ᓂᔓ ᑯᕆᓐᑎᐊᓇ 10 - ᐅᔅᑭ ᑎᔅᑌᒥᓐᑦ

ᐹᓪ ᐋᐃᒋᑳᐸᐎᔅᑕᒻ ᐅᑕᑐᔅᑫᐎᓐ

¹ ᓂᓚ ᒫᑲ ᐹᓪ ᑫᒋᐙᒃ ᑭ ᓇᑐᑕᒫᑎᓇᐗᐤ ᐁ ᐃᔑ ᓗᔅᑳᑎᓰᑦ ᓀᔥᑕ ᐯᑳᑖᑎᓯᑦ ᙭, ᐁ ᐃᔑᓈᑯᓯᔮᓐ ᑳ ᒪᒉᓕᑖᑯᓯᔮᓐ ᐃᑕ ᐁ ᐃᑖᔦᒃ, ᒫᑲ ᐁ ᐃᑖᐱᒋᔮᓐ ᑳ ᓴᓱᑭᒧᑐᑖᑕᑾᒃ;

² ᒫᑲ ᑭ ᓇᑐᑕᒪᑎᓈᓐ, ᐁᑳ ᑭᒋ ᐃᔑ ᓴᓱᑭᒧᔮᓐ ᐃᑖᔮᓀ ᐃᑕ ᐁ ᐃᑕᔦᒃ, ᑫ ᐃᔑ ᑫᒋᓈᒋ ᓴᓱᑭᒧᑐᑕᐗᑭᒃ ᐗᑎᑦ ᐊᐌᓂᑳᓇᒃ, ᐎᔮᓯᐎᓂᒃ ᐱᒧᑌᐗᒃ ᑳ ᐃᑌᓕᒥᔭᒥᒋᒃ᙮

³ ᐌᓴ ᐋᑕ ᐁ ᐱᒧᑌᔮᒃ ᐎᔮᓯᐎᓂᒃ, ᓇᒪᐎᓚ ᐎᔮᓯᐎᓂᒃ ᓂᑦ ᐃᔑ ᓄᑎᓂᑳᓈᓐ;

⁴ ᐌᓴ ᓇᒪᐎᓚ ᐎᔮᓯᐗᓋ ᓂᑦ ᐊᔓᐎᓂᓈᓇ ᐁ ᓄᑎᓂᑫᔮᒃ, ᒫᑲ ᓱᑳᑎᓯᒪᑲᓋ ᑭᒋᒪᓂᑐ ᐅᒋ ᑭᒋ ᐅᒋ ᓂᒋᐌᐱᓂᑳᑌᑭ ᓇᑐᐸᓕᐎᑲᒥᑾ:

⁵ ᐁ ᓂᒋᐌᐱᓂᑳᑌᒃ ᒫᒥᑐᓀᓕᒋᑫᐎᓇ, ᓀᔥᑕ ᒥᓯᐌ ᑕᑐ ᑫᒀᓐ ᑳ ᑭᔅᑌᓕᑖᑯᐃᑎᓱᔅᑕᒧᒪᑲᒃ ᐅ ᑭᔅᑫᓕᒥᑯᓯᐎᓐ ᑭᒋᒪᓂᑐ, ᓀᔥᑕ ᐁ ᐯᑖᓂᐗᒃ ᒥᓯᐌ ᑕᑐ ᐃᑌᓕᑕᒧᐎᓐ ᐅ ᓇᓇᐃᑖᑯᓯᐎᓂᒃ ᙭;

⁶ ᓀᔥᑕ ᐁ ᐋᔦᔅᑲᐎᓯᔮᒃ ᑭᒋ ᐋᔅᑯᒋᑖᔮᒃ ᒥᓯᐌ ᐋᓉᑕᒧᐎᓐ, ᐃᔅᐱ ᑮ ᑎᐱᐸᓕᑫ ᑭᓚᐗᐤ ᑭ ᓇᓇᐃᑕᒧᐎᓂᐗᐤ᙮

⁷ ᑭ ᑲᓇᐙᐸᑌᓇᐗᐤ ᓈ ᑫᒀᓇ ᐁ ᐃᔑᓈᑾᑭ ᐗᔅᑮᒡ? ᑮᔥᐱᓐ ᐊᐌᓇ ᐃᓕᓕᐤ ᒣᒥᔑᑐᑕᓱᒋ ᐁ ᑎᐯᓕᒥᑯᑦ ᙭ᑕ, ᐁᑯᔑ ᐅᒣᓕᐤ ᓀᔥᑕ ᑲᑕ ᐃᑌᓕᑕᒻ, ᑖᐱᔅᑯᒡ ᐁ ᐃᔑ ᑎᐯᓕᒥᑯᑦ ᙭ᑕ, ᐁᑯ ᑖᐱᔅᑯᒡ ᓀᔥᑕ ᓂᓚᓈᓐ ᐁ ᑎᐯᓕᒥᔭᒥᑦ ᙭᙮

⁸ ᐌᓴ ᐋᑕ ᓂ ᑳ ᒫᒪᑖᑯᒧᑖᔾ ᓂ ᑎᐯᓕᒋᑫᐎᓂᓈᓐ ᐅᒋ, ᑳ ᑮ ᒥᓕᐃᔭᒥᑦ ᐅᑎᐯᓕᒋᑫᐤ ᑭᒋ ᑲᑫᔅᑭᒥᑕᑾᒃ ᓇᒪ ᒫᑲ ᑭᒋ ᓂᔑᐗᓈᒋᐃᑕᑾᒃ, ᓇᒪᐎᓚ ᓂ ᑳ ᓇᓀᐯᐎᓯᑖᐤ:

⁹ ᐁᑳ ᑭᒋ ᐃᑌᓕᑖᑯᓯᔮᓐ ᒫᓇ ᐱᑯ ᐁ ᐎ ᑯᔅᑕᒋᐃᑕᑾᒃ ᐁ ᒪᓯᓇᐊᒫᑕᑾᒃ᙮

¹⁰ ᐌᓴ ᐅ ᒪᓯᓇᐃᑫᐎᓇ, ᐃᑗᐗᒃ, ᑯᓯᑾᓂᓕᐗ ᓀᔥᑕ ᒪᔥᑲᐎᓯᒪᑲᓂᓕᐗ; ᒫᑲ ᐁ ᐃᔑᓈᑯᓯᑦ ᐎᔭᐎᒃ ᓕᓚᒥᓯᐤ, ᓀᔥᑕ ᐅᑦ ᐋᔭᒥᐎᓐ ᐸᑾᓐᑕᐤ ᐃᑌᓕᑖᑾᓂᓕᐤ᙮

¹¹ ᐁᑯᔑ ᐁᐗᑯ ᑐᐎᑳᓐ ᐅᒣᓕᐤ ᑲᑕ ᐃᑌᓕᑕᒻ, ᑳ ᐃᔑ ᐋᔭᒥᔮᒃ ᐁ ᒪᓯᓇᐃᑫᔮᒃ ᐁ ᐃᑖᐱᒋᔮᒃ, ᐁᑯ ᑖᐱᔅᑯᒡ ᑫ ᐃᔑ ᐋᔨᑎᔮᒃ ᐯᒋ ᐃᑖᔮᓀ᙮

¹² ᐌᓴ ᓇᒪᐎᓚ ᓂ ᑳ ᑮ ᐊᔑᑕᑭᒥᑎᓱᓈᓐ, ᓇᒪ ᓀᔥᑕ ᓂ ᑳ ᑮ ᐊᓯᒋ ᐃᑌᓕᒥᑎᓱᓈᓐ ᐊᓂᑭ ᐋᑎᑦ ᑳ ᒥᓗᐋᓕᒧᒥᑎᓱᒋᒃ: ᒫᑲ ᐎᓇᐗᐤ ᑖᑎᐱᓚᐌ ᐁ ᑖᑎᐸᐅᓱᒋᒃ, ᓀᔥᑕ ᑖᑎᐱᓚᐌ ᐁ ᑖᐱᔅᑯᑌᓕᒥᑎᓱᒋᒃ, ᓇᒪᐎᓚ ᑲᑫᑕᐌᓕᑕᒶᒃ᙮

¹³ ᒫᑲ ᓇᒪᐎᓚ ᓂ ᑳ ᒫᒪᑖᑯᒧᓈᓐ ᐁᑳ ᐁ ᐃᔑ ᑎᐸᐃᑳᑌᒃ, ᒫᑲ ᐁ ᐃᔑ ᑎᐸᐃᑳᑌᒃ ᐅ ᑎᐹᔨᑲᓐ ᑭᒋᒪᓂᑐ ᐅᒋ ᑳ ᑮ ᒫᑎᓇᒪᐎᔭᒥᑦ, ᑎᐹᔨᑲᓐ ᑫ ᐃᔅᐸᓕᒃ ᐃᔥᐱᔥ ᑭᓚᐗᐤ ᑭᒋ ᐅᑎᑎᑯᔦᒃ᙮

¹⁴ ᐌᓴ ᓇᒪᐎᓚ ᓂ ᔑᐱᓂᑎᓱᓈᓐ ᐊᐙᓯᑌ ᐁᔅᐱᒋᑭᑎᔮᒃ, ᑖᐱᔅᑯᒡ ᐁᑳ ᐁ ᐅᑎᑎᑕᑾᒃ: ᐌᓴ ᐃᔥᐱᔥ ᐃᑕ ᐁ ᐃᑖᔦᒃ ᓂ ᑮ ᐯᒋ ᐅᑎᑌᓇᓐ ᐁ ᑲᑫᔅᑭᒥᐌᐗᑭᑦ ᐅ ᒥᓗᐋᒋᒧᐎᓐ ᙭:

¹⁵ ᐁᑳ ᐊᐙᓯᑌ ᐁ ᒫᒫᑖᑯᒧᔮᒃ ᑳ ᐃᔅᐱᒋᑭᑎᔮᒃ, ᑯᑕᑭᔭᒃ ᐃᓕᓕᐗᒃ ᐅᑦ ᐊᑑᔅᑫᐎᓂᐙᒃ; ᒫᑲ ᐁ ᐊᔅᐯᓕᒧᔮᒃ, ᐃᔅᐱ ᑭ ᑖᐺᔦᓕᑕᒧᐎᓂᐗᐤ ᐊᑎ ᓚᑭᐸᓕᑫ ᑭᒋ ᑭᔅᑌᓕᑖᑯᐃᑲᐎᔮᒃ ᑭᓚᐗᐤ ᐅᒋ ᑳ ᐃᑕᔅᑌᒃ ᐅᒪ ᓂ ᑎᐹᔨᑲᓂᓈᓐ,

¹⁶ ᑭᒋ ᑲᑫᔅᑭᒥᐌᔮᒃ ᒥᓗᐋᒋᒧᐎᓐ ᐊᐙᓯᑌ ᐃᑌᑫ ᐃᑕ ᐁ ᐃᑖᔦᒃ, ᐁᑳ ᓀᔥᑕ ᑭᒋ ᒫᒪᑖᑯᒧᔮᒃ ᑯᑕᒃ ᐃᓕᓕᐤ ᐅᑦ ᐃᓯᒋᑫᐎᓂᒃ, ᐋᔕᔾ ᑳ ᑮ ᐊᔦᔅᑲᐎᑕᒫᑲᐎᔮᒃ᙮

¹⁷ ᒫᑲ ᐊᓇ ᑳ ᒫᒪᑖᑯᒧᑦ ᐁᑯᔑ ᐅᑎᐯᓕᒋᑫᒃ ᑲᑕ ᐃᔑ ᒫᒪᑖᑯᒧ᙮

¹⁸ ᐌᓴ ᓇᒪᐎᓚ ᓇᐁᓕᑖᑯᓯᐤ ᐊᓇ ᑳ ᒥᓗᐋᓕᒧᒥᑎᓱᑦ, ᒫᑲ ᐊᓇ ᑳ ᒥᓗᐋᓕᒧᒥᑯ ᐅᑎᐯᓕᒋᑫᐗ᙮