ᓂᔥᑕᒻ ᑯᕆᓐᑎᐊᓇ 12 - ᐅᔅᑭ ᑎᔅᑌᒥᓐᑦᒥᓕᐌᐎᓇ ᐸᓓᑭ ᐊᒑᒃ ᐅᒋ 1 ᐊᓂᐃ ᐊᒐᑯᐎ ᒥᓕᐌᐎᓇ ᐅᒋ, ᓂᒋᔖᓂᑐᒃ, ᓇᒪᐎᓚ ᑭ ᓇᑕᐌᓕᒥᑎᓇᐗᐤ ᐁᑳ ᑭᒋ ᑭᔅᑫᓕᑕᒣᒃ᙮ 2 ᑭ ᑭᔅᑫᓕᑌᓇᐗᐤ ᐁ ᑮ ᒉᓐᑖᐃᓕᐎᔦᒃ, ᐁ ᐗᓂᐎᓕᑲᐎᔦᒃ ᑭᒋ ᐊᑑᔅᑲᐌᑾᒃ ᐅᑯ ᐁᑳ ᑳ ᓂᑕᐌᒋᒃ ᒪᓂᑐᑳᓇᒃ, ᑖᐱᔅᑯᒡ ᑳ ᑮ ᐃᔑ ᑭᔅᑭᓄᑕᐃᑲᐎᔦᒃ᙮ 3 ᐁᐗᑯ ᐌᒋ ᑭᔅᑫᓕᑕᒥᐃᑕᑾᒃ, ᐁᑳ ᐊᐌᓇ ᐁ ᐅᒋ ᐋᔭᒥᑦ ᑭᒋᒪᓂᑐ ᐅᑦ ᐊᒑᑾ, ᒪᒋ ᐃᑌᓕᑖᑯᓯᐤ ᒋᓴᔅ, ᑭᒋ ᑮ ᐃᑗᑦ: ᐁᑳ ᓀᔥᑕ ᐊᐌᓇ ᑭᒋ ᑮ ᐃᑗᑦ, ᒋᓴᔅ ᐁᐗᑯ ᐅᑎᐯᓕᒋᑫᐤ, ᐱᑯ ᐸᓓᑭ ᐊᒑᑾ ᐅᒋ᙮ 4 ᐃᑕᑾᓋ ᒫᑲ ᐹᐱᑐᔥ ᐁ ᐃᔑᓈᑾᑭ ᒥᓕᐌᐎᓇ, ᒫᑲ ᐁᐗᒀᓇ ᑫᔮᐸᒡ ᐊᒑᒃ᙮ 5 ᐱᑐᑕᓋ ᓀᔥᑕ ᐋᔭᒥᐋᐎ ᐊᑑᔅᑫᐎᓇ, ᒫᑲ ᐁᐗᒀᓇ ᑫᔮᐸᒡ ᐅᑎᐯᓕᒋᑫᐤ᙮ 6 ᐹᐱᑐᔥ ᓀᔥᑕ ᐁ ᐃᔑ ᐋᔨᑎᓈᓂᐗᒃ, ᒫᑲ ᐁᐗᒀᓇ ᑫᔮᐸᒡ ᑭᒋᒪᓂᑐ ᒥᓯᐌ ᓀᔥᑕ ᒥᓯᐌ ᑳ ᑐᑕᒫᑫᑦ᙮ 7 ᒫᑲ ᐊᒑᒃ ᐅ ᐙᐸᑎᓕᐌᐎᓐ ᒥᓛᑲᓂᐎᐤ ᒥᓯᐌ ᑕᑐ ᐃᓕᓕᐤ ᑭᒋ ᐅᒋ ᐋᓕᐗᒃ ᐅᑎ᙮ 8 ᐌᓴ ᐯᔭᒃ ᒥᓛᑲᓂᐎᐤ ᐊᒑᑾ ᐅᒋ ᑲᑫᑕᐌᓕᑕᒧᐎ ᐋᔭᒥᐎᓂᓕᐤ; ᑯᑕᒃ ᑭᔅᑫᓕᑕᒧᐄ ᐊᔭᒥᐎᓂᓕᐤ ᐊᓂᐃ ᑫᔮᐸᒡ ᐊᒑᑾ ᐅᒋ; 9 ᑯᑕᒃ ᑖᐺᔦᓕᑕᒧᐎᓂᓕᐤ ᐊᓂᐃ ᑫᔮᐸᒡ ᐊᒑᑾ ᐅᒋ; ᑯᑕᒃ ᒥᓇᐙᒋᐃᐌᐎ ᒥᓕᐌᐎᓇ ᐊᓂᐃ ᑫᔮᐸᒡ ᐊᒑᑾ ᐅᒋ; 10 ᑯᑕᒃ ᑭᒋ ᒫᒪᔅᑳᒋᐃᔑᒋᑫᑦ; ᑯᑕᒃ ᑭᔅᑭᐙᐃᑫᐎᓂᓕᐤ; ᑯᑕᒃ ᑭᒋ ᓂᓯᑕᐌᓕᒫᑦ ᐊᒑᑾ; ᑯᑕᒃ ᓇᓈᑲᐤ ᐃᔑᑭᔗᐎᓇ; ᑯᑕᒃ ᑭᒋ ᐃᑗᔅᑕᒃ ᐃᔑᑭᔗᐎᓇ᙮ 11 ᒫᑲ ᒥᓯᐌ ᐅᐅ ᑐᑕᒻ ᐊᓇ ᑳ ᐯᔭᑯᑦ ᐊᒑᒃ ᑫᒋᐙᒃ, ᐁ ᒫᑎᓇᒪᐙᑦ ᒥᓯᐌ ᑕᑐ ᐊᐌᓕᐗ ᐁ ᐃᔑ ᐃᑌᓕᑕᒃ᙮ ᐯᔭᒃ ᒥᔮᐤ 12 ᐌᓴ ᑖᐱᔅᑯᒡ ᐁ ᐃᔑ ᐯᔭᑾᒃ ᒥᔭᐤ, ᓀᔥᑕ ᐁ ᐋᔮᒪᑲᒃ ᒥᒉᑦ ᐸᔅᑫᓯᐎᓇ, ᓀᔥᑕ ᒥᓯᐌ ᐸᔅᑫᓯᐎᓇ ᐊᓂᒪ ᐯᔭᒃ ᒥᔭᐎᒃ, ᐁ ᒥᒉᑎᑭ, ᐯᔭᑯ ᒥᔭᐎᐗᓐ; ᐁᑯ ᓀᔥᑕ ᑖᐱᔅᑯᒡ ᙭᙮ 13 ᐌᓴ ᐯᔭᒃ ᐊᒑᒃ ᐅᒋ ᒥᓯᐌ ᐁ ᐃᑕᔑᔭᒃ ᑭ ᓯᑲᐊᑖᑲᐎᓈᓇᐤ ᐯᔭᒃ ᒥᔭᐎᒃ, ᑮᔥᐱᓐ ᒎᐎᐗᑴ ᓀᔥᑕᐱᑯ ᒉᓐᑖᐃᓕᐗᑴ, ᑮᔥᐱᓐ ᐃᐋᐎᑳᓂᐗᑴ, ᓀᔥᑕᐱᑯ ᑌᐯᓕᒥᑎᓱᐗᑴ; ᓀᔥᑕ ᒥᓯᐌ ᑭ ᑮ ᒥᓂᒀᑕᒧᐃᑲᐎᓈᓇᐤ ᐯᔦᑯ ᐊᒑᑯᒃ ᐃᔑ᙮ 14 ᐌᓴ ᒥᔭᐤ ᓇᒪᐎᓚ ᐯᔭᑯ ᐸᔅᑫᓯᐎᓂᐗᓐ, ᒫᑲ ᒥᒉᑦ᙮ 15 ᑮᔥᐱᓐ ᒥᓯᑦ ᐃᑗᒪᑲᑫ, ᓇᒪᐎᓚ ᓂᓚ ᓂ ᒥᒋᒋᐎᓐ, ᐁᐗᑯ ᐌᒋ ᐁᑳ ᑎᐯᓕᑖᑯᓯᔮᓐ ᒥᔭᐎᒃ; ᓇᒪ ᓈ ᒫᑲ ᑎᐯᓕᑖᑾᓐ ᒥᔭᐎᒃ? 16 ᑮᔥᐱᓐ ᒫᑲ ᒥᑕᐗᑲᐃ ᐃᑗᒪᑲᑫ, ᓇᒪᐎᓚ ᓂᓚ ᓂ ᒥᔥᑭᔑᑯᐎᓐ, ᐁᐗᑯ ᐌᒋ ᐁᑳ ᑎᐯᓕᑖᑯᓯᔮᓐ ᒥᔭᐎᒃ; ᓇᒪ ᓈ ᒫᑲ ᑎᐯᓕᑖᑾᓐ ᒥᔭᐎᒃ? 17 ᑮᔥᐱᓐ ᒥᓯᐌ ᒥᔭᐤ ᑮ ᒥᔥᑭᔑᑯᐗᓄᑯᐸᓀ, ᑖᓐᑌ ᑫ ᐅᒋ ᐯᒋᑳᑌᒃ? ᑮᔥᐱᓐ ᒥᓯᐌ ᑮ ᐯᑕᒧᐎᓂᐗᓄᑯᐸᓀ, ᑖᓐᑌ ᑫ ᐅᒋ ᒥᓛᒋᑳᑌᒃ? 18 ᒫᑲ ᐎᓚ ᑭᒋᒪᓂᑐ ᑮ ᐃᑕᔅᑕᐤ ᐸᔅᑫᓯᐎᓇ ᒥᓯᐌ ᐁ ᐃᑕᑎᑭ ᒥᔭᐎᒃ, ᑳ ᐃᔑ ᒥᓜᓕᑕᒃ᙮ 19 ᑮᔥᐱᓐ ᓀᔥᑕ ᒥᓯᐌ ᐊᓂᐃ ᑮ ᐯᔭᑯ ᐸᔅᑫᓯᐎᓂᐗᓄᑯᐸᓀ, ᑖᓐᑌ ᑫ ᐃᑕᑾᑭᐸᓐ ᒥᔭᐤ? 20 ᒫᑲ ᒥᒉᑎᓋ ᐸᔅᑫᓯᐎᓇ, ᐯᔭᑾᓐ ᒫᑲ ᐱᑯ ᒥᔭᐤ᙮ 21 ᒥᔥᑭᔑᒃ ᓀᔥᑕ ᓇᒪᐎᓚ ᑲᑕ ᑮ ᐃᑌᒪᑲᓐ ᒥᒋᒋ, ᓇᒪᐎᓚ ᑭ ᓇᑕᐌᓕᒥᑎᓐ; ᓇᒪ ᓀᔥᑕ ᒥᔅᑎᒀᓐ ᒥᓯᑕ, ᓇᒪᐎᓚ ᑭ ᓇᑕᐌᓕᒥᑎᓇᐗᐤ᙮ 22 ᓇᒫ, ᓇᐗᒡ ᐊᐙᓯᑌ, ᐊᓂᐃ ᐸᔅᑫᓯᐎᓇ ᒥᔭᐎᒃ, ᑳ ᐃᔑᓈᑾᑭ ᐁ ᓕᓚᓯᒪᑲᑭ, ᓇᑕᐌᓕᑖᑾᓋ᙮ 23 ᓀᔥᑕ ᐊᓂᐃ ᐸᔅᑫᓯᐎᓇ ᒥᔭᐎᒃ, ᓄᑕᐤ ᑳ ᐋᐱᔅᑌᓕᑕᒪᒃ, ᐅᐅ ᓇᐗᒡ ᑭ ᑭᔅᑌᓕᑖᑯᑖᓈᓇᐤ; ᓀᔥᑕ ᐃᑕ ᐁᑳ ᐁ ᒥᓗᓈᑯᓯᔭᒃ ᐊᐙᓯᑌ ᑭ ᒥᓗᓈᑯᑖᓈᓇᐤ᙮ 24 ᐌᓴ ᐃᑕ ᐁ ᒥᓗᓈᑯᓯᔭᒃ ᓇᒪᐎᓚ ᑶᑕᒫᒪᑲᓐ: ᒫᑲ ᑭᒋᒪᓂᑐ ᑮ ᐃᔑ ᒫᒪᐎ ᐃᑕᔅᑕᐤ ᒥᔭᐤ, ᐁ ᑮ ᐃᔑ ᐸᑭᑎᓇᒃ ᐊᐙᓯᑌ ᑭᔅᑌᓕᑖᑯᓯᐎᓂᓕᐤ ᐊᓐᑕ ᐁ ᓄᑌᐸᓕᒃ: 25 ᐁᑳᐎᓚ ᑭᒋ ᐃᑕᑾᒃ ᐹᑳᓂᐃᓱᐎᓐ ᒥᔭᐎᒃ; ᒫᑲ ᐸᔅᑫᓯᐎᓇ ᑖᐱᔅᑯᒡ ᑭᒋ ᐃᔑ ᑲᓇᐌᓕᒥᑐᒪᑲᑭ᙮ 26 ᑮᔥᐱᓐ ᒫᑲ ᐯᔭᒃ ᐸᔅᑫᓯᐎᓐ ᐎᓴᑫᓕᑕᒧᒪᑲᒃ, ᒥᓯᐌ ᑯᑕᑭᔭ ᐸᔅᑫᓯᐎᓇ ᐊᓯᒋ ᐎᓴᑫᓕᑕᒧᒪᑲᓋ; ᓀᔥᑕᐱᑯ ᐯᔭᒃ ᐸᔅᑫᓯᐎᓐ ᑭᔅᑌᓕᒋᑳᑌᒃ, ᒥᓯᐌ ᑯᑕᑭᔭ ᐸᔅᑫᓯᐎᓇ ᐊᓯᒋ ᒥᓚᐙᑕᒧᒪᑲᓋ᙮ 27 ᑭᓚᐗᐤ ᒫᑲ ᐁᐗᑯ ᙭ ᐎᔭᐤ, ᓀᔥᑕ ᐯᐯᔭᒃ ᐁ ᐸᔅᑫᓯᐎᓂᐎᔦᒃ᙮ 28 ᑭᒋᒪᓂᑐ ᒫᑲ ᑮ ᐊᓓᐤ ᐋᑎᑦ ᐅᑦ ᐗᔭᒥᐋᐎᓂᒃ, ᓃᔥᑕᒻ ᐊᐸᔅᑕᓚ, ᐁ ᓂᔑᒃ ᐅᑭᔅᑭᐙᐃᑫᐗ, ᐁ ᓂᔅᑎᒃ ᐅᑭᔅᑭᓄᐊᒫᑫᐗ, ᐁᑯ ᒫᒪᑖᐎᐃᔑᒋᑫᐎᓇ, ᐁᑯ ᒥᓇᐙᒋᐃᐌᐎ ᒥᓕᐌᐎᓇ, ᓂᔓᑲᒫᑫᐎᓇ, ᑎᐯᓕᒋᑫᐎᓇ, ᐹᐱᑐᔥ ᐃᔑᑭᔗᐎᓇ᙮ 29 ᒥᓯᐌ ᓈ ᐊᐸᔅᑕᓚᒃ? ᒥᓯᐌ ᓈ ᐅᑭᔅᑭᐗᐃᑫᐗᒃ? ᒥᓯᐌ ᓈ ᐅᑭᔅᑭᓄᐊᒫᑫᐗᒃ? ᒥᓯᐌ ᓈ ᒫᒪᑖᐎᐃᔑᒋᑫᐗᒃ? 30 ᒥᓯᐌ ᓈ ᐋᔭᐗᒃ ᒥᓇᐙᒋᐃᐌᐎ ᒥᓕᐌᐎᓇ? ᒥᓯᐌ ᓈ ᐹᐱᑐᔥ ᐃᔑᑭᔗᐗᒃ? ᒥᓯᐌ ᓈ ᐃᑗᔅᑕᒫᑫᐗᒃ? 31 ᒫᑲ ᐌᐌᓕᑦ ᒧᔅᑌᓇᒧᒃ ᑳ ᒫᐗᒡ ᒥᓨᔑᑭ ᒥᓕᐌᐎᓇ: ᐁᓕᐌᒃ ᒫᑲ ᑭ ᐋᐸᑎᓕᑎᓇᐗᐤ ᐊᐙᓯᑌ ᒥᓗ ᐃᔑᑣᐎᓐ᙮ |
The text of the Bible in Moose Cree is in the public domain.
Moose Cree New Testament © Canadian Bible Society, 1991.
Canadian Bible Society