Marku 9 - Matu Chin New Testament 2006

¹ Tecoengah Jesuh lawng awl a thui pe koep tih, “Ataktang kavan thui u, he kah aka awm thlaang khatsut hue he Pathen Ram huham tharana oen a law te a huh u thlantoe duek u manawh,” a tina.

Jesuh Mueime Thawlengna

² Hinruk a awm coengah Jesuh lawng Piter, Jeem oen Johan mi te a ceh puei, tlaangsawm la a luui puei tih te ah te amami bueng awm u. Ahimi kah mik huh ah Jesuh kah a mueime te thawleng u,

³ a himbai te abawkla aang rawngtheng tih tetih aihla abawk ham tah dilai dawngkah a-u lawngkhaw suk thai manawh.

⁴ Tecoengah Elijah, Mosi oen Jesuh mi awl a thui u te a hubang hue lawng a huh.

⁵ Piter lawng Jesuh nala, “Saya, he ah mami ng'awm u he theen tangkiik! Riim-im pathum ah ka sa u silang tah pakhat te nang ham seh, pakhat te Mosi ham seh, akhat te tah Elijah ham seh,” a tina u.

⁶ Ahih oen atloe rawi lawngah a rih tangkiik u tih thui ham koei khaw ahih lawng ming sut nawh.

⁷ Tecoengah muui yaal tih ahimi te a thiing khoep. Muui dawng kalawng ah, “He tah ka thintlawhna Ka Capa ni, a awl hutung pe uh!” tila awl kam at va law.

⁸ Ahimi lawng a teng avai ah a bueh u de a-u khat khaw hu u nawh tih Jesuh bueng te ahimi tengah awm.

⁹ Tlaangsawm kalawng a rum thuk u vengah Jesuh lawng ahimi nala te, “Thlaanghing Capa he duekna kalawng a thawh koep thlantoe na huh u thaihu he a-u tengah khaw thui u boel,” tila awl a uen.

¹⁰ Ahimi lawng te awl uen te a vai u, tede amami oen amami mai te, “Duekna kalawng thawhkoepna ti he n'tu kai?” tila he kawng he a thui khiing u.

¹¹ Tecoengah ahimi lawng Jesuh te, “N'tu ah Phungawl cangpueikung thli lawng ‘Elijah he lamhala law ai’ a ti u kai?” tila a doet u.

¹² Jesuh lawng, “Soeprep boeih he roekbah oepsoeh hamla Elijah tah law tangtang ai. Te tih atah n'tu ah Caciim lawngah Thlaanghing Capa lawng patang a khang vetih ahih te a hoett u ai tila a thui kai?

¹³ Tede kavan thui u, Elijah tah law poen tih Caciim lawng ahih kawng te a thui angla thlaang thli lawng amami ngaih la a sawah a sai u poen,” a tina.

Raaithe aka Khueh Tawngpaca A Hoeih Sak

¹⁴ Ahimi lawng atloe a hubang hue tengah a pha vengah thlaangping lawng te thli te a veel khoep u tih Phungawl cangpueikung thli khatsut oen a hubang hue a oelh u te a huh.

¹⁵ Thlaangping lawng Jesuh te a huh u vengah a kawpoek rai tangkiik, a tengla cet u tih a voemtoei u.

¹⁶ Jesuh lawng a hubang hue te, “Nangmi he ahimi oen ah n'tu kawng na oelh u khiing te?” tila a doet.

¹⁷ Thlaangping tim kah thlaang pakhat lawng, “Saya, ka capa raaithe lawng a tuuk tih awl khaw a cal thai nawh dawngah nang tengla kavan law puei.

¹⁸ Raaithe lawng a tuuk vengah dilai dawngah tlim kut tih a kaa dawng kalawng a tilhawm thoeng, a naw te a tah tih a pum boeih keuhkhang la awm. Na hubang hue tengah raaithe hek hamla reenna ka bih de hek u thai nawh.

¹⁹ Jesuh lawng ahimi nala te, “Nangmi oengna aka khueh nawh thlaang hue! Nangmi he metuek toe kan awm puei ai? Nangmi he meyoeh toe nuem kan reen u lah ai? Camaw te ka tengla van law puei uh,” a tina.

²⁰ Ahimi lawngah camaw te Jesuh tengla avan law puei u. Raaithe lawng Jesuh te a huh pahoei vengah camaw te rap rap a doek, dilai dawngah tlim tih savaih, a kaa dawngah tilhawm a peem.

²¹ Jesuh lawng, “Meveng kalawng he tila a awm?” tila ana pa te a doet. Ana pa lawng, “A camoe veng kalawng awm poen.

²² Raaithe lawng camaw he ngawn hamla a teeng tih hai dawngkhaw, tui khuiah khaw a tulh poepa. Na sai thai koeila a awm atah n'reen langtah m'bawm lah,” a tina.

²³ Jesuh lawngah, “Na sai thai koei la a awm atah na ti aw!, Oeih! Oengna aka khueh thlaang ham tah soeprep boeih he coengg thai ta,” a tina.

²⁴ Tevengah camaw kah ana pa lawng, “Oengna ka khueh ta, tede khoek nawh, m'bawm lah!” tila angaih hlang la paang.

²⁵ Jesuh lawng thlaangping amah tengla voeh ava yoeii phai te a huh vengah raaithe nala, “Awlmueh oen haapang raaithe nang awl kan peek, Camaw kaw khui kalawng co langtah mevengah khaw kuun koep tlaih boel!” a tina.

²⁶ Raaithe te angaihhlangla paang tih Camaw te langlang a thuen sak tih co. Camaw te duek rawkk angla awm tih thlaang boeih lawngah, “Duek poen” ti u.

²⁷ Tede Jesuh lawng camaw te a kut ah a phoeih tih a thawh vengah ahih te pai hang.

²⁸ Jesuh te im khuila a kuun coeng atah a hubang hue lawng ahuepla, “N'tu kawngah kaimi lawngtah raaithe ka hek thai u nawh kai?” tila a doet u.

²⁹ Jesuh lawngah, “Thangthuina bueng oen ni he ang he hek thaina a awm, atloe hek thaina tah awm nawh!” a tina.

Jesuh Lawng A Duekna kawng A Thui Koep

³⁰ Jesuh oen a hubang hue tah te huen kalawng tho u tih Galili peng kalawng poe cet u. Jesuh lawng a hubang hue te a cang puei hun dawngah amah a awmna te a-u khaw ming sak hamla ngaih nawh,

³¹ A cangpueina tah, “Thlaanghing Capa he thlaang kut ah a peek u vetih a ngawn u ai. Tede hin thum coengah tho koep ai,” a tina.

³² Tede ahih kah cangpueina te a hubang hue lawng a thuingaihna yaakming u nawh. Ahih te doetdap ham khaw birih u.

A-u Bawilen koek

³³ Ahimi tah Kapernaum khaaw te a pha u tih im khuila a kuun u coengah Jesuh lawng a hubang hue te, “Lawngpueng ah n'tu kawng na oelh u khiing te?” tila a doet.

³⁴ Tede ahimi lawng, mami tim ah a-u nuem bawilen koek tila lawngpueng ah a oelh u khiing dawngah ahih kah awl doet te thung pe u nawh.

³⁵ Jesuh lawng ngawl tih a hubang paha thlaihih te a khue tih ahimi nala, “A-u khaw asangkoek la awm ham aka ngaih tah nangmi boeih lak ah aheem koek oen tuihyoeihthlaang la awm seh,” a tina.

³⁶ Tecoengah camaw pakhat te a khue tih ahimi haiah a pai sak. Camaw te a lengawi tih ahimi nala te,

³⁷ “A-u khaw he ang camaw thli he ka miing oen pakhat khaw aka do tah kai aka do ni; a-u khaw kai aka do tah kai bueng he n'do nawh tih kai tuihkung te khaw a do,” a tina.

Mami aka Oelhtaih nawh Tah Mami Be nah aka Awm Ni

³⁸ Johan lawng, “Saya, Nang kah miing oen raaithe aka hek thlaang pakhat ka huh u tih mami tim kah thlaang nawh dawngah sai tlaih nawh ham ka khang pe u,” a tina.

³⁹ Jesuh lawng ahimi nala te, “Khang pe u boel! ka miing oen kawpoekrai-miknoek aka sai thlaang lawngah kai he athela aka thui pahoei a-u khaw awm nawh.

⁴⁰ A-u khaw mami aka oelhtaih nawh tah mami ben ah aka awm ni.

⁴¹ Atak tang kavan thui u: Kai kah thlaang la na awm u dawngah nangmi te tuiding boengloeng khui at khaw aka tuul tah kutdo a dang ngaikhoek ai,” a tina.

Suekna

⁴² “A-u khaw he ang camaw thli timkah pakhat mai te khaw, kai a oengna te phelh sak ham aka suek tah caang neetna sum lungto te a rawn ah a awi tih tuiliidung ah sungpung kawinih ahih ham theen bet ai.

⁴³ Tedawngah na kut lawng na oengna te a phelh sak atah tloek poet hawn! Na kut pahih oen aka duek tlaih nawh hell hai khuiah na tlaak lak atah na kut pakhat bueng oen hingna khuiah na kuun te theen ngai.

⁴⁴ Te huen atah ahimi aka ca ami te khaw duek tlaih nawh tih ahimi aka ung sak hai te khaw duek tlaih nawh.

⁴⁵ Na khow lawng na oengna te a phelh sak atah na khaw te tloek poet hawn! Na khow pahih oen hell khuiah na tlaak lak atah na khow pakhat bueng oen hingna khuiah na kuun te theen ngaai.

⁴⁶ Te huen atah ahimi aka ca ami te khaw duek tlaih nawh tih ahimi aka ung sak hai te khaw duek tlaih nawh.

⁴⁷ Na mik lawng na oengna te a phelh sak atah na mik te koeih pak hawn! Mik pahih oen hell khuiah ne tlaak lak atah mik pakhat bueng oen Pathen Ram ah na kuun te theen ngaai.

⁴⁸ Te huen atah ahimi aka ca ami khaw duek tlaih nawh tih ahimi aka ung sak hai khaw duek tlaih nawh.

⁴⁹ Luciik sa boeih te lungkeh oen aciim sak boeih angla thlaang boeih he hai oen aciim sak van ai.

⁵⁰ Lungkeh tah theen; tede a aalna te a moelh atah metila na aal sak koep thai ai? Nangmi lawng paya laikoeina lungkeh te khueh u langtah pakhat oen khat roeproeicala awm uh” a tina.