ᓂᔥᑕᒻ ᑯᕆᓐᑎᐊᓇ 13 - ᐅᔅᑭ ᑎᔅᑌᒥᓐᑦᓵᑭᐃᐌᐎᓐ 1 ᐋᑕ ᐁ ᐋᔭᒥᔮᓐ ᐃᓕᓕᐗᒃ ᓀᔥᑕ ᐁᓐᒐᓚᒃ ᐅᑦ ᐃᔑᑭᔗᐎᓂᐙᒃ, ᑮᔥᐱᓐ ᐁᑳ ᐋᔮᔮᓐ ᓵᑭᐃᐌᐎᓐ, ᑖᐱᔅᑯᒡ ᐅᓵᐙᐱᔉ ᐁ ᒫᑗᑎᒃ, ᓀᔥᑕᐱᑯ ᑭᑐᒋᑲᓐ ᐁ ᓄᑖᑯᓯᒪᑲᒃ ᓂᑦ ᐃᑌᓕᑖᑯᓯᓐ᙮ 2 ᐋᑕ ᒫᑲ ᐁ ᐋᔮᔮᓐ ᒥᓕᑯᓯᐎᓐ ᑭᒋ ᑭᔅᑭᐙᐃᑫᔮᓐ, ᓀᔥᑕ ᓂᓯᑐᑕᒫᓐ ᒥᓯᐌ ᑳᒋ ᑫᒀᓇ, ᓀᔥᑕ ᒥᓯᐌ ᑭᔅᑫᓕᑕᒧᐎᓐ; ᐋᑕ ᒫᑲ ᐁ ᐋᔮᔮᓐ ᒥᓯᐌ ᑖᐺᔦᓕᑕᒧᐎᓐ, ᐃᔥᐱᔥ ᑭᒋ ᑮ ᐋᑕᔅᑖᔮᓐ ᐗᒋᔭ, ᐁᑳ ᒫᑲ ᐋᔮᔮᓐ ᓵᑭᐃᐌᐎᓐ, ᓇᒪᐎᓚ ᑫᒀᓐ ᓂᑦ ᐃᑌᓕᑖᑯᓯᓐ᙮ 3 ᐋᑕ ᒫᑲ ᐁ ᒥᓕᐌᔮᓐ ᒥᓯᐌ ᓂᑦ ᐋᔮᓇ ᑭᒋ ᐊᔕᒪᑭᒃ ᑳ ᒪᓀᓯᒋᒃ, ᐋᑕ ᒫᑲ ᐁ ᐸᑭᑎᓇᒫᓐ ᓂᔭᐤ ᑭᒋ ᐃᔅᒀᓯᑳᑌᒃ, ᐁᑳ ᒫᑲ ᐊᔮᔮᓐ ᓵᑭᐃᐌᐎᓐ, ᓇᒪᐎᓚ ᑫᒀᓐ ᓂ ᑲᔥᑭᑕᒫᑯᓐ᙮ 4 ᓵᑭᐃᐌᐎᓐ ᔑᐱᓚᐌᓯᒪᑲᓐ, ᓀᔥᑕ ᑭᔐᐙᑎᓯᒪᑲᓐ; ᓵᑭᐃᐌᐎᓐ ᓇᒪᐎᓚ ᐅᑌᓕᒋᑫᒪᑲᓐ; ᓵᑭᐃᐌᐎᓐ ᓇᒪᐎᓚ ᒫᒪᑖᑯᒥᑎᓱᒪᑲᓐ, ᓇᒪᐎᓚ ᒫᒪᑖᑯᓯᒪᑲᓐ, 5 ᓇᒪᐎᓚ ᐸᑾᓐᑕᐤ ᐋᔨᑎᒪᑲᓐ, ᓇᒪᐎᓚ ᓈᓇᑕᐌᓕᑕᒧᒪᑲᓐ ᑎᐱᓚᐌ ᑫᒀᓇ, ᓇᒪᐎᓚ ᐊᑫᐎᓚᐌᓯᒪᑲᓐ, ᓇᒪᐎᓚ ᒪᒋ ᒥᑐᓀᓕᒋᑫᒪᑲᓐ: 6 ᓇᒪᐎᓚ ᐅᒋ ᒥᓚᐙᑕᒧᒪᑲᓐ ᒪᒑᑎᓯᐎᓐ, ᒫᑲ ᒥᓚᐙᑕᒧᒪᑲᓐ ᑖᐺᐎᓐ: 7 ᒥᓯᐌ ᑫᒀᓇ ᔑᐱᓚᐌᓯᔅᑕᒧᒪᑲᓐ, ᒥᓯᐌ ᑫᒀᓇ ᑖᐺᑕᒧᒪᑲᓐ, ᒥᓯᐌ ᑫᒀᓇ ᐊᔅᐯᓕᒧᑕᒧᒪᑲᓐ, ᒥᓯᐌ ᑫᒀᓇ ᔕᔑᐯᓕᑕᒧᒪᑲᓐ᙮ 8 ᓵᑭᐃᐌᐎᓐ ᓇᒪᐎᔅᑳᑦ ᐃᔥᒀᐸᓕᐤ: ᐋᑕᐁᐃᑕᑾᑭ ᑭᔅᑭᐙᐃᑫᐎᓇ, ᑲᑕ ᐃᔥᒀᐸᓕᐗ; ᐋᑕ ᐁ ᐃᑕᑾᑭ ᐃᔑᑭᔗᐎᓇ, ᑲᑕ ᐳᓂᒪᑲᓋ: ᐋᑕ ᐁ ᐃᑕᑾᒃ ᑭᔅᑫᓕᑕᒧᐎᓐ, ᑲᑕ ᐹᔑᑯᓈᑾᓐ᙮ 9 ᐌᓴ ᐸᔅᑭ ᐱᑯ ᑭ ᑭᔅᑫᓕᑌᓈᓇᐤ, ᐸᔅᑭ ᓀᔥᑕ ᑭ ᑭᔅᑭᐙᐃᑳᓈᓇᐤ: 10 ᒫᑲ ᐃᔅᐱ ᐊᓂᒪ ᑳ ᒪᐗᒋ ᐸᔅᑭᓛᑫᒃ ᐅᑎᒋᐸᓕᑫ, ᐁᑯ ᐊᓂᒪ ᑳ ᐸᔅᑭ ᐃᑌᓕᑖᑾᒃ ᑫ ᐃᔥᒀᐸᓕᒃ᙮ 11 ᒣᒀᒡ ᐁ ᑮ ᐊᐙᔑᔑᐎᔮᓐ, ᓂ ᑮ ᐋᔭᒥᓐ ᑖᐱᔅᑯᒡ ᐊᐙᔑᔥ, ᓂ ᑮ ᓂᓯᑐᑌᓐ ᑖᐱᔅᑯᒡ ᐊᐙᔑᔥ, ᓂ ᑮ ᒥᑐᓀᓕᑌᓐ ᑖᐱᔅᑯᒡ ᐊᐙᔑᔥ: ᒫᑲ ᐃᔅᐱ ᐁᑎ ᑭᔖᐯᐎᔮᓐ, ᓂ ᑮ ᐌᐱᓀᓐ ᐊᐙᔑᔑᐎ ᑫᒀᓇ᙮ 12 ᐌᓴ ᐊᓄᒡ ᑭ ᐸᔅᐹᐱᓈᓇᐤ ᐁᑳ ᐁ ᐸᑲᔅᑭᓇᒪᒃ; ᒫᑲ ᐊᓂᒪ ᐃᔅᐱ ᒥᑖᔅᑕᒥᒃ ᑲᑕ ᐸᑲᔅᑭᓇᒧᒪᑲᓐ ᒥᑖᔅᑕᒥᒃ: ᐊᓄᒡ ᐸᔅᑭ ᓂ ᑭᔅᑫᓕᒋᑳᓐ; ᒫᑲ ᐊᓂᒪ ᐃᔅᐱ ᓂ ᑳ ᑭᔅᑫᓕᒋᑳᐤ ᑖᐱᔅᑯᒡ ᐁ ᐃᔑ ᑭᔅᑫᓕᒥᑲᐎᔮᓐ᙮ 13 ᐊᓄᒡ ᒫᑲ ᐃᑕᑾᓋ ᑖᐺᔦᓕᑕᒧᐎᓐ, ᐊᔅᐯᓕᒧᐎᓐ, ᓵᑭᐃᐌᐎᓐ, ᐅᐅ ᓂᔅᑐ; ᒫᑲ ᐊᓂᒪ ᑳ ᒪᐗᒋ ᑭᔅᑌᓕᑖᑾᒃ ᐁᐗᑯ ᓵᑭᐃᐌᐎᓐ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society