ᓂᔥᑕᒻ ᑯᕆᓐᑎᐊᓇ 14 - ᐅᔅᑭ ᑎᔅᑌᒥᓐᑦᒥᓕᐌᐎᓇ ᐊᒑᒃ ᐅᒋ 1 ᓄᔅᐱᓈᑕᒧᒃ ᓵᑭᐃᐌᐎᓐ, ᓀᔥᑕ ᓇᑕᐌᓕᑕᒧᒃ ᐊᒑᑯᐎ ᒥᓕᐌᐎᓇ; ᐊᐙᓯᑌ ᒫᑲ ᑭᒋ ᑭᔅᑭᐙᐃᑫᔦᒃ᙮ 2 ᐌᓴ ᐊᓇ ᑳ ᐋᔭᒥᑦ ᐁᑳ ᑳ ᑭᔅᑫᓂᑖᑾᒃ ᐃᔑᑭᔗᐎᓂᒃ, ᓇᒪᐎᓚ ᐊᔭᒥᐁᐤ ᐃᓕᓕᐗ, ᒫᑲ ᑭᒋᒪᓂᑐᐗ: ᐌᓴ ᓇᒪᐎᓚ ᐊᐌᓕᐗ ᓂᓯᑐᑖᑯ; ᐁᓕᐌᒃ ᒫᑲ ᐊᒑᑯᒃ ᑳᒋ ᑫᒀᓇ ᐋᔨᑗᐤ᙮ 3 ᒫᑲ ᐊᓇ ᑳ ᑭᔅᑭᐙᐃᑫᑦ ᐋᔭᒥᐁᐤ ᐃᓕᓕᐗ, ᑭᒋ ᑭᔅᑭᓄᐊᒪᐙᑦ, ᓀᔥᑕ ᑲᑫᔅᑭᒫᑦ, ᓀᔥᑕ ᑳᑭᒋᐋᑦ᙮ 4 ᐊᓇ ᑳ ᐋᔭᒥᑦ ᐁᑳ ᑳ ᑭᔅᑫᓕᑖᑾᒃ ᐃᔑᑭᔗᐎᓂᒃ, ᑭᔅᑭᓄᐊᒫᓱ; ᒫᑲ ᐊᓇ ᑳ ᑭᔅᑭᐙᐃᑫᑦ ᑭᔅᑭᓄᐊᒪᐌᐤ ᒫᒪᐎᐋᔭᒥᐋᐗ᙮ 5 ᓂ ᑳ ᓇᑕᐌᓕᑌᑖᔾ ᒥᓯᐌ ᐁ ᐃᑕᔑᔦᒃ ᓇᓈᑲᐤ ᑭᒋ ᐃᔑᑭᔗᔦᒃ, ᓇᐗᒡ ᒫᑲ ᑭᒋ ᑭᔅᑭᐙᐃᑫᔦᒃ: ᐌᓴ ᐊᐙᓯᑌ ᑭᔅᑌᓕᑖᑯᓯᐤ ᐊᓇ ᑳ ᑭᔅᑭᐙᐃᑫᑦ ᐃᔥᐱᔥ ᐊᓇ ᓇᓈᑲᐤ ᐁ ᐃᔑᑭᔗᑦ, ᐱᑯ ᑮᔥᐱᓐ ᐃᑗᔅᑕᒃ, ᒫᒪᐎᐋᔭᒥᐋᐗ ᑭᒋ ᑭᔅᑭᓄᐊᒫᓕᒋ᙮ 6 ᒫᑲ, ᓂᒋᔖᓂᑐᒃ, ᑮᔥᐱᓐ ᐯᒋ ᓈᑎᑕᑾᒃ ᓈᓈᑲᐤ ᐁ ᐃᔑᑭᔗᔮᓐ, ᑫᒀᓐ ᑫ ᐃᑖᐸᒋᐃᑕᑾᒃ, ᑮᔥᐱᓐ ᐱᑯ ᐋᔭᒥᐃᑕᑾᑫ ᑭᔅᑫᓕᑖᑯᑖᑫᐎᓂᒃ, ᓀᔥᑕᐱᑯ ᑭᔅᑫᓕᑕᒧᐎᓂᒃ, ᓀᔥᑕᐱᑯ ᑭᔅᑭᐙᐃᑫᐎᓂᒃ, ᓀᔥᑕᐱᑯ ᑭᔅᑭᓄᐊᒫᑫᐎᓂᒃ ᐅᒋ? 7 ᓀᔥᑕ ᐙᐙᒡ ᐁᑳ ᑳ ᐱᒫᑕᑭ, ᐁ ᓄᑕᑾᑭ, ᑮᔥᐱᓐ ᐱᐱᒀᓐ ᓀᔥᑕᐱᑯ ᔖᑲᓈᐱᑭᑐᒋᑲᓐ, ᑮᔥᐱᓐ ᐁᑳ ᐹᔦᑌᑖᑾᑭ, ᑖᓂ ᑫ ᐃᔑ ᑭᔅᑫᓕᒋᑳᑌᒃ ᑖᓐ ᐁᑗᒪᑲᒃ ᐱᐱᒀᓐ ᓀᔥᑕᐱᑯ ᔖᑲᓈᐱᑭᑐᒋᑲᓐ? 8 ᐌᓴ ᑮᔥᐱᓐ ᐳᑖᒋᑲᓐ ᐁᑳ ᑫᒋᓇᑖᑾᑭ, ᐊᐌᓇ ᑫ ᐋᔦᔅᑲᐎᐃᑎᓯᑦ ᑭᒋ ᓇᑐᐸᓕᑦ? 9 ᐁᑯ ᑖᐱᔅᑯᒡ ᑭᓚᐗᐤ, ᑮᔥᐱᓐ ᐱᑯ ᐗᔪᑗᔦᑯ ᐋᔭᒥᐎᓇ ᐎᔦᑕᑭ ᑭᒋ ᓂᓯᑐᒋᑳᑌᑭ, ᑖᓂ ᑫ ᐃᔑ ᑭᔅᑫᓕᒋᑳᑌᒃ ᑫᒀᓐ ᑳ ᐃᑣᓂᐗᒃ? ᐌᓴ ᑭ ᑳ ᐋᔭᒥᑖᓇᐗᐤ ᐁ ᓗᑎᒃ᙮ 10 ᐃᑕᑾᓋ, ᑭᔅᑎᓈᒡ, ᐁ ᒥᒉᑎᑭ ᐹᐱᑐᔥ ᐯᑖᑯᓯᐎᓇ ᐅᑕ ᐊᔅᑮᒃ, ᓇᒪ ᐙᐙᒡ ᐯᔭᒃ ᐁ ᐃᑕᑎᑭ ᒫᑲ ᐁᑳ ᐁ ᓂᓯᑕᐌᓕᒋᑳᑌᒃ᙮ 11 ᑮᔥᐱᓐ ᒫᑲ ᐁᑳ ᑭᔅᑫᓕᑕᒫᓐ ᑖᓐ ᐁᑗᒪᑲᒃ ᐯᑖᑯᓯᐎᓐ, ᐋᔭᒡ ᐃᓕᓕᐤ ᓂ ᑳ ᐃᑌᓕᒥᒃ ᐊᓇ ᑳ ᐋᔭᒥᑦ, ᓀᔥᑕ ᐊᓇ ᑳ ᐋᔭᒥᑦ ᐋᔭᒡ ᐃᓕᓕᐤ ᓂ ᑳᐃᑌᓕᒪᐤ᙮ 12 ᐁᑯ ᑖᐱᔅᑯᒡ ᑭᓚᐗᐤ, ᓈᔅᐱᒡ ᐁ ᓇᑕᐌᓕᑕᒣᒃ ᐊᒑᑯᐎ ᒥᓕᐌᐎᓇ, ᓈᓇᑕᐌᓕᑕᒧᒃ ᑭᒋ ᐃᔑ ᐸᔅᑭᓛᑫᔦᒃ ᑭᒋ ᑭᔅᑭᓄᐊᒪᐌᑾᒃ ᒫᒪᐎᐋᔭᒥᐋᐗᒃ᙮ 13 ᐁᑯᔑ ᒫᑲ ᐊᓇ ᑳ ᐋᔮᒥᑦ ᐁᑳ ᑳ ᑭᔅᑫᓕᑖᑾᒃ ᐃᔑᑭᔗᐎᓂᒃ, ᑲᑕ ᐸᑯᓭᓕᑕᒻ ᑭᒋ ᐃᑗᔅᑕᒃ᙮ 14 ᐌᓴ ᑮᔥᐱᓐ ᐋᔭᒥᔮᓐ ᐁᑳ ᑳ ᑭᔅᑫᓕᑖᑾᒃ ᐃᔑᑭᔗᐎᓂᒃ, ᓂᑦ ᐊᒑᒃ ᐋᔭᒥᐊᐤ, ᒫᑲ ᓂ ᓂᓯᑐᑕᒧᐎᓐ ᓇᒪᐎᓚ ᓈᓐᑕᐤ ᐃᑖᐸᑕᓐ᙮ 15 ᑫᒀᓐ ᒫᑲ, ᓂ ᑳ ᐋᔭᒥᐋᓐ ᐊᒑᑯᒃ, ᓂ ᑳ ᐋᔭᒥᐋᓐ ᓂᓯᑐᑕᒧᐎᓂᒃ ᓀᔥᑕ: ᓂ ᑳ ᓂᑲᒧᓐ ᐊᒑᑯᒃ, ᓂ ᑳ ᓂᑲᒧᓐ ᓂᓯᑐᑕᒧᐎᓂᒃ ᓀᔥᑕ᙮ 16 ᑮᔥᐱᓐ ᐁᑳ, ᐃᔅᐱ ᒥᓦᑭᒥᐌᔭᓀ ᐊᒑᑯᒃ, ᐊᓇ ᑳ ᐊᐱᑦ ᐁᑳ ᑳ ᑭᔅᑫᓕᑕᒧᐎᓯᑦ ᑖᓂ ᑫ ᐃᔑ ᐃᑗᑦ ᐁᒣᓐ, ᐁ ᓈᓈᔅᑯᒧᔭᓐ, ᐁᑳ ᐁ ᓂᓯᑐᑕᒃ ᑫᒀᓐ ᑳ ᐃᑗᔭᓐ? 17 ᐌᓴ ᑖᐺ ᒀᔭᔉ ᑭ ᓇᓈᔅᑯᒧᓐ, ᒫᑲ ᐊᓇ ᑯᑕᒃ ᓇᒪᐎᓚ ᑭᔅᑭᓄᐊᒪᐤ᙮ 18 ᓂ ᓇᓈᔅᑯᒪᐤ ᓂ ᑭᒋᒪᓂᑐᒻ, ᐊᐙᓯᑌ ᓇᓈᑲᐤ ᓂᑦ ᐃᔑᑭᔣᓐ ᐃᔥᐃᔥ ᒥᓯᐌ ᐁ ᐃᑕᔑᔦᒃ: 19 ᐁᓕᐌᒃ ᒫᑲ ᐋᔭᒥᐁᐎᑲᒥᑯᒃ ᐊᐙᓯᑌ ᓂ ᑳ ᓇᒪᓕᑌᑖᔾ ᓂᔮᓚᓐ ᐋᔭᒥᐎᓇ ᑭᒋ ᐃᑗᔮᓐ ᑳ ᓂᓯᑐᑕᒫᒃ, ᐁ ᐯᑖᑯᓯᔮᓐ ᑯᑕᑭᔭᒃ ᓀᔥᑕ ᑭᒋ ᑭᔅᑭᓄᐊᒪᐗᑭᒃ, ᐃᔥᐱᔥ ᒥᑖᑡᐤ ᑭᒋᒥᑖᑐᒥᑕᓇᐤ ᐋᔭᒥᐎᓇ ᐁᑳ ᑳ ᑭᔅᑫᓕᑖᑾᒃ ᐃᔑᑭᔗᐎᓂᒃ᙮ 20 ᓂᒋᔖᓂᑐᒃ, ᐁᑳᐎᓚ ᐊᐙᔑᔑᐎᒃ ᓂᓯᑐᑕᒧᐎᓂᒃ: ᒫᑲ ᐎᓚ ᑭᓰᔅᑖᑐᐎᓂᒃ ᐊᐙᔑᔑᐎᒃ, ᒫᑲ ᓂᓯᑐᑕᒧᐎᓂᒃ ᑭᔖᐯᐎᒃ᙮ 21 ᐅᓚᔓᐌᐎᓂᒃ ᐃᑕᓯᓇᐃᑳᑌᐤ, ᐃᓕᓕᐗ ᐱᑐᔥ ᐁ ᐃᔑᑭᔗᓕᒋ ᓀᔥᑕ ᐱᑐᔥ ᐁ ᐅᑐᓂᐎᓕᒋ ᓂ ᑳ ᐅᒋ ᐋᔭᒥᐋᐗᒃ ᐅᑯ ᐃᓕᓕᐗᒃ; ᐁᓕᐌᒃ ᒫᑲ ᓇᒪᐎᓚ ᓂ ᑳ ᓇᑐᑖᑾᒃ, ᐃᑗᐤ ᐅᑎᐯᓕᒋᑫᐤ᙮ 22 ᐁᐗᑯ ᐅᒋ ᓇᓈᑲᐤ ᐃᔑᑭᔗᐎᓇ ᓇᒪᐎᓚ ᑭᔅᑭᓄᐙᒋᒋᑲᓂᑳᑕᒪᐗᐗᒃ ᐊᓂᑭ ᑳ ᑖᐺᑕᑭᒃ, ᒫᑲ ᐊᓂᑭ ᐁᑳ ᑳ ᑖᐺᑕᑭᒃ: ᒫᑲ ᑭᔅᑭᐙᐃᑫᐎᓐ ᓇᒪᐎᓚ ᓈᓐᑕᐤ ᐃᑖᐸᒋᐃᑯᐗᒃ ᐊᓂᑭ ᐁᑳ ᑳ ᑖᐺᑕᑭᒃ, ᒫᑲ ᐊᓂᑭ ᑳ ᑖᐺᑕᑭᒃ᙮ 23 ᑮᔥᐱᓐ ᒫᑲ ᒥᓯᐌ ᒫᒪᐎᐋᔭᒥᐋᐗᒃ ᐯᔭᑾᓄᒃ ᒪᐗᒋᐃᑐᒋᒃ, ᓀᔥᑕ ᒥᓯᐌ ᓇᓈᑲᐤ ᐃᔑᑭᔗᒋᒃ, ᐯᒋ ᐱᑐᑫᑡᐎ ᒫᑲ ᐊᐌᓂᑭ ᐁᑳ ᑫᔅᑫᓕᑕᒧᐎᓯᒋᒃ ᓀᔥᑕᐱᑯ ᐁᑳ ᑎᐋᐺᑕᑭᒃ, ᓇᒪ ᓈ ᑲᑕ ᐃᑗᐗᒃ ᐁ ᑭᔥᑴᔦᒃ? 24 ᒫᑲ ᑮᔥᐱᓐ ᒥᓯᐌ ᑭᔅᑭᐙᐃᑫᒋᒃ, ᐯᒋ ᐱᑐᑫᑌ ᒫᑲ ᐊᐌᓇ ᐁᑳ ᑎᐋᐺᑕᒃ, ᓀᔥᑕᐱᑯ ᐊᐌᓇ ᐁᑳ ᑫᔅᑫᓕᑕᒧᐎᓯᑦ, ᒥᓯᐌ ᐃᔑ ᔖᑯᒋᒪᐤ, ᒥᓯᐌ ᐅᒋ ᑎᐹᔅᑯᓇᐤ: 25 ᐁᑯ ᐃᔑ ᓀᔥᑕ ᓂᐅᑯᑖᓂᐗᓂᓕᑭ ᑭᒧᑎᓯᐎᓇ ᐅᑌᐃᒃ; ᐁᑯ ᒫᑲ, ᐁ ᐅᑎᐱᐸᓕᐅᑦ, ᑲᑕ ᐋᔭᒥᐁᔅᑕᐌᐤ ᑭᒋᒪᓂᑐᐗ, ᓀᔥᑕ ᑲᑕ ᐎᑕᒻ ᑖᐺ ᐁ ᐎᒉᐅᑖᒃ ᑭᒋᒪᓂᑐ᙮ ᒀᔭᔉ ᐁ ᓇᑭᔥᑳᑐᓈᓂᐗᒃ ᐊᔭᒥᐁᐎᑲᒥᑯᒃ 26 ᑖᓐ ᐁᔑ ᐃᑭᒃ, ᓂᒋᔖᓂᑐᒃ? ᐃᔅᐱ ᐯᒋ ᒪᐗᒋᐃᑐᔦᒃ, ᑕᑐ ᐁ ᐃᑕᔑᔦᒃ ᐋᔭᐤ ᓂᑲᒧᐎᓐ, ᐋᔭᐤ ᑭᔅᑭᓄᐊᒫᑫᐎᓐ, ᐋᔭᐤ ᐃᔑᑭᔗᐎᓐ, ᐋᔭᐤ ᑭᔅᑫᓕᑖᑯᑖᑫᐎᓐ, ᐋᔭᐤ ᐃᑗᔅᑕᒫᑫᐎᓐ᙮ ᐁᑯᔑ ᒥᓯᐌ ᑫᒀᓇ ᑲᑕ ᑐᒋᑳᑌᐤ ᑭᒋ ᐃᔑ ᑭᔅᑭᓄᐊᒫᑳᓂᐗᒃ᙮ 27 ᑮᔥᐱᓐ ᐊᐌᓇ ᐃᓕᓕᐤ ᐃᐋᔭᒥᑴ ᐁᑳ ᑳ ᑭᔅᑫᓕᑖᑾᒃ ᐃᔑᑭᔗᐎᓂᒃ, ᐁᑯᔑ ᑲᑕ ᓂᔑᐗᒃ, ᓀᔥᑕᐱᑯ ᐅᓵᒻ ᓂᔅᑐ, ᓀᔥᑕ ᒣᒥᔅᑯᒡ ᐃᔑ; ᐁᑯᔑ ᒫᑲ ᐯᔭᒃ ᐊᐌᓇ ᑲᑕ ᐃᑗᔅᑕᒫᑫᐤ᙮ 28 ᒫᑲ ᑮᔥᐱᓐ ᐁᑳ ᐁᑖᓕᑴ ᐅᑎᑗᔅᑕᒫᑫᐗ, ᐁᑯᔑ ᐁᑳᐎᓚ ᑲᑕ ᑭᑐ ᐋᔭᒥᐁᐎᑲᒥᑯᒃ; ᐁᑯᔑ ᓀᔥᑕ ᑲᑕ ᐗᔭᒥᐃᑎᓱ ᓀᔥᑕ ᑭᒋᒪᓂᑐᐗ᙮ 29 ᐁᑯᔑ ᓂᔓ ᓀᔥᑕᐱᑯ ᓂᔅᑐ ᐅᑭᔅᑭᐙᐃᑫᐗᒃ ᑲᑕ ᐋᔭᒥᐗᒃ, ᐁᑯᔑ ᓀᔥᑕ ᑯᑕᒃ ᑲᑕ ᑎᐹᔅᑯᓀᓕᑕᒻ᙮ 30 ᑮᔥᐱᓐ ᑫᒀᓐ ᑫᔅᑫᓕᑕᒥᐋᑲᓂᐎᑴ ᑯᑕᒃ ᐊᐌᓇ ᑳ ᐊᐱᑦ, ᐁᑯᔑ ᐊᓇ ᓃᔥᑕᒻ ᑲᑕ ᐳᓂ ᑭᑐ᙮ 31 ᐌᓴ ᒥᓯᐌ ᐁ ᐃᑕᔑᔦᒃ ᐯᐯᔭᒃ ᑭ ᑳ ᑭᔅᑭᐙᐃᑳᓇᐗᐤ, ᒥᓯᐌ ᑭᒋ ᑭᔅᑭᓄᐊᒫᑲᐎᔦᒃ ᓀᔥᑕ ᒥᓯᐌ ᑭᒋ ᑳᑭᒋᐃᑲᐎᔦᒃ᙮ 32 ᓀᔥᑕ ᐅᑭᔅᑭᐙᐃᑫᐗᒃ ᑎᐯᓕᒥᒣᐗᒃ ᐅᑭᔅᑭᐙᐃᑫᐗᒃ ᐅᑦ ᐊᒑᑯᐗᐗ᙮ 33 ᐌᓴ ᑭᒋᒪᓂᑐ ᓇᒪᐎᓚ ᑮ ᐅᓚᑭᑕᒻ ᐋᔑᑌᒥᑐᐎᓂᓕᐤ, ᒫᑲ ᑳᔮᒣᓕᑕᒧᐎᓂᓕᐤ, ᐁ ᐃᔑ ᐃᑭᓂᓕᒃ ᒥᓯᐌ ᐅᑦ ᐋᔭᒥᐁᐎᑲᒥᑯᐙᒃ ᐅᐸᓓᑭᓴᒃ᙮ 34 ᐁᑯᔑ ᑭᑦ ᐃᔅᑴᒥᐗᐗᒃ ᓇᒪᐎᓚ ᑲᑕ ᑭᑐᐗᒃ ᐋᔭᒥᐁᐎᑲᒥᑯᒃ: ᐌᓴ ᐎᓚᐗᐤ ᓇᒪᐎᓚ ᐃᓕᓇᐗᒃ ᑭᒋ ᐋᔭᒥᒋᒃ; ᒫᑲ ᐃᑕᔓᐗᐗᒃ ᑭᒋ ᐃᑖᒋᒃ ᓇᓇᐃᑕᒧᐎᓂᒃ, ᐁ ᐃᑗᒪᑲᒃ ᓀᔥᑕ ᐅᓚᔓᐌᐎᓐ᙮ 35 ᑮᔥᐱᓐ ᒫᑲ ᓇᑕᐎᑭᔅᑫᓕᑕᑭᒃ ᑫᒀᓕᐤ, ᐁᑯᔑ ᑲᑕ ᑲᑴᒋᒣᐗᒃ ᐅ ᓈᐯᒥᐗᐗ ᐎᑭᐙᒃ; ᐌᓴ ᓇᓀᐯᐌᓕᑖᑾᓂᓕᐤ ᐃᔅᑴᐗᒃ ᑭᒋ ᐋᔭᒥᒋᒃ ᐋᔭᒥᐁᐎᑲᒥᑯᒃ᙮ 36 ᑖᓀᑭ? ᐃᑕ ᐁ ᐃᑖᔦᒃ ᓈ ᑮ ᐅᒋᐸᓕᓕᐤ ᑭᒋᒪᓂᑐ ᐅᑦ ᐋᔭᒥᐎᓐ? ᓀᔥᑕᐱᑯ ᑭᓚᐗᐤ ᐱᑯ ᑭ ᑮ ᐯᒋ ᐅᑎᑎᑯᐙᓇᐗᐤ? 37 ᑮᔥᐱᓐ ᐊᐌᓇ ᐃᓕᓕᐤ ᐁᑌᓕᒥᑎᓱᑴ ᐁ ᐅᑭᔅᑭᐙᐃᑫᐎᑦ, ᓀᔥᑕᐱᑯ ᐁ ᐊᒑᑯᐎᐃᑖᑎᓰᑦ, ᐁᑯᔑ ᑲᑕ ᐎᑕᒻ ᐊᓂᐃ ᑳ ᒪᓯᓇᐊᒫᑕᑾᒃ ᐁᐗᒀᓂᐃ ᐅ ᑲᑫᔅᑴᐎᓇ ᐅᑎᐯᓕᒋᑫᐤ᙮ 38 ᒫᑲ ᑮᔥᐱᓐ ᐊᐌᓇ ᐃᓕᓕᐤ ᐁᑳ ᑫᔅᑫᓕᑕᑭ, ᐁᑯᔑ ᐁᑳᐎᓚ ᑳᑕ ᑭᔅᑫᓕᑕᒻ᙮ 39 ᐁᐗᑯ ᐅᒋ, ᓂᒋᔖᓂᑐᒃ, ᒧᔅᑌᓇᒧᒃ, ᑭᒋ ᑮ ᑭᔅᑭᐙᐃᑫᔦᒃ, ᐁᑳᐎᓚ ᓀᔥᑕ ᑭᑕᐊᒫᑫᒃ ᑭᒋ ᓇᓈᑲᐤ ᐃᔑᑭᔡᓂᐗᒃ᙮ 40 ᐁᑯᔑ ᒥᓯᐌ ᑫᒀᓇ ᑲᑕ ᐃᑐᒋᑳᑌᐗ ᐁ ᐃᔑ ᒥᓗᓈᑾᒃ ᓀᔥᑕ ᐁ ᐃᔑ ᒀᔭᔅᑾᒃ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society