ᓂᔥᑕᒻ ᑯᕆᓐᑎᐊᓇ 6 - ᐅᔅᑭ ᑎᔅᑌᒥᓐᑦᐁ ᐃᔑᐎᓚᑦ ᑮᒋ ᐅᑕᔭᒥᐊᐤ ᑎᐹᔥᑯᓂᑫᐎᓂᒃ 1 ᑲᑕ ᐃᔅᐱᒋ ᓱᑭᑌᐁᐤ ᓈ ᐊᐌᓇ ᐁ ᐃᑕᔑᔦᒃ, ᐙᔦᔥ ᐁ ᐃᑌᓕᒫᑦ ᑯᑕᑭᔭ, ᑭᒋ ᐃᑐᑌᑦ ᑎᐹᔅᑯᓂᑫᐎᓂᒃ ᐁᑕᔅᑕᒪᐱᓕᒋ ᐊᓂᐃ ᐁᑳ ᑳ ᒀᔭᔅᑭᑎᓕᒋ, ᓇᒪ ᒫᑲ ᐁᑕᔅᑕᒪᐱᓕᒋ ᐅᐸᓓᑭᓴ? 2 ᓇᒪ ᓈ ᑭ ᑭᔅᑫᓕᑌᓇᐗᐤ ᐅᐸᓓᑭᓴᒃ ᑭᒋ ᑎᐹᔅᑯᓇᑭᒃ ᐅᒣᓕᐤ ᐊᔅᑭᓕᐤ? ᑮᔥᐱᓐ ᒫᑲ ᑭᓚᐗᐤ ᑫ ᑎᐹᔅᑯᓇᒣᒃ ᐅᒪ ᐊᔅᑭ, ᓇᒪ ᓈ ᑭ ᑌᐸᑫᓕᑖᑯᓯᓇᐗᐤ ᑭᒋ ᑎᐹᔅᑯᓇᒣᒃ ᐊᓂᐃ ᒫᐗᒡ ᑳ ᐋᐱᔅᑌᓕᑕᑾᑭ? 3 ᓇᒪ ᓈ ᑭ ᑭᔅᑫᓕᑌᓇᐗᐤ ᑭᒋ ᑎᐹᔅᑯᓇᑭᒃ ᐁᓐᒐᓚᒃ? ᑖᓐ ᐁᔅᐱᒋ ᐊᐙᓯᑌ ᒫᑲ ᐊᓂᐃ ᐅᒪ ᐱᒫᑎᓯᐎᓂᒃ ᑳ ᑎᐯᓕᑖᑾᑭ? 4 ᑮᔥᐱᓐ ᒫᑲ ᐋᔮᔦᒃ ᑫᒀᓇ ᑭᒋ ᑎᐹᔅᑯᓂᑳᑌᑭ ᐅᒪ ᐱᒫᑎᓯᐎᓂᒃ ᑳ ᑌᐸᑫᓕᑖᑾᑭ, ᐸᑭᑎᓂᑯᒃ ᑭᒋ ᑎᐹᔅᑯᓂᑫᒋᒃ ᐊᓂᑭ ᒫᐗᒡ ᑳ ᐗᐱᔅᑌᓕᑖᑯᓯᒋᒃ ᒣᑴᔭᔥ ᒪᒪᐎᐋᔭᒥᐊᐗ᙮ 5 ᐅᒪ ᓂᑦ ᐃᑣᓐ ᑭᒋ ᐅᒋ ᓇᓀᐯᐎᓯᔭᒃ᙮ ᑖᐺ ᓈ ᐁᑳ ᐁ ᐃᑖᑦ ᐊᐌᓇ ᐁ ᐃᑕᔑᔦᒃ ᑳ ᑲᑫᑕᐌᓚᑕᒃ? ᓇᒪ, ᓇᒪ ᐙᐙᒡ ᐯᔭᒃ ᑫ ᑲᔥᑭᑖᑦ ᑭᒋ ᑎᐹᔅᑯᓈᑦ ᐎᒋᔖᓇ? 6 ᒫᑲ ᐎᒋᔖᓇᒪᐤ ᐃᑐᑕᐁᐤ ᐎᒋᔖᓇ ᑎᐹᔅᑯᓂᑫᐎᓂᒃ ᐃᔑ, ᐅᒣᓕᐤ ᓀᔥᑕ ᑐᑕᒻ ᐁᑕᔅᑕᒪᐱᓕᒋ ᐊᓂᐃ ᐁᑳ ᑳ ᑖᐺᔦᓕᑕᒥᓕᒋ᙮ 7 ᑖᐺ ᒫᑲ ᑭ ᐗᓂᑐᑌᓇᐗᐤ, ᒣᒥᔅᑯᒡ ᐁ ᐃᑐᑕᐃᑐᔦᒃ ᑎᐹᔅᑯᓂᑫᐎᓂᒃ ᐃᔑ᙮ ᑖᓀᑭ ᐌᒋ ᐁᑳ ᑳᔮᒥ ᐅᑎᓇᒣᒃ ᑭ ᐗᓂᑐᑖᑯᓯᐎᓂᐗᐤ? ᑖᓀᑭ ᐌᒋ ᐁᑳ ᑳᔮᒣᐎᓯᔦᒃ ᐁ ᑭᔑᐃᑲᐎᔦᒃ? 8 ᔖᑯᒡ, ᑭ ᐗᓂᑐᑌᓇᐗᐤ, ᓀᔥᑕ ᑭ ᒋᔑᐃᐙᓇᐗᐤ, ᐅᒣᓕᐤ ᓀᔥᑕ ᑭ ᑐᑕᐙᐗᐗᒃ ᑭᒋᔖᓂᐗᐗᒃ᙮ 9 ᓇᒪ ᓈ ᑭ ᑭᔅᑫᓕᑌᓇᐗᐤ ᐊᓇ ᐁᑳ ᑳ ᒀᔭᔅᑭᑖᑎᓰᑦ ᐁᑳ ᑭᒋ ᐋᓂᔅᑫ ᐋᔮᐙᑦ ᐅᑦ ᐅᑭᒪᐎᐎᓂᓕᐤ ᑭᒋᒪᓂᑐᐗ? ᐁᑳᐎᓚ ᑭ ᑳ ᐙᔦᔑᐃᑲᐎᓇᐗᐤ: ᓇᒪᐎᓚ ᐅᐱᔑᒀᑎᓯᔅᑲᒃ, ᓇᒪ ᓀᔥᑕ ᑳ ᓇᐗᑮᔅᑕᐙᒋᒃ ᒪᓂᑐᑳᓇ, ᓇᒪ ᓀᔥᑕ ᒪᒋᐎᐯᒥᑐᐗᒃ, ᓇᒪ ᓀᔥᑕ ᑳ ᐃᔅᑫᑳᓱᒋᒃ, ᓇᒪ ᓀᔥᑕ ᑳ ᐎᒋᐎᓂᓱᒫᒋᒃ ᓈᐯᐗ᙮ 10 ᓇᒪ ᓀᔥᑕ ᑭᒧᑎᔅᑲᒃ, ᓇᒪ ᓀᔥᑕ ᐅᒧᔅᑌᓇᒫᑫᔅᑲᒃ, ᓇᒪ ᓀᔥᑕ ᑭᔥᑴᐯᔅᑲᒃ, ᓇᑕ ᓀᔥᑕ ᐅᒫᓓᓕᒋᑫᔅᑲᒃ, ᓇᒪ ᓀᔥᑕ ᐅᒪᔅᑲᑗᔅᑲᒃ, ᑲᑕ ᐋᓂᔅᑫ ᐋᔭᐌᐗᒃ ᐅᑦ ᐅᑭᒪᐎᐎᓂᓕᐤ ᑭᒋᒪᓂᑐᐗ᙮ 11 ᐁᑯ ᓀᔥᑕ ᑳ ᑮ ᐃᔑᓈᑯᓯᔦᒃ ᐋᑎᑦ ᐁ ᐃᑕᔑᔦᒃ: ᒫᑲ ᑭ ᑮ ᑭᒋᔅᑖᐸᐗᓕᑲᐎᓇᐗᐤ, ᒫᑲ ᑭ ᑮ ᐸᓓᑭᐃᑲᐎᓇᐗᐤ, ᒫᑲ ᑭ ᑮ ᒀᔭᔅᑭᑖᑎᓯᐃᑲᐎᓇᐗᐤ ᐅᑦ ᐃᔑᓂᑳᓱᐎᓂᒃ ᐅᑎᐯᓕᒋᑫᐤ ᒋᓴᔅ, ᓀᔥᑕ ᐅᑦ ᐊᒑᑾ ᑭ ᑭᒋᒪᓂᑐᒥᓇᐤ᙮ ᐋᐸᒋᑕᒃ ᑭᔭᐎᐙᐗ ᑭᒋ ᑭᔅᑖᒋᒣᒃ ᑭᒋᒪᓂᑐ 12 ᒥᓯᐌ ᑫᒀᓇ ᐅᓚᔓᐌᓕᑖᑾᓋ ᓂᓚ ᐅᒋ, ᒫᑲ ᒥᓯᐌ ᑫᒀᓇ ᓇᒪᐎᓚ ᐋᐸᑕᓋ: ᒥᓯᐌ ᑫᒀᓇ ᐅᓚᔓᐌᓕᑖᑾᓋ ᓂᓚ ᐅᒋ, ᒫᑲ ᓇᒪᐎᓚ ᓂᑦ ᐃᑌᓕᑌᓐ ᐙᔦᔥ ᑭᒋ ᑎᐯᓕᒥᑯᔮᓐ᙮ 13 ᒥᒋᒪ ᒥᔅᑕᑖᔾ ᐅᒋ, ᓀᔥᑕ ᒥᔅᑕᑖᔾ ᒥᒋᒪ ᐅᒋ: ᒫᑲ ᑭᒋᒪᓂᑐ ᑖᐱᔅᑯᒡ ᑲᑕ ᓂᔑᐗᓈᒋᑕᐤ᙮ ᒥᔭᐤ ᒫᑲ ᓇᒪᐎᓚ ᑲᑕ ᐋᐸᒋᑖᓂᐗᓄᐸᓐ ᐱᔑᒀᑎᓯᐎᓂᒃ, ᒫᑲ ᑭᒋ ᐅᒋ ᐊᑑᔅᑫᔅᑕᐙᑲᓂᐎᑦ ᐅᑎᐯᓕᒋᑫᐤ; ᐅᑎᐯᓕᒋᑫᐤ ᓀᔥᑕ ᑭᒋ ᑎᐯᓕᑕᒃ ᒥᔭᐎᓕᐤ᙮ 14 ᑭᒋᒪᓂᑐ ᒫᑲ ᑳ ᑮ ᐃᔑ ᐗᓂᔥᑳᓈᑦ ᐅᑎᐯᓕᒋᑫᐗ, ᐁᑯ ᑖᐱᔅᑯᒡ ᑫ ᐃᔑ ᐗᓂᔥᑳᓂᑕᒃ ᑎᐱᓚᐌ ᐅ ᑲᔥᑭᐅᐎᓂᒃ ᐅᒋ᙮ 15 ᓇᒪ ᓈ ᑭ ᑭᔅᑫᓕᑌᓇᐗᐤ ᑭᔭᐙᐗ ᐁ ᐅ ᐸᔅᑫᓯᐎᓂᑦ ᙭? ᓂ ᑳ ᐅᑎᓇᒸᓐ ᓈ ᐅ ᐸᔅᑫᓯᐎᓇ ᙭, ᑭᒋ ᐃᔑᑖᐗᒃ ᑭᒋ ᐅ ᐸᔅᑫᓯᐎᓂᑦ ᐱᔑᒀᑎᔅᑴᐤ? ᓇᒪᐎᓚ ᑲᑕ ᐎ ᐃᑭᓐ᙮ 16 ᑫᒀᓐ! ᓇᒪ ᓈ ᑭ ᑭᔅᑫᓕᑌᓇᐗᐤ ᐊᓇ ᑳ ᐎᒉᐙᑦ ᐱᔑᒀᑎᔅᑴᐗ ᐁ ᐯᔭᑯ ᒥᔭᐎᑦ? ᐌᓴ ᑳ ᓂᔑᒋᒃ, ᐃᑗᐤ, ᑲᑕ ᐯᔭᑯ ᐎᔮᓯᐗᒃ᙮ 17 ᒫᑲ ᐊᓇ ᑳ ᐎᒉᐙᑦ ᐅᑎᐯᓕᑭᑫᐗ ᐯᔭᑯ ᐊᒑᑯᐎᐤ᙮ 18 ᐅᔑᑕᒧᒃ ᐱᔑᒀᑎᓯᐎᓐ, ᑕᑐ ᒪᒋᑐᑕᒧᐎᓐ ᐃᓕᓕᐤ ᑳ ᑐᑕᒃ ᐗᓚᐎᑎᒥᒃ ᐎᔭᐎᒃ ᐃᑐᑕᒻ; ᒫᑲ ᐊᓇ ᑳ ᑐᑕᒃ ᐱᔑᒀᑎᓯᐎᓂᓕᐤ ᒪᒋᑐᑕᒻ ᑎᐱᓚᐌ ᐎᔭᐤ᙮ 19 ᑫᒀᓐ! ᓇᒪ ᓈ ᑭ ᑭᔅᑫᓕᑌᓇᐗᐤ ᑭᔭᐎᐗᐤ ᐁ ᐅᑦ ᐋᔭᒥᐁᐎᑲᒥᑯᒥᑦ ᐸᓓᑭ ᐊᒑᒃ, ᑳ ᐱᒋᔅᑳᑖᒃ, ᑳ ᑮ ᒥᓕᑖᒃ ᑭᒋᒪᓂᑐ, ᓀᔥᑕ ᐁᑳ ᐁ ᑎᐯᓕᒥᑎᓱᔦᒃ? 20 ᐌᓴ ᑭ ᑮ ᐅᑎᓂᑲᐎᓇᐗᐤ ᐁ ᑮ ᑎᐸᐅᑲᐎᔦᒃ: ᐁᐗᑯ ᐅᒋ ᑭᔅᑌᓕᒥᒃ ᑭᒋᒪᓂᑐ ᑭᔭᐎᐗᒃ, ᓀᔥᑕ ᑭᑦ ᐊᒑᑯᐙᒃ, ᑳ ᑎᐯᓕᑕᒃ ᑭᒋᒪᓂᑐ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society