ᓂᔥᑕᒻ ᑯᕆᓐᑎᐊᓇ 5 - ᐅᔅᑭ ᑎᔅᑌᒥᓐᑦᐱᔑᒀᑎᓯᐎᓐ ᒣᑯᔦᔥ ᐅᑖᐺᑕᒧᐗᒃ 1 ᐃᑖᒋᒧᓋᓂᐗᓐ ᐁ ᐃᑕᑾᒃ ᐱᔑᒀᑎᓯᐎᓐ ᐃᑕ ᐁ ᐃᑖᔦᒃ, ᓀᔥᑕ ᑐᐎ ᐱᔑᒀᑎᓯᐎᓐ ᐁᑳ ᐃᔥᐱᔥ ᑳ ᐋᓕᒧᒋᑳᑌᒃ ᐃᑕ ᐁ ᐃᑖᒋᒃ ᒉᓐᑖᐃᓚᒃ, ᐊᐌᓇ ᑭᒋ ᐋᔮᐄᒫᑦ ᐅᑖᐎᔭ ᐎᐎᓕᐗ᙮ 2 ᓀᔥᑕ ᑭ ᑭᔅᑌᓕᒧᓇᐗᐤ, ᓇᒪ ᓀᔥᑕ ᓇᐗᒡ ᑭ ᓇᓀᑳᒋᒧᓇᐗᐤ, ᐊᓇ ᑳ ᑮ ᑐᑕᒃ ᐅᒣᓕᐤ ᑭᒋ ᐃᑲᑌᓈᑲᓂᐎᑦ ᐃᑕ ᐁ ᐃᑕᔦᒃ᙮ 3 ᐌᓴ ᓂᓚ ᑖᐺ, ᐁ ᐃᑖᐱᒋᔮᓐ ᓂᔭᐎᒃ, ᒫᑲ ᐁ ᐎᒉᐎᑕᑾᒃ ᓂᑦ ᐊᒑᑯᒃ, ᐋᔕᔾ ᓂ ᑮ ᑎᐹᔅᑯᓂᑳᓐ, ᑖᐱᔅᑯᒡ ᐁ ᐎᒉᐎᑕᑾᒃ ᐊᓇ ᐅᒋ ᐅᒣᓕᐤ ᑳ ᑮ ᑐᑕᒃ; 4 ᐅᑦ ᐃᔑᓂᑳᓱᐎᓂᒃ ᑭ ᑎᐯᓕᒋᑫᒥᓇᐤ ᒋᓴᔅ ᙭, ᐃᔅᐱ ᒫᒪᐎ ᒫᐗᒋᐃᑐᔦᑴ, ᓀᔥᑕ ᓂᑦ ᐊᒑᒃ, ᐊᓯᒋ ᐅ ᑲᔥᑭᐅᐎᓐ ᑭ ᑎᐯᓕᒋᑫᒥᓇᐤ ᒋᓴ ᙭, 5 ᐊᓇ ᑐᐎ ᑭᒋ ᐸᑭᑎᓇᒪᐌᒃ ᓭᑖᓐ, ᑭᒋ ᓂᔑᐗᓋᑕᓂᓕᒃ ᐎᔭᔅ, ᐅᑦ ᐊᒑᑾ ᑭᒋ ᐱᒫᒋᐋᑲᓂᐎᓕᒋ ᐅ ᑭᔑᑳᒥᒃ ᑭ ᑎᐯᓕᒋᑫᒥᓇᐤ ᒋᓴᔅ᙮ 6 ᑭ ᒫᒪᑖᑯᒧᐎᓂᐗᐤ ᓇᒪᐎᓚ ᒥᓨᔑᓐ, ᓇᒪ ᓈ ᑭ ᑭᔅᑫᓕᑌᓇᐗᐤ ᒫᓐᔑᔥ ᐅᐱᓯᑲᓐ ᒥᓯᐌ ᐁ ᐅᐱᓯᑫᒪᑲᒃ? 7 ᐌᐱᓂᒃ ᒫᑲ ᑳᔮᔥ ᐅᐱᓯᑲᓐ, ᑭᒋ ᐅᔥᑭ ᒥᓯᐌᓯᔦᒃ, ᐁᑳ ᐁ ᐅᐱᓯᐃᑲᐎᔦᒃ᙮ ᐌᓴ ᐙᐙᒡ ᙭ ᑮ ᒥᔮᔥᑳᑫᐎ ᒫᓂᔥᒑᓂᔑᔑᒪᐤ ᓂᐸᐋᑲᓂᐎᐤ ᑭᓚᓈᓇᐤ ᐅᒋ: 8 ᐁᐗᑯ ᐅᒋ ᑲᓇᐌᓕᑖᑕᐤ ᒪᑯᔐᐎᓐ, ᐁᑳ ᐁ ᐋᐸᒋᐋᒃ ᑳᔮᔥ ᐅᐱᓯᑲᓐ, ᐁᑳ ᓀᔥᑕ ᐅᐱᓯᑲᓐ ᑭᓯᔅᑖᑐᐎᓂᒃ ᓀᔥᑕ ᒪᒑᑎᓯᐎᓂᒃ ᑳ ᐅᒋᐸᓕᒃ; ᒫᑲ ᐁᑳ ᐁ ᐅᐱᓱᑦ ᐊᓚᑯᓇᐤ ᒀᔭᔉ ᐃᑌᓕᑕᒧᐎᓐ ᓀᔥᑕ ᑖᐺᐎᓐ᙮ 9 ᑭ ᑮ ᒪᓯᓇᐊᒫᑎᓇᐗᐤ ᒪᓯᓇᐊᒫᑫᐎᓂᒃ ᐁᑳ ᑭᒋ ᐅ ᐎᒉᐙᑲᓂᔦᒃ ᐅᐱᔑᒀᑎᓯᔅᑲᒃ: 10 ᐁᓕᐌᒃ ᒫᑲ ᓇᒪᐎᓚ ᒥᑐᓂ ᑭ ᑭᑕᐊᒫᑎᓇᐗᐤ ᑭᒋ ᐎᒉᐌᑾᒃ ᐅᐱᔑᒀᑎᓰᔅᑲᒃ ᐅᑕ ᐊᔅᑮᒃ, ᓀᔥᑕ ᐅ ᒧᔅᑌᓇᒫᑫᔅᑲᒃ, ᓀᔥᑕ ᐅᒪᔅᑲᑗᔅᑲᒃ, ᓀᔥᑕ ᑳ ᓇᐗᑭᔅᑕᐙᒋᒃ ᒪᓂᑐᑳᓇ; ᐌᓴ ᐁᑯᔅᐱ ᑫ ᐗᓚᐎᔦᑯᐸᓐ ᐊᔅᑮᒃ ᐅᒋ᙮ 11 ᒫᑲ ᐊᓄᒡ ᑭ ᑮ ᒪᓯᓇᐊᒫᑎᓇᐗᐤ, ᐁᑳ ᑭᒋ ᐎᒉᐌᒃ ᐊᐌᓇ ᐎᒋᔖᓂᒪᐤ ᑳ ᐃᔑᓂᑳᑖᑲᓂᐎᑦ, ᑳ ᐱᔑᒀᑎᓯᔅᑭᑦ, ᓀᔥᑕ ᑳ ᒧᔅᑌᓇᒫᑫᔅᑭᑦ, ᓀᔥᑕ ᑳ ᓇᐗᑮᔅᑕᐙᑦ ᒪᓂᑐᑳᓇ, ᓀᔥᑕ ᑳ ᒫᓓᓕᒋᑫᔅᑭᑦ, ᓀᔥᑕ ᑳ ᑭᔥᑴᐯᔅᑭᑦ, ᓀᔥᑕ ᑳ ᒪᔅᑲᑗᔅᑭᑦ; ᐊᐌᓇ ᐊᐗ ᑐᐎ, ᐁᑳ ᐙᐙᒡ ᑭᒋ ᐎᒋᒥᒋᓱᒣᒃ᙮ 12 ᐌᓴ ᑫᒀᓐ ᐁᔮᔮᓐ ᑭᒋ ᑎᐹᔅᑯᓇᑭᒃ ᐊᓂᑭ ᐗᓚᐎᑎᒥᒃ ᑳ ᐃᑖᒋᒃ? ᓇᒪ ᓈ ᑭᓚᐗᐤ ᑭ ᑎᐹᔅᑯᓇᐗᐗᒃ ᐊᓂᑭ ᐱᑐᑲᒥᒃ ᑳ ᐃᑖᒋᒡ? 13 ᒫᑲ ᐊᓂᐃ ᐗᓚᐎᑎᒥᒃ ᑳ ᐃᑖᓕᒋ ᑭᒋᒪᓇᑐ ᑎᐹᔅᑯᓀᐤ᙮ ᐁᐗᑯ ᐅᒋ ᐃᑲᑌᓂᐤ ᐃᑕ ᐅᒋ ᐁ ᐃᑖᔦᒃ ᐊᓇ ᒪᒑᑎᓯᐎ ᐃᓕᓕᐤ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society