪ ᑳ ᐃᔑ ᓄᑌᐸᓕᔮᓐ ᐊᓂᑭ ᐎᒋᔖᓂᒪᐗᒃ ᒪᓯᑐᓂᔭᐃᒃ ᑳ ᑮ ᐯᒋ ᐅᑐᑌᒋᒃ ᓂ ᑮ ᐅᑎᓇᒫᑾᒃ: ᓀᔥᑕ ᒥᓯᐌ ᐃᔑ ᓂ ᑮ ᑲᓇᐌᓕᒥᑎᓱᓐ ᐁᑳ ᑭᒋ ᑄᐗᑌᐃᑕᑾᒃ, ᐁᑯ ᓀᔥᑕ ᑫᔮᐸᒡ ᑫ ᐃᔑ ᑲᓇᐌᓕᒥᑎᓯᔮᓐ᙮ 10 ᑖᐱᔅᑯᒡ ᐁ ᐃᔑ ᐱᒋᔅᑳᑯᐗᒃ ᙭ ᐅ ᑖᐺᐎᓐ, ᓇᒪᐎᓚ ᐊᐌᓇ ᐃᓕᓕᐤ ᓂ ᑳ ᑭᐱᒋᐃᒃ ᐅᒪ ᐁ ᐃᔑ ᒫᒪᑖᑯᒧᔮᓐ ᐊᑳᔭ ᐊᔅᑮᒃ᙮ 11 ᑖᓀᑭ ᐌᒋ? ᐁᑳ ᐁ ᓵᑭᐃᑕᑾᒃ ᓈ? ᑭᒋᒪᓂᑐ ᑭᔅᑫᓕᑕᒻ᙮ 12 ᒫᑲ ᐊᓂᒪ ᑳ ᑐᑕᒫᓐ, ᐁᐗᑯ ᑫ ᑐᑕᒫᓐ, ᑭᒋ ᑭᐱᒋᐊᑭᒃ ᐊᓂᑭ ᑳ ᐎ ᒪᓓᓕᒥᒋᐤ; ᐊᓂᒪ ᒫᑲ ᑳ ᐅᒋ ᒫᒪᑖᑯᒧᒋᒃ, ᑭᒋ ᐃᔑ ᒥᔅᑳᒋᒃ ᒬᒋ ᑖᐱᔅᑯᒡ ᓂᓚᓈᓐ᙮ 13 ᐌᓴ ᐁᐗᑯ ᑐᐎ ᑭᓛᔅᑭᐎ ᐊᐸᔅᑕᓚᒃ, ᐙᔦᔑᐃᐌᐎ ᐅᑕᑐᔅᑫᐗᒃ, ᐁ ᑴᔅᑭᓈᑯᐃᑎᓱᒋᒃ ᑳ ᐃᔑᓈᑯᓯᓕᒋ ᐅᑦ ᐊᐸᔅᑕᓕᒪ ᙭᙮ 14 ᓇᒪᐎᓚ ᒫᑲ ᒫᒪᔅᑳᒡ: ᐌᓴ ᓭᑖᓐ ᑫᒋᐙᒃ ᑴᔅᑭᓈᑯᐃᑎᓱ ᑖᐱᔅᑯᒡ ᐙᔅᑌᐎᓂ ᐁᓐᒐᓪ᙮ 15 ᐁᐗᑯ ᐅᒋ ᓇᒪᐎᓚ ᑭᒋ ᑫᒀᓐ ᑮᔥᐱᓐ ᐅᑦ ᐊᑑᔅᑫᓛᑲᓂᒪ ᑶᐁᔅᑭᓈᑯᐃᒥᒋ ᑖᐱᔅᑯᒡ ᒀᔭᔅᑭᑖᑎᓯᐎᓂ ᐊᑑᔅᑫᓛᑲᓇᒃ; ᑫ ᐳᓂᐸᓕᒋᒃ ᐁ ᐃᔑᓈᑾᓂᓕᑭ ᐅᑦ ᐊᑑᔅᑫᐎᓂᐗᐗ᙮ ᐹᓪ ᐅᑲᑾᑕᑫᓕᒧᐎᓇ ᐋᓕᒧᒋᑳᑌᓕᐗ 16 ᓂᑦ ᐃᑣᓐ ᒥᓇ, ᐁᑳᐎᓚ ᐊᐌᓇ ᐃᓕᓕᐤ ᑭᔥᑴᑳᓐ ᓂ ᑳ ᐃᑌᓕᒥᒃ; ᑮᔥᐱᓐ ᐱᑐᔥ ᐁᓕᐌᒃ ᒫᑲ ᑖᐱᔅᑯᒡ ᑮᔥᑴᑳᓐ ᐃᓕᓇᐐᒃ, ᒫᓐᔒᔥ ᑭᒋ ᑮ ᒫᒪᑖᑯᒧᔮᓐ᙮ 17 ᐊᓂᒪ ᑳ ᐃᑗᔮᓐ, ᓇᒪᐎᓚ ᓂ ᓇᔅᐱᑕᐗᐤ ᐅᑎᐯᓕᒋᑫᐤ, ᒫᑲ ᐱᑯ ᒫᓇ ᑲᑫᐹᑎᓯᐎᓂᒃ ᐃᔑ, ᐁ ᑫᒋᓇᐅᔮᓐ ᐅᒪ ᐁ ᒫᒪᑖᑯᒧᔮᓐ᙮ 18 ᐁ ᓄᑾᒃ ᒥᒉᑦ ᐎᔮᓯᐎᓂᒃ ᐁ ᐃᔑ ᒫᒪᑖᑯᒧᒋᒃ, ᓂᓚ ᓀᔥᑕ ᓂ ᑳ ᒫᒪᑖᑯᒧᓐ᙮ 19 ᐌᓴ ᑮ ᓯᑭᓓᓯᐎ ᐃᓕᓇᐗᐗᒃ ᑭᔥᑴᑳᓇᒃ, ᑭᓚᐗᐤ ᐁ ᑲᑫᑕᐌᓕᑕᒣᒃ᙮ 20 ᐌᓴ ᑭᑦ ᐃᓕᓀᓇᐗᐤ ᑮᔥᐱᓐ ᐊᐌᓇ ᐯᔑᑖᒃ ᐊᐗᑳᔑᐌᐎᓂᒃ, ᑮᔥᐱᓐ ᐊᐌᓇ ᒣᔅᑎᓂᑖᒃ, ᑮᔥᐱᓐ ᐊᐌᓇ ᒪᔅᑲᒥᑖᒃ, ᑮᔥᐱᓐ ᐊᐌᓇ ᑭᔅᑌᓕᒥᑎᓱᑦ, ᑮᔥᐱᓐ ᐊᐌᓇ ᐸᓯᑴᐅᑖᒃ᙮ 21 ᓂᑦ ᐋᓕᒧᑌᓐ ᒫᓓᓕᑖᑯᓯᐎᓐ, ᑖᐱᔅᑯᒡ ᐁ ᑮ ᓕᓚᒥᓯᔮᑭᐸᓐ, ᐁᓕᐌᒃ ᒫᑲ ᐱᑯ ᐃᑕ ᐊᐌᓇ ᐁ ᓱᑫᓕᒧᑦ, ᓂ ᑮᔥᑴᒧᓐ, ᓂᓚ ᓀᔥᑕ ᓂ ᓱᑫᓕᒪᓐ᙮ 22 ᐦᐃᑉᕉᐎᐗᒃ ᓈ? ᐁᑯ ᓀᔥᑕ ᓂᓚ᙮ ᐃᔅᕃᐃᓚᐃᑕᒃ ᓈ? ᐁᑯ ᓀᔥᑕ ᓂᓚ᙮ ᐎᓚᐗᐤ ᓈ ᐁᑉᕃᐋᒻ ᐅᑦ ᐊᐙᔑᒥᔕ? ᐁᑯ ᓀᔥᑕ ᓂᓚ᙮ 23 ᐎᓚᐗᐤ ᓈ ᙭ ᐅᑦ ᐋᔭᒥᐋᐎ ᐊᑑᔅᑫᓛᑲᓇ? ᓂ ᑮᔥᑴᒧᓐ, ᓂᓚ ᐊᐙᓯᑌ; ᓂᑦ ᐊᑑᔅᑫᐎᓇ ᐊᐙᓯᑌ ᐁ ᒥᒉᑎᑭ, ᒥᒉᑡᐤ ᐁ ᐸᐸᓴᔅᑌᐅᑲᐎᔮᓐ, ᑭᐸᐅᑐᐎᑲᒥᑯᒃ ᐊᐙᓯᑌ ᒥᒉᑡᐤ, ᓂᐱᐎᓂᒃ ᒥᒉᑡᐤ᙮ 24 ᓂᔮᓕᓦᐤ ᒎᐗᒃ ᓂ ᑳ ᐸᓴᔅᑌᐅᑾᒃ ᓀᒥᑕᓇᐗᐤ ᐁ ᐅᑖᒪᐅᒋᒃ ᐯᔭᒃ ᐱᑯ ᐁ ᓄᑌᐸᓕᒃ᙮ 25 ᓂᔅᑡᐤ ᒥᔅᑎᑯᔑᔕ ᓂ ᑮ ᐅᒋ ᐅᑖᒪᐅᑲᐎᓐ, ᐯᔭᑾᐤ ᓂ ᑮ ᐱᒶᓯᓈᑕᐅᑲᐎᓐ, ᓂᔅᑡᐤ ᓂ ᑮ ᐱᑯᑌᔑᓂᓐ, ᐯᔭᑾᐤ ᐁ ᑎᐱᔅᑳᒃ ᓀᔥᑕ ᐁ ᑭᔑᑳᒃ ᓂ ᑮ ᐃᑖᓐ ᑎᒥᔮᒃ; 26 ᒥᒉᑡᐤ ᓂ ᑮ ᐸᐸᒧᑖᓐ, ᓂ ᑮ ᐅᒋ ᓈᓂᓵᓂᓰᓐ ᓂᐱᐊ, ᓂ ᑮ ᐅᒋ ᓈᓂᓵᓂᓰᓐ ᐅᒪᔅᑲᑗᐗᒃ, ᓂ ᑮ ᐅᒋ ᓈᓂᓴᓂᓰᓐ ᑎᐱᓚᐌ ᓂ ᐎᑕᔅᑭᒫᑲᓇᒃ, ᓂ ᑮ ᐅᒋ ᓈᓂᓵᓂᓰᓐ ᐋᔭᒡ ᐃᓕᓕᐗᒃ, ᓂ ᑮ ᓈᓂᓵᓂᓰᓐ ᐃᑖᐎᓂᒃ, ᓂ ᑮ ᓈᓂᓵᓂᓰᓐ ᐸᑾᑕᔅᑮᒃ, ᓂ ᑮ ᓈᓂᓵᓂᓰᓐ ᑭᒋᑲᒦᒃ, ᓂ ᑮ ᓈᓂᓵᓂᓰᓐ ᐃᑕ ᐁ ᐃᑖᒋᒃ ᓇᔅᐹᒡ ᐎᒋᔖᓂᒪᐗᒃ; 27 ᐊᔦᔅᑯᓯᐎᓂᒃ ᓀᔥᑕ ᐎᓴᑫᓕᑕᒧᐎᓂᒃ, ᒥᒉᑡᐤ ᐊᔕᐙᐱᐎᓂᒃ, ᓄᑌᑲᑌᐎᓂᒃ ᓀᔥᑕ ᓄᑌᐋᐸᑴᐎᓂᒃ, ᒥᒉᑡᐤ ᓂᑲᓱᐎᓂᒃ, ᓯᑲᒋᐎᓂᒃ ᓀᔥᑕ ᒧᔕᔥᑲᑌᐎᓂᒃ: 28 ᑖᐸᒡ ᒫᑲ ᐊᓂᐃ ᑫᒀᓇ ᐗᓚᐎᑎᒥᒃ ᑳ ᐃᑕᑾᑭ, ᐊᓂᒪ ᑕᑡᐤ ᑳᔑᑳᑭ ᑳ ᒫᑕᑯᔥᑳᑯᔮᓐ, ᑭᒋ ᑲᓇᐌᓕᒪᑭᒃ ᒥᓯᐌ ᒫᒪᐎᐋᔭᒥᐋᐗᒃ᙮ 29 ᐊᐌᓇ ᓓᓚᒥᓰᑦ ᓀᔥᑕ ᐁᑳ ᐁ ᓕᓚᒥᓯᔮᓐ ᓂᓚ? ᐊᐌᓇ ᓀᔦᑕᐎᓇᐌᓯᑦ ᓀᔥᑕ ᐁᑳ ᐁ ᐃᔅᒀᓱᔮᓐ ᓂᓚ? 30 ᑮᔥᐱᓐ ᒫᑲ ᓇᑕᐌᓕᑖᑯᓯᔮᓐ ᑭᒋ ᒫᒪᑖᑯᒧᔮᓐ, ᓂ ᑳ ᐅᒋ ᒫᒪᑖᑯᒧᓐ ᓂ ᓕᓚᒥᓯᐎᓇ ᐅᒋ᙮ 31 ᑭᒋᒪᓂᑐ, ᑭ ᑎᐯᓕᒋᑫᒥᓇᐤ ᒋᓴᔅ ᙭ ᐅᑖᐎᔭ ᑳᑭᑫ ᑫᔅᑌᓕᑖᑯᓯᑦ ᑭᔅᑫᓕᑕᒻ ᐁᑳ ᐁ ᑭᓛᔅᑭᔮᓐ᙮ 32 ᑕᒫᔅᑲᓯᒃ ᐊᓇ ᑳ ᑮ ᑎᐯᓕᑕᒥᐃᑯᑦ ᐊᕆᑕᓴ ᑭᒋᐅᑭᒪᐗ, ᑮ ᑲᓇᐌᓕᑕᒬᐤ ᐊᓂᐃ ᑖᒪᓯᓇᒃ ᐅᑦ ᐃᑖᐎᓂᓕᐗ ᐁ ᐋᔭᐙᑦ ᓇᑐᐸᓕᐎᓕᓕᐗ, ᐁ ᐎ ᐅᑎᓂᑦ: 33 ᓂᔥᑕ ᔖᐳ ᐸᔅᐹᐱᐎᓂᒃ ᓂ ᑮ ᐅᒋ ᓈᓵᐱᑫᓂᑲᐎᓐ, ᐁᑯ ᒫᑲ ᑳ ᐅᔑᒪᐤ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society