ᓂᔥᑕᒻ ᐱᑕᕐ 1 - ᐅᔅᑭ ᑎᔅᑌᒥᓐᑦ

¹ ᐱᑕᕐ, ᐅᑦ ᐊᐸᔅᑕᓕᒪ ᒋᓴᔅ ᙭, ᐁ ᒪᓯᓇᐊᒪᐙᑦ ᐊᓂᐃ ᒫᓐᑌᐗ ᓇᓈᓂᔅ ᑳ ᐃᑖᓕᒋ ᐸᓐᑕᓯᒃ, ᑲᓓᔕᐃᒃ, ᑳᐸᑐᔕᐃᒃ, ᐁᔕᐃᒃ, ᓀᔥᑕ ᐹᐃᑎᓐᔭᐃᒃ,

² ᑳ ᑮ ᐙᐌᓛᐸᒥᒋᒃ ᑳ ᐃᑕᔅᑌᓕᒃ ᑭᒋᒪᓂᑐ ᐌᐅᑖᐎᒪᐎᑦ ᐅ ᓂᑳᓂ ᑭᔅᑫᓕᑕᒧᐎᓐ, ᐅ ᐸᓓᑭᐃᐌᐎᓐ ᐊᒑᒃ ᐅᒋ, ᓇᓇᐃᑕᒧᐎᓂᒃ ᐃᔑ ᓀᔥᑕ ᐁ ᐊᑭᑲᐎᐌᐱᓂᑳᑌᓕᒃ ᐅᒥᑯ ᒋᓴᔅ ᙭: ᔕᐌᓕᒋᑫᐎᓐ ᑭ ᑳ ᐎ ᐋᔮᓇᐗᐤ, ᓀᔥᑕ ᑳᔮᒣᓕᑕᒧᐎᓐ ᑭ ᑳ ᐎ ᓚᑭᑕᒫᑲᐎᓇᐗᐤ᙮

ᐸᑯᓭᓕᒧᐎᓐ ᑳ ᑫᒋᓇᐌᓕᑖᑾᒃ

³ ᑲᑕ ᐎ ᒫᒥᒋᒥᑯᓯᐤ ᑭᒋᒪᓂᑐ ᐅᑖᐎᔭ ᑭ ᑎᐯᓕᒋᑫᒥᓇᐤ ᒋᓴᔅ ᙭, ᐊᓇ ᑳ ᒥᒉᓂᓕᒃ ᐅ ᔕᐌᓕᒋᑫᐎᓐ ᐅᒋ ᒥᓇ ᑳ ᑮ ᓂᑖᐎᑭᐃᑕᒃ ᑭᒋ ᐱᒫᑎᓯᐎ ᐊᔅᐯᓕᒧᐎᓂᔭᒃ, ᐅ ᐗᓂᔥᑲᐎᓐ ᒋᓴᔅ ᙭ ᐅᓂᐱᐗ ᐅᒋ,

⁴ ᑭᒋ ᐅ ᑎᐯᓕᒋᑲᓂᔭᒃ ᐁᑳ ᑫ ᓂᔑᐗᓈᑕᒃ, ᐁᑳ ᑳ ᐎᓕᐹᒃ, ᐁᑳ ᓀᔥᑕ ᑳ ᐊᑎ ᐌᐱᐸᓕᒃ, ᐁ ᐊᔅᑖᒫᑲᐎᔦᒃ ᑭᒋᑭᔑᑯᒃ,

⁵ ᑭᒋᒪᓂᑐ ᐅ ᑲᔥᑭᐅᐎᓐ ᑳ ᐅᒋ ᑲᓇᐌᓕᒥᑲᐎᔦᒃ ᐁ ᑖᐺᔦᓕᑕᒣᒃ ᐱᒫᒋᐃᐌᐎᓂᒃ ᐃᔑ ᑳ ᐋᔦᔅᑯᐗᒃ ᒫᒋᒡ ᐁ ᑭᔑᑳᑭ ᑭᒋ ᓄᑯᑖᓂᐗᒃ᙮

⁶ ᐃᑕ ᑳ ᐃᔑ ᓈᔅᐱᒡ ᒥᓚᐙᑕᒣᒃ, ᐊᑕ ᐊᓄᒡ ᐱᑕᒪ, ᑮᔥᐱᓐ ᐃᑌᓕᑖᑾᒃ ᑭᒋ ᐃᑭᒃ, ᑭ ᑯᓯᑾᒪᒋᐅᓇᐗᐤ ᐁ ᒫᒥᒉᑎᑭ ᑭ ᑲᑴᒋᐃᑯᓯᐎᓂᐙᐗ;

⁷ ᐁ ᑲᑴᒋᑖᓂᐗᒃ ᑭ ᑖᐺᔦᓕᑕᒧᐎᓂᐗᐤ, ᐊᐙᓯᑌ ᐁ ᑭᔅᑕᑭᑖᑾᒃ ᐃᔥᐱᔥ ᐅᓵᐎᔔᓕᐋᓈᐱᔉ ᑳ ᓂᔑᐗᓈᑕᒃ, ᐋᑕ ᐃᔥᑯᑌᒃ ᐁ ᑮ ᑯᒋᑖᓂᐗᒃ, ᑭᒋ ᒥᔅᑭᑳᑌᒃ ᑭᒋ ᐅᒋ ᒫᒪᑕᑯᒥᑲᐎᔦᒃ, ᓀᔥᑕ ᑭᔅᑌᓕᒥᑲᐎᔦᒃ, ᓀᔥᑕ ᑭᔅᑌᓕᑖᑯᐃᑲᐎᔦᒃ ᐯᒋ ᓄᑯᓯᑌ ᒋᓴᔅ ᙭;

⁸ ᐊᓇ ᐋᑕ ᐁᑳ ᐁ ᑮ ᐙᐸᒣᒃ, ᑭ ᓵᑭᐊᐗᐤ; ᐊᓇ, ᐋᑕ ᐁᑳ ᐊᓄᒡ ᐁ ᐙᐸᒣᒃ, ᐁᓕᐌᒃ ᒫᑲ ᐁ ᑖᐺᑕᒣᒃ, ᑭ ᒥᓚᐙᑌᓇᐗᐤ ᐊᓂᒪ ᒥᓚᐙᑕᒧᐎᓂᒃ ᐁᑳ ᑫ ᑮ ᐎᒋᑳᑌᒃ ᓀᔥᑕ ᐁ ᓵᑲᔅᑭᓀᒃ ᑭᔅᑌᓕᑖᑯᓯᐎᓐ:

⁹ ᐁ ᒥᓕᑲᐎᔦᒃ ᐁ ᐃᔑ ᑲᔥᑭᑖᒪᑲᒃ ᑭ ᑖᐺᔦᓕᑕᒧᐎᓂᐗᐤ, ᑭᒋ ᐱᒫᒋᐋᑲᓂᐎᒋᒃ ᑭᑦ ᐊᒑᑯᐙᐗᒃ ᐅᑎ᙮

¹⁰ ᐊᓂᒪ ᐱᒫᒋᐃᐌᐊᓐ ᒫᑲ ᐅᑭᔅᑭᐙᐃᑫᐗᒃ ᑮ ᐅᒋ ᑲᑴᒋᑫᒧᐗᒃ ᓀᔥᑕ ᐌᐌᓕᑦ ᑮ ᓈᓇᑕᐌᓕᑕᒶᒃ, ᐊᓂᑭ ᑳ ᑮ ᓂᑳᓂᐎᑕᑭᒃ ᐊᓂᒪ ᔕᐌᓕᒋᑫᐎᓐ ᑫ ᐅᑎᑎᑯᔦᑭᐸᓐ:

¹¹ ᐁ ᓈᓇᑕᐌᓕᑕᑭᒃ ᑫᒀᓐ, ᓀᔥᑕᐱᑯ ᑫᑯ ᐁ ᐃᔑᑭᔑᑳᑭ, ᐅᑦ ᐊᒑᑾ ᙭ ᑳ ᑮ ᐱᒋᔅᑳᑯᓕᒋ ᑫ ᐋᒋᒧᓕᒋ, ᐃᔅᐱ ᓂᑳᓐ ᑳ ᑮ ᐋᓕᒧᑕᒥᓕᑭ ᑫ ᐃᔑ ᐙᐎᓴᑫᓕᑕᒥᓕᔅᐸᓐ ᙭ᑕ, ᓀᔥᑕ ᐊᓂᐁᓕᐤ ᑭᔅᑌᓕᑖᑯᓯᐎᓂᓕᐤ ᑫ ᐹᐸᓕᓕᑭᐸᓐ᙮

¹² ᐊᓂᑭ ᑳ ᑮ ᐙᐸᑎᓛᑲᓂᐎᒋᒃ, ᓇᒪᐎᓚ ᐎᓚᐗᐤ ᑫᒋᐙᒃ, ᒫᑲ ᑭᓚᓈᓇᐤ ᐊᓂᐃ ᐁ ᑮ ᐊᑐᔅᑫᔅᑕᒫᑕᑾᒃ, ᐊᓂᐃ ᐊᓄᒡ ᑳ ᐎᑕᒫᑖᑾᒃ ᐊᓂᑭ ᑳ ᑮ ᑲᑫᔅᑭᒥᑖᑾᒃ ᒥᓗᐋᒋᒧᐎᓐ ᐯᓓᑭᓯᑦ ᐊᒑᒃ ᐅᒋ ᑭᒋᑭᔑᑯᒃ ᑳ ᑮ ᐯᒋ ᓛᔑᑎᔕᐙᑲᓂᐎᑦ: ᐅᐅ ᑫᒀᓇ ᐁᓐᒐᓚᒃ ᑮ ᐸᑯᓭᓕᒧᐗᒃ ᑭᒋ ᑲᓇᐗᐸᑕᑭᒃ᙮

ᑭ ᑌᑄᑎᑲᐎᓈᓇᐤ ᒋ ᐸᓓᑭ ᐱᒫᑎᓯᔭᒃ

¹³ ᐁᐗᑯ ᐅᒋ, ᐸᑾᑌᐊᒧᒃ ᑭ ᒥᑐᓀᓕᒋᑲᓂᐙᐗ, ᐯᑳᒡ ᐃᑖᑎᓰᒃ, ᓀᔥᑕ ᐃᔅᒀᔮᒡ ᐃᔅᑯ ᐊᔅᐯᓕᒧᑐᑕᒧᒃ ᐊᓂᒪ ᔕᐌᓕᒋᑫᐎᓐ ᑫ ᐯᒋ ᒥᓕᑲᐎᔦᒃ ᑭᔅᑫᓕᑖᑯᐋᑲᓂᐎᑌ ᒋᓴᔅ ᙭;

¹⁴ ᑖᐱᔅᑯᒡ ᑳ ᓇᓇᐃᑕᑭᒃ ᐊᐙᔑᔕᒃ, ᐁᑳ ᐁ ᐃᔑᐃᑎᓱᔦᒃ ᑳ ᑮ ᐃᔑ ᒪᒋ ᓇᑕᐌᓕᑕᒣᒃ ᐌᔅᑳᒡ ᐃᔅᐱ ᐁᑳ ᑳ ᑮ ᑭᔅᑫᓕᑕᒣᒃ;

¹⁵ ᒫᑲ ᑖᐱᔅᑯᒡ ᐁ ᐃᔑ ᐸᓓᑭᓯᑦ ᐊᓇ ᑳ ᑮ ᓇᑐᒥᑖᒃ, ᐁᑯ ᓀᔥᑕ ᑭᓚᐗᐤ ᐸᓓᑭᓯᒃ ᒥᓯᐌ ᐁ ᐃᔑ ᐱᒫᑎᓯᓈᓂᐗᒃ;

¹⁶ ᐌᓴ ᒪᓯᓇᐃᑳᑌᐤ; ᐸᓓᑭᓯᒃ ᑭᓚᐗᐤ; ᐌᓴ ᓂᓚ ᓂ ᐸᓓᑭᓯᓐ᙮

¹⁷ ᑮᔥᐱᓐ ᒫᑲ ᓈᓇᑕᒣᑴ ᐌᐅᑕᐎᒪᐎᑦ, ᐊᓇ ᐁᑳ ᐹᐱᑐᔥ ᑳ ᐃᑌᓕᒫᑦ ᐃᓕᓕᐗ ᑳ ᑎᐹᔅᑯᓇᒸᑦ ᐁ ᐃᔑᓈᑾᓂᓕᒃ ᒥᓯᐌ ᑕᑐ ᐃᓕᓕᐗ ᐅᑦ ᐊᑑᔅᑫᐎᓂᓕᐤ, ᒣᒀᒡ ᐅᑕ ᐁ ᑕᔑᑫᔦᒃ ᐱᒫᑎᓰᒃ ᓇᓂᒋᐎᓂᒃ:

¹⁸ ᐌᓴ ᑭ ᑭᔅᑫᓕᑌᓇᐗᐤ ᐁᑳ ᐁ ᑮ ᐅᒋ ᐱᒫᒋᐃᑳᐎᔦᒃ ᑳ ᓂᔑᐗᓈᑕᑭ ᑫᒀᓇ, ᑖᐱᔅᑯᒡ ᔖᓕᐋᓈᐱᔉ ᓀᔥᑕᐱᑯ ᐅᓵᐎᔔᓂᐋᓈᐱᔉ, ᑭ ᑲᑫᐹᑎᓯᐎ ᐃᔑᐱᒫᑎᓯᐎᓂᐙᒃ ᐅᒋ ᑳ ᐋᔭᔦᒃ ᐅ ᑭᔅᑭᓄᐊᒫᑫᐎᓂᐙᒃ ᑯᑖᐎᐗᐗᒃ ᐅᒋ;

¹⁹ ᒫᑲ ᑳ ᑭᔅᑕᑭᑖᑾᓂᓕᒃ ᐅᒥᑯ ᙭ ᐅᒋ, ᑖᐱᔅᑯᒡ ᒫᓂᔥᒑᓂᔑᔥ ᐁᑳ ᑳ ᒫᔅᑭᓯᑦ ᐁᑳ ᓀᔥᑕ ᑳ ᐎᓕᐱᓯᑦ:

²⁰ ᐊᓇ ᑖᐺ ᓂᑳᓐ ᑳ ᑮ ᐹᑲᓂᐋᑲᓂᐎᑦ ᐸᒧᔑ ᑮ ᒫᒋ ᐃᑕᑾᒃ ᐊᔅᑭ, ᒫᑲ ᒣᒀᒡ ᐅᐅ ᒫᒋᒡ ᐁ ᑭᔑᑳᑭ ᑭᓚᐗᐤ ᑳ ᐅᒋ ᓄᑯᐋᑲᓂᐎᑦ;

²¹ ᑭᓚᐗᐤ ᐎᓚ ᑳ ᐅᒋ ᑖᐺᔦᓕᒣᒃ ᑭᒋᒪᓂᑐ, ᑳ ᑮ ᐗᓂᔥᑳᓈᑦ ᐅᓂᐱᐗ ᐅᒋ, ᓀᔥᑕ ᑳ ᑮ ᒥᓛᑦ ᑭᔅᑌᓕᑖᑯᓯᐎᓂᓕᐤ: ᑭᒋ ᑮ ᑖᐺᔦᓕᒣᒃ ᓀᔥᑕ ᐊᔅᐯᓕᒧᑐᑕᐌᒃ ᑭᒋᒪᓂᑐ᙮

²² ᐁ ᓄᑾᒃ ᐁ ᑮ ᐹᔦᑭᐁᑾᒃ ᑭᑦ ᐊᒑᑯᐙᐗ, ᐊᒑᒃ ᐅᒋ ᐁ ᑮ ᓇᓇᐃᑕᒣᒃ ᑖᐺᐎᓐ, ᑭᒋ ᑖᐺ ᓵᑭᐁᑾᒃ ᐎᒋᔖᓂᒪᐗᒃ, ᐸᓓᑭ ᒥᑌᐃᒃ ᐌᐌᓕᑦ ᓵᑭᐃᑐᒃ:

²³ ᒥᓇ ᐁ ᑮ ᓂᑕᐎᑭᔦᒃ ᓇᒪᐎᓚ ᑳ ᓂᔑᐗᓈᑕᑭ ᓯᒥᓇ ᐅᒋ, ᒫᑲ ᐁᑳ ᑫ ᓂᔑᐗᓈᑕᑭ, ᑭᒋᒪᓂᑐ ᐅᑦ ᐋᔭᒥᐎᓐ ᐅᒋ ᑳ ᐱᒫᑕᓂᓕᒃ ᓀᔥᑕ ᑳᑭᑫ ᑳ ᐃᑕᑾᓂᓕᒃ᙮

²⁴ ᐌᓴ ᒥᓯᐌ ᑳ ᐎᔮᓯᒋᒃ ᓇᔅᐱᑕᒶᒃ ᒪᔅᑯᔑᐊ, ᓀᔥᑕ ᒥᓯᐌ ᐅ ᑭᔅᑌᓕᑖᑯᓯᐎᓐ ᐃᓕᓕᐤ ᐃᔑᓈᑾᓂᓕᐤ ᑖᐱᔅᑯᒡ ᒪᔅᑯᔑᐊ ᐁ ᐙᐱᑯᓂᐗᑭ᙮ ᒪᔅᑯᔑᐊ ᓂᐱᒪᑲᓋ, ᓀᔥᑕ ᐁ ᐃᔑ ᐙᐱᑯᓂᐗᑭ ᐸᑭᑎᓋ;

²⁵ ᒫᑲ ᑭᒋᒪᓂᑐ ᐅᑦ ᐋᔭᒥᐎᓐ ᑳᑭᑫ ᐱᒫᑕᓂᓕᐤ᙮ ᐁᐗᑯ ᒫᑲ ᐅᒪ ᐋᔭᒥᐎᓐ ᒥᓗᐋᒋᒧᐎᓂᒃ ᑳ ᐅᒋ ᑲᑫᔅᑭᒥᑲᐎᔦᒃ᙮